2 Korintus 8:1 - ALLAH ANE WENW KET MEKE WAROGO WOKNINAKHIKHE WENE

¹ Nagarlak lak nerugi. At Allah obabut hano etnogo nen a'buri o Makedonia meke yoma inobabut hano hagarinakhemo hagakha meke hinilurogo yokhisak.

2 Korintus 8:1 ပူးပေါင်းရင်းမြစ်များ

Matius 25:22

Itithogon yogokhikhesik werekma, yabokane at uang 2.000 waganhikhe meke etnogo oba wageikhesik nen, Noe. Hat nen 2.000 woknikhigin etnogo lakhan. An nen yabokane 2.000 ageikhe inomat lapelogo 'bigima yi o, iluk yogokhikhemo,

La'isasikhe 11:23

At Barnabas iti, obabut hano dogolik, etaiken Yesus oba hakotdiluk motok werekma, Allah Agoreke akla kerlekhogon welageikhe iti nen, la'i agoukhama, wageikhesik ileken hisalok, akla nen, “Allah obabut hano nen hano hagarinakhemo werek higi,” iluk akla arleken akhasikhe. Akla arleken akhasikhesik, “Hit tha'bokhogonat hinetaiken ninoe Etagapogot oba hakotdiluk, at hinom hunigat motok dogono o,” iluk inasuk wakhikhe. Inasuk wakhe lageikhemo, akhuni doalegat, ninoe Etagapogot werekma dapuldiluk inebe wiak-wayakhogon hagatlagoukha.

La'isasikhe 16:9

Wagoukhasik dogolik, hibako Paulus a'bikaka men hasikhe. Ap o Makedonia meke ageikhe metek dogolik, “Hat nen nit akhuni Makedonia meke yoma yomaknisa itali me o,” iluk akla kagalogo yogokhunem a'bikaka hasikhe.

La'isasikhe 24:17

An mo dageigik, usigik, tahun doalegat o Yerusalem lageidek welagarik nen, nagarlak lak nerugi ninebe opakiat meke iluk, uang ageikhe yomageisigik, Allah hasik ageikhe 'bisigik, hagasigiluk lagei.

1 Korintus 15:10

Itithogon usak erlok dek mekeat, Allah obabut hano nen nayoko 'bisikhemo yigithogon agagisik welagei o. Nayoko 'bisikhe iti we yugunat 'bisikhe dek iti nen, it aperek tha'bokhogonat yabu herlekha'bugat hakene waganhe korlek, an anek he, doalegat hakene waganhe lagei o. Meke re, itithogon waganhe lagei iti, an nen waganhe lagei 'buk. Allah obabut hano nen, nipisagat dogolik waganiogo o.

2 Korintus 11:9

An hit ninom dogolik uang dek nen, hit nen aperek woknesuagaluk kino hinoba tiolhe lageidek o. Itithogon werekma, it ap nagarlak lak o Makedonia meke wageikhasik erlogat woknesi ageikha iti nen, yi meke ti meke hasik hit hinoba akinetdinogo iluk, apasigisikmo, kino yokhisigidek welagagisik yabokane itihogonat motok hagakhe dogogin o.

2 Korintus 9:12

Hit akhuni hinakmu nen yomageisagun iti baga, Allah a'buri inikimo dek meke anek erlogat waganhe dogogun 'buk. Titu asu hak, akhuni doalegat nen Allah heagei kokhogon wakhe dogogunat o.

2 Korintus 9:2

Hit nen it iti yomageisauwogoluk hinakla arlekenhogon hagakhe lagap iti, hinobabut an nilu. An nen hit hogothinakhe dogolik, it akhuni o Makedonia yoma men yogeisekhe lagei, “Tahun alep iti baga nen, it akhuni o Akhaya etoma meke nen it iti itithogon yomageisauwogoluk it meke natogorlogo 'bisukhasik werek,” iluk hogothinakhe lagei. Hit hinakla arlekenhogon hagakhe lagap iti baga nen, it akhuni yoma aperek inebe doalegat nen it iti 'bisauwogoluk inetaiken aborlok iliogeiat.

2 Korintus 9:4

Itithogon la'isa agei iti, hit nen aban natogorlogo 'bisigidek werekma an akhuni Makedonia meke ninom hinoba wisusak erlok dek o. Alebat an nen ekhe dogolik, “It itithogon eberogonat hano hagasugun werek o,” iluk isigisikmo, an nekarli ageik, hit hinekarli ageik, asunogo iluk, it tak la'isa agei iti o. Hit nen wene iti hasik hutdisigisipmo, hit hinekarli asunogo iluk yokhisausak dek meke igi iti.

Efesus 3:8

Allah a'buri meke tha'bokhogonat inetaga werek hak werek korlegat, an netaga dek, erlok dek meke, at Allah obabut hano nen, hano wene pilinerogo usak erlok dek meke, Kristus nen wogeisekherek etnogo akhuni itikmanke meke yogeisilik nekhe dogoagaluk nayoko 'biluk nayabu iti woknikhikhemo welagei.

Kolose 1:29

An wene iti hasik bogokhogon hagasigiluk, at Kristus obatne etnogo an nakla dogolik nobatnetnakho korlek, nobatnerogonat hagakho motok welagei iti o.

1 Tesalonika 4:10

Hit hinagarlak lak hinerugi o Makedonia etoma meke tha'bokhogonat itithogon hinakmurinakhe lagap mekeat he, nagarlak lak nerugi o. Yabokane kokhogonat hinakmurinakhe dogobageik iluk, hinasuk warogo yokhisigi iti o.