2 Timotius 2:3 - ALLAH ANE WENW KET MEKE WAROGO WOKNINAKHIKHE WENE

³ Ap ekeraguntek meke inougi inane hologo wim yakhe dogolik, yi aik ti aik hilik-hilik yakharek hak, hat nen Yesus Kristus ane hologo, yi aik ti aik hekhe dogolik, hobakhanini hapugutdiluk hagakhe dogono.

2 Timotius 2:3 ပူးပေါင်းရင်းမြစ်များ

La'isasikhe 23:31

Palhikhemo nen, agarumi tentara meke emenogo nen Paulus ebe wolok wisuagaluk inayoko 'bisikhe hagat, wolok wagoukha. O itinem hibakoat, Paulus wolok, o Antipatris wagoukha.

1 Korintus 13:7

Inakmurogon dogolik, yi wene ti wene inoba agunem, inobakhanini hapugutdiluk welageik, inetaiken Allah oba hakotdiluk welageik, hano asigin iluk inakla arleken akhigik, inetaiken hapukhogon welageik, hagakharek iti.

1 Korintus 9:7

Ap tentara inougi koktek nen inagarumi wim yabuogoluk inayoko 'bisinem, it inekaerek nen iniki oko heago yakharek nogo a? Dek o. Nen, it aperek nen anggur ai ya'iluk nen, eken ikhunem aperek inekaerek nekarek dek nogo a? E a, at he, it aperek inako domba doalegat herogo dogolik irlak apusu aperek inekaerek nekarek dek nogo a? Nekaregat o.

2 Korintus 1:6

Nit yi aik ti aik hekhe lago iti baga, Allah nen hit hinakla hano asuagaluk hinetaiken thebelhik, hinebe tilhinakhik, hagasiginat o. Nen, nit yi aik ti aik hasinem Allah nen ninetaiken thebelherek iti baga, hit itithogonat yi aik ti aik hekhe dogolik hinetaiken thebekhogon hinobakhanini hapugutdiluk dogogun halok, Allah nen hinakla hano asuagaluk hinetaiken thebeliginat o.

1 Timotius 1:18

Timotius na'but o. An wene yi hasuk warogo yokhisik. It aperek nen wene alebat hat hekaerek hasik ekhe dogolik, “At itithogon hagakhe dogogin,” iluk isukha hak, hano wene yi hasik, wim inobatnerogon yakharek hak, hobatnerogon yogeisekhe dogono o.

2 Timotius 1:1

Timotius na'but nakmu o. Allah nen he, “Hit Kristus Yesus hinom hunik werekma hiniluguthinakherek,” iluk, abok yoknisasikhe meke iti, an Paulus nen yogeisilik nekhe dogoagaluk, akla apasikhe baga Kristus Yesus nen nayoko 'biluk la'ani ageikhemo, yoma dogolik wene yi holal waganogo hoba la'i agei iti o. Ninopase Allah inom, ninoe Etagapogot Kristus Yesus inom, ipisak inobabut hano etnogo nen, hano meke wokhikhik, inakmuthakhik, hetaiken hapugutdageigik, hagakhe dogoak o.

2 Timotius 1:8

Itithogon wokhisekherek iti, ninoe Etagapogot abok akhuni aperek yogeisausak hekarli dekhogon pakhogonat yogeisigik, nen, an at hasigat niki herle warogo 'banhama welagei yi hasik, hekarli dek halonhogo welageik, hagakhe dogono. Itithogon hagakhe dogolik, akhuni aperek nen hano wene iti hasik, yi aik ti aik hagatninakho korlegat, an Allah obatne baga welagarek hagat, hobakhanini hapugutdiluk dogono.

2 Timotius 2:10

Iti nen he, it akhuni aperek Allah nen wenageinakhikhe meke Kristus Yesus inom hunisumo, inebe tilinakhik, iniluk hano motok dogoagaluk, hanorinakhik, hagasuagaluk, an itithogon weagatnakho korlegat, nobakhanini hapugutdiluk welagarek iti o.

2 Timotius 2:9

An hano wene itithogon yogeisilik nukhunem, it akhuni aperek nen, it aperek weak hagariogei meke hagarinabu hak, an yi aik ti aik hagatnakhik, niki herle wakhik, hagariogei mekeat he, Allah ane iti herle wasusak erlok dek o. Herle hisalegat werek o.

2 Timotius 3:11

Akhuni nen yi aik ti aik hagatnakhunem, noba aik weak hegerek etnogo hiluat o. Akhuni o Antiokia nen, Ikonium nen, Listra nen, weagatnakho korlegat werekma, ninoe Etagapogot nen iki ageikhe thogotdanhidek tilnakhe lageikhe iti o.

2 Timotius 4:5

It itithogon hagakho korlegat, hat yi meke ti meke hasik, hobabut hebelek dogolik, hoba yi aik ti aik hekhe dogolik, hobakhanini hapugutdiluk dogono o. Hano wene yakulisilik nekharek iti mekeat kogotdiluk Allah nen, “Itithogon yomageisekhe dogono,” iluk, hayoko 'bisikhe meke iti ageikhe here'isigidegat mothogon hagakhe dogono.

Ibrani 10:32

Nagarlak lak nerugi. Hit alep Allah nen hinebe liatdinageikhemo werekma yi aik ti aik wiik-weakhogon hagathinakho korlek, hinaik hundiluk hinobakhanini hapugutdiluk hinobatnerogon welagagip iti hinakla ebetni o.

Ibrani 11:27

Itithogon apasikhesik nen dukhisikhesik, etaiken Allah oba hakotdiluk, “Ap kok Firaun akla aga dagousak iti nayuk o,” iluk akla apigidegat, Allah ebe ninileken hogorek dek meke iti ileken hekhe dogolik negen, “Netaiken at oba hakotdigirikmo iti, dukhiginat o,” iluk o Mesir here'isalok dukhi ageikhe iti.

Ibrani 6:15

Itithogon yogokhikhemo nen, Abraham akla puk ageidek therogo motok welageikhe iti baga, wene abok yogokhikhe meke iti, arat ebeat ageikhe iti.

Yakobus 1:12

Hit aperek yi akin ti akin hinoba aga korlek, hinobakhanini hapugutdiluk dogogun halok, hinakla arleken akhekhe dogono o. Itithogon hinobakhanini hapugutdiluk dogogun halok, Allah nen he, “An nebe hinakmu meke hiniluk motok dogogun meke wokhisagein o,” iluk, abok yoknisasikhe etnogo hit hinobabut palogo nenat wokhisagein o.