Ibrani 9:15 - ALLAH ANE WENW KET MEKE WAROGO WOKNINAKHIKHE WENE

¹⁵ Iti halok he, wene warogo alebageik wokninakhikhe meke iti baga dogolik, nit ninasuk warek dek weak hagakhe lagagu iti baga ninebe herle warek hakene welagagu meke. Itithogon werekma, at Allah nen Kristus watlageikhe iti baga herle hialninakhikhesik, nit at nen wanisasikhe meke ninom hundiluk, hano ikhok motok dogogin meke woknisagaluk, wene ket meke warogo wokninabiluk, Kristus ebe turlem heisogo meldisikhe.

Ibrani 9:15 ပူးပေါင်းရင်းမြစ်များ

Matius 19:29

Halok he, an netaga kok asuagaluk tha nen ai halek men, oe agot men, erugi men, agosa opase men, a'buri men, wen waganek men, here'isalok waga halok he, oko obolukmo Allah nen iniki 100 oba hakene motok doalegat wogokhik, naburlal-haburlal wogokhik, hagasigin o.

Matius 22:3

Isakhe dogolik akhuni inayoko 'bisikhe meke nasuagaluk, at atuaneke meke aperek men yogeisasikhe, Akhuni inayoko 'bigi emenogo wisuak nen woginabi lani o, iluk, la'isasikhe meke re, it inayoko 'bisikhe meke iti ina'it nen wageidek huk agoukha.

Matius 25:34

Itithogon hulogo 'bisalok nen, an nebe Netagapogot etnogo nen, it niki ebeke 'bisagein meke iti, wene men yogeisagein, An nopase nen hanothinakhemo welagap. Halok he, witni o. An hipiri abu werekma hit nen melaknikhik, i abu werekma hit nen woknikhik, an ap husoat werekma hit nen woknakhik, nasu ugu dek werekma hit nen i'banhik, u warek werekma hit nen 'bitnea ageik, niki herle warek werekma 'bitnea ageik, hagakhigip iti nen, an nopase nen pogot agat aban walhigidek dogolik, hit kok hinetagapogot dogobageik iluk, wenago 'binageisikhe meke yi horlatni o, iluk yogokhunem,

Markus 10:17

Wene itithogon yogeisalok at Yesus o etoma nen holak piokthek lagaluk lagunem, ap ageikhe pirlirli oba wageikhe. Wageikhesik itibagal yukukhogon apma hureklasi ageikhesik nen, men yogokhikhe, “Guru noe. Wene yakulnisekhe lagan iti, hat hano o. An naburlal-haburlal hagatnabuak nen, an nobabut nikithogon hagakhe dogosak,” iluk yogokhikhemo,

Lukas 18:18

Itithogon yogeisekhe lageikhemo, it akhuni Yahudi meke inoe kok ageikhe nen Yesus men yogokhikhe, “Noe. Wene yakulnisekhe lagan iti, hat hano o. An naburlal-haburlal ite asik nen, an nobabut nikithogon hagakhe dogosak,” iluk yogokhikhemo,

Lukas 22:20

arat nasukhama nen, isoak eken apusu henago itithogonat wogeisekhe dogolik, “Yi re, an namebat o. Allah nen wene ket meke warogo wokhinabigin, isikhe etnogo hit hinobasik namep ulabogo nasugun iti baga, ebeat asigin o,” iluk supurogo wogeisasikhe.] Wogeisasikhesik men yogeisasikhe,

Yohanes 10:28

Noporlik nekhe korlek, it iniluk motok dogoagaluk inilugurinakhe dogogin iti nen, it inebe watlatluk nuk asugun dek o. It an niki baga werek korlek, it ap aperek nen tilogo woginabusak erlok dek o.

La'isasikhe 20:32

Yogo. Wene Allah obabut hano nen wokninakherek iti wene hiniki a'bethogon hago dogobageik iluk, yokhisigi. Yogotak nen, at Allah obatne werek meke nen, wene iti baga hinetaiken horlethinakhik, yi meke ti meke at ekaerek a'buri wogeisagaluk 'bisasikhe meke wokhisigik, erlok hagasusak meke iki baga 'binagagi o.

Roma 5:10

Nit alebageik he, Allah ninom wim palek werekma, yabokane at a'but watlaga dogolik, Allah ninom dapukhogon 'binanhikhemo welago. Itithogon werekma, at ebe iluk dogolik, tilninabigin dek nogo? Alebageik tilninabusak dekma tilninakhikhesik nen, yogotak ninom hunik dogolik, tilninabiginat o.

Roma 5:6

Nit Allah ebe thogotdiluk walegat asi lagagusik, ninebe erlok dek werekma, at Allah nen, “It itithogon werek iti hasik, Kristus itinem watlasuak,” iluk apasikhe bagaat ebe wakhukhama ninobolukmo watlageikhe iti.

Roma 5:8

Itithogon mekeat he, at Allah ninebe akmu nen hagakherek iti ekagat asuagaluk, nit weak hagakho werekma, Kristus ebe woknisasikhemo ninobolukmo watlageikhe iti.

Roma 6:23

Weak hagakharek iti oko re, watlageikharek iti. Nen, ninoe Etagapogot Yesus Kristus ninom hunik werekma, Allah obabut hano nen oko degat niniluk motok dogoagaluk hagatninakherek iti.

Roma 8:28

At Allah akla apalok nit ninayoko 'bisikhemo, nit at ebe ninakmu welago meke, at ninom dogolik, yi meke ti meke hano asuagaluk, hagatnisiliogo nit ninilu.

Roma 8:30

Alebat Allah nen ninebe wenakninakhikhe meke, ninayoko 'bisikhe. Itithogon ninayoko 'bisikhe meke, wene ninoba meke korogo wokhasikhesik nen, yabokane ninom ninapuke hunogo 'binanhikhemo welago. Ninebe itithogon hunogo 'binanhikhe meke at ebe hogorakho motok welageikharek meke iti hakene asuagaluk wokninakhikhe.

Roma 9:24

Itithogon apekherek meke iti, nit akhuni Yahudi meke anek wenakninakhikhesik ninayoko 'bisikhe 'buk. It itikmanke meke ninomat wenakninakhikhesik inayoko 'bisikheat o.

2 Korintus 3:6

Allah nen wene ket wene nit ninoba watnisasikhe iti, nit nen wolok loagaluk, at nenat ninobatnetninakhikhemo erlok wolok lausak welago. Wene alep inasuk wakhikhemo holal waganogo 'bisukha meke tak-tagat hagakhidek halok, iti baga inebe inakherek. Meke re, Allah Agoreke nen inilugurinakherek iti nen, nit wene alep holal waganek meke wolok lageidek, at Agoreke nen yoknisiliogo meke wolok laga lago iti.

Galatia 3:20

Akhuni pere mikirlogo hurli warek werekma, ap ageikhe turlem heisogo dogosagat o. Itithogon mekeat he, at Allah ekaerek nen wene abok yoknisekherek iti nen, at nen wene oko dek ebalake anegat yoknisekherek iti.

Efesus 1:7

Itithogon woknisasikhemo, ebe amep ulabogo wakhukha iti baga, ninoko palogo tilninakhik, nit weak hagakhe lagagu meke degetdisigik, hagakhikhe iti o. At Allah akla kagalek dogolik ninebe hutdinanhikhesik, obabut motok hano etnogo nen, ninebe kokhogon akmutninakhikhe iti o.

2 Tesalonika 2:14

Ninoe Etagapogot Yesus Kristus hogorakho motok welageikharek hak, hit itihogonat hinom hogothinabuagaluk, Allah warlok nen hano wene nit nen yokhisa agagu iti baga, hinayoko 'bisekhemo welagap.

1 Timotius 2:5

Allah ebe opakiat anek o. Nen Allah ninom nit akhuni ninom turlem heisogo dogolik dapulninabiogo meke ap ebe Yesus Kristus iti opakiat anek o.

2 Timotius 2:10

Iti nen he, it akhuni aperek Allah nen wenageinakhikhe meke Kristus Yesus inom hunisumo, inebe tilinakhik, iniluk hano motok dogoagaluk, hanorinakhik, hagasuagaluk, an itithogon weagatnakho korlegat, nobakhanini hapugutdiluk welagarek iti o.

Titus 1:2

At Allah nen, yi meke ti meke aban winametdigidek dogolik, nit akhuni ninobasik men isikhe, “Akhuni an nen winametdisalok nen, inebe iniluk motok dogoagaluk, hano hagarinabigin,” iluk abok isikhe iti, “Ekalat ekherek dek o,” iluk ninakla eberek dogolik, ebe wene yakulisekhe lago iti o.

Titus 3:7

At Yesus obabut hano nen wene ninoba meke korogo wokhasikhesik, Allah ninom ninapuke hunogo 'binanikhemo, nit ninakla nen, “Niniluk motok dogogun o,” iluk apekhe lago iti mothogon iteerek asuagaluk Allah Agoreke woknisasikhe iluk,

Ibrani 10:34

it aperek herle warogo kola'isugunem hinakmurinakhik, hagakhe lagagip iti o. Itithogon hagakhe dogolik hinakla nen, “Nit meke hano motok dogogin meke werek o,” iluk apekhe dogolik, hit meke yi meke ti meke horlugunem hinakla weak ageidek hinakla arleken akhekhe lagagip iti.

Ibrani 10:36

Hit nen Allah akla warlok apekherek meke hagakhunem, at nen, “Hit wokhisagein,” iluk abok yokhisasikhe meke iti waganubageik nen, hinobakhanini hapugutdiluk hagakhe dogosak o.

Ibrani 11:13

It akhuni inetaga ilik waga lagei iti tha'bokhogonat nen, “At Allah eberogonat,” iluk inetaiken at oba hakotdiluk welagoukha iti baga, Allah nen abok yogeisasikhe iti ebe waganhidek meke re, akhuni nen yi meke ti meke walegat werekma inileken lakhalok, inakla arleken akhegarek iti hak, it inetaiken oba nen, “Eberogonat waganugun meke werek o, iluk apekhe lago iti nen, o agat oba yoma it aperek inaila olirok lalok ap huso negen welageikharek hak welago,” iluk pakhogon ekhe dogolik inebe watlarik lagoukha.

Ibrani 12:24

Yogotak Allah nen nit ninom hunisuogoluk wene ket meke warogo wokninakhikhesik, Yesus ebe woknisasikhemo turlem heisogo werek iti inom werekma wagap o. Iti at Habel oe nen wakhikhemo amep wene weak meke hagatlageikhe meke iti oba wagap 'buk. Yesus ebe wakhukhama amep oba hisathigik warogo hano wene hagatlageikhe meke oba wagap o.

Ibrani 13:20

Ninopase Allah dapulogo 'binanherek meke etnogo nen, ninoe Etagapogot Yesus watlageikhesikmo nen ebe ilugutdisikhe. At ebe amep ulabogo wakhukha iti baga, Allah nen nit ninom hunisuogoluk wene motok dogogin meke warogo wokninakhikhesik, nit tha'bokhogonat Yesus nen ako domba negen thetnisik dogoagaluk ebe kogat meldisikhe iti.

Ibrani 2:14

At nen, “Akhuni iti an na'buri,” iluk isikhe iti, nit akhuni watlagorek meke ninobasik isikhe iti nen, at ebe watlaga dogolik, nit akhuni watlagorek meke erlo at Iblis iki baga welagarek meke iti, at Yesus nen at Iblis ebe obatne degetdisigik,

Ibrani 3:1

Iti nen, Allah a'buri ekaerek hasik wenago 'binageikhemo welagap meke nagarlak lak nerugi. At Allah pogot oba nenat hit ninomat ninayoko 'bisikhemo wene waganhugusik pakhogon ekhe lago iti hasik, at Yesus ebe Allah iteerek ninoe kok dogoagaluk, Allah nenat la'i ageikhemo werek iti halok, hit hinetaiken oba nenat hutdekhe dogono o.

Ibrani 6:13

At Allah nen he, Abraham yogokhe dogolik, “Hat yabokane yigithogon hagathabigin,” iluk abok yogokhe dogolik, “Hat hebe hani-hanorogonat hagathakhik, hat ha'buri nen itago meke motok doalegat wiak-wayakhogon wokhikhik, hagasigin o,” iluk, ap ninat meke etagapogot degatma, Allah ekaerek etaga baga hupuk palogo yogokhikhe.

Ibrani 6:15

Itithogon yogokhikhemo nen, Abraham akla puk ageidek therogo motok welageikhe iti baga, wene abok yogokhikhe meke iti, arat ebeat ageikhe iti.

Ibrani 7:22

At Allah nen, “Yigithogon 'bogokhogon hano hagathinabigin,” iluk wene ket meke warogo wokninakhikhe iti, ebe asigin iluk at Yesus ebeat meldiluk woknisasikhe itiat o.

Ibrani 8:13

At nen he, “Wene ket meke warogo woginabigin,” iluk isikhe iti, wene haganeat meke degetdigiluk isikhe. Yi meke ti meke haganeat meke il momok agunem ibat thogotdisegarek iti hak, wene alep meke degatdigiluk isikhe iti.

Ibrani 9:16

Ap ageikhe nen, “An niki 'biluk itithogon supusogo wogeisano,” iluk ekherek meke ebe iluk werek korlek, iki 'biluk horlegarek dek. Meke re, at ebe watlaga halogat, “At arat watlaga,” iluk thelekma isi halok, iki 'biluk horlegarek o.

Ibrani 9:28

at Kristus meneke nit akhuni weak hagakhorek meke degetdisagaluk iki opaki hasigat kambing sapi Allah warekhe lagoukha iti hak, at ebe watlageikhesik, yabokane wisigin iti, nit weak hagakhorek meke degetdisagaluk wisigin 'buk. Dek o. Nit akhuni, at wagunem elokhoma therogo welagorek meke hanotninabigiluk wisigin o.

Yakobus 1:12

Hit aperek yi akin ti akin hinoba aga korlek, hinobakhanini hapugutdiluk dogogun halok, hinakla arleken akhekhe dogono o. Itithogon hinobakhanini hapugutdiluk dogogun halok, Allah nen he, “An nebe hinakmu meke hiniluk motok dogogun meke wokhisagein o,” iluk, abok yoknisasikhe etnogo hit hinobabut palogo nenat wokhisagein o.

1 Petrus 3:18

Nit akhuni weak hagakhorek iti hasik niniki ilugun oba, at Kristus yabokane watlageidek dogeigiluk opaki hasigat watlageikhe. Ninebe Allah oba woknisik lagaluk, at obabut mothogon hagakherek meke nen, nit ninobabut korlo hagakhorek meke hasik watlageikhe iti. Ebe nit akhuni meke iti wakhukhama watlageikhe mekeat he, agoreke meke iti Allah nen ilugutdisikhe iti.

1 Petrus 5:10

Werekma, at Allah ebe hogorakho motok dogogun iti hak, hit Kristus hinom hunik werekma hinomat hogothinakho dogoagaluk hinayoko 'bisikhemo, yogotak ya herlekha'bugat anek hinoba yi aik ti aik hekhe dogoluk, yabokane, at obabut hano motok etnogo nen, hinetaiken aban meke thirliphogon hagathinakhik, hinetaiken horlethinakhik, hinobatnethinakhik, hapuguthinakhik, hagasigin o.

1 Yohanes 2:25

Nen, at ekaerek nen, “Wokhisagein,” iluk abok yoknisasikhe etnogo, ninebe naburlal-haburlal hagatninabigiluk isikhe o.

A'bikaka 5:9

Itithogon etai ket meke yakulogo wakhe dogolik, “Hat anek he, arat hakhukhama watlagagitik, u a e, Akhuni tha'bokhogonat inukuloak etaga tomok, inane tomok, u a e, Inoado tomok, inaila tomok, u a e, Hat hamep oba Allah hasik oko palogo 'bisalok, u a e, Iteerek agatik, u a e, Thuesika uanat meke baga holal waganek dikilik iti, u a e, Waganiluk nen, sirlo 'begarek iti hak, u a e, Iki apusu tetnekhogon 'bisukha meke iti, u a e, Erlogat 'bukalusak, u a e. It iti inoko palogo 'bisasigitik, u a e, Ninopase Allah hasik hagakhe dogoagaluk, u a e, Inukuloak etaga, Allah iteerek, thaligin, u a e, Inebe kogat meldisasiginmo, u a e, It nen akhuni agat oba meke, u a e, Inapma 'bisalok hagasik dogogun, u a e,” iluk etai wakhunem hisigi.