Kolose 2:19 - ALLAH ANE WENW KET MEKE WAROGO WOKNINAKHIKHE WENE

¹⁹ Ninebe yi ninukuloak inom hunik werekma, niniki ninisok ekarlim ninomaken oba hunogo 'binanhikhemo, ninapiri nasinem apusu ninoak elolake lagunem, ninebe kok agorek hak, nit Allah a'buri Kristus ninom hunik werekma, at Allah nenat, kogotninakherek iti. Meke re, it iti itithogon ninoe kok Kristus inom hunik welagoukhasik nenat, yabokane kobologo la'isasukha iti nen, inane holhup o.

Kolose 2:19 ပူးပေါင်းရင်းမြစ်များ

Lukas 5:38

Halok he, anggur eken apusu ket meke halok he, isoak ket mekeat akla henasusak o.

Yohanes 17:21

Nopase. An nen kino yokhekhe lagei yi, men iluk. An nen nopase hat nipisak hunik, nen, nopase hat nen an nipisak hunik, welagorek iti hak, it itithogonat inebe tha'bokhogonat opakiat dogoagaluk kino yokhekhe lagei o. Itithogon werekma, it akhuni agat oba meke nen, ekhe dogolik, At he, opase nenat la'i ageikhe iti eberogonat, iluk hutduagaluk, it inebe nit ninom hunigat dogouok o.

La'isasikhe 4:32

It wene eberogonat iluk waganhukha meke iti, inebe doalegat meke re, inetaiken opakiat welagoukha. Dogolik, inameke yi meke ti meke tha'bokhogonat, “Yi an meke,” iluk igidegat he, “Ninebe tha'bokhogonat ninameke,” iluk ekhe lagoukha.

Roma 11:17

O zaitun erlo hano meke werekma, ikilo'bak aperek palogo la'isalok nen, obolukmo o zaitun okama meke ikilo'bak palogo hunisisumo, erlo hunik dogolik apusu werek dogou hakene, hit iti, hinebe itikmanke meke Allah nen it Yahudi meke emenogo inoba hunogo 'binageikhemo hano welagap o.

1 Korintus 1:10

Itithogon mekeat he, nagarlak nerugi. Ninoe Etagapogot Yesus Kristus etaga baga, wene ageikhe hinasuk wasik. Hit tha'bokhogonat hinebe mikikhidek hinom hunik dogolik nen, hinane opakiat meke igik, hinetaiken opakiat welageik, hinakla nen wene opakiat meke ebekhik, hagakhe dogono.

1 Korintus 11:3

Itithogon mekeat he, wene opakiat agekhe yi hinilu asusak meke apekhe lagei. Nit ap ninebe tomok, ninoe Etagapogot Kristus metek werekma apma dogosak. Nen, humi inebe tomok inaguni kok metek werekma inapma dogosak. At Kristus iti opase kok Allah metek werekma apma welagarek o.

1 Korintus 3:6

Wene iti, hipiri ai yakharek hak, an nen yakhigi. Nen, at Apolos nen, i tialik lageikhe. Nen, ebe, at Allah nenat kogotdisikhe.

Efesus 1:22

Allah nen yi meke ti meke pogot oba agat oba welagarek meke tha'bokhogonat waganogo at Kristus arligat apma 'bisalok Allah a'buri natogokhe lago meke yi meke ti meke hasik kok he, Kristus at woknisasikhe iti.

Efesus 1:23

Nit Allah a'buri ninebe at Kristus ebeat o. Nen, yi meke ti meke, pogot oba agat oba welagarek meke tha'bokhogonat akla Kristus ebe kerlekhogonat dogolik, nit Allah a'buri at ebe hakene werekma, ninakla kerlekhogonat welagarek iti o.

Efesus 2:21

Nit tha'bokhogonat ninebe tomok, at Yesus ninom hunogo 'binaniluk nen, o thep hun-hun halharek hak, o iti abisakeat ninopase Allah ekaerek hasik ai halogo 'binaniogo iti o.

Efesus 4:3

Allah Agoreke nen ninebe opakiat meke hunogo 'binanhemo dogolik, inebe hano dapukhogon welageikharek iti meke kogotdekhe dogono o.

Efesus 5:29

Akhuni aperek nen inekaerek inebe ina'it aperek welageikharek nogo a? Dek o. Ninekaerek ninapiri hano meke nikik, ninebe aleligik, hagakhorek hak, at Kristus nen, “Allah a'buri an nekaerek nebe meke niki nisok hakene,” iluk itithogon alelogo haknisik welagarek.

Filipi 1:27

Wene hano wene Kristus nen hagakhikhe wene etnogo baga, “Yigithogon hagakhe dogono, tigithogon hagakhe dogono,” iluk yokhisegarek mekeat hagakhe dogono. Itithogon hagakhe dogolik, hinebe opakiat dapukhogon hagakhe dogoumo, it akhuni aperek nen hinabok ekhe dogolik, “It inobabut hano wene yogeisugunem holiogei tak-tagat inetaiken Allah oba hakotdiluk obatnerogon metek werek o,” iluk, an nebe walegat werekma yoknisugun a? Hinoba witluk nileken hisagein a. Wene hano wene yokhisogorek hak, hinetaiken opakiat hinom dapukhogon dogolik, wim yakhe dogolik obatnerogon yakharek hak, wene iti hasik hinobatnerogon hagakhe dogono.

Kolose 1:10

Itithogon hinilu atluk nen, ninoe Etagapogot akla hanorogo, at warlok apekherek meke mothogon anek hagakhe dogosagat. Yi meke ti meke ai yakhunem erlo kok atluk nen eken hano ikherek hak, hit Allah obabut hinilu aga dogolik, yi meke ti meke hano meke hagakhe dogosak iti.

Kolose 1:18

Nit Allah a'buri ninoe kok at Kristus dogolik, ninebe ninilugutninakherek iti nen, at ebe iki isok negen welagorek. Yi meke ti meke yoarlemake negen werek korlek, at Allah nen, “Kok he, an na'but makusa mekeat dogoak,” iluk, at ebe watlageikhesikmo nen, ilugutdisikhe iti.

Kolose 2:2

Hit hinetaiken ago warek dogolik, hit-hit hinom hunik nakmu-hakmurogon dogobageik iluk itithogon hagakhe lagei o. Hit itithogon dogolik he, “Wene iti eberogonat,” iluk, hutdiluk nen, wene munini hinakla ebekhidek motok 'bogokhogon dogolik, wene Allah akla limago welageikhe wene iti hutukhogon hinilu asugun o. Wene iti, Kristus ebeat o.

1 Tesalonika 3:12

Nit nen hit hinebe ninakmurogon welago hak, hit nen itithogonat hit-hit hinakmurogon hagakhik, akhuni tha'bokhogonat hinakmurinakhik, kokhogonat hinakmurinakhe dogobageik nen, ninoe Etagapogot nen hinobabut inakmurinakharek iti meke oba dukhogon ageikhe inombat wokhisekhe dogoak.

1 Tesalonika 4:10

Hit hinagarlak lak hinerugi o Makedonia etoma meke tha'bokhogonat itithogon hinakmurinakhe lagap mekeat he, nagarlak lak nerugi o. Yabokane kokhogonat hinakmurinakhe dogobageik iluk, hinasuk warogo yokhisigi iti o.

2 Tesalonika 1:3

Nagarlak lak nerugi. Hit hinetaiken Kristus oba hakotdiluk welagathep meke iti, ageikhe inom kokhogon hakotdigik, hit-hit hinebe dopok nakmu-hakmurogon hagakhethep meke iti, ageikhe inom kokhogonat hinakmurinakhik, hagakhe lagap iti nen, nit nen hit hinobasik Allah hogorasusak mekeat hogorakho motok welago.

1 Petrus 3:8

Wene iti ilukun warogo men yokhisak. Hit hinebe tha'bokhogonat hinakla nen, “Ninebe Allah a'buri ninagarlak lak ninerugi ninom,” iluk, hinetaiken hunik dogolik, hinakla opakiat meke apigik, hinetaiken opakiat meke ebekhik, hagakhe dogono.Itithogon hagakhe dogolik, hinekaerek nen hogorakhigidek, hinetaiken thebekhogon dogolik, hit-hit nakmu-hakmurogo hagakhe dogono.

2 Petrus 3:18

Ninoe Etagapogot tilninakherek meke obabut hano etnogo nen woknisekherek meke iti waganhik, ebe hinilu ageik, hagakhe dogolik, hinetaiken horle atluk dogono. Yogotak ya men, yabokane men, at Yesus Kristus arligat hogorakho motok dogouok o, iluk, “Amin,” igi iti.