Ibrani 13:17 - ALLAH ANE WENW KET MEKE WAROGO WOKNINAKHIKHE WENE

¹⁷ Hit hinougi inakla nen, “Yabokane Allah nen, It inebe hasik nikithogon hagakhe lagasip, iluk yoknisugunem, nit nen ninoba dopogat oko yogosugun higi,” iluk, hanorogo thethisik motok welageikharek iti nen, it inapma thoma iluk inane hologo hagakhe dogono o. Itithogon hagakhe dogogun halok he, it inakla arleken, hit hinobasik hagakhe dogogun iti. Meke re, hit nen it inane hologo dogogun dek halok he, it inakla weak dogolik, hit hinobasik alomarogoat hagakhe dogosak o.

Ibrani 13:17 ပူးပေါင်းရင်းမြစ်များ

Lukas 16:2

Itithogon yogokhukhama, at kok etnogo nen atuaneke etnogo waikhikhemo wageikhemo nen, men yogokhikhe, Hat hagakhe lagan meke nasuk holhi iti, nikithogon hagakhe lagan. Yogotak hat an naila yoma dogolik, an nameke hago dogogin degatma re, hago dogolik hagakhe lagan meke holal waganek meke iti pilinogo yoknetluk nen, woknom o, iluk yogokhikhe.

La'isasikhe 20:28

Domba therisik welageikharek iti hak, hit nen Allah a'buri therisik dogoagaluk, at Agoreke nen hinayoko 'bisikhemo, therisik dogolik, hinekaerek hinobabut hebelogo dogono o. Itithogon hinobabut hebelogo dogolik nen, Allah a'buri yoma, at ekaerek a'but amep oba woginakhikhemo inebe at ekaerek a'buri werek, iluk hanorogo therisik dogono o.

Roma 14:12

Yabokane, ninebe dopok nen, “An yigithogon hagakhi, tigithogon hagakhi,” iluk, wene pilinerogo at Allah at yogosugun o.

1 Korintus 16:16

It inobabut hakene halok he, it aperek it inom inobatnerogon hagakho halok he, tha'bokhogonat inapma ukiluk inane holek dogono o.

Efesus 5:21

Allah itithogon heagei wakhe dogolik, Kristus alon halhe dogolik, hit-hit ageikhe nenat ageikhe apma dogolik inane hologo hagakhe dogono.

Filipi 1:4

Hit ebekeram wene waganhigip iti hurli nen, yogotak hurli, an nen hano wene akhuni aperek yogeisilik nekhe dogoagaluk yomakneekho motok welagathep iti nen, an hibiku-yogoku nakla arlekenhogon hit tha'bokhogonat hinobasik sembayan ekhe dogolik, Allah ayoko 'bigik, heagei wakhik, hagakhe lagei.

Filipi 2:12

Nagarlak lak nerugi. Hinebe nakmu o. An ninom dogolik, nane hibiku-yogoku isinem hologo hagakhe lagagip iti hagat, an yogotak nebe walegat werek korlek, nane itiat kogotdiluk nen, hologo motok hagakhe dogono. At Allah nen, hit nen hagakhe dogobageik iluk, hinakla kagalogo hagathinakhunem, hit hinakla nen, “I, nit itithogon hagakhe dogou warlok,” iluk apalok, Allah akla warlok meke hagakhe lagap iti nen, at ebe hinayukhogon hinoageleke dik-dik hagakhe dogolik, “At nen tilninabigin,” iluk iti hasigat hagakho motok dogono.

Filipi 2:16

Itithogon hagakhe dogolik, yi meke ti meke supusogo wogeisuogoluk inugurisegarek hak, wene akhuni inebe inilugurinakherek wene iti yogeisilik nekhe dogono. Itithogon yogeisekhe dogogun halok, at Kristus wisigin itinem, an nen, “Mep dageik-dagokhogon nobatnerogonat hagakhe lagagi meke etnogo we yugunat alomarogo hagakhidek. Kristus hasik erlok hagarogo 'bisigima,” iluk nalonat asigin iti o.

Filipi 2:29

At ebe wagunem, ninoe Etagapogot hinom hunik dogolik, hinakla arleken akhekhe dogolik at ebe waganino. Hit nen nikithogon yomakneau heat iti nen, hinobolukmo at nen yomakneagaluk, “Nebe watlagei halok hanoat o,” iluk, Kristus hasik hagakhe dogolik watlatlep meke iti o. It akhuni aperek inobabut at hagakherek hak hagariogei meke halok inalonhogon woginakhe dogono o.

Filipi 3:18

An alebageik he, niki eran-alep yokhisasigi hagat, yogotak nane yabokane dagakhogon yokhisagat o. Akhuni inebe doalegat nen, “Kristus nit ninobasik o baga meldiluk wakhukha etnogo, nina'it,” iluk inom wim palek negen dogolik inobabut korlo hagariogei meke iti hasik inuak de aga dogolik yokhisekhe lagei o.

Filipi 4:1

Iti nenat, nagarlak lak nerugi. Hinebe nakmu o. Ninoe Etagapogot hinom hunik hinobatnerogon dogono. Hit hinobabut hagakhe lagap oba an nakla arleken akhigik, hogorakhigik, hagakhe dogolik, hinoba witluk nebe ninom dogolo o, iluk, apekhe lagei.

2 Tesalonika 3:14

Wene holal waganogo hinoba la'i ago meke iti, it aperek nen inasuk hologo hagasusak ina'it meke iti, inekarli asuagaluk it inobabut itithogon hagariogei meke iti hutdisalok nen, hinom hundiluk dogogup o.

1 Timotius 5:17

Allah nen men isikhemo holal waganogo 'bekhe dogolik, “Sapi isok nen gandum oado wulel tagalogo eken yibilhe dogolik aperek naunogo iluk ape herle wasusak dek o. Aperek noagaluk here'isekhe dogono,” iluk isikhemo, holal waganogo 'bisukha iti o. Nen, ageikhe, “Akhuni yabu yi meke ti meke hasik hagakhunem, iniki oko wogeisekhe dogosak o,” iluk isikhemo holal waganogo 'bisukhaat. Iti nen he, ap Allah a'buri hanorogon hagasik welageikharek meke iti, it Allah a'buri tha'bokhogonat nen, “Iniki oko arat yomakhogo,” iluk apigidek, aperek inomat oba dukhogon yomakhekhe dogosak o. Itithogon hagakhe dogolik, kok hakene re, it aperek Allah ane inobatnerogon yogeisigik, yakulisigik, hagariogei meke iti, inalonhogon yomageisekhe dogosak o.

Ibrani 13:24

Hit nen, it ap hinougi hit thethisik welageikharek meke inom, Allah a'buri inom, inebe tha'bokhogonat, “At nen heagei wathinakhe,” iluk yogeisano o. Nen, ninagarlak lak ninerugi o Italia welageikharek meke nen heagei wathinakhaat o.

Ibrani 13:7

Hinougi alebat thethisik welagoukha meke nen, Allah ane yokhisasukha meke iti, inoba eberek dogono o. It inetaiken Allah oba hakotdiluk, inebe iniluk dogolik inom, watlasuogoluk inom, hagakhe lagoukha meke hutdiluk, hit it inobabut waganogo hinetaiken Allah oba hakotdiluk dogono o.

Yakobus 4:7

Iti nen he, Allah apma hinetaiken thebekhogon ukiluk ane holek dogolik, Iblis ane iti thagalogo here'isekhe dogono. Here'isaumo, at nen here'inageiluk lo liginat o.

1 Petrus 5:5

Nen iti hagat, hit ap elege nagarumi. It aperek nen Allah ane baga men isukha, “Akhuni inekaerek nen hogorakhugunem, Allah nen a'it hisekherek o. Mekeat he, inekaerek inetaiken thebekhogon dogogun halok, at obabut hano nen akmurinakherek o,” iluk holal waganogo 'bisukhama werek iti nen, hit nen inarluetek inapma ukiluk inane hologo hagakhe dogono o. Itithogon hagakhe dogolik, hit tha'bokhogonat nen, hinekaerek nen hogorakhigidek inapma dogolik, hit aperek nen it aperek inatuaneke welageik, it nen hit hinatuaneke welageik, hagakhe dogolik yomak-yomak hagakhe dogono o.