2 Korintus 3:1 - ALLAH ANE WENW KET MEKE WAROGO WOKNINAKHIKHE WENE

¹ Itithogon igi iti, nit ninekaerek nen yabokane ninakeke 'bakhekhe lago nogo a? Motok dek o. E a, at he, it akhuni aperek nen hagakharek iti hak, nit wokninabuagaluk surat hit wokhisigik, it aperek nen wokninabuagaluk surat hit nen wogeisigik, hagakhe lago a? Dek o.

2 Korintus 3:1 ပူးပေါင်းရင်းမြစ်များ

La'isasikhe 18:27

Yakulekhe lagoukhama, o Akhaya wisigiluk hagakhikhemo, Allah a'buri o Efesus meke nen, wene holal waganogo it akhuni o Akhaya meke Yesus ane waganhukha meke inoba la'ekhe dogolik, men isukha, “Apolos hinoba waga iti hanorogo waganino,” iluk holal waganogo wogokhukhama wolok lageikhe. Lageikhesik, it akhuni o Akhaya meke Allah obabut hano nen wene eberogonat inakla apalok waganhukha meke doalegat yomageisekhe lageikhe.

Roma 16:1

He nineru Febe iti ebe hinilurogo yakulhisak. At obabut hanoma Allah a'buri o Kengkrea meke yomageisekherek meke hinoba waga iti,

1 Korintus 10:33

Hit hinobabut an hagakherek hak hagakhe dogono o. An he, yi meke ti meke hagakhe dogolik, nekaerek hanorakhagaluk hagakherek dek. Akhuni inebe doalegat Allah nen tilinakhunem hano asuagaluk hagakherek o.

1 Korintus 16:3

'Bisalok nen, ap wolok lugun meke hit nen, “It erlok,” iluk apegep meke halok inayoko 'bino. Itithogon inayoko 'biluk werekma, an nebe witluk nen, hit nen 'bisegep meke iti wolok loak nen, surat holal o Yerusalem la'isagein o.

1 Korintus 3:10

At Allah obabut hano nen nayoko 'bisikhemo, o iti herlaga re, an netai ekerlek meke nen 'bisigimo, it aperek nen oba dukhogon haliogei iti o. Meke re, akhuni inebe tomok, o herlaga iti baga dukhogon haluogoluk halok he, hutdiluk nen inetai ekerlogo halusak o.

1 Korintus 4:15

Hit Kristus hinom hunik werekma, ap wene yakulhisiliogei meke inebe 10.000 doalegat werek mekeat he, hinopase re, doalegat 'buk. Ina'buri itaginakharek hak, an nenat wene hano wene iti yokhisa agagisik Kristus Yesus hinom hunogo 'binagasigimo welagap iti baga, hinopase narligat agagisik welagei o.

2 Korintus 10:12

Nit nen he, it aperek inekaerek nen, “An hano,” iluk inetaiken nen hogorakhiliogei meke iti, ninom wenakninabusak he, nayuk. An nekaerek nobabut palogo nen nebe it ninom tak-tak u nayugat o. Iti, it nen he, “Inobabut hano waganusak he, nirat,” iluk igik, akhuni isi it meke motok it-it inobabut paligik, hagariogei iti, inebe kepu nen hagariogei o.

2 Korintus 10:18

Akhuni inekaerek nen hogorakhegarek meke iti Allah nen hano iluk woginakherek 'buk. At ninoe Etagapogot nen hogorinakherek meke halok hano iluk woginakherek o.

2 Korintus 10:8

Ninoe Etagapogot nen he, an nen weagathinabuagaluk iteerek 'banhemo 'buk. Hinetaiken horlethinabuagaluk, iteerek 'banhemo welagei iti hasik kogat hogorakhekhe lagei halok he, nekarli asigin dek o.

2 Korintus 12:11

It ap Kristus nen inayoko 'biluk la'isa agarek meke negen hagatlatluk witluk, “At Paulus etaga dek,” iluk egarek iti, an eberogonat netaga dek. It koktek inetagapogot higi! Itithogon dek o. Hit nen hutdaniluk nalon halogo yoknisusak mekeat he, itithogon egethep dek iti nen he, eberogonat ap kepu nen egarek hak, yokhisigi iti o.

2 Korintus 12:19

Hit hinakla nen he, “At Paulus wene ekaerek oba degerogo iliogo,” iluk haganeat nen ekhe lagap mekeat he, an itithogon apekhe lagei dek o. Nagarlak lak nerugi. Hinebe nakmu. At Allah il oba, an Kristus nipisak hunik dogoligat ekhe lagei iti. Yi meke ti meke hagakhe lagei iti, hit hinetaiken horle asuagalugat hagakhe lagei o.

2 Korintus 2:17

It akhuni aperek inebe doalegat nen, yi meke ti meke oko hau wolok lageikharek hak, Allah ane itithogonat wolok lageikharek. Meke re, nit anek he, itithogon dek. Allah nen, at ane wolok loagaluk ninayoko 'bisikhe iti nen, at il obaat ninetaiken opakiat Kristus ninom hunigat dogolik, yogeisilik laga lago o.

2 Korintus 5:12

Iti, hit nen nit hagatninabubageik iluk ninekaerek nen ninakeke 'bakhekhe lago dek o. It akhuni aperek inetaiken hasik ninakeke 'bakhekhe lago dek, inoado itikmanke hasik inakeke 'bakhugunem, hit nen oko nit ninabok hano ekhe dogolik hogotninabubageik nen iluk yokhisigi o.