2 Petrus 1:16 - ALLAH ANE WENW KET MEKE WAROGO WOKNINAKHIKHE WENE

¹⁶ Ninoe Etagapogot Yesus Kristus obatneak etnogo ebe wageikhe meke hasik hinilurogo yokhisekhe lago iti, wene suakane akhuni inakla kagalogo pilinekharek meke iti baga lisogon yokhisekhe lago dek o. At ebe Etagapogot meke wageikhemo, ninekaerek ninileken tomok hasugu meke nen yokhisekhe lago o.

2 Petrus 1:16 ပူးပေါင်းရင်းမြစ်များ

Matius 16:27

An abat itaklasi agagi etnogo re, yabokane nopase hogorakho motok welageikharek iti hagat, hagalatluk, it malaikat Allah nen pogot oba nen yoko usa'isa agarek meke emenogo ninom witluk nen, itinem, akhuni tha'bokhogonat inobabut dopok hagakharek meke tak-tagat oko wogeisasigin o.

Matius 16:28

Nen, hit metek welagap yoma meke hinebe aperek watlageidek dogolik, an abat itaklasi agagi etnogo kok Netagapogot dogeigiluk akhuni tha'bokhogonat napma 'bisa agunem hinileken neagunat o, iluk eberogonat yokhisigi,” iluk yogeisasikhe.

Matius 17:1

At Yesus nen itithogon yogeisasikhesik nen, noge iniki 6 iluk nen, Petrus men, Yakobus men, agot Yohanes ipisak men, inarligat wogosik tom uan ageikhe baga dageisikhe.

Matius 24:27

Iti re, an abat itaklasi agagi etnogo wisigin he, o yabok o mo dagei agarekma eloma nen opaki hasigat yegethasinem, o mo ukekherekma yibakha lagarek iti hak wisigin o,” iluk itithogon yogeisasikhesik,

Matius 24:3

Itithogon yogeisalok, tom Zaitun ukul oba dageisikhesik hurek werekma, at ane waganhe lagoukha meke emenogo oba wagoukhasik inarligat dogolik, men yogokhukha, “Hat nen yoknisegen etnogo, mera nen hagatlasigin? Hat hebe wageik, o ilugun oba hagatlageik, arat hagatlasigiluk hagakhe korlek, nena meke tak hagatlagunem nit ninetaiken eketlasugun. Wene hutukhogon yoknisan,” iluk yogokhukhama,

Matius 28:18

Itithogon apekhe korlek, at Yesus ebe inalilu wageikhesik nen, men yogeisasikhe, “Allah nen he, pogot oba meke inom, agat oba meke inom, tha'bokhogonat an iteerek 'banhemo o.

Markus 13:26

Itinem an abat itaklasi agagi etnogo nobatnerogonat oisa akla usa'agunem, akhuni inileken nealok, motok hogotnabugun o.

Markus 14:62

Hinok itithogon waganhikhemo, at Yesus nen men yogokhikhe, “Iti, an nebe yiat o. An abat itaklasi agagi etnogo, at Allah obatneak yi meke ti meke hagasusak anek etnogo alilu iki ebeke kogat hurek dogoluk, pogot oba etoma nen oisa akla usa'agunem hinileken neagun o,” iluk yogokhikhe.

Lukas 9:43

Itithogon wogokhikhemo akhuni emenogo tha'bokhogonat inileken hasukhasik nen, “Allah obatneak iti nayuk e,” iluk hogorakhukha. It akhuni emenogo tha'bokhogonat, at Yesus nen yi hagakhik, ti hagakhik, hagakhe lageikhe meke emenogo hasik, “Eiye!” iluk, hogorakhe korlek, at nen at agarumi ane waganhe lagoukha meke emenogo men yogeisasikhe,

Yohanes 1:14

Ebe Wene etnogo abat ageikhesik ninomat welagagu. Ninomat dogolik, at ebe iti Allah a'but irlagapi itago etnogo, hogorakharek meke ninileken hasugu o. At obabut hano nen, hanorogo hagatninakhik, wene ebe wene yoknisigik, hagakho motok werekma ninileken hasugu.

1 Korintus 1:17

At Kristus nen, an nen akhuni ima usageinakhe dogoagaluk la'ani ageikhe 'buk. Dek o. Allah ane hano wene iti yogeisilik nekhe dogoagaluk la'ani ageikhe. At ebe o baga meldiluk wakhukha etnogo alomatlasunogo iluk, an akhuni inawene meke kagoukhogon egarek iti hakene ekhe dogoagaluk la'ani ageikhe dek o.

1 Korintus 1:23

nit anek he, Kristus o harokhogon oba meldiluk wakhukha wene etnogoat yogeisekhe lago. Yogeisugunem, it akhuni Yahudi meke nen, “Wene iti weak,” iluk kolelogo herek'isigik, nen, it akhuni itikmanke meke nen, “Wene iti, akhuni kepu meke nen egarek hakene iliogei,” iluk here'isigik, iliogei o.

1 Korintus 1:7

Hinetaiken itithogon horletdiluk, ninoe Etagapogot Yesus Kristus thelekmaat wisigin iluk, therogo dogolik Allah nen woknisekherek meke iti, ageikhe aban waganhidek welagap 'buk. Tha'bokhogonat waganhigisip welagap o.

1 Korintus 2:1

Nagarlak lak nerugi. Allah ane iti akla limago werekma, akhuni agat oba meke nen inokodek meke iti, an nen pakhogon yokhisa agagi iti, an nane apusu tik-tik egerek oba, nakla kagalek oba, yokhisa agagi dek.

1 Korintus 2:4

Itithogon dogolik, akhuni inawene an nakla kagalek oba, nane hano baga, nobatnerogon yokhisasigi dek o. At Allah Agoreke obatne baga, yokhisasigimo, ebeat ageikhemo, hinileken hasigip.

2 Korintus 2:17

It akhuni aperek inebe doalegat nen, yi meke ti meke oko hau wolok lageikharek hak, Allah ane itithogonat wolok lageikharek. Meke re, nit anek he, itithogon dek. Allah nen, at ane wolok loagaluk ninayoko 'bisikhe iti nen, at il obaat ninetaiken opakiat Kristus ninom hunigat dogolik, yogeisilik laga lago o.

2 Korintus 4:2

Nit he, akhuni nen yi meke ti meke limago weak hagakharethek inekarli agarek iti meke here'isasugu. Itithogon here'isalok, akhuni nukhetdisigik, Allah ane wene ageikhe meke oba lapelogo yogeisigik, hagakhorek dek. Akhuni yoma inakla tomok nen hutdinoagaluk, wene ebe wene Allah iloba thelekmaat yogeisilik nekhe lago.

Efesus 4:14

Itithogon hagakhe dogolik, ninobabut yekerugi inobabut hisakne nen i hoklabu sabulogo lageik-wageik hagakherek iti hagat, nit itithogon hagakhe dogoak nen iluk, it akhuni aperek inobabut mirlok-marlokthek meke nen inekalat mekeat he, eberogonat thalek nukhetdinanuogoluk, wene ninat wene eran-alep yoknisariogei iti inane holusak dek o.

Filipi 3:21

At ebe witluk nen, ninebe ninekarli negen welago yi, at obatne baga yi meke ti meke tha'bokhogonat, at apma 'bisagein iti nen, at ebe hogorakharek hagat, nit ninebe hogotninabusak mekeat hagarogo 'binanigin o.

1 Tesalonika 2:19

Nit nen he, “Hano asigin,” iluk ninakla arleken akhekhe lago iti, thani inobasik nogo. Ninoe Etagapogot Yesus ebe witluk, “Hano hagakhep,” iluk, at il oba ekagat 'binanumo hogorakhagun iti, erlo ki baga nen nogo. Erlo ninat meke hasik 'buk. Hit hinebe hasigat hogorakhagun o.

2 Tesalonika 2:9

Itithogon warogo degetdisigin meke aban werek korlek, at obabut motok weak meke etnogo, Iblis nen obatne wogosumo akhuni nen hogorakhik, at oba ebekhik, hagasuagaluk, yi meke ti meke hagasusak dek meke eberogonat thalek elalinat hagakhe dogogin.

1 Timotius 1:4

It iti nen he, wene suakane inekalat pilinekhik, Ninebe itithogon itaklarik wagagu, iluk wene erloma nen paldigidegat pilinerik hunik-hunik motok lageik, iliogei iti meke baga inetaiken eberek motok dogunogo nen, igidek here'isoagaluk inasuk watnoat,” iluk yokhikhigi apigi. Wene iti meke isinem, ebe wene ninetaiken Allah oba hakotdiluk werekma, at nen hanotninabigin iti meke kok agarek dek o. Ilugun oba inane kogat thagalharek iti o.

1 Timotius 4:7

Akhuni nen wene suakane ebe wene dek mekeat he, yugunat inekalat pilinekharek meke iti here'isekhe dogono. Here'isalok, Allah apma dogolik hagakharek meke itiat hobatnerogon yakulekhe dogono.

Titus 1:14

It akhuni Yahudi meke ineram nen wene suakane wene pilineriogei meke inom, akhuni aperek nen, ebe wene here'isalok inakla nen kagalogo, “Itithogon hagakhe dogosak,” iluk inasuk wariogei meke iti inom, wene iti herogo dogunogo iluk, inasuk obatnerogonat wakhe dogono.

2 Petrus 2:3

It ap Allah ane yakulisegarek meke thalek winam asugun iti inobabut he, “Nit anek woknisanek,” iluk egarek meke iti nen, hit nen oko wogeisoagaluk, wene inekaerek inakla nen kagalogo inekalat yokhisekhe dogogun iti. Itithogon mekeat he, it inobabut hagakhe dogogun iti baga, at Allah nen, “It iti ukum inoba 'biluk inebe weagarinabigin,” iluk haganeat dik-dukhogon hagatdiluk welageikhe. “Huk huk, maga maga,” iluk welageidek weagarinabigin meke werek o.

1 Yohanes 4:14

Nit nen he, “Allah nen a'but ninileken hekhe lagagu meke iti nen, nit akhuni agat oba meke tilninabuagaluk la'i ageikhemo,” iluk abok pakhogon yokhisekhe lago.

Yudas 1:14

Alebat Adam nen itaklarik waga lagoukhasik, hurli 7 baga hurli, at Henokh itaklageikhe meke nen, it akhuni iti ukum inoba 'bisagein meke hasik men isikhe, “Lakhani. Ninoe Etagapogot etnogo nen agarumi at ekaerek nen yoko usa'isa agarek meke inebe motok doalegat wogosik usasigin o.

A'bikaka 1:7

Lakhani! At ebe oisa baga wagunem, akhuni tha'bokhogonat inebe dopok men, it at thege karluk wakhukha meke men, inomat nen inileken lakhekhe dogolik, inukuloak etaga tomok tha'bokhogonat de asugun o, iluk yokhisigi iti, “Ebeat asuak o,” u hak, “Amin,” igi iti o.