Filipi 3:19 - ALLAH ANE WENW KET MEKE WAROGO WOKNINAKHIKHE WENE

¹⁹ It iti inetaiken Allah oba hakotdiluk dogosak mekeat he, inoba agaken dageiluk hagakharek iti meke baga hakotdiluk dogolik, inekarli asusak mekeat he, hano thalek iti hasigat inekarli dek hogorakhiliogei iti o. Itithogon hagakhe dogolik, inetaiken yi warlok ti warlok, wene agat oba meke oba eberiogei iti, ilugun oba arat nuk asugun o.

Filipi 3:19 ပူးပေါင်းရင်းမြစ်များ

Matius 16:23

Asuk wakhikhemo, at Yesus elokhe dagakhogon Petrus men yogokhikhe, “Hat Iblis higi. Allah akla apekherek tak-tak ebekhidek, akhuni nen apegarek tak-tagat ebetdiluk nelokhe palhe lagan yi, nelokhoma yoma dogogun. Horla lan o,” iluk yogokhikhe.

Matius 25:41

Nen, it niki paike 'bisagein meke iti men yogeisagein, An nopase nen hit homan 'binagakhe meke yirani! An hipiri abu werekma, hit nen melaknikhidek, i abu werekma, hit nen woknikhidek, ap huso werekma hit nen woknakhidek, su ugu dek werekma hit nen ageikhe i'banhidek, u warek werekma men, niki herle warek werekma men, 'bitnea lageidek hagakhe lagagip o. Halok he, an nopase nen, at Iblis agarumi inebe doalegat inom, hetu nagulasusak dekma dogoagaluk inoboluk 'bisasikhemo etoma horla lani o, iluk yogeisagein.

Lukas 12:19

Itithogon 'bakhalok werek korlek, nekaerek nen nasuk warekhe dogolik, Yogo. Mo dageigik, usigik, hagakhe korlek yi tahun ti tahun hasik nameke doalegat erlogat 'bakhigirikmo hano. Yogotak thet walogo dogolik, hipiri nikik, oken apusu nikik, neke dogolik nen, nakla arleken akhekhe dogogin o, iluk nekaerek nasuk warekhe dogogin, iluk apekhe lageikhemo,

Lukas 16:19

Itithogon yogeisasikhesik nen, yabokane at Yesus nen wene ageikhe men yogeisasikhe, “Ap ageikhe kok ameke motok doalegat dogolik nen, asu oko kok hano meke anek ikhigik, yi meke ti meke hanoma akla hiakhogon dogolik, hibiku-yogoku akla motok arleken akhekhe lageikhe.

Lukas 18:4

Itithogon yogosi agunem, ap kok etnogo nen alebageik ane holhidek a'it hekhe lageikhe mekeat, yabokane akla ebekhe dogolik, An nobabut, Allah nayuk degat dogolik, akhuni agugurogo nakmurinakhidek mekeat,

Roma 16:18

It iti, ninoe Etagapogot Kristus apma dogolik, at hasik hagariogei 'buk. We, inekaerek inakla warlok meke hagariogei o. Itithogon hagakhe dogolik, inane hano igik, enago igik, ekhe dogolik, it akhuni aperek inobabut, “I o,” anek egarek meke iti nukhetdisiliogei iti.

Roma 6:21

Meke re, itithogon hagakhe lagagip iti hasik, nena meke thaburasigip nogo? Alebat hagakhe lagagip meke iti hasik, yogotak hinekarli ariogo iti. Itithogon hagakhe dogoluk nen, ilugun oba inebe motok watlageikharek itiat o.

1 Korintus 3:3

Hit-hirat ua palhik, wene palhik, hagakhe lagap halok he, hinobabut akhuni inobaburat welagap o. Akhuni inobabut inikhogat dogolik hagakharek hak, hagakhe lagap iti nen yokhisigi o.

1 Korintus 5:2

Itithogon hagakhe korlegat, hit hogorakhekhe lagap iti. Hit hagasusak he, hinakla weak atluk, ap weak hagakhe werek iti, ula'isausak meke hinom dapukhogon welagap iti.

1 Korintus 5:6

Akhuni nen inane dagakhogon ekhe dogolik, “Hipiri roti meke hisuagaluk eken hikherek meke herlekha'bugat akla 'bilukmo nen, roti ebe tha'bokhogonat hikherek o,” iluk egarek etnogo hinokodek nogo a? Hinilu dogolik hogorakhekhe lagap iti hano 'buk. Weak o.

2 Korintus 11:12

It aperek Kristus nen inayoko 'biluk la'isa ageikhe meke thalek wageikhasik hagariogei meke iti nen, “Nit Paulus ninom tak-tak o,” iluk ekhe dogolik hogorakhiliogei meke iti, inane kokok uagaluk an yogotak hagakhe lagei meke yi re, hagakho motogat dogogin o.

2 Korintus 11:15

At Iblis atuaneke dogolik, at hasik hagakharek mekeat he, at Allah atuaneke dogolik tak-tagat hagakharek meke negen hagatlatluk wiriogei iti inobabut inikhokmaat o. Itithogon hagakharek iti nen, o ilugun oba, Allah nen oko it yi meke ti meke hasik hagakharek tak-tagat hagarinabigin o.

Galatia 6:13

It iti wene Allah nen ninasuk wakhikhe wene etnogo hanorogo holek welageidegat, inekaerek inaperlagap palekhe dogolik, “Hit itithogonat palani o,” iluk inekaerek nen hogorakhekhe dogouogoluk iliogei iti.

Filipi 2:21

At itithogon werek korlek, it akhuni iti inebe tha'bokhogonat anek he, Yesus Kristus hasik hagakhidek dogolik, inekaerek hasik kogotdiluk hagariogei o.

Kolose 3:2

Hinebe watlagagisip nen, yabokane Kristus hinomat hiniluk dogogun meke Allah nen aban thelekmatdigidek aburarek werek iti nen, hinakla nen, yi meke ti meke agat oba meke oba ebekhidek dogolik, pogot oba meke oba ebekhe dogono.

2 Tesalonika 1:9

It itithogon ukum inoba 'biluk, ninoe Etagapogot obatneak nen hogorakho motok welageikharekma il oba etoma nenat weakma etoma motogat dogoagaluk la'isagein o.

2 Tesalonika 2:8

at obabut motok weak meke iti thelekmaat wisigin. Witluk nen, weak hagakho werekma, ninoe Etagapogot Yesus hogorakho korlek yabokane waga dogolik apelaga nen huphogon ebe warogo motok degetdisigin.

2 Timotius 3:4

inebe opakiat meke it aperek nen inasuagaluk yoko lageik, inobabut al hathokhogon hagakhik, inekaerek inalonetdakhalok hogorakhigik, Allah ebe inakmurakhidek, akhuni inakla arlekenhogon hagakharek iti mekeat warlok welageik,

Yakobus 4:16

hinekaerek nen hogorakhigik, siatdakhigik, hagarik nekhe lagap iti re! Itithogon hogorakhekhe lagap iti korloat o.

2 Petrus 2:1

Alebat etoma, ap Allah ane yogeisekhe lagoukha meke thalek wagoukhasik, inekalat ekhe lagoukha meke, Allah a'buri inaklake melarik wagoukha. Iti hakene, yabokane ap ebe wene yakulhisiliogei meke thalek hagarogo witluk, inekalat ekhe dogogun meke hinaklake aperek winam atluk wisugunat o. Winam atluk nen, wene akhuni inebe weagarinakherek wene yokhisa ukisugun. Ukitluk nen, ninoe Etagapogot nen it ninomat tilninabigiluk ninoko palhikhe mekeat he, it nen, “At he, nit ninoe dek o. Ninokodek,” iluk la'belhe dogogun iti. La'belumo, inekaerek nen ukum ibat inoba 'bakhalok weak akhagun o.

2 Petrus 2:13

It nen it aperek weak hagarinakhe dogogun iti baga, Allah nen oko weak hagarinabigin iti. It he, inetaiken thebelu'buk dikeneat weak hagasu warlok nen hagakhe dogogun iti. Su hano werek korlek, mirli meke oba dabulageik, huriagap hagatlageik, hagakherek iti hak, hit pesta isago nukunem, it iti inetaiken thebelu 'buk, yi meke ti meke inetaiken nen nukunem yi weak ti weak hagakhe dogoligat, hinoba ukitluk, hinom opakimo neke dogogun iti.

2 Petrus 2:3

It ap Allah ane yakulisegarek meke thalek winam asugun iti inobabut he, “Nit anek woknisanek,” iluk egarek meke iti nen, hit nen oko wogeisoagaluk, wene inekaerek inakla nen kagalogo inekalat yokhisekhe dogogun iti. Itithogon mekeat he, it inobabut hagakhe dogogun iti baga, at Allah nen, “It iti ukum inoba 'biluk inebe weagarinabigin,” iluk haganeat dik-dukhogon hagatdiluk welageikhe. “Huk huk, maga maga,” iluk welageidek weagarinabigin meke werek o.

Yudas 1:10

Itithogon mekeat he, it akhuni iti yi wene ti wene inokodek dogoligat, abok weak paliogei iti. Itithogon palhe dogolik, wam etaiken dek meke nen hagakherek iti hak, inabusak inilu atluk hagariogei iti baga inobabut oba inebe weagatdakhiliogei iti.

Yudas 1:16

It iti akhuni inabok weak palhik, wenageisigik, isi motogat welageikharek meke. Yi meke ti meke inetaiken nen nukunem, “Warlok o,” inakla apekhe dogolik, iti mekeat hagakhik, inekaerek nen hogorakhekhe dogolik, yi meke ti meke thaburogo horlauwogoluk, it akhuni aperek inane agugurogo hogorinakhik, egarek meke.

A'bikaka 18:7

At he iti, ekaerek nen ekhe dogolik, An nebe he kok dogolik, akhuni napma 'bisalok hagasik welagei ha yoma re! Thoge 'banhama nen nakla weak atluk de aga dogogin nogo? Dek o, iluk yi meke ti meke oba hiakhogon dogolik ekaerek nen kokhogon hogorakhekho motok werek iti hagat, hinet kokhogon wakhe dogolik, akla weak atluk de aga dogoagaluk ukum wogotno o.

A'bikaka 19:20

Itithogon werekma, at ageikha haganeat wageikhesik, “An Allah ane yokhisekhe lagei,” iluk ekalat at helo yeke hakene etnogo il oba elalin meke hagakhe lageikhe etnogo nen, nukhetdisasinem eberogonat thalek, it akhuni aperek nen he, “Nit at helo yeke hakene kok meke yi agarumi,” iluk apusu sirlo hakene inobake waganhik, inetaiken kaneke at helo yeke hakene kok etnogo ebe hakene alino hagarek etnogo oba hakotdigik, hagakhe lageikha mekeat he, yogotak at helo yeke hakene etnogo ebe inom, ekalat nukhetdisekhe laga meke etnogo inom, ipisak ha'isegasik, herle warogo i laut hetu meke yekelekma hotali al hakene obasi weak meke etaga belerang inom-inom amulok nasi motok welagarekma etoma inebe inilukeke la'isekhe laga higi.

A'bikaka 21:8

Itithogon mekeat he, it akhuni aperek inayuk holik meke inom, inetaiken Allah oba hakotdigidek meke inom, Allah alilo meke hagakharek meke inom, akhuni inakharek meke inom, param ha'isigik, ha'isoagaluk hagakhik, hagarek meke inom, elo dek elalinat inakharek meke inom, inetaiken kaneke oba hakotdiluk dogolik, hogorakharek meke inom, inekalat egarek meke tha'bokhogonat inom, i laut hetu meke yekelek werekma, hotali al hakene obasi weak meke etaga belerang inom-inom amulok nasi motok welagarekma etoma inobolukmo la'isagein. La'isagein iti, inebe alebageik elanma hasik watlatlukmo nen, yabokane watlasugun meke itiat o,” iluk yoknekhe.

A'bikaka 22:15

Itithogon mekeat he, it akhuni aperek weak inalilo meke yeke hagakharek hak hagakharek meke inom, it elo dek elalin inakharek meke inom, it param ha'isigik, ha'isoagaluk hagakhik, hagakharek meke inom, it akhuni inakharek meke inom, it inetaiken kaneke oba hakotdiluk dogolik hogorakharek meke inom, it inape baga nen nukhetdisigik, yi meke ti meke hagakhe dogolik, nukhetdisigik, hagakharek meke inebe tomok inom, tha'bokhogonat o kota iti abel itikmanke dogogun o,” iluk yoknekhe.