Ibrani 11:26 - ALLAH ANE WENW KET MEKE WAROGO WOKNINAKHIKHE WENE

²⁶ “Yabokane Allah nen oko woknisigin meke werek o,” iluk apasikhesik nen, “Yi meke ti meke hano meke akhuni o Mesir inikimo meke yi kok dek o,” iluk, here'isalok nen, “Kristus hasik ninebe wiik-weakhogon hagatninakhe dogosak itiat kok o,” iluk apasikhe.

Ibrani 11:26 ပူးပေါင်းရင်းမြစ်များ

Matius 10:41

Nen, tha nen, Ap yi Allah ane yogeisekherek meke, iluk ebe waganigin halok he, it ap Allah ane yogeisegarek meke oko horlegarek tak-tagat horlagein o. Nen, Ap yi mothogonat hagakherek meke, iluk ebe waganigin halok he, it mothogon hagakharek meke oko horlegarek tak-tagat horlageinat o.

Matius 6:1

Itithogon yogeisasikhesik, ageikhe men yogeisasikhe, “Allah nen, Itithogon hagakhe dogono, iluk isikhemo, hit nen mothogon hagakhe lagap meke iti, akhuni nen inileken hisekhe dogoagaluk thelekma hagakhe dogogup o. Inileken hisekhe dogoagaluk hagakhep halok he, hinopase pogot oba meke nen oko wokhisagein motok dek o. Hinakla ebetni!

Lukas 14:14

Itithogon inayoko 'bekhe dogoumo, it nen hat hayoko 'busak dek iti nenat, hat hakla arleken kogat akhagein o. It iti nen oko wokhesusak dekma iti, akhuni inetaiken mot meke watlatlukmo, Allah nen inilugurinabigin itinem, hat hagakhe dogogin meke oko, at Allah nenat wokhesigin o,” iluk yogeisasikhe.

Lukas 14:33

Iti hak, hit aperek hinameke yi meke ti meke thogotdisigidek dogolik an nagarumi asuogoluk napma ukusak erlok dek o,” iluk yogeisasikhe.

La'isasikhe 5:41

Ula'isugunem, it ap wene erlo pilinekhe lagoukha meke emenogo here'isalok dukhisukhasik nen, Yesus agarumi emenogo it-it ekhe dogolik, “Allah nen, Hit Yesus etaga hasik akhuni nen, Hit weak, iluk wenakhisaumo erlok, iluk akla apekhe tak-tak wenaknisega iti hano,” iluk inakla arleken akhalok dukhisukha.

2 Korintus 12:10

Iti nen, an Kristus hasik, nebe erlok dek agei halok, akhuni nen nabok weak palho halok, wiik-weakhogon hagatnakho halok, yi aik ti aik hagatnakho halok, wim yakhe dogolik inasuogoluk hoborisegarek hak hobotneekho halok, an erlok degat werekma, iti baga nen nobatne agarek iti nen nakla arleken akhegerek.

2 Korintus 6:10

Ninakla weak dogoligat he, ninakla arleken akhekho motok welago. Yi meke ti meke ninikimo dek mekeat he, akhuni doalegat hano meke inilmo horleak asuagaluk hagatdisekhe lago. Ninameke motok dek mekeat he, ebe meke tha'bokhogonat ite agosik welago.

Efesus 1:18

At nenat hinakla liathinakhunem, hit nen he, “Ninayoko 'bisikhe meke etnogo nen yabokane hanotninabigin,” iluk, hinakla arlekenhogon oba eberek welagap meke etnogo hinilu ageik, yi meke ti meke hano meke hogorakho motok dogogun meke at a'buri woknisagaluk kokhogon hulogo 'binanhikhe meke iti, hinilu ageik,

Efesus 3:8

Allah a'buri meke tha'bokhogonat inetaga werek hak werek korlegat, an netaga dek, erlok dek meke, at Allah obabut hano nen, hano wene pilinerogo usak erlok dek meke, Kristus nen wogeisekherek etnogo akhuni itikmanke meke yogeisilik nekhe dogoagaluk nayoko 'biluk nayabu iti woknikhikhemo welagei.

Filipi 3:7

An alep itithogon hagakhe dogolik, “Thaburekhe lagei,” iluk apasigi mekeat he, yogotak Kristus ebe waganhirik oba nen, “Alep hagakhe lagagi iti, weat alomarogo hagakhe lagagimo higi,” iluk hutdekhe lagei o.

Ibrani 10:33

Itithogon hagakhe dogolik, hit aperek akhuni doalekma hinetaga wiik-weakhogon weak hagathinakhunem, hit aperek nen, “Nit ninomat weagatninabuak,” iluk inoba ukisinem hinomat weak hagathinakhik,

Ibrani 10:35

Halok he, alep weak hagathinakho korlek hinakla pugat welagagip meke iti kobokhogon thogotdigidek, yogotak ya itithogonat dogogun halok, oko kok meke wokhisagein iti nen, hinobatnerogon hago dogono o.

Ibrani 11:6

Akhuni inetaiken Allah oba hakotdigidek halok he, at akla hanorogo hagasusak motok erlok dek o. Nen, at oba wisuogoluk halok, it nen, “Allah eberogonat werek,” iluk apigik, “At ebe inilu asuogoluk hagasugun halok, at nen oko ebe meke wogeisekheregat,” iluk apigik, hagasusak iti.

Ibrani 13:13

Itithogon watlageikhe iti nen, nit agat oba yoma motok dogosak dek. Nit yabokane o motok dogogun meke herakhe lago iti nen he, at Yesus akhuni nen inane aik dagok paik dagok dalhe lagoukha hak, nit itithogonat yoknisekho korlek, at oba leget abel itikmanke dukhisi dogouok o.

Ibrani 2:2

Wene iti, nit ninopa lak yogeisoagaluk, Allah nen it malaikat inayoko 'biluk la'isa ageikhemo yogeisasukha meke eberogonat hagatlageikhe. Nen, it aperek wene iti hologo mothogon hagakhidek meke, inebe tomok wene mothogonat inoba 'biluk weagarinakhe lageikhe iti.

1 Petrus 1:11

Itithogon yogeisekhe lagoukha iti, at Kristus Agoreke inakla dogolik yogeisekhe dogolik, men isikhe, “Kristus aik hilik hilik watlasigin. Watlatluk nen yabokane iluk agunem hogorakhe dogogun,” iluk yogesasikhemo it nen ekhe dogoligat, “Nikithogon hagatlasigin. Meranem nen hagatlasigin,” iluk hinok hutukhogon waganhe lagoukha.

1 Petrus 4:14

Akhuni aperek nen at Kristus hasik wenakhisekhe halok, hinakla nen, “Allah Agoreke hogorakharek meke etnogo ninoba duk ekhemo welago,” iluk hinakla arleken akhekhe dogono o.

A'bikaka 2:9

Hit ebe meke hasik hinebe kok hinikierek mekeat he, it akhuni Iblis a'buri mekeat he, inekalat, Nit ninebe Yahudi meke, iluk ekhe dogolik, hit hinetaga weak hagarogo weak hagathinakhunem, hinebe hinerlageik weak welagap iti, an niluat o.

A'bikaka 3:18

Itithogon welagap iti nen, hit koktek hinikierek asubageik nen, emas hetu werago hano hagakharek meke noba oko paligik, hinalpalegat welagap meke iti, hinekarli asunogo nen, ikhauwogoluk su kut meke noba oko paligik, hinileken puk meke iti, hano agunem yi meke ti meke lakhekhe dogouogoluk, apusu hinileken obake wasubageik nen noba oko paligik, hagasubageik nen iluk hinasuk wakhe lagei o.