Kolose 1:10 - ALLAH ANE WENW KET MEKE WAROGO WOKNINAKHIKHE WENE

¹⁰ Itithogon hinilu atluk nen, ninoe Etagapogot akla hanorogo, at warlok apekherek meke mothogon anek hagakhe dogosagat. Yi meke ti meke ai yakhunem erlo kok atluk nen eken hano ikherek hak, hit Allah obabut hinilu aga dogolik, yi meke ti meke hano meke hagakhe dogosak iti.

Kolose 1:10 ပူးပေါင်းရင်းမြစ်များ

Yohanes 15:16

Hit nen an wenaknakhigip 'buk. Dek o. An nen hit wenakhinakhigi iti, o eken ikherek iti hak, motok dogogin meke hagasi lobageik nen iluk, hinebe wenakhinakhigisik meldinagagi. Iti baga, nena meke, hit warlok meke an netaga palogo nopase kino yogosugun halok he, at nen wokhisageinat o.

Yohanes 15:8

Hit hineken doalegat isu hak hano meke kokhogon hagasugun halok, akhuni nen an nopase hogorasugun o. Hit hinebe ebe nagarumi nane waganhe lagap meke dogolik, itithogonat hagakhe dogogun o,” iluk yogeisasikhe.

Yohanes 17:3

It akhuni nen, Allah hogorasusak ebe meke arlik-arlegat motok welagarek, iluk, hebe inilu ageik, nen an Yesus Kristus la'ani agaginmo wagagi meke yi nebe inilu ageik, hagariogei iti re, iniluk motok welageikharek erlo itiat o.

Roma 1:13

Nagarlak lak nerugi. An nen, akhuni itikmanke meke aperek o yi ai ti ai eloma wene yogeisekhe lagagimo waganhukha hak, hit meneke, itithogonat waganubageik iluk niki doalegat oba hinoba wisigiluk apekhe lagei mekeat he, nagolak palek nen huk aga lagei iti hinilu asubageik nen iluk yokhisigi o.

Roma 4:12

Ninopa Abraham iti oado aperlagap meke itithogon palek dek dogolik, etaiken Allah oba hakotdisikhe hak, nit ninoado meke itithogon anek palek halok, Abraham ninopa usak erlok dek o. At he, Abraham obabut waganogo ninetaiken itithogon Allah oba hakotdogo meke halok, Abraham ninopa usagat o.

Roma 6:4

Ima usa'inanhe dogolik, at ebe warek thalhukha hak, nit at ninom hunigat werekma warogo 'binanhukha. Nen, at Kristus watlageikhesikmo nen, opase obatneak hogorakharek meke etnogo nen ilugutdisikhe hak, nit yogotak ninilugutninakhikhemo ninobabut ket ninat hagakhe dogouok o.

2 Korintus 2:14

Itithogon mekeat he, at Kristus obatne ageikhesik elokhe waganhe korlek nukhunem, nit at ninom hunik meke Allah nen Kristus oporlik woknisik nekherek, iluk hogorasuok o. Itithogon woknisik nekhe dogolik, obasi hano meke thak-pakhogon lagarek hak, at Kristus hagakhikhe wene etnogo nit nen wialogo o yi ai ti ai wolok loagaluk woknisik nekherek.

2 Korintus 4:6

At Allah nen ekhe dogolik, “O mum iti akla nen lia atnek,” iluk isikhe iti hak, at nenat nit ninakla mum meke iti liatninakhikhemo welago. Itithogon dogolik, at Kristus elokhoken a'bi'bal yakhunem ninileken lakhalok nen, at Allah hogorakharek meke etnogo ebe itigirlik iluk hutdekhe dogoagaluk itithogon liatninakhikhe.

2 Korintus 5:9

At Kristus nen nit tha'bokhogonat ninoado yi baga dogolik hagakhe dogogun meke tomok ninitema waganogo ukum ninoba 'bigik, kokhik, hagakhe dogolik, hano hagakho meke halok, “Hano,” igik, nen weak hagakho meke halok, “Weak,” igik, mothogonat yoknisagein o. Itithogon yoknisagein iti nen, nit o yoma huso dogolik inom, yabokane at aila ukiluk inom, ninetaiken tumo, at akla hanorogo anek hagakhe dogou warlok nen hagakhe lago iti.

2 Korintus 9:8

Akhuni inobabut hano hagakharek meke hasik, Allah ane baga holal men iluk waganek werek, “It nen hano meke akhuni ya wogeisigik, ta wogeisigik, supurisekhe dogolik, it aperek inerlageik meke supurisegarek. Inobabut hano nen wogeisegarek iti, Allah nen akla eberek motok dogogin o,” iluk holal waganogo 'bisukha hak, at Allah obabut hano nen, yi meke ti meke oba dukhogon wokhisugunem, hit nen hibiku-yogoku hinekaerek hasik erlogat dogolik, oba dukhogon it aperek hanorogon yomageisekhe dogobageik iluk, Allah nen erlogat wokhisausak werek o.

Efesus 1:17

Hit hinobasik he, ninoe Etagapogot Yesus Kristus opase Allah hogorakho motok welageikharek meke etnogo nen, hinakla motok kagalek meke wokhisigik, at ebe hutukhogon hutdubageik nen yakulhisigik, hagakhe dogoak nen iluk, Agoreke wokhisoagaluk ayoko 'bekhe lagei.

Efesus 2:10

At nenat hano hagarogo 'binanhikhemo welago. Iti nit Kristus ninom hunik dogolik, yi meke ti meke hanorogon hagakhe dogoagaluk, ninobabut ket ninat winametdinanhikhe iti, ebe Kristus Yesus oba nenat winametdinanhikhemo welago.

Efesus 4:1

An ninoe Etagapogot hasik niki herle warogo 'banhama dogolik, hit wene ageikhe hinasuk wasik. Nagarlak lak nerugi. Hit hinobabut he, at Allah nen hinayoko 'bisikhe tak-tagat hagakhe dogono o.

Efesus 4:13

Itithogon hagakhe dogoluk, ninetaiken at oba hakotdiluk dogolik nen, ninebe opakiat meke hakene hagatlageik, Allah a'but iti ebe hutukhogon ninilu ageik, at Kristus yi meke ti meke hasik etaiken bogokhogon horle motok welagarek hak, nit ninetaiken itithogonat horle ageik, hagasugun iti o.

Efesus 5:10

Hinakla nen, “Ninobabut nikithogon hagakhe dogogun oba ninoe Etagapogot akla hotok igin,” iluk, hinakla hutdiluk, hinobabut iti mekeat yakulino o.

Efesus 5:15

Iti nenat, hinobabut hebelogo hagakhe dogono o! Akhuni inetaiken abit meke nen hagakharek hak hagakhidek, inetaiken kagalek meke nen hagakharek hak, hagakhe dogono o.

Efesus 5:2

Akhuni nen yi meke ti meke Allah hasik 'bisalok, ebe warogo hetu hunekhunem, Allah akla hanorogo obasi hano meke liagakhe lagoukha iti hak, at Kristus nit ninebe akmutninakhikhesik nen, “It inobasik an nebe nasuak o,” iluk apasikhe baga ebe wakhukha iti baga Allah akla hano ageikhe iti hak, nit-nit nakmu-hakmurogo hagakhe dogouok o.

Filipi 1:11

Yi meke ti meke ai yakhunem erlo kok atluk eken ikherek hak, at Yesus Kristus nen hagathinakhe dogogin oba, hinobabut mothogon hagakho motok aperek inomat obarluk hagakhe dogogun halok, at ebe wagunem, akhuni aperek nen Allah heagei wakhik, hogorakhik, hagasugun o.

Filipi 1:27

Wene hano wene Kristus nen hagakhikhe wene etnogo baga, “Yigithogon hagakhe dogono, tigithogon hagakhe dogono,” iluk yokhisegarek mekeat hagakhe dogono. Itithogon hagakhe dogolik, hinebe opakiat dapukhogon hagakhe dogoumo, it akhuni aperek nen hinabok ekhe dogolik, “It inobabut hano wene yogeisugunem holiogei tak-tagat inetaiken Allah oba hakotdiluk obatnerogon metek werek o,” iluk, an nebe walegat werekma yoknisugun a? Hinoba witluk nileken hisagein a. Wene hano wene yokhisogorek hak, hinetaiken opakiat hinom dapukhogon dogolik, wim yakhe dogolik obatnerogon yakharek hak, wene iti hasik hinobatnerogon hagakhe dogono.

Filipi 4:18

Yogotakne, hit nen yomakneegepma, horligirik, an tha'bokhogonat warlok apekhe lagei meke erlok agasik ato titu agaat. Ap Epafroditus oba 'begepma woknisi agama nen, nameke werek aga o. Hit nen an yomakneegep iti, domba Allah hasik warogo hetu hunekhe dogolik obasi hano meke liakhunem, at akla hano agarek hak, itithogon yomakneegepma, at Allah akla hano aga o.

Kolose 2:19

Ninebe yi ninukuloak inom hunik werekma, niniki ninisok ekarlim ninomaken oba hunogo 'binanhikhemo, ninapiri nasinem apusu ninoak elolake lagunem, ninebe kok agorek hak, nit Allah a'buri Kristus ninom hunik werekma, at Allah nenat, kogotninakherek iti. Meke re, it iti itithogon ninoe kok Kristus inom hunik welagoukhasik nenat, yabokane kobologo la'isasukha iti nen, inane holhup o.

Kolose 2:6

Hit nen he, “Kristus Yesus ninoe Etagapogot o,” iluk ebe horlasigip iti nen, hinom hunik motok dogono o. Itithogon dogolik, hinobabut wene yakulhisasukha tak-tagat,

Kolose 3:20

Nen, hit yekerugi, nagarumi. Hinagosa, hinopase lak nen, yi meke ti meke hasik yokhisugunem, inane hologo hagakhe dogoumo, ninoe Etagapogot oba hotok igin iti nen, itithogonat hagakhe dogono o.

Kolose 4:5

It akhuni Allah ane inokodek meke hasik he, hit hinakla motok kagalek dogolik, “Nit Allah a'buri hagasusak meke hano asuak nen ya bagaat hagakhe dogouok,” iluk iti mekeat hagakhe dogono.

1 Tesalonika 4:1

Nagarlak lak nerugi. Wene ilugun oba ageikhe yi yokhisak. Nit ninoe Etagapogot Yesus nen, “Hinobabut Allah akla hanorogon, yigithogon hagakhe dogono, tigithogon hagakhe dogono,” iluk, isikhemo yakulhisa agagu etnogo hinilu. Itithogon yakulhisasugumo, hit nen itithogon hagakhe lagap mekeat he, yabokane ageikhe inom kokhogon hagakhe dogobageik iluk, ninoe Etagapogot Yesus ninom hunik dogolik hinasuk warogo yokhisigi iti o.

2 Timotius 2:4

It ap ekeraguntek iti, inougi koktek inakla arleken akhoagaluk, wim yakhe dogolik, yi meke ti meke uma werek meke oba ebekhidegat yakharek iti o.

Titus 3:1

Allah a'buri hat nen hagasik welagan meke etoma nen, inougi pemerintah meke koktek inapma werekma, it nen yi meke ti meke mothogon hagasuagaluk isinem, “I o,” iluk inane hologo hagakhe dogoagaluk inasuk wakhe dogono.

Titus 3:14

Akhuni nit Allah a'buri meke aperek, o eken hano meke ikhidek welagarek hak, it iti hano meke ite ageidek yugunat alomarogo dogunogo iluk, it aperek yi meke ti meke dek nen nuk atluk werekma, it inekaerek hano hagakhe dogolik yomageisekhe dogoagaluk, iti meke kogotdiluk yakulhe dogoak o.

Ibrani 11:5

At ap Henokh etaiken Allah oba hakotdiluk welageikhe iti baga, ebe watlageidek. Allah nen ilugat waganhikhemo, it akhuni aperek nen ebe herakhukha mekeat he, at ebe inileken higidek. At ebe Allah nen aban waganhidek werek korlek, “At Henokh Allah akla hanorogon anek hagakhe lageikhe,” iluk Allah ane baga holal waganek werek o.

Ibrani 13:16

Itithogon ekhe dogolik, akhuni aperek hano hagarinakhik, yomageisigik, hagakhe dogouok. Itithogon hagakhe dogosak iti, Allah akla hanorogo kambing sapi warekhe dogou hagatma, obarlikmatdusak motok dek o.

Ibrani 13:21

Hit Allah akla warlok apekherek meke anek hano hagasubageik nen, yi meke ti meke hano meke tha'bokhogonat wokhisoak. Itithogon wokhisugunem, nit ninom tha'bokhogonat nen Allah akla hanorogo hagakhe dogoagaluk, ninobabut at nen woknisagein iti, ebe, Yesus Kristus nen woknisoak o. At Kristus itiat hogorakho motok dogouok o. Ebeat asuak u hak, “Amin,” igi iti.

2 Petrus 1:8

Hit he, hinobabut iti meke tha'bokhogonat ite atluk, eran-alep kokhogon ite atluk dogogun iti nen, we yugunat alomarogo welageidek, ninoe Etagapogot Yesus Kristus thekekhogon hinilu asugun o.

2 Petrus 3:18

Ninoe Etagapogot tilninakherek meke obabut hano etnogo nen woknisekherek meke iti waganhik, ebe hinilu ageik, hagakhe dogolik, hinetaiken horle atluk dogono. Yogotak ya men, yabokane men, at Yesus Kristus arligat hogorakho motok dogouok o, iluk, “Amin,” igi iti.

1 Yohanes 3:22

at nen wene ninasuk wakhikhe wene mothogon hagakhik, at ilhanem akla hanorogon anek hagakhik, hagakhe lago iti nen, nit yi meke ti meke kino yogokhunem, at nen woknisiliogo.

1 Yohanes 5:20

At Allah a'but ninoba usa'ageikhesik, Allah ebeat meke ninilu asuagaluk ninetaiken kagalogo yoknisasikhe. Itithogon yoknisasikhemo, nit he, Allah ebeat meke a'but Yesus Kristus ipisak ninom hunik motok welago. Nen, at Yesus ebe Allah ebeat meke dogolik naburlal-haburlal erlo arat welagarek o.