Ibrani 6:17 - ALLAH ANE WENW KET MEKE WAROGO WOKNINAKHIKHE WENE

¹⁷ Itithogon hagatlagarek iti hak, Allah nen, “Akhuni an nakla apalok abok yogeisegerek meke, nane dagakhogon yabokane ninat meke ageikhe yogeisegerek dek o,” iluk, it wene abok yogeisasikhe meke eberogonat apoagaluk, hupuk palogo yogeisasikhe iti.

Ibrani 6:17 ပူးပေါင်းရင်းမြစ်များ

Yohanes 10:10

Nen, it ap inilarlurlu waganharek meke wageikharek iti, domba inilarlurlu waganhik, inakhik, inebe motok degetdisigik, hagasuogoluk wageikharek mekeat he, an wagagi iti anek, it akhuni yi meke ti meke doalegat oba hiakhogon welageikharek iti hak, inebe iniluk motok dogoagaluk inilugurinabilukmo nen ebe meke oba hiakhogon dogoagaluk wagagi o.

Roma 11:29

At Allah obabut hano nen yi meke ti meke woknisigik, ninebe wenakninakhik, hagatluk nen, yabokane ane ninat ageikhe ekherek dek.

Roma 8:17

Nit ninebe Allah a'buri halok he, at Kristus yi aik ti aik hasikhe hak, hugun halok, Allah nen nit Kristus ninomat hogotninabigin iti nen, Allah nen yi meke ti meke at a'buri wogeisagaluk abok yogeisasikhe meke iti, at Kristus ninomat woknisaumo, iteerek dogogun o.

Galatia 3:29

Hit hinebe Kristus meke halok he, hinebe Abraham nen itago meke welagap. Halok he, Allah nen Abraham abok yogokhikhe meke etnogo, hit wokhisausak morat o.

Efesus 1:11

At Allah nen, “Yigithogon hagatlasuak, tigithogon hagatlasuak,” iluk akla apekherek tak-tagat yi meke ti meke tha'bokhogonat hagakhunem hagatlagarek iti nen, “It inebe an nekaerek na'buri asuak,” iluk wenago 'binanhikhemo, iteerek agagu iti o.

Ibrani 11:7

At ap Nuh meneke, etaiken Allah oba hakotdiluk, yi wene ti wene yabokane hagatlasigin meke Allah nen husupi yogokhikhemo ebe ileken higidek mekeat he, “Eberogonat hagatlasigin meke yoknekhe higi,” iluk Allah ane holek dogolik, ku ageikhe at a'buri inom tilinabusak meke halhikhe. Itithogon halhikhemo, Allah nen akhuni ukum inoba 'biluk inebe inakhikhe mekeat he, at Nuh arligat anek he, etaiken Allah oba hakotdisikhe iti baga, Allah nen, “At hano,” iluk tilhikhe.

Ibrani 11:9

Wageikhesik, o abok yogokhikhe meke iti arat wageikhesik dogolik, “O yi dek o. O ninat ageikhe Allah nen walegeke walhalok o herlaga obatneak meke baga halhikhe meke ageikhe werek o,” iluk therogo motok dogolik, o su ai meke ya halogo noge igik, ta halogo noge igik, ap huso negen nekhe lageikhe. Iti hagat, ap Ishak inom, Yakub inom, inakla nen he, “Allah nen, Itithogon wokhisagein, iluk abok isikhe iti, nit ninomat yoknisasikhemo ite asugun,” iluk itithogonat nekhe lagoukha.

Ibrani 6:12

Hit hina'it weak hagakhe dogosak he, nina'it o. It akhuni alep inetaiken Allah oba hakotdiluk ina'it ageidek, it nen, “Eberogonat waganugun,” iluk apekhe lagoukha baga, Allah nen, “Wokhisagein,” iluk abok yogeisasikhe meke ebe waganhukha iti hagat, hit itithogonat it inobabut waganogo hagakhe dogono o.

Ibrani 6:16

Meke re, it akhuni nen inetaga hupuk paluogoluk halok he, inekaerek inetaga erlok dek negen nen, inekaerek inetaga baga hupuk palhidek. It aperek inetagawerek kok meke inetaga baga hupuk palharek iti. Itithogon palhunem, it apurukhugi nen wene palhe dogogun meke emenogo inane dek agarek iti o.

Ibrani 6:18

Wene hupuk palogo yogeisasikhe iti, nit Allah apma uki ago meke ninakla nen, “Hanotninabigin,” iluk eberek welago meke ninetaiken hapukhogon dogoagaluk nirat abok yoknisasikhe. Abok yoknisigik, hupuk palhik, wene pere isikhe iti, nit nen, Allah ekalat ekherek motok dek, iluk ninetaiken hapukhogon dogoagaluk yoknisasikhe iti.

Yakobus 1:17

Ninopase Allah pogot oba meke etnogo nenat yi meke ti meke hano meke woknisigik, hano motok meke woknisigik, usaknisa agarek iti. At nenat pogot obake lia welagarek meke iti winametdisikhesik nen, at ebe ninat hagatlageik, abel dagakhogon mum ageik, lia ageik, hagakherek dek.

Yakobus 2:5

Nagarlak lak nerugi. Hinebe nakmu lak o. An wene igin meke yi hinasuk holini. It akhuni agat oba inameke dek meke iti, Allah nenat wenageinakhe dogolik, “Inameke doalegat dogou hak, inetaiken an noba hakotdiluk dogoak o. Nen, it an nebe inakmu meke, o an nen napma 'bisugunem dogogunmo etoma iteerek asugun iluk abok yogeisasigi meke iti, irat iteerek asugun o,” iluk wenageinakhikhe.

1 Petrus 1:3

Ninoe Etagapogot Yesus Kristus opase Allah etnogoat hogorakhe dogouok. At Allah ninebe akmu motok nen, Yesus Kristus watlageikhesikmo nen ilugutdisikhe iti baga nit ninilugutninakhikhe iti. Ninilugutninakhikhemo dogolik, ninakla nen he, “At nen, yabokane hanothinabigin, isikhe iti tagan-hagan asigin dek,” iluk ninakla arleken akhekhe lago.

1 Petrus 3:7

Nen, hit ap meneke, Allah obabut hano nen hinagugi hinom tak-tagat hiniluk motok dogoagaluk iteerek 'binagakhemo welagap iti nen, hit sembayan isinem Allah nen hinane asuk holhidek thogotdinogo iluk, hinagugi hinom hano dogolik, hinakla nen, “Humi inobatne dek,” iluk hutdiluk, inalon halogo hinakmurinakhe dogono o.