Ibrani 9:26 - ALLAH ANE WENW KET MEKE WAROGO WOKNINAKHIKHE WENE

²⁶ At nen he, it alep hagakhe lagoukha iti hak hagatlepma re, agat walhasikhe hurli nen lok-logat nit yogotak ya hurli, yi aik ti aik hekhe dogolik iki eran-alebat watlaga dogolep. Itithogon mekeat he, o ilugun oba nit weak hagakhorek meke degetdisagaluk iki opaki hasigat kambing sapi Allah waresu hak, ekaerek ebe watlasi ageikhe iti.

Ibrani 9:26 ပူးပေါင်းရင်းမြစ်များ

Matius 13:39

At ap wen iteerek ipisak motok weak dogolik, ai weak meke yakhikhe iti ebe re, at Iblis itiat o. Eken palusak tak-tak iti ebe re, o ilugun oba hasigat o. Nen, it ap eken palharek meke ebe re, it malaikat Allah pogot oba nen yoko usa'isa agarek meke itiat o.

Matius 13:40

Nen, it akhuni nen oka weak meke natogorlogo 'biluk hetu hunharek iti hak, o ilugun oba itithogonat hagasigin o.

Matius 25:34

Itithogon hulogo 'bisalok nen, an nebe Netagapogot etnogo nen, it niki ebeke 'bisagein meke iti, wene men yogeisagein, An nopase nen hanothinakhemo welagap. Halok he, witni o. An hipiri abu werekma hit nen melaknikhik, i abu werekma hit nen woknikhik, an ap husoat werekma hit nen woknakhik, nasu ugu dek werekma hit nen i'banhik, u warek werekma hit nen 'bitnea ageik, niki herle warek werekma 'bitnea ageik, hagakhigip iti nen, an nopase nen pogot agat aban walhigidek dogolik, hit kok hinetagapogot dogobageik iluk, wenago 'binageisikhe meke yi horlatni o, iluk yogokhunem,

Yohanes 1:29

Wene itithogon isukhasik nen, noge iluk, hubuluke, at Yesus Yohanes oba wagunem ileken lakhalok nen, wene men yogeisasikhe, “Allah adomba eak meke nit akhuni agat oba yoma weak hagakhorek meke korogo thogotdisagein meke etnogo waga ili hinileken lakhani o.

Yohanes 17:24

Allah nopase. Hat nen agat aban walhigidek dogolik, an nebe hetaiken hunik welagagin iti nen, hogotnakhe dogoagaluk kogotdanhigin etnogo, it hat nen haganeat woknikhigin meke emenogo inileken neoagaluk, o an dogoginmo etoma, it ninomat dogosak warlok o.

1 Korintus 10:11

It itithogon hagarinakhikhemo inoba hagatlageikhe iti tha'bokhogonat nen, it akhuni aperek hutdekhe dogoagalugat hagatlageikhe. Itithogon hagarinakhikhe iluk holal waganogo 'bisukha iti, nit yogotak o ilugun hurli baga asi ago meke yi, ninasuk warekhe dogoagalugat holal waganogo 'bisukha.

Galatia 4:1

Nagarlak lak nerugi. Wene ageikhe yi yokhisak. Inopase lak watlagunem iniki 'biluk yi meke ti meke tha'bokhogonat ina'buri iteerek mekeat, yekerugi inebe aban inarlue ageidek halok he, ap ageikhe nen ekhe dogolik, “Yekerugi inebe inarlue agunem yabokane wogeisagun,” iluk inatuaneke meke thalek it inatuaneke welageikharek hak welageikharek iti.

Efesus 1:10

Wene at akla limago welageikhe iti ebe, yabokane hagatlasusak oba hagatlasi agunem, at nen yi meke ti meke pogot oba welagarek meke inom, agat oba welagarek meke inom, tha'bokhogonat dapukhogon Kristus arligat apma 'bisagein meke hasik abok yoknisasikhe itiat o.

Efesus 5:2

Akhuni nen yi meke ti meke Allah hasik 'bisalok, ebe warogo hetu hunekhunem, Allah akla hanorogo obasi hano meke liagakhe lagoukha iti hak, at Kristus nit ninebe akmutninakhikhesik nen, “It inobasik an nebe nasuak o,” iluk apasikhe baga ebe wakhukha iti baga Allah akla hano ageikhe iti hak, nit-nit nakmu-hakmurogo hagakhe dogouok o.

Titus 2:14

Nit alep Allah ane here'isalok yi weak ti weak hagakhe lagagu iti nen niniki herle warogo negen haknisik werekma, at Yesus Kristus nen he, “It inebe an nekaerek na'buri atluk nen, inobabut hano meke akilukhogon hagakhe dogoak nen, inebe herle hisalogo inoko paligiluk, an nebe watlasigin,” iluk isikhe.

Ibrani 1:2

Meke re, o ilugun oba, nit yogotak welago ya baga, Allah nen a'but yogokhikhemo, at nen nit yakulnisa ageikhe. At a'but iti, erloma Allah nen yi meke ti meke tha'bokhogonat winametdisikhe iti, ebe at a'but nenat winametdisikhemo, iteerek dogoagaluk meldisikhemo dogogin iti o.

Ibrani 10:10

Nen, at Yesus Kristus Allah akla warlok meke iti hagakhe dogolik, at ebe opaki hasigat watlaga dogolik, Allah wogokhikhe iti baga, nit ninebe Allah hasik motok karelogo 'binanhikhemo welago.

Ibrani 10:12

Itithogon mekeat he, at Kristus anek he, nit akhuni nen weak hagakhorek meke hasik iki opaki hasigat watlaga dogolik, ebe motok-motok Allah wogokhikhesik, alilu iki ebeke asi lageikhesik kok werek iti.

Ibrani 10:26

Ebe wene Allah ane yoknisasukha meke ninilu dogoligat, nineram nenat, wene iti thagalogo here'isalok weak motogat hagakhe dogogun halok he, nit yabokane ninako kambing sapi Allah warisumo hotninabigin motok degat o.

Ibrani 4:3

It inobasik itithogon erlok dek ageikhe mekeat he, nit ninetaiken Allah oba hakotdekhe lago meke, at nen, “Hit thet walagun,” iluk abok isikhe etnogo nirat thet walagun o. Wene iti hasik, Allah nen yigithogon isikhe apigi, “An nakla aga dageiluk hupuk palogo wenageisekhe dogolik, An thet walogo welagarek iti hak, it thet walagun motok dek o,” iluk isikhe iti, pogot agat at nen walhasikhesik nen thet walekhe dogolik isikhe.

Ibrani 7:27

It ap Allah iteerek koktek iti hibiku-yogoku inekaerek weak hagakharek meke hasik tak, inako Allah warekharethek nen yabokane akhuni aperek weak hagakharek hasik inako Allah warogo wogokharek mekeat he, at Yesus anek he, nit weak hagakhorek meke hasik ninako Allah waresu hak, at ebe opaki hasik watlaga dogolik, ebe Allah wogokhikhe iti.

Ibrani 9:14

It inoado itikmanke meke hasik sapi amep erlok dek meke baga erlok hano horinakhe lagoukha. Halok he, nit Kristus amep kok meke baga, “Wene hinoba dek,” iluk ninakla thelekhogon erlok motok 'binanherek o. Nit Allah iluk welagarek meke akla hanorogo hagakhe dogoagaluk, domba isi hano meke Allah warekhe lagoukha iti hak, at Kristus Allah Agoreke ikhok motok welagarek meke obatne baga, watlaga dogolik, ebe Allah wogokhikhe iti baga, nit alebat dek asigin meke we yugunat hagakhe lagagu meke, at nen, “Wene hinoba dek,” iluk, at amep oba ninakla thelekhogon 'binanhikhemo welago.

1 Petrus 1:20

Kristus, Allah nen pogot agat yoma aban walhigidek dogolik, akla apalok ayoko 'bisikhesik welageikhesik nen, ebe yogotak o ilugun hurli baga hit hinobasik thelekmaat la'i ageikhemo hinebe tilhinakhikhe iti.

1 Petrus 2:24

Nit ninobabut weak hagakhe lagagu meke iti, akhuni watlatluk yi meke ti meke hagakharek dek iti hak, nit weak meke here'isalok, niniluk dogolik Allah akla warlok meke hagakhe dogoagaluk, nit weak hagakhe lagagu meke korogo, at Kristus oba 'bakhasikhemo, ebe o baga meldiluk wakhukha iti. At ebe li'bik-la'bakhogon wakhukha iti baga, hit hanothinakhikhe iti.

1 Petrus 3:18

Nit akhuni weak hagakhorek iti hasik niniki ilugun oba, at Kristus yabokane watlageidek dogeigiluk opaki hasigat watlageikhe. Ninebe Allah oba woknisik lagaluk, at obabut mothogon hagakherek meke nen, nit ninobabut korlo hagakhorek meke hasik watlageikhe iti. Ebe nit akhuni meke iti wakhukhama watlageikhe mekeat he, agoreke meke iti Allah nen ilugutdisikhe iti.

1 Petrus 4:7

Yi meke ti meke tha'bokhogonat ilugun oba hagatlasigin meke horogat asi aga iluk, sembayan ekhe dogouogoluk, hinetaiken thebekhogon dogolik, hinobabut hebelogo dogono.

1 Yohanes 3:5

At Kristus ekaerek weak hagakhidek dogolik, nit weak hagakhorek meke thagalogo degetdisagaluk ebe thelekmaat wageikhe iti hinilu o.

1 Yohanes 3:8

Nen, at ageikhe nen obabut weak hagakho motok welagarek halok he, at Iblis obabut erlo baga nenat weak hagakherethekma nogo nen, at iti ebe Iblis a'but werek o. Meke re, at Allah a'but thelekmaat wageikhe iti, at Iblis obabut hagakherek meke iti, motok degetdisagaluk wageikhe o.

A'bikaka 13:8

At Allah nen pogot agat aban walhigidek dogolik, “It eta iniluk motok dogoagaluk hagarinabigin,” iluk inetaga at ADomba Eak, it inobasik wakhukha meke etnogo aruesika baga holal waganogo 'bisikhe. It inetaga itithogon holal waganogo 'bisikhe meke, helo yeke hakene kok etnogo hogorakhidek werek korlek, akhuni agat oba welageikharek meke aperek tha'bokhogonat helo yeke hakene kok etnogo inetaiken oba hakotdiluk hogorakhe lageikha hisigi.

A'bikaka 17:8

Helo yeke hakene hegen iti, alep iluk welageikhe mekeat he, yogotak elokhe dek hegen iti, wema baga kilinmo nen dageisigin o. Dagei aga halok, Allah nen alomatdigin o. Nen, Allah nen agat aban winametdigidek dogolik, thuesika it akhuni iniluk motok dogoagaluk hanorinabigin meke, inetaga holal waganek iti baga, it aperek inetaga holal waganek dek meke nen helo yeke hakene iti inileken halok, it nen he, Helo yeke hakene yi, alep welageikhesik nen, elokhe dek ageikhe mekeat, yabokane winam aga yi, ninayuk o, iluk hogorasugun o.