1 Yohanes 3:10 - ALLAH ANE WENW KET MEKE WAROGO WOKNINAKHIKHE WENE

¹⁰ Allah a'buri inom, Iblis a'buri inom, ninetai ekerlogo inobabut ekagat hagatlariogo yi. Tha nen obabut mothogon hagakhidegat, agarlak lak erugi akmurinakhidegat, hagariogo halok, at iti ebe Allah a'but dek o.

1 Yohanes 3:10 ပူးပေါင်းရင်းမြစ်များ

Matius 13:38

Nen, wen iti ebe re, o agat oba yoma yi ai ti ai tha'bokhogonat o. Nen, ai hano meke ebe re, akhuni Allah apma welageikharek inebe itiat o. Nen, ai weak meke iti ebe re, at obabut motok weak meke a'buri itiat o.

Lukas 6:35

Iti itithogon hagakharek mekeat he, hit nen hinom weak meke hinakmurinakhik, hanorogon yomageisigik, Oko it nen ageikhe woknisoak, iluk apigidegat hinobakha palek yugunat wogeisigik, hagakhe dogogun halok he, hinebe Allah Etagapogot a'buriat werekma, oko kok meke wokhisagein o. At nen itithogonat, it inobabut weak at ebe heagei wakhidek weak hagakhe korlek, at akmurinakherek iti.

Yohanes 1:12

Itithogon thogotdisukha meke re, it akhuni aperek nen, at ebe waganiluk nen, inetaiken at oba hakotdisukhama, Allah a'buri ebeat meke asuagaluk iterinakhikhe.

Yohanes 11:52

Meke re, it akhuni Yahudi meke inobasik anek isikhe 'buk. Akhuni tha'bokhogonat Allah a'buri meke o yi ai ti ai lo lagoukhasik welageikharek meke inom dapukhogon 'bisagaluk, Yesus watlasigin meke hasik isikhe.

Yohanes 8:44

Itithogon hina'it iti, hit hinopase Iblis atma, hit nen at warlok apekherek meke itiat warlok nen hagakhe lagap iti. At Iblis iti erlo baga nenat akhuni inakherek mekeat o. At wene ebe wene akla dek iti nen, wene ebeat wene isinem inane legekherek dek iti. Iblis ekalat ekherek iti, at obabut ikhogatma ekalat ekherek iti. Inekalat egarek iti, erlo arat o.

Yohanes 8:47

Tha nen ebe Allah meke halok, Allah ane iti asuk hokherek mekeat, hit he, hinebe allah meke 'buk. Ninat meke iti nen he, at ane hinasuk holusak hina'it iti o,” iluk yogeisasikhe.

La'isasikhe 13:10

men yogokhikhe, “Hat hebe Iblis a'but yi re! Akhuni dalinakhik, nukhetdisigik, hagakho motok dogolik, yi meke ti meke mot hagasuogoluk hagakhunem, hat nen degetdigiluk hagakho motok welagan yi re! Ninoe Etagapogot nen, akhuni tilninabigiluk holak mothogon ya'inanhikhe meke, hat nen huk ageidegat korlotdigiluk hagakho motok welagan iti nenaluk.

Roma 13:8

Hit he, akhuni hinoba palegeke dogosak dek. Hinoba palegeke dogou hak, hit-hit nakmu-hakmurogon hinetaiken hunik dogosak itiat o. Wene Allah nen ninasuk wakhikhe wene etnogo tha'bokhogonat tak-tagat hagasu hak, inebe nakmu-hakmurogo inetaiken hunik dogosak itiat o.

Efesus 5:1

Hinebe Allah a'buri at akmu meke welagap iti nen, at obabut waganino.

Kolose 3:14

Itithogon hagakhe dogolik, ebe kok hakene re, akhuni inebe hinakmurogon dogono. Inakmurogon welageikharek meke iti baga, hinebe opakiat motok dapukhogon dogou hagat dogogun iti.

1 Timotius 1:5

Inetaiken Allah nen horinakhunem inekaerek inakla nen he, “An wene noba dek, nakla thiok welagei,” iluk apekhe dogolik, inetaiken eberogonat Allah oba hakotdiluk welageikharek iti nen, akhuni inakmurogon welageikharek o. Halok he, it itithogonat dogoagaluk inasuk wakhe dogono, iluk yokhikhigi iti o.

1 Yohanes 2:29

At Kristus Allah a'but obabut hano mothogon anek hagakherek etnogo hinilu halok he, hit hinakla nen he, “It akhuni aperek inobabut hano mothogon hagakharek meke inebe tomok Allah a'buri yabokane itaginakhemo werek,” iluk hinilu asusagat o.

1 Yohanes 3:1

At Allah nen he, “It yi an na'buri,” iluk itakninakhikhemo eberogonat nit ninebe at a'buri welago. Itithogon welagorek iti nen, ninebe at akmu motok welagarek iti 'bikhani! Itithogonat mekeat he, it akhuni agat oba meke inobabut inikhok meke emenogo nen Allah ebe inokodek iti nen he, nit ninebe inokodegat o.

1 Yohanes 3:2

Nagarlak lak nerugi, nakmu lak o. Yogotak nit ninebe Allah a'buri welago meke re, yabokane ninebe dogogun meke thelekma ageidek aban limago werek o. Itithogonat meke re, nit ninilu re, Yesus ebe yogotak werek meke ninileken hutukhogon hugun iti nen, at wisigin itinem ebe wagunem, nit ninebe at ebe werek iti hagat, hagatlasugun o.

1 Yohanes 4:21

Iti nen, at Kristus nen ninasuk wakhe dogolik, “Allah hinakmurogon dogolik, hinagarlak lak hinerugi hinakmurogonat dogono o,” iluk yoknisasikhe iti.

1 Yohanes 4:6

Meke re, nit he, ninebe Allah a'buri meke dogolik ninane isinem, it aperek Allah ebe inilu meke halok, inasuk holhik, nen, it aperek inebe Allah a'buri meke 'buk, ninat halok he, inasuk holhidek here'isigik, hagakharek o. Itithogon hagakhunem nit nen he, “Allah ebeat meke Agoreke it iti inakla werek, nen it aperek iti mokat nukhetdinanherek meke inakla werek,” iluk ekagat hutdisogorek iti o.

1 Yohanes 4:8

Nen, at Allah obabut he, nit akmutninakho welagarek iti nen, tha nen nakmu-hakmurogon dogogin dek halok, at iti nen Allah ebe okodek werek o.

1 Yohanes 5:19

It akhuni agat oba meke inobabut inikhok meke iti tha'bokhogonat he, at obabut weak meke etnogo iki baga welageikharek. Itithogon welageikharek mekeat he, nit anek he, Allah ebeat a'buri meke welago, iluk ninilu o.

1 Yohanes 5:2

Itithogon ninakmurogo dogosak iluk hutdiluk, Allah ebe ninakmurogo dogolik, wene at nen ninasuk wakhikhe wene iti hologo mothogon hagakhe dogolik, at a'buri itaginakhe meke iti ninakmurogo dogosagat o.

3 Yohanes 1:11

Nagarlak o. Hebe nakmu. Hat nen he, it akhuni inobabut weak hagakharek meke iti, inobabut waganhun o. It inobabut hano hagakharek meke halok, inobabut waganhe dogono o. Tha nen obabut hano anek hagakherek meke iti ebe Allah a'but mekeat he, tha nen obabut weak anek hagakherek meke halok, at nen Allah ebe ileken hekerek dek okodek o.