1 Yohanes 1:6 - ALLAH ANE WENW KET MEKE WAROGO WOKNINAKHIKHE WENE

⁶ Nen, nit he, ninane baga nen, “At ninom hunik welago,” iluk ekhe dogoligat he, o mummo dogolik inobabut hagakharek meke iti hagakhe lago halok he, ebeat meke hagakhidek ninekalat ekhe lago o.

1 Yohanes 1:6 ပူးပေါင်းရင်းမြစ်များ

Matius 7:22

O ilugun hurli baga hagatlasigin itinem, akhuni doalegat noba witluk nen, yigithogon yoknesugun, Ninoe. Nit nen, hat hetaga bagaat wene hano wene yakulisigik, mokat obabut weak meke akhuni inakla ukisukhasik werekma mukhogo ula'isigik, hagasusak dek meke elalinat doalegat hagakhik, hagarik nekhe lago emenogo dek a? iluk ugun mekeat he,

Yohanes 11:10

Meke re, tha nen o hibako laga halok he, at akla lia meke dekma iti nen, isok a'bit dikhogon waragein o,” iluk yogeisasikhesik,

Yohanes 12:35

Itithogon yogokhukhama, at Yesus nen, men yogeisasikhe, “An nebe o liarinakherek meke etnogo we niki herlekha'bugat ninom dogogun o. Halok he, at tha nen o hibako mummo laga halok he, O koma laga lagei heat, iluk okodegat liliogo iti nen, hit lagunem o mum asinogo, iluk, an o liarinakherek meke ninom werek korlek yaat lia baga laga dogoni o.

Yohanes 12:46

Nen, it akhuni inetaiken an noba hakotdugun meke tha'bokhogonat, o mum oba dogunogo iluk, liarinabigiluk an nebe liarinakherek meke agat oba yoma usa'agagi o.

Yohanes 8:12

Yabokane, at Yesus nen it akhuni emenogo wene ageikhe men yogeisasikhe, “Akhuni agat oba meke liarinakherek iti, anat o. Tha nen an noporlik nekhe dogogin halok he, an nebe lia dogolik inilugurinakherek meke etnogoat woknabigin iti nen, at iti o mummo nekhe dogogin dek o,” iluk ekhe lageikhemo,

1 Timotius 4:2

Hagakhe dogolik, akhuni iniki thenap atlukmo, ki meke hakhogo heat iluk egarek iti hak, it iti inakla ko'bot atluk nen, Yi weak hagakhoma higi. Yi hano hagakhoma higi, iluk apigidek yugunat hagakhe dogogun. Itithogon hagakhe dogolik, inekalat dal-kalhogon hagarinakhe dogogun iti o.

Yakobus 2:14

Nagarlak lak nerugi. Hat ageikhe tha nen, “Netaiken Allah oba hakotdiluk welagei o,” iluk ekhe dogoligat he, hiki baga nen akhuni aperek yomageisigidek halok he, hane anek, “Netaiken Allah oba hakotdiluk welagei,” iluk ekhe lagan iti baga ageikhe hagatlasigin nogo a? We yugunat ekhe lagan o. Nen, hetaiken anek itithogon hakotdiluk dogoumo, iti baga erlok tilhabigin nogo a? Erlok dek o.

Yakobus 2:16

hat nen at ebe hasik yomakhigidek dogoligat he, hane baga nen anek, “Nagarlak o. Hoba agaken thok-thok hipiri ha'ithogonat hakla arleken akhilik lan o,” iluk egen halok he, ageikhe hagatlasusak nogo? We yugunat o.

Yakobus 2:18

It aperek nen itithogon isinem men usak, “Hat nen he, Netaiken Allah oba hakotdiluk welagei ekhe lagan iti. Nen, an nen niki baga nen yomageisekhe lagei iti. Halok he, hat hiki nen yomageisigidek dogolik, hetaiken anek Allah oba hakotdiluk welagei iluk ekhe lagan iti, ebe ki? Inugutnean ta. An anek he, Netaiken Allah oba hakotdigirik welagei, iluk, niki baga nen, yomageisekhe lagei meke ekagat werek iti, inugutheageinat o,” iluk yogeisausak o.

1 Yohanes 1:10

Itithogonat meke re, nit nen he, “Weak ageikhe hagakhidek welago,” iluk ogorek halok he, nit nen, “Allah ekalat ekherek,” iluk u hagat ogorek iti nen, Allah ane nit ninakla motok dek o.

1 Yohanes 1:3

Ebe nit ninileken higik, ninasuk holhik, hagakhugu meke iti, ninopase Allah a'but Yesus Kristus ipisak ninom hunik welagorek iti hak, hit nit ninom hano hunik dogouogoluk yokhisekhe lago o.

1 Yohanes 1:8

Itithogonat meke re, nit nen ekhe dogolik, “Nit weak ageikhe hagakhidek,” iluk ekhe lago halok he, ninekalat ninekaerek nukhetdakhekhe lago iti nen, ebe wene ninakla motok dek o.

1 Yohanes 2:4

Meke re, tha nen, “An he, Allah ebe nilu,” iluk ekhe dogoligat he, at nen wene ninasuk wakherek wene iti hologo mothogon hagakhidek halok he, at ekalat ekherek iti. Halok he, ebe wene iti akla motok dek o.

1 Yohanes 4:20

Itithogon mekeat he, akhuni nen inagarlak lak inerugi inileken hisegarek meke inakmu dek dogoligat he, Allah inileken hegarek dek meke inakmu dogosak apegep? Erlok dek o. Halok he, at ageikhe agarlak lak erugi motok a'it welagarek meke nen, “An Allah nakmu,” iluk iliogo halok he, ekalat iliogo o.