Filipi 3:8 - ALLAH ANE WENW KET MEKE WAROGO WOKNINAKHIKHE WENE

^8-9 Itithogon hutdekhe lagei iti anek 'buk. Noe Etagapogot Yesus Kristus nilu agagi iti hano motogat o. Yi meke ti meke ninat meke hagakhe lagagi iti, weat alomarogo hagakhe lagagimo iluk, hutdekhe lageiat o. At ebe horlalok nen, nipisak hunik motok dogouogoluk, yabu aleke karelogo ulakharek hak, yi meke ti meke alep hagakhe lagagi meke iti, “Weat meke,” iluk here'isasigi iti o. Wene Allah nen ninasuk wakhikhe wene iti baga, nekaerek nen mot hagakhe lagei 'buk. It akhuni aperek inetaiken Kristus oba hakotdisinem, wene inoba meke korogo wokhalok yabokane Allah inom hunogo 'bisekherek hak, an itithogonat netaiken at oba hakotdisigimo, wene noba welageikhe meke korogo wokhasikhe iti o.

Filipi 3:8 ပူးပေါင်းရင်းမြစ်များ

Lukas 1:43

Nen, hat hebe an noe Etagapogot agosa nen 'bitnea wagan yi nayuk o!

Lukas 11:20

Meke re, an nen Allah obatne iti baga mokat obabut weak meke iti mukhogo ula'isikhe lagei halok he, Allah apma 'bisagein iti arat hinoba hakok asi agama o.

Yohanes 14:20

Itithogon hinileken neagun itinem, an nopase nipisak hunik welago, nen, hit an ninom hunik, nen an hit ninom hunik welago meke iti, hinilu asigin o.

Yohanes 14:7

it tha'bokhogonat yogeisekhe dogolik, “Hit an nebe hinilu agap iti, an nopase hinilu asiginat o. Hinilu asigin iti, hurli yogotak hurli nen, at ebe hinilu ageik, hinileken higik, arat hekhe lagap o,” iluk yogeisekhe lageikhemo,

Yohanes 16:3

It nen itithogon hagathinabugun iti, an nopase nipisak ninebe inokodek iti nenat hagathinabugun o.

Yohanes 17:3

It akhuni nen, Allah hogorasusak ebe meke arlik-arlegat motok welagarek, iluk, hebe inilu ageik, nen an Yesus Kristus la'ani agaginmo wagagi meke yi nebe inilu ageik, hagariogei iti re, iniluk motok welageikharek erlo itiat o.

Yohanes 17:8

Wene hat nen yoknikhigin meke emenogo, it arat yogeisigima, arat waganhasik an nobasik ekhe dogolik, Allah nen la'i ageikhemo, at werekma nen eberogonat wageikhe, iluk inilu ageikhasik nen, nebe hutdanha o.

Yohanes 20:13

Itithogon hisasikhemo, it nen men yogokhukha, “He yi neru o. Hat nenaluk de aga lagan,” iluk ugun apasukha, at Maria nen, men yogeisasikhe, “An noe Etagapogot warek akhuni nen wolok o koma 'bi lageikhama heat, an nokodek nen de aga lagei o, nerugi,” iluk yogeisasikhesik nen,

Yohanes 20:28

Itithogon yogokhikhemo, at Tomas nen, “Eiye! Noe, hebe Hetagapogot Allah at hiigi o,” iluk yogokhikhemo,

La'isasikhe 20:24

Itithogon mekeat he, an nebe niluk dogosak itiat kok iluk iti meke kogotdekhe lagei dek. Ninoe Etagapogot Yesus nen nayoko 'bekhe dogolik, at nen, Allah obabut hano nen hagarinakherek wene hano wene itiat yogeisilik lano o, iluk nayoko 'bisikhe itiat ilugun oba kobokhogon hagasigiluk kogotdekhe lagei o.

Roma 8:18

Nit o yogotak welago ya baga re, yi aik ti aik hekhe lago iti, herlekha'bugat negen. Meke re, yabokane, Allah nen ninebe ninat meke hagatninakhunem hogotninabugun iti anek he, kogat o. Halok he, ipisak walhaumo ipisak tak-tak dek, nakla apekhe lagei o.

1 Korintus 2:2

An hit ninom dogolik, nakla nen wene werlek meke ebekhidek, at Yesus Kristus hasik ebekhe dogolik, kok hak he, at ebe o harokhogon meldiluk wakhukha wene itiat anek ebesigin o, iluk nakla apasigi.

1 Korintus 9:10

Nit akhuni nen yabu waganhik, eken palhik, hagakhe dogolik, “An ageikhe nigin o,” iluk inakla arleken akhekhe dogolik yabu waganhik, eken palhik, hagakhorek iti nen, wene iti nit ninobasigat isikhemo holal waganek werek o.

2 Korintus 4:4

Itithogon werek iti, it akhuni agat oba meke inopase Iblis etnogo nen inetaiken Allah oba hakotdigidek meke iti, inetaiken mumerinakhikhemo werek o. At Kristus Allah hakene atma, ebe hogorakharek wene, hano wene iti nen liarinabusak mekeat he, liarinabinogo iluk, inetaiken mumerinakhikhemo werek iti o.

2 Korintus 4:6

At Allah nen ekhe dogolik, “O mum iti akla nen lia atnek,” iluk isikhe iti hak, at nenat nit ninakla mum meke iti liatninakhikhemo welago. Itithogon dogolik, at Kristus elokhoken a'bi'bal yakhunem ninileken lakhalok nen, at Allah hogorakharek meke etnogo ebe itigirlik iluk hutdekhe dogoagaluk itithogon liatninakhikhe.

Galatia 1:16

Wenaknakhikhesik nen, hano wene a'but Yesus hagakhikhe wene etnogo akhuni itikmanke meke yogeisilik nekhe dogoagaluk a'but ebe thelekma inugutneasikhemo, wene akhuni aperek inoba hinok waganhidegat o.

Efesus 4:13

Itithogon hagakhe dogoluk, ninetaiken at oba hakotdiluk dogolik nen, ninebe opakiat meke hakene hagatlageik, Allah a'but iti ebe hutukhogon ninilu ageik, at Kristus yi meke ti meke hasik etaiken bogokhogon horle motok welagarek hak, nit ninetaiken itithogonat horle ageik, hagasugun iti o.

Filipi 1:1

Hit Allah a'buri Kristus Yesus hinom hunik dogolik, o Filipi welagathep meke, hinebe tha'bokhogonat inom, hinougi Allah a'buri hakhisik welageikharek meke inom, Allah a'buri yomageisegarek meke inom, nagarlak lak nerugi. An Paulus Timotius nipisak nen Kristus atuaneke dogolik wene holal waganogo hinoba la'i ago iti o.

Filipi 3:10

At Kristus yi aik ti aik hilik-hilik watlageikhe hak, nipisak tak-tagat, an itithogonat aik hilik-hilik, watlasusagat apekhe lagei. Itithogonatma re, at watlageikhesikmo, Allah obatne baga ilugutdisikhe hak, an itithogonat watlatlukmo, niligutnabigin, iluk, oba eberegat welagei o.

Filipi 3:12

Meke re, an yogotak ya, netaiken motok hanoat ageik, ebe hano meke iti arat horligik, igi 'buk. Aban o. Hano meke iti an horloagaluk, Yesus Kristus nen nebe woknakhikhe iti nen, ebe horla lagaluk, nobatnerogon hagakhe lagei o.

Filipi 3:7

An alep itithogon hagakhe dogolik, “Thaburekhe lagei,” iluk apasigi mekeat he, yogotak Kristus ebe waganhirik oba nen, “Alep hagakhe lagagi iti, weat alomarogo hagakhe lagagimo higi,” iluk hutdekhe lagei o.

2 Timotius 4:6

Akhuni nen an nebe Allah hasik namep ulabogo nasugun oba arat hakok i aga o. Itithogon nasugunmo, an nebe nopase oba lausak tak-tagat agama welagei o.

Ibrani 3:14

Itithogon hagakhe dogolik, ebekeram ninetaiken at oba hakotdisugu meke itiat, niniki nomokhogon herogo werekma, hurli ilugun oba hago dogogun halok he, nit Kristus agarlak lak erugi agosik welago o.

1 Petrus 2:7

Hit hinetaiken at oba hakotdiluk welagap meke nen, “At hano motok,” iluk hutdekhe lagap iti. Mekeat he, it aperek inetaiken at oba hakotdigidek meke inobasik anek he, men isikhe, “It ap tukang o helekit meke halharek meke nen, o ebe halhe dogolik, Helekit yi weak, iluk here'isega meke iti herlaga hagatlaga yi,” iluk isikhe.

2 Petrus 1:2

Hit nen Allah inom, ninoe Etagapogot Yesus inom, ipisak inebe thekekhogon hiniluat welagap iti nen, it inobabut hano etnogo nen hano meke wokhisigik, hinetaiken hapugutdinagagik, kokhogon hagakho motogat dogoak o.

2 Petrus 1:3

At Allah ikhok motogat dogolik, yi meke ti meke elalinat hagakhunem hogorakho motok welageikharek meke etnogo nen ninayoko 'bisikhe iti. Halok he, nit nen at ebe thekekhogon ninilu atluk, nit ninebe niniluk dogolik, at hasik mothogon hagakhe dogoagaluk, at ekaerek obatne baga yi meke ti meke woknisasikhemo ite agosik welago.

2 Petrus 1:8

Hit he, hinobabut iti meke tha'bokhogonat ite atluk, eran-alep kokhogon ite atluk dogogun iti nen, we yugunat alomarogo welageidek, ninoe Etagapogot Yesus Kristus thekekhogon hinilu asugun o.

2 Petrus 3:18

Ninoe Etagapogot tilninakherek meke obabut hano etnogo nen woknisekherek meke iti waganhik, ebe hinilu ageik, hagakhe dogolik, hinetaiken horle atluk dogono. Yogotak ya men, yabokane men, at Yesus Kristus arligat hogorakho motok dogouok o, iluk, “Amin,” igi iti.

1 Yohanes 1:3

Ebe nit ninileken higik, ninasuk holhik, hagakhugu meke iti, ninopase Allah a'but Yesus Kristus ipisak ninom hunik welagorek iti hak, hit nit ninom hano hunik dogouogoluk yokhisekhe lago o.

1 Yohanes 2:19

It akhuni iti inebe re, nit meke palek mekeat he, it inebe eberogonat nit werekmake meke dek o. It inebe eberogonat nit werekmake meke dogolepma re, inebe nit ninom motogat dogolo. Meke re, it iti inebe tha'bokhogonat nit meke dek, ninat meke ekagat hagatlasuagaluk dukhisukha iti o.

1 Yohanes 5:20

At Allah a'but ninoba usa'ageikhesik, Allah ebeat meke ninilu asuagaluk ninetaiken kagalogo yoknisasikhe. Itithogon yoknisasikhemo, nit he, Allah ebeat meke a'but Yesus Kristus ipisak ninom hunik motok welago. Nen, at Yesus ebe Allah ebeat meke dogolik naburlal-haburlal erlo arat welagarek o.