2 Petrus 1:6 - ALLAH ANE WENW KET MEKE WAROGO WOKNINAKHIKHE WENE

⁶ Allah ebe hinilu dogolik, iti meke oba dukhogon, inetaiken thebekhogon welageikharek meke iti, ite atno. Hinetaiken thebekhogon dogolik, iti meke oba dukhogon, yi hasik ti hasik hagakhe dogolik, inobakhanini hapugutdiluk welageikharek iti meke, ite atno. Hinobakhanini hapugutdiluk dogolik, iti meke oba dukhogon, Allah apma dogolik, at akla warlok apekherek mothogon hagakharek meke, ite atno.

2 Petrus 1:6 ပူးပေါင်းရင်းမြစ်များ

Lukas 21:19

Halok he, hinetaiken hapugutdakhalok nen, hinakla pukhogonat dogogun iti baga hinoado tilhinabigin o,” iluk yogeisasikhe.

Lukas 8:15

Nen, agat hanoma usa'isikhe iti ebe re, it akhuni aperek hano wene iti inasuk holharethek nen, inetaikenma motok hutukhogon horlegarethek here'isigidek hago motok dogolik, eken motok doalegat ikherek itiat o,” iluk yogeisasikhe.

La'isasikhe 24:25

Itithogon holek werek korlek, mothogon hagakhe dogosak wene iti men, inetaiken thebekhogon dogosak wene iti men, yabokane Allah nen akhuni ninitema waganiluk ukum ninoba 'bigik,kokhik, hagasigin wene iti men, yogeisugunem, Feliks ayuk ageikhe. Ayuk atluk nen, “Yogotak wene arat egen o. Yabokane usak mot aga halok he, wahesigin o,” iluk apuke la'isikhe.

Roma 15:4

Allah ane holal waganek iti baga, ninobakhanini hapugutdiluk welageik, ninakla hano ageik, hagakhorek iti nen, “Hano asigin,” iluk Allah oba eberek dogoagaluk, nirat ninasuk warogo Allah ane baga haganeat holal waganogo 'bisukha iti.

Roma 2:7

At Allah nen, it akhuni aperek nen inebe hogorinakharek meke men, inalon halinakharek meke men, hirli agarek dek meke men, ite asuogoluk ina'it ageidek dogolik inobabut mot hagakharek meke, inebe iniluk motok dogoagaluk hagarinabigin.

Roma 8:25

Meke re, ninakla nen, “Yabokane eberogonat itithogon hagatlasigin o,” iluk apekhe lago meke ninileken higidek dogolik ninobakhanini hapugutdiluk therogo welago.

1 Korintus 9:25

Inae dek asunogo iluk, yi meke ti meke here'isalok inekaerek nen inebe karelegarek iti. It nen, kare-kare ibat weak asigin mekeat wogeisoagaluk karelegarek iti. Meke re, nit nen weak asigin dek meke woknisoagaluk yi meke ti meke hasik karelekhe lago.

2 Korintus 6:4

Akhuni nen he, “It Allah nen inayoko 'bisikhemo, at hasik hagakhe dogosak mekeat hagariogei,” iluk hutdinanuagaluk, yi aik ti aik hagatninakhik, wiik-weakhogon hagatninakhik, umunetnisigik, hagakhe korlek, ninobakhanini hapugutdiluk dogolik yi meke ti meke ekagat hagakhe lago.

Galatia 5:23

inetaiken thebekhogon welageik, inekaerek nen inasuk warek welageik, hagakharek itiat o. Inobabut itithogon hagakhunem, wene ageikhe inoba 'begarek nogo? Motok dek o.

Kolose 1:11

Ninopase Allah obatneak hogorakharek meke etnogo hinobatnethinakhunem, hit hinobatnerogo motok dogobageik iluk ayoko 'bekhe lageiat. Itithogon hinobatnethinakhunem, yi meke ti meke akin hinoba aga korlek, hinakla puk ageidek, hinobakhanini hapugutdiluk dogolik, hinakla arleken akhigik,

1 Tesalonika 1:3

Ninopase Allah il oba sembayan itithogon ekhe dogolik, hit hinetaiken Allah oba hakotdiluk dogolik hagakhe lagap meke inom, akhuni aperek hinakmurogo dogolik, hinobatnerogo yomageisekhe lagap meke inom, hinakla nen, “Ninoe Etagapogot Yesus Kristus nen hano hagatninabigin,” iluk hinebe hinobakhanini hapugutdiluk welagap meke inom, nit nen hit hagakhe lagap meke iti hasik obarlikmatdigidek, eberek motok welago.

2 Tesalonika 1:4

Akhuni nen yi aik ti aik hagathinakho korlegat, hinobakhanini hapugutdiluk dogolik, hinetaiken Kristus oba itithogon hakotdiluk welagathep iti nen, nit nen Allah a'buri o yi ai ti ai natogokharek meke hinabok yogeisekhe dogolik hogothinakhe lago.

2 Tesalonika 3:5

Hit hinakla nen he, “Ninebe Allah akmu o,” iluk hutdigik, hinobabut Kristus obakhanini hapugutdiluk hagakhe lageikhe hagat, obabut waganhik, kokhogon hagakhe dogobageik nen, ninoe Etagapogot ebe hinetaikenma dogolik, hinakla kagalhe dogoak o.

1 Timotius 2:10

Inobake waganu hak he, inobabut Allah a'buri dogolik hagasu hagat, it aperek hanorogon yomageisekhe dogoak.

1 Timotius 3:16

Wene iti, nit Allah apma dogolik eberogonat iluk apogorek wene limago welageikhe meke Allah nenat thelekmatdisikhemo, “Wene iti kok,” iluk pakhogon ekhe lago. Wene iti re, At Kristus ebe akhuniat winam ageikhe o. At Allah Agoreke nen, “At Kristus iti eberogonat,” iluk thelekmatdisikhe o. It malaikat Allah nen yoko usa'isa agarek meke inileken hasukhaat o. Agarumi nen at hagakhe lageikhe wene etnogo yi akhuni ti akhuni itikmanke meke yogeisilik lagoukha o. Akhuni o yi ai ti ai agat oba meke aperek doalegat nen, “At ebe eberogonat,” iluk inetaiken at oba hakotdisukha o. Allah nen pogot oba hogorakho motok welageikharekma lia'isikhemo welagarek o. Wene iti re, at Allah nenat thelekmatdisikhemo pakhogon ekhe lago o.

1 Timotius 6:11

It itithogon hagakharek mekeat he, hat he, hebe Allah a'but welagan iti nen, iti meke hagakhidek lo here'isalok dogono. Itithogon dogolik, Allah akla apekherek tak-tagat hagakhik, apma ukiluk, at hasik hagakhik, hetaiken at oba hakotdiluk welageik, akhuni hakmurinakhik, hobakhanini hapugutdiluk welageik, hobabut enago welageik, hagakhe dogeigiluk, iti mekeat kogotdekhe dogono.

1 Timotius 6:3

It akhuni aperek nen hano wene ninoe Etagapogot Yesus Kristus nen hagakhikhe wene etnogo inom, “Allah apma ukiluk, itithogon hagakhe dogosak,” iluk wene yakulisekhe lago meke iti inom, here'isalok, ninat wene yakulisiliogei meke aperek werek.

1 Timotius 6:6

Meke re, ninagosa lak inakla nen itaklaga dogolik, yi meke ti meke ninikimo wolok wagorek dek iti hak, ninebe watlaga dogolik, yi meke ti meke aperek wolok lugun degat iti nen, ninikierek dogou hak, nit Allah apma ukiluk dogolik ninakla nen, “Erlogat welago,” iluk, ninobakhanini hapugutdiluk dogoumo, ebeat meke thaburagun iti o.

2 Timotius 3:5

akhuni inil oba, Allah a'buri thalek dogolik, inakla nen Allah obatne iti meke here'isigik, hagakhe dogogun o. Yogotak akhuni inobabut iti hakene aperek hagariogei meke halok, hinom hunik dogogup o.

Titus 1:1

Titus na'but o. An Paulus nen, Allah atuaneke dogolik, akhuni at nen wenageinakhikhe meke inetaiken at oba hakotdiluk werekma ago watdisigik, nen, nit at apma dogolik ebe wene yakulisekhe lago wene etnogo hutukhogon inilu asuagaluk yakulisigik, hagasuagaluk Yesus Kristus nen nayoko 'biluk la'ani ageikhe meke etnogo nen, wene yi holal waganogo hoba la'i agei iti o.

Titus 1:8

ap huso wagunem aila hanorogo woginakherek meke halok, hano hagakharek iti meke anek warlok apekherek meke halok, etaiken ekaerek nen therogo welagarek meke halok, obabut mothogon hagakherek meke halok, ebe Allah hasik karelek welagarek meke halok, ekaerek nen asuk warek welagarek meke halok, meldusak o.

Titus 2:2

Ap inarluetek meke iti, it inetaikenma hanorogo apigik, it inetaiken werek welageik, it inetaiken inekaerek nen therogo welageik, it inetaiken Allah ane ebeat apalok aborlok dek welageik, akhuni inakmurogo welageik, yi meke ti meke hasik inoba aik hekhe dogolik, inobakhanini hapugutdiluk welageik, hagakhe dogoagaluk inasuk wakhe dogono.

Ibrani 10:36

Hit nen Allah akla warlok apekherek meke hagakhunem, at nen, “Hit wokhisagein,” iluk abok yokhisasikhe meke iti waganubageik nen, hinobakhanini hapugutdiluk hagakhe dogosak o.

Ibrani 12:1

It akhuni alebageik hagarik wagoukha meke inabok ilik wago iti, inebe doalegat ninaliluke dagakhogon inileken laknisik werek iti nen he, tha ae 'busuk tha ae 'busuk luogoluk yi meke ti meke inoba akin meke nokorlogo here'isalok lageikharek iti hak, nit ninoba akin weak irluk-marlukhogon welagarek meke iti inom, ninobabut weak hagakhorek meke ninoba dekelek motok welagarek meke iti inom, tha'bokhogonat nokorlogo here'isalok, Allah nen, “Hurli iti hurli lano,” iluk yoknisasikhe iti, ninakla nen, “Ninelokhoma piokhogon hurli iti bagaat luok,” iluk, ninobatnerogon laga dogouok o.

Ibrani 6:12

Hit hina'it weak hagakhe dogosak he, nina'it o. It akhuni alep inetaiken Allah oba hakotdiluk ina'it ageidek, it nen, “Eberogonat waganugun,” iluk apekhe lagoukha baga, Allah nen, “Wokhisagein,” iluk abok yogeisasikhe meke ebe waganhukha iti hagat, hit itithogonat it inobabut waganogo hagakhe dogono o.

Ibrani 6:15

Itithogon yogokhikhemo nen, Abraham akla puk ageidek therogo motok welageikhe iti baga, wene abok yogokhikhe meke iti, arat ebeat ageikhe iti.

2 Petrus 1:3

At Allah ikhok motogat dogolik, yi meke ti meke elalinat hagakhunem hogorakho motok welageikharek meke etnogo nen ninayoko 'bisikhe iti. Halok he, nit nen at ebe thekekhogon ninilu atluk, nit ninebe niniluk dogolik, at hasik mothogon hagakhe dogoagaluk, at ekaerek obatne baga yi meke ti meke woknisasikhemo ite agosik welago.

2 Petrus 3:11

Yi meke ti meke tha'bokhogonat itithogon dek asigin iti nen, hit hinobabut nikithogon hagakhe dogosak apegep. Allah nen hagasigin itinem pogot hetu 'bumo re, amulok nen tha'bokhogonat nikik, yi meke ti meke erlo inom herlenhogo nikik, hagasigin iti nen, weak hagakhidek hinobabut karelogo dogolik, hinebe Allah hasik 'bisalok, at ebe therogo dogolik, ebe ibat wisuagaluk hinobatnerogon hagakhe dogono.

A'bikaka 1:9

An hinagarlak hineru Yohanes ninom ninebe Yesus a'buri opakiat meke, yi aik ti aik hagatninakho korlek, ninakla nen, “Yabokane at Allah nen apma 'binanigin,” iluk ninobakhanini hapugutdiluk welagorek iti. Werekma, Allah ane Yesus nen pakhogon yoknisasikhe wene etnogo an nen yogeisilik nekherek iti nen, niki herle warogo i eken palekma o etaga Patmos 'bani ageikhama welagei o.

A'bikaka 14:12

Wene yi hasik kogat hagasusak he, Allah a'buri at ane hologo mothogon hagakhe dogolik, hinetaiken Yesus oba hakotdiluk welagathep meke iti, hinetaiken thebekhogon hinobakhanini hapugutdiluk dogosak o.

A'bikaka 2:2

Hit nen an nobasik hinobakhanini hapugutdiluk hinobatnerogonat hagakhe dogolik, it aperek weak hagakhunem he, Inoba dopok, iluk, inasuk wakhidek here'isegep dek. Nen, it aperek Yesus nen la'isa agama negen hagarogo witluk ugunem, hit nen, Inekalat iliogei, iluk inobabut ekagat palhethebat. Hinobabut itithogon hagakhethep iti an nilu o.