Kolose 2:2 - ALLAH ANE WENW KET MEKE WAROGO WOKNINAKHIKHE WENE

² Hit hinetaiken ago warek dogolik, hit-hit hinom hunik nakmu-hakmurogon dogobageik iluk itithogon hagakhe lagei o. Hit itithogon dogolik he, “Wene iti eberogonat,” iluk, hutdiluk nen, wene munini hinakla ebekhidek motok 'bogokhogon dogolik, wene Allah akla limago welageikhe wene iti hutukhogon hinilu asugun o. Wene iti, Kristus ebeat o.

Kolose 2:2 ပူးပေါင်းရင်းမြစ်များ

Matius 11:25

Itithogon yogeisasikhesik, o itinem, at Yesus nen Allah ebe yogokhe dogolik, “Allah nopase! Pogot agat iteerek harat o! Wene tha'bokhogonat iti, it akhuni inakla kagalek meke men, yi wene ti wene inilu meke men, inilu asunogo iluk lima'iluk nen, it inobabut yekerugi ket itago meke hakene anek, pakhogon yogeisegen iti hakla warlok apegetik nenat yogeisegen iti nen heagei wathakhe lagei, nopase,” iluk yogokhikhe.

Matius 11:27

Itithogon yogokhikhesik, it akhuni emenogo men yogeisasikhe, “An nopase nen yi meke ti meke tha'bokhogonat iteerek dogoagaluk woknikhikhe. Nen, an Allah a'but yi, akhuni tha'bokhogonat motok inokodek mekeat he, nopase Allah arligat anek ilu welagarek. Iti hagat, an nopase Allah iti akhuni tha'bokhogonat motok inokodek mekeat he, a'but an narligat anek nilu welagarek o. Nen, Allah a'but an nenat nakla apalok nen nopase ebe akhuni aperek inilu asuagaluk pakhogon yogeisegerek meke itiat inilu ageikharek.

Matius 13:11

at Yesus nen, “Nopase pogot oba apma 'bisekherek wene iti, at akla limago welageikhe meke, hit anek hinilu asubageik nen iluk, akla pakhogon yokhisausak apasikhe mekeat he, it akhuni aperek iti anek pakhogon yogeisausak dek akla nen apasikhe.

Lukas 1:1

Teofilus noe. Wene nit ninakerlekla nen hagatlageikhe etnogo, it wene ebe erlo baga nen hagatlarik wagunem inileken hasukhasik yakulisilik nekhe lagoukha meke nen yoknisasukha mothogon, it akhuni aperek inebe motok doalegat wene ebe holal waganuogoluk walhilik wagoukha.

Yohanes 10:30

Nopase nipisak ninebe opakiat o,” iluk yogeisekhe lageikhemo,

Yohanes 10:38

Meke re, an nen hagakhe korlegat, hit eberogonat iluk hinetaiken an noba hakotdusak hina'it iti o. Itithogon hagakhethep iti an nen nopase nipisak hunik, nen, at nen an nipisak hunik, welagorek iti, hinilu atluk nen eberogonat iluk hutdubageik nen, an hagakhe lagei meke iti eberogonat iluk hutdini o!” iluk yogeisekhe lageikhemo,

Yohanes 16:15

Yi meke ti meke nopase meke tha'bokhogonat, an meke iti nen he, Allah Agoreke iti an nane hologo waganiluk, hit yakulhisekhe dogogin iluk yokhisigi iti o,” iluk yogeisasikhe.

Yohanes 17:3

It akhuni nen, Allah hogorasusak ebe meke arlik-arlegat motok welagarek, iluk, hebe inilu ageik, nen an Yesus Kristus la'ani agaginmo wagagi meke yi nebe inilu ageik, hagariogei iti re, iniluk motok welageikharek erlo itiat o.

Yohanes 5:17

Itithogon hagakhukha mekeat he, at Yesus nen wene men yogeisasikhe, “An nopase iki ageikhe thogotdigidek, o yogotak yi inomat hagarinakho motok welagarek iti hak, an itithogonat hagarinakho welagei o,” iluk yogeisasikhemo,

Yohanes 6:69

Nit nen, ninoe hat Allah ekaerek hasik meldageiluk, eberogonat at nen la'agei ageikhemo ilu, hutdagagosik ninetaiken hat hoba hakotdiluk welago,” iluk itithogon yogokhikhemo,

La'isasikhe 4:32

It wene eberogonat iluk waganhukha meke iti, inebe doalegat meke re, inetaiken opakiat welagoukha. Dogolik, inameke yi meke ti meke tha'bokhogonat, “Yi an meke,” iluk igidegat he, “Ninebe tha'bokhogonat ninameke,” iluk ekhe lagoukha.

Roma 15:13

“Yabokane hano asigin,” iluk ninakla arleken akhogorek iti, erlo at Allah nenat hagatninakherek. Hit itithogon hinakla arleken kokhogon akhekhe dogoagaluk Allah Agoreke obatne baga hagathinabuak. Itithogon hagathinabuak nen, hinetaiken at oba hakotdisigip iti baga hakotdiluk werekma, at nen hinakla arleken motok akhekhe dogoagaluk hagathinakhik, hinetaikek hapugutdinagagik, hagasuak o.

Roma 16:25

Allah hogorakhe dogouok o! An nen hano wene Yesus Kristus hagakhikhe wene yokhisasigi hak, at Allah obatneak etnogo nen hinetaiken horlethinakhe dogosak erlok o. Wene Allah akla wene iti, muk haganeat nen limago welageikhe meke re, yogotak Allah nen thelekmatdisikhemo werek o.

Roma 2:4

“At Allah obabut hano motok, enago,” iluk, hinakla meanetdekhe lagap a? Hit hinakla nen, “Allah obabut hano nen nit weak hagakhe lago meke here'isalok ninobabut hebelasuagaluk, ninakla kagalherek,” iluk hinokodek a? Hiniluat o.

1 Korintus 14:31

Iti hagat hinebe tha'bokhogonat nen wene yakulogo hinilu ageik, hinetaiken kagouk igik, hagasuogoluk hinebe tha'bokhogonat opakitek opakitek eran-alep Allah ane pakhogon yogeisekhe dogosak o.

1 Korintus 2:12

Nit he, akhuni agat oba meke yoma inagoreke waganhugu 'buk. At Allah obabut hano nen woknisasikhe meke ninilu asuagaluk, at Agoreke usa'i ageikhemo horlasugu o.

Galatia 3:28

Waganiluk, yabokane hit tha'bokhogonat, Kristus Yesus hinom hunik dogolik hinebe opakiat meke welagap iti nen, hit ebetlake Yahudi meke, ebetlake akhuni itikmanke igik, ebetlake inatuan meke, ebetlake inasokne meke igik, ebetlake humi, ebetlake ap igik, ekhe dogosak dek.

Efesus 1:7

Itithogon woknisasikhemo, ebe amep ulabogo wakhukha iti baga, ninoko palogo tilninakhik, nit weak hagakhe lagagu meke degetdisigik, hagakhikhe iti o. At Allah akla kagalek dogolik ninebe hutdinanhikhesik, obabut motok hano etnogo nen, ninebe kokhogon akmutninakhikhe iti o.

Efesus 3:16

At Allah yi meke ti meke ilmo motok horleak iluk u hak, hogorakho welageikharek etnogo nen, Agoreke oba hinobatnerogon hinetaiken horlethinabuagaluk ayoko 'bekhe lageiat o.

Efesus 3:3

Wene at Allah akla limago welageikhe meke iti, an pakhogon yakulnikhikhe, iluk, holal 'beroat waganogo yakulhisasigi apigi o.

Efesus 6:22

Nit ya dogolik hagakhe lago meke hinilu atluk nen, hinetaiken thebelogo dogobageik iluk hinoba la'i agei iti o.

Filipi 2:1

Nit Kristus ninom hunik dogolik, at nen ninetaiken ago watdinanhik, ninebe akmurogon ninetaiken thebelhik, Agoreke ninom hunik dogolik, yomaknisigik, hagakhe korlek nit-nit hanorogon nakmu-hakmurogon hagakhorek iti nen,

Filipi 3:8

Itithogon hutdekhe lagei iti anek 'buk. Noe Etagapogot Yesus Kristus nilu agagi iti hano motogat o. Yi meke ti meke ninat meke hagakhe lagagi iti, weat alomarogo hagakhe lagagimo iluk, hutdekhe lageiat o. At ebe horlalok nen, nipisak hunik motok dogouogoluk, yabu aleke karelogo ulakharek hak, yi meke ti meke alep hagakhe lagagi meke iti, “Weat meke,” iluk here'isasigi iti o. Wene Allah nen ninasuk wakhikhe wene iti baga, nekaerek nen mot hagakhe lagei 'buk. It akhuni aperek inetaiken Kristus oba hakotdisinem, wene inoba meke korogo wokhalok yabokane Allah inom hunogo 'bisekherek hak, an itithogonat netaiken at oba hakotdisigimo, wene noba welageikhe meke korogo wokhasikhe iti o.

Kolose 1:26

Wene iti, o muk haganeat erloma nen yi tahun ti tahun hagatlaga dogolik, akhuni itaklarik waga korlek, Allah nen akhuni yogeisigidek inilomasirogon at akla limago welageikhe. Meke re, yogotak nit at a'buri meke halok, thelekma pakhogon yoknisasikhe iti o.

Kolose 1:27

At Allah akla nen he, it akhuni itikmanke meke tha'bokhogonat hano motok hagarinabigin wene iti kokhogon hogorasusak mekeat apasikhesik nen akla limago welageikhe meke, at a'buri halok thelekma pakhogon yogeisagaluk isikhe. Wene iti ebe re, Kristus hit hinakla werek halok, yabokane hanothinakhunem, hogothinabugun itiat o.

Kolose 1:9

Hinabok itithogon isinem ninasuk holhosik, nit nen hit hinobasik sembayan igik, Allah ayoko 'bigik, thogotdigidek isi motogat welago. Itithogon isinem Allah Agoreke nen hinakla kagalhunem, hinakla motok kagalogo wene hutdiluk nen, at Allah akla warlok apekherek meke iti hit nen, hutukhogon hinilurogon dogobageik iluk ayoko 'bekhe lagoat o.

Kolose 2:19

Ninebe yi ninukuloak inom hunik werekma, niniki ninisok ekarlim ninomaken oba hunogo 'binanhikhemo, ninapiri nasinem apusu ninoak elolake lagunem, ninebe kok agorek hak, nit Allah a'buri Kristus ninom hunik werekma, at Allah nenat, kogotninakherek iti. Meke re, it iti itithogon ninoe kok Kristus inom hunik welagoukhasik nenat, yabokane kobologo la'isasukha iti nen, inane holhup o.

Kolose 3:14

Itithogon hagakhe dogolik, ebe kok hakene re, akhuni inebe hinakmurogon dogono. Inakmurogon welageikharek meke iti baga, hinebe opakiat motok dapukhogon dogou hagat dogogun iti.

Kolose 4:3

Sembayan ekhe dogolik, nit ninobasik, men ekhe dogono, “Allah ninopase. Wene Kristus nen hagakhikhe wene, alep hakla limago welageikhe meke etnogo, it Paulus lak nen yogeisilik nekhe dogoagaluk, thu hualisano,” iluk, sembayan nit ninobasik ekhe dogono. Wene iti hasigat niki herle warogo 'banhama yoma welagei.

Kolose 4:8

Hit nen, “It inebe itithogon werek higi,” luk, wene hinilu atluk nen, hinetaiken hapuk uagaluk, iti hasigat hinoba la'isigin iti.

1 Tesalonika 1:5

Nit hano wene wolok yokhisa agagu etnogo, ninane baga anek yokhisekhe lagagu 'buk. Allah Agoreke etnogo ninakla dogolik, obatnerogo yomaknisekho korlek, ninakla nen, “Wene yi eberogonat,” iluk ninetaikenma hutdisugusik nenat yokhisekhe lagagu iti o. Nit o etoma ninom dogolik, hit hinobasigat hagakhe lagagu etnogo hit hiniluat o.

1 Tesalonika 3:2

Werek korlek, at ninagot Timotius, hano wene Kristus hagakhikhe wene etnogo ninomat, Allah hasik yogeisilik nekhe lago meke etnogo, akhuni nen yi aik ti aik hagathinabiogei iti nen, hit hinetaiken Kristus oba hakotdisigip meke aborlok unogo iluk, hinetaiken ago wathinakhik, hinasuk wakhik, hagakhe dogoagaluk hinoba la'i ago iti o. Yi aik ti aik hagatninabiogei iti, Allah nen nit ninobasik akla apekhe dogolik, “Itithogon hagathinakhe dogogun,” iluk isikhe hagat hagathinabiogei iti, hiniluat o.

1 Tesalonika 5:14

Nagarlak lak nerugi. Hit nen he, it aperek yabu waganu'buk iniki waganu weak meke iti inasuk wakhik, inayuk weak meke iti inakla kagalhik, inobatne dek meke iti yomageisigik, hagakhe dogolik, akhuni tha'bokhogonat inobasik erogat hagakhe dogono.

1 Timotius 3:16

Wene iti, nit Allah apma dogolik eberogonat iluk apogorek wene limago welageikhe meke Allah nenat thelekmatdisikhemo, “Wene iti kok,” iluk pakhogon ekhe lago. Wene iti re, At Kristus ebe akhuniat winam ageikhe o. At Allah Agoreke nen, “At Kristus iti eberogonat,” iluk thelekmatdisikhe o. It malaikat Allah nen yoko usa'isa agarek meke inileken hasukhaat o. Agarumi nen at hagakhe lageikhe wene etnogo yi akhuni ti akhuni itikmanke meke yogeisilik lagoukha o. Akhuni o yi ai ti ai agat oba meke aperek doalegat nen, “At ebe eberogonat,” iluk inetaiken at oba hakotdisukha o. Allah nen pogot oba hogorakho motok welageikharekma lia'isikhemo welagarek o. Wene iti re, at Allah nenat thelekmatdisikhemo pakhogon ekhe lago o.

Ibrani 10:22

At ebe etoma werekma, nit ninakla nen, “Nit weak hagakho,” iluk ninakla wene munini ebekhorek meke hano hotninakhik, ninoado baga i elokhoken hano meke baga thobalninakhik, hagakhikhe iti nen, ninetaiken opakiat at oba hakotdiluk ninayuk dekhogon, at oba horokhogon ukekhe dogouok o.

Ibrani 6:11

Nagarlak lak nerugi. Nit ninakla warlok he, hit hinakla nen, “Allah nen nit hanotninabigin,” iluk hinakla arleken akhekhe lagap meke itiat akhekhe dogoluk, hurli ilugun oba iteerek asubageik nen, hagakhe lagap iti hagat, hinebe tomok hinobatnerogon hagakho motok dogosak warlok apekhe lago o.

2 Petrus 1:10

Iti nen, nagarlak lak nerugi. Hinebe Allah nen wenakhinakhikhesik hinayoko 'bisikhe iti, eberogonat hagatlasuagaluk, hit nen hinobatnerogo hagakhe dogono. Itithogon hagakhe dogogun halok, hinetaiken Allah baga hakotdiluk welagap meke here'isalok dukhugun dek o.

2 Petrus 1:3

At Allah ikhok motogat dogolik, yi meke ti meke elalinat hagakhunem hogorakho motok welageikharek meke etnogo nen ninayoko 'bisikhe iti. Halok he, nit nen at ebe thekekhogon ninilu atluk, nit ninebe niniluk dogolik, at hasik mothogon hagakhe dogoagaluk, at ekaerek obatne baga yi meke ti meke woknisasikhemo ite agosik welago.

2 Petrus 3:18

Ninoe Etagapogot tilninakherek meke obabut hano etnogo nen woknisekherek meke iti waganhik, ebe hinilu ageik, hagakhe dogolik, hinetaiken horle atluk dogono. Yogotak ya men, yabokane men, at Yesus Kristus arligat hogorakho motok dogouok o, iluk, “Amin,” igi iti.

1 Yohanes 3:19

Nit nen ninobabut itithogon hagakhe dogolik, ninakla nen he, “Nit ninebe Allah eberogonat meke a'buri welago,” iluk hutdusak. Itithogon hutdekhe dogolik, nit weak hagakho, iluk ninakla akin welago halok, nit ninebe erlok dek meke re, at Allah anek he, ebe kok dogolik, yi wene ti wene tha'bokhogonat ilu anek welagarek, iluk, at ilhanem ninakla the ninayuk dekhogonat dogosak o.

1 Yohanes 5:7

Yesus iti Kristus at o, iluk, akhuni inebe 3 nen inane opakiat meke pakhogon u hakene, Allah Agoreke nen igik, Yesus ebe ima usakhukha iti baga igi, amep ulabogo wakhukha iti baga igik, thelekma ageikhe iti o.