1 Yohanes 2:18 - ALLAH ANE WENW KET MEKE WAROGO WOKNINAKHIKHE WENE

¹⁸ Na'buri o. O yogotak he, o ilugun oba welago o. Akhuni aperek nen, “Yabokane ap ageikhe Kristus inom motok weak meke wisigin,” iluk yokhisasukhama, hinasuk holhigip iti hak, o yogotak he, Kristus inom weak meke inebe doalegat arat thelekma asi ageikhasik werek iti nen he, nit nen, “O yogotak eberogonat o ilugun oba welago,” iluk ninetai eketlatluk hutdekhe lago.

1 Yohanes 2:18 ပူးပေါင်းရင်းမြစ်များ

Matius 24:11

Nen, it aperek inekalat Allah ane yogeisiliogei meke thalek hagatlatluk hinoba witluk nen, akhuni motok doalegat nukherinabugun o.

Matius 24:5

Akhuni inebe doalegat nen inetaga an netaga meke thalogo nen men ilik wisugun, Kristus etnogo nebe wagei yiat o, iluk, inane eberogonat thalek akhuni doalegat nukherinabisugun o.

Markus 13:6

Akhuni inebe doalegat nen inetaga an netaga meke thalogo nen men ilik wisugun, At wisigin isukha etnogo an nebe wagei yiat o, iluk inane eberogonat thalek akhuni doalegat nukherinabisugun.

Yohanes 21:5

Itithogon hutdigidek werekma, at Yesus nen men yogeisasikhe, “Warligi yi. Nagarumi. Ikan ageikhe waganhep a?” iluk yogeisasikhemo, it nen, “Motok dek o,” iluk yogokhukhama,

Roma 13:11

Itithogon hagakhe dogosak iti nenaluk. Iti re, nit ebekeram ninetaiken Allah baga hakotdisugu itinem he, o hanotninabigin hurli walegat welageikhe. Meke re, yogotak horogat asi iriogo iti nen, hit noge ekhe lagap iti, hiniluk asusak mo aga iti hutdekhe lagap o.

Roma 13:12

O hibako welagosik yi, horok yaat o wi asigin. Akhuni o mummo dogolik hagakharek meke iti here'isauwok. Sikhe thege waganharethek hebelogo welageikharek hak, nit o lia meke waganiluk ninobabut hebelogo dogouok.

Ibrani 1:2

Meke re, o ilugun oba, nit yogotak welago ya baga, Allah nen a'but yogokhikhemo, at nen nit yakulnisa ageikhe. At a'but iti, erloma Allah nen yi meke ti meke tha'bokhogonat winametdisikhe iti, ebe at a'but nenat winametdisikhemo, iteerek dogoagaluk meldisikhemo dogogin iti o.

1 Petrus 1:20

Kristus, Allah nen pogot agat yoma aban walhigidek dogolik, akla apalok ayoko 'bisikhesik welageikhesik nen, ebe yogotak o ilugun hurli baga hit hinobasik thelekmaat la'i ageikhemo hinebe tilhinakhikhe iti.

1 Petrus 1:5

Hinetaiken at Allah oba hakotdiluk welagap iti nen, at obatne baga hakhisik dogoluk nen, yabokane hinebe hanothinabigin meke ilugun hurli baga winametdigin iti.

1 Petrus 4:7

Yi meke ti meke tha'bokhogonat ilugun oba hagatlasigin meke horogat asi aga iluk, sembayan ekhe dogouogoluk, hinetaiken thebekhogon dogolik, hinobabut hebelogo dogono.

2 Petrus 2:1

Alebat etoma, ap Allah ane yogeisekhe lagoukha meke thalek wagoukhasik, inekalat ekhe lagoukha meke, Allah a'buri inaklake melarik wagoukha. Iti hakene, yabokane ap ebe wene yakulhisiliogei meke thalek hagarogo witluk, inekalat ekhe dogogun meke hinaklake aperek winam atluk wisugunat o. Winam atluk nen, wene akhuni inebe weagarinakherek wene yokhisa ukisugun. Ukitluk nen, ninoe Etagapogot nen it ninomat tilninabigiluk ninoko palhikhe mekeat he, it nen, “At he, nit ninoe dek o. Ninokodek,” iluk la'belhe dogogun iti. La'belumo, inekaerek nen ukum ibat inoba 'bakhalok weak akhagun o.

2 Petrus 3:3

Wene ebe yi tak hutdusak. O ilugun hurli baga, akhuni aperek inane sagun weak meke inetaiken oba nen nukunem inakla nen kagalogo weak hagakhe dogolik, hinoba witluk, inane sagun yokhisekhe dogolik,

1 Yohanes 2:22

At ekalat ekherek meke iti ebe tha apegep. At iti nen, “Yesus ebe Kristus dek o,” iluk kolelogo la'isekherek meke iti dek nogo? Itiat o. At Kristus inom motok weak meke ebe re, ninopase Allah a'but Yesus inom inebe kolelogo la'isekherek meke itiat o.

1 Yohanes 4:1

Nagarlak lak nerugi. Nakmu lak o. Akhuni inebe doalegat nen, “Nit nen Allah ane yokhisekhe lago,” iluk inekalat iliogei meke inebe arat thelekma ageikhasik, o yi ai ti ai liliogei iti nen he, aperek hinoba witluk, wene yokhisugunem, hit nen he, “Allah Agoreke akla dogolik yoknisiliogo,” iluk hinetaiken inoba ebekhup o. At he, “Eberogonat Allah Agoreke akla dogolik iliogo a? Ninat meke akla dogolik yoknisiliogo a,” iluk inobabut tak paliluk nen, inebe hutdisekhe dogono o.

1 Yohanes 4:3

Itithogon mekeat he, it aperek nen Yesus hasik wene itithogon pakhogon egarek dek meke nen isi halok he, hit nen he, “It iti inakla Allah Agoreke 'buk. Ninat meke werek o,” iluk hutdisekhe dogosagat o. It iti hasik wene Allah nen haganeat yoknisekhe dogolik, “At ageikhe Kristus inom motok weak meke wisigin etnaga o,” iluk yoknisasikhe meke, hinasuk holhigip etnaga, yogotak agat oba yoma inebe arat thelekma ageikhasik werek itiat o.

2 Yohanes 1:7

Itithogon hagakhe dogosak iti, it akhuni inebe doalegat nen, “Yesus Kristus iti abat itaklasi ageidek,” iluk, nukhetdisegarek meke inebe thelekma ageikhasik agat oba yi ai ti ai tha'bokhogonat liliogei iti nen, nakmu-hakmurogon hagakhe dogosak igi iti o. It iti inebe re, Kristus inom motok weak dogolik akhuni nukhetdisegarek meke etnogoat o.

Yudas 1:18

It nen he, wene men iluk yokhisasukha iti, “O ilugun kobokhogon oba dogolik, it akhuni aperek Allah ebe ina'it dogolik inakla nen, yi meke ti meke inetaiken nen nukunem, Warlok, iluk iti mekeat weak motok hagakhe dogolik, inane sagun yokhisasugun o,” iluk yokhisasukha iti.