Filipi 4:8 - ALLAH ANE WENW KET MEKE WAROGO WOKNINAKHIKHE WENE

⁸ Nagarlak lak nerugi. Wene ilugun oba yi ageikhe yokhisak. Hinakla ebekhe dogolik, hanorogon hagakhik, hogorinabusak meke hagakhik, hagariogei meke oba ebekhe dogono. Iti ebe re, wene eberogonat meke oba ebekhik, hogorasusak meke oba ebekhik, mothogon hagakharek meke oba ebekhik, weak meke thogotdiluk hano anek hagakharek meke oba ebekhik, inobabut heanerogon hagakharek meke oba ebekhik, inoba la'buk usak meke oba ebekhik, ebekho motogat dogono.

Filipi 4:8 ပူးပေါင်းရင်းမြစ်များ

Matius 22:16

Abok palhe lagoukhasik nen, ap it inagarumi inane waganhe lagoukha meke inom, it ap Herodes werekmake meke inom, Yesus oba wene hinok waganuagaluk la'isa agoukhama it wagoukhasik nen, men yogokhukha, “Yesus noe. Hat hobabut wene eberogonat anek ekhe dogolik, Allah akla nen, Akhuni yigithogon hagakhe dogoak, iluk apekherek meke eberogonat yakulnisekhe lagan iti nit ninilu o. Akhuni inebe hayuk degat dogolik inelokhoken oba anek hisalok, ageikhe helokhoma 'bisigik, ageikhe hoporlike 'bisigik, hagakhetek dek heekhe lago.

Lukas 16:15

Itithogon at obato agoukhama, at Yesus nen it yogeisekhe dogolik, “An mot hagakhe lagei, iluk akhuni inil oba hinobabut mot meke hakene hagakhe lagap. Mekeat he, Allah nen hinetaiken motok ilu o. Yi meke ti meke it akhuni nen hano iluk kogotdegarek meke iti nen, at Allah motok a'it o.

Lukas 2:25

Etanem ap o Yerusalem meke ageikhe etaga Simeon welageikhe. At obabut hano, Allah ayukhogon dogolik, motok mothogon hagakhe lageikhe. Itithogon hagakhe dogolik, akhuni Israel meke inakla hanorinabi wisigin meke iti therogo werekma, Allah Agoreke oba duk isikhemo welageikhe.

Lukas 23:50

Itithogon hagakhukhama ap ageikhe etaga Yusuf, it akhuni Yahudi meke inaila o ukul ageikhe etaga Arimatea iti meke. Allah apma 'bisagein etnogo therogo dogolik, obabut hano mot hagakhe lageikhe meke, at ebe Yahudi inougi koktek wene pilinisuogoluk inom natogokhe lagoukha meke. Itithogon mekeat he, it agarlak lak nen, Yesus abok palogo wakhukha iti, an nen, “I o, wasuok o,” iluk igidek huk welageikhesik nen,

Yohanes 7:18

Halok he, tha nen wene ekaerek akla nen kagalogo ekherek iti, akhuni nen hogorasuagaluk ekherek o. Meke re, tha nen, at la'i ageikhe meke hogorasuagaluk ekherek halok he, ekalat ekherek motok dek o. At he, eberogonat ekherek o.

La'isasikhe 10:22

Itithogon yogeisasikhemo, it nen, “Ap tentara meke opaki doalharek meke inoe kok etaga Kornelius, iti nen la'inani agama wago. At iti obabut mothogon hagakhik, Allah ebe ayukhogo welageik, hagakherek iluk, it akhuni Yahudi meke tha'bokhogonat nen obabut palharethek nen, itithogonat abok hano egarek. At iti itithogonat hagakhunem, malaikat Allah nen yoko usa'isa agarek meke emenogo ageikhe nen, Petrus iti nen wene hat hasuk holusak meke yokhesigin werek o, iluk hat hayoko la'inani isuagaluk yogokhemo, at nen la'inani agama hoba wago o,” iluk yogokhukha.

La'isasikhe 22:12

Ukisukhama, o Damsyik etoma ap ageikhe etaga Anania. Wene Allah nen ninasuk wakhikhe wene etnogo hago dogolik mothogon hagakhunem, it akhuni Yahudi meke o Damsyik meke tha'bokhogonat nen alon halhe lagoukha.

La'isasikhe 6:3

Halok he, hit nen he, ap ageikhe Allah Agoreke inakla kerlekhogon dogolik, inetaiken motok kagalek hagakhunem, inobabut ekagat hisekhe lagap meke halok, inebe 7 baga herageinabino. Herageinakhep halok, it nen yi meke ti meke itithogon supurisekhe dogoagaluk, nit nen meldisagun o.

Roma 13:13

O lia baga dogolik hagakharek hak, ninobabut mothogon hagakhe dogouok. Pesta nalok eka hagakhik, anggur apusu nalok hunu-hunu ageik, hagakharek iti hak hagasusak dek o. Yugunat param hagarinakhik, inekarli dek hagakhik, hagakharek iti hak hagasusak degat o. Wene palhik, ua palhik, hagakharek iti hak hagasusak degat o.

Roma 13:3

It akhuni hano hagakhe dogolik, koktek pemerintah meke iti, inayuk dekhogon welageikharek. Meke re, it weak hagakhe dogoligat, inayukhogon welageikharegat. Hit nen it pemerintah meke hinayuk dekhogon dogouogoluk, hinobabut hanorogon anek hagakhe dogono. Itithogon hagakhe dogogun halok he, it nen hogothinabugunat o.

Roma 14:18

Hit Kristus atuaneke dogolik, itithogon hagakhe dogoumo, Allah akla hano ageik, akhuni inakla nen, “At hano,” iluk inakla apigik, ugunat o.

Roma 2:29

Akhuni Yahudi ebe Yahudi meke re, “An nebe Yahudi meke inoado aperlagap palek welagei,” iluk thuesika baga holal palogo 'begarek iti hasik 'buk. Dek o. Mekeat, inoado aperlagap palek ebe meke re, inoado aperlagap meke palu hak, Allah Agoreke nen inetaikenma meke karelogo ulakherek itiat o. Akhuni inetaikenma itithogon karelek werek halok he, akhuni aperek nen hogorinakharek 'buk. Meke re, at Allah nenat hogorinakherek o.

1 Korintus 4:5

Iti nen he, wene akhuni inoba 'bigik kokhik hagasigin itinem aban asi ageidek werek korlek, hit wene inoba 'bigik kokhik hagasusak motok dek o. At ninoe Etagapogot ebe witluk nen, hibakone limago hagariogei meke thelekmatdigik, itithogon hagasugun iluk apalok inakla thebelek werek meke iti 'bualogo 'bigik, hagasisigin iti therogo dogosak o. Itithogon 'bualogo 'bisinem, Allah nen hano hagakha meke inebe tomok hogorinabusak mekeat hogorinabigin o.

2 Korintus 13:7

Nit nen he, hit weak ageikhe hagasunogo iluk, Allah ayoko 'bekhe lago. Iti, hit nen hinileken nisekhe dogolik nen, “Paulus lak hano hagariogei,” iluk ninobabut palogo nen ekhe dogobageik iluk ekhe lago dek o. Nit ninobabut palhunem, hit nen, “It erlok dek hakene hagatlageikha,” apegep halok he, yugunat. Here'isani o. Hirat hano hagakhe dogobageik iluk hit hinobasik Allah ayoko 'bekhe lago o.

2 Korintus 6:8

It aperek nen hogotninakhik, ninabok hano igik, hagakhe korlek, it aperek nen wenaknisigik, ninabok weak palhik, hagariogei. Wene eberogonat yogeisekhe korlek mekeat he, “Inekalat nukhetninabiogei,” iluk wenaknisiliogeiat.

2 Korintus 8:18

Ninagarlak ageikhe hano wene yogeisilik nukhunem, it Allah a'buri o yi ai ti ai nen, “At obabut hano,” iluk hogorariogei meke, at Titus ipisak la'isa agei iti o.

2 Korintus 8:21

Itithogon hagakhe dogolik, ninoe Etagapogot il oba anek ninobabut mothogon hagakhe dogouogoluk hagakhe lago dek. At he, ninoe Etagapogot inom, akhuni inom, inil oba ninobabut mothogon hagakhe dogouogoluk apekhe lago.

Galatia 5:22

O eken ikherek hak, Allah Agoreke akhuni inakla dogolik inobabut hagakharek ebe yi. Akhuni aperek inebe inetaiken hunik welageik, inakla arleken akhigik, inetaiken hapukhogon welageik, inobabut inobakhanini hapugutdiluk welageik, inobabut enago welageik, inobabut hano welageik, inobabut dopokhogon welageik,

Efesus 4:25

Nit tha'bokhogonat ninebe at Kristus iki isok hakene ninom hunik welago iti nen, inekalat egarek meke iti here'isalok, hinagarlak lak hinerugi hinom hinane eberogonat meke anek ekhe dogono o.

Efesus 5:9

O erlo hano meke nen eken hano mekeat ikherek hak, akhuni o lia baga dogolik yi meke ti meke hanorogo mothogonat inetaiken oba nen eberogonat hagakharek iti o.

Efesus 6:14

Wim hinom yabubageik nen i'biluk metek dogosak he, ebe yi. Therlok isu hak, wene ebe wene itiat ikhik, hinamik oak oba isu hak, Allah akla warlok meke anek mothogon hagakharek iti meke ikhik,

Filipi 3:1

Nagarlak lak nerugi. Wene ilugun oba yokhisak nen ninoe Etagapogot hinom hunik dogolik, hinakla arleken akhekhe dogono, iluk igi iti o. It aperek nen weagathinakhidek hinebe hano dogobageik iluk, wene alep holal waganogo la'i agei mekeat, nape ale ageidegat yabokane nane dagakhogon yokhisageinat o.

Kolose 4:5

It akhuni Allah ane inokodek meke hasik he, hit hinakla motok kagalek dogolik, “Nit Allah a'buri hagasusak meke hano asuak nen ya bagaat hagakhe dogouok,” iluk iti mekeat hagakhe dogono.

1 Tesalonika 4:12

Itiat kogotdiluk nen, it aperek nen waganekmake nilik nekharek iti hak hagakhidek dogolik, akhuni itikmanke meke nen, “It hano,” iluk uagaluk inil oba hinobabut mothogon hagakhe dogono.

1 Timotius 3:11

Iti hagat he, it iti inagugi inalaga isonhogo hagakhe dogolik inahusupi weak ilik nekharek dek meke halok, weak hagasuagaluk inakla kagalhunem inetaiken inekaerek nen therogo welageikharek meke halok, inobabut mothogon hagakharek meke halok, inobabut iti hakene halok, inaguni yomageisegarek meke dogoagaluk meldisausak o.

1 Timotius 3:4

ekaerek nen a'buri meke hano karelogo hagasik werekma, at a'buri nen inopase apma dogolik alon halogo hagakhik, ane isinem hologo hagakhik, hagakharek meke halok, inobabut itigirlik meke halok Allah a'buri therisik dogosak o.

1 Timotius 4:12

Hat hebe elege aban welagan iti nen, it akhuni aperek nen inakla meanetdagousak dek o. Meke re, hebe elegeat dogolik, akhuni aperek inetaiken Allah oba hakotdiluk werek meke nen, hat hobabut waganuagaluk, hane mothogon yogeisigik, hobabut mothogon hagakhik, akhuni hakmurinakhik, hetaiken Kristus oba hakotdiluk welageik, weak hagakhidek hilaga isonhogo welageik, hagakhe dogono.

1 Timotius 5:10

It akhuni aperek nen it humi thoge meke iti inabok ekhe dogolik, “It inobabut hano hagariogei,” iluk egarek meke halok, inetaga holal waganusak. Hano hagakharek iti, inekaerek ineagei hanorogon kogorinakhik, ap huso wagunem, inebe hanorogon woginakhik, Allah a'buri aperek inisok obake thobalinakhik, it aperek weak werekma yomageisigik, iniki ageikhe huk agedek yi meke ti meke hasik yomageisekho motok welageik, hagakharek meke halok, inetaga holal waganusak o.

1 Timotius 5:2

humi inarluetek iti, hagosa lak negen hinom welageik, humi tugum meke inom homagarlugi tharlisik meke inom, herugi negenat, hakla weak meke ebekhidek hilaga isonhogon hinom welageik, hagakhe dogolik, inasuk hanorogon wakhe dogono.

Titus 1:8

ap huso wagunem aila hanorogo woginakherek meke halok, hano hagakharek iti meke anek warlok apekherek meke halok, etaiken ekaerek nen therogo welagarek meke halok, obabut mothogon hagakherek meke halok, ebe Allah hasik karelek welagarek meke halok, ekaerek nen asuk warek welagarek meke halok, meldusak o.

Titus 2:14

Nit alep Allah ane here'isalok yi weak ti weak hagakhe lagagu iti nen niniki herle warogo negen haknisik werekma, at Yesus Kristus nen he, “It inebe an nekaerek na'buri atluk nen, inobabut hano meke akilukhogon hagakhe dogoak nen, inebe herle hisalogo inoko paligiluk, an nebe watlasigin,” iluk isikhe.

Titus 2:2

Ap inarluetek meke iti, it inetaikenma hanorogo apigik, it inetaiken werek welageik, it inetaiken inekaerek nen therogo welageik, it inetaiken Allah ane ebeat apalok aborlok dek welageik, akhuni inakmurogo welageik, yi meke ti meke hasik inoba aik hekhe dogolik, inobakhanini hapugutdiluk welageik, hagakhe dogoagaluk inasuk wakhe dogono.

Titus 2:7

Inasuk itithogon wakhunem, it nen, hat hobabut waganhe dogoak nen, yi meke ti meke hasik hagakhe dogolik hobabut mothogon hagakhe dogono. Itithogon hagakhe dogolik, “Wene yi kogat,” iluk mothogon yakulisekhe dogono.

Titus 3:14

Akhuni nit Allah a'buri meke aperek, o eken hano meke ikhidek welagarek hak, it iti hano meke ite ageidek yugunat alomarogo dogunogo iluk, it aperek yi meke ti meke dek nen nuk atluk werekma, it inekaerek hano hagakhe dogolik yomageisekhe dogoagaluk, iti meke kogotdiluk yakulhe dogoak o.

Ibrani 11:2

It akhuni alebageik inetaiken Allah oba itithogonat hakotdiluk welagoukha iti baga, Allah nen, “It hano,” iluk inebe oba hotokthek welageikhe.

Ibrani 13:18

Nit yi meke ti meke hasik hano anek hagakhe dogouogoluk, apekhe dogolik, ninakla nen, “Nit wene ninoba dek. Ninakla thelek,” iluk apekhe lago iti nen, nit ninobasik sembayan ekhe dogono o.

Yakobus 1:27

Ninopase Allah nen, “Akhuni nen an nakla hanorogo mot hano motok hagakhe dogosak he, yigithogon. Yekerugi irlagakot meke inom, humi thoge meke inom, nuk atluk werekma yomageisigik, akhuni agat oba weak hagariogei meke iti inobabut waganhidek inekaerek nen kareligik, hagakhe dogosak o,” iluk akla apekherek iti o.

Yakobus 3:17

Itithogon mekeat he, Allah nen akhuni inakla kagalhunem, inobabut kok hagakharek he, weak ageikhe hagakhidek inilaga isonhogo welageikharek iti. Itithogon dogolik, akhuni inom hanorogo welageik, inobabut enago welageik, inane hologo hagakhik, akhuni inakmurogon motok welageik, o eken hano meke ikherek iti hak, hanorogon hagakhik, akhuni aperek inelokhomake 'bisigik, aperek inoporlike 'bisigik, hagakhidegat inetaiken pere welageidegat, hanorogo hagakharek iti.

1 Petrus 1:22

Ebe wene iti hinasuk holhe dogolik, hinakla nen weak meke horogo la'isalok, hinagarlak lak hinerugi Allah a'buri meke aperek eberogonat hinakmurogon hagakhe lagap iti, hinom hunik motok dogolik nakmu-hakmurogon hagakhe dogono.

1 Petrus 2:12

It akhuni itikmanke meke Allah inokodek meke hinom dogolik, it nen, hit weak hagakhe lagap meke thalek, “It weak hagariogei o,” iluk hinabok weak ekhe dogoligat, hit hinobabut hano hagakhunem inileken hisekhe dogoluk nen, akhuni nen at Allah ebe yabokane wagunem hogorasuagaluk hit hinobabut mothogon hagakhe dogono o.

1 Petrus 4:8

Wene kok hakene yi. Hit-hit nakmu-hakmurogon hagakhe dogolik, ageikhe nen ageikhe weagatdugun meke thagalogo motok degetdugun iti nen, hit-hit hinagarlak lak hinerugi hinom nakmu-hakmurogo motok hagakhe dogono.

2 Petrus 3:1

Nagarlak lak nerugi. Hinebe nakmu lak o. Surat alep ageikhe holal waganogo hinoba la'i agagi iti men, yabokane la'i agei iti men, hit wene ebe hinilu mekeat, hinakla mothogon ebesubageik nen iluk la'i aga lagei iti.

1 Yohanes 3:18

Halok he, na'buri o. Nit nen akhuni aperek ninakmurinakhidek dogoligat he, ninape baga anek he, “Ninakmurinakhe dogouok o,” iluk ekhe dogosak erlok dek o. At he, inebe ninakmurinabiluk, niniki baga nen eberogonat yomageisekhe dogouok o.

1 Yohanes 3:3

Nit ninakla nen, “Itithogon hagatlasugun,” iluk oba eberek welagorek meke ninebe tomok nen, at Kristus ekaerek ebe karelek welagarek iti hak, nit itithogonat karelekhe dogosak o.

1 Yohanes 4:1

Nagarlak lak nerugi. Nakmu lak o. Akhuni inebe doalegat nen, “Nit nen Allah ane yokhisekhe lago,” iluk inekalat iliogei meke inebe arat thelekma ageikhasik, o yi ai ti ai liliogei iti nen he, aperek hinoba witluk, wene yokhisugunem, hit nen he, “Allah Agoreke akla dogolik yoknisiliogo,” iluk hinetaiken inoba ebekhup o. At he, “Eberogonat Allah Agoreke akla dogolik iliogo a? Ninat meke akla dogolik yoknisiliogo a,” iluk inobabut tak paliluk nen, inebe hutdisekhe dogono o.