1 Timotius 6:12 - ALLAH ANE WENW KET MEKE WAROGO WOKNINAKHIKHE WENE

¹² Akhuni inae walhauwogoluk tha ae 'busuk tha ae 'busuk walhegarek hak, niniluk motok dogogun iti meke horla lagaluk, hetaiken Allah oba hakotdiluk dogolik, at hasik hobatnerogon hagakhe dogono. Itithogon hagakhe dogoluk, iti meke horla lanogoluk, Allah nen hayoko 'bisikhemo, hat nen he, “Netaiken Kristus oba hakotdiluk itithogon hagakhe dogogin,” iluk akhuni doalegat inil oba pakhogon isigin iti tak-tagat hobatnerogon hagakhe dogono.

1 Timotius 6:12 ပူးပေါင်းရင်းမြစ်များ

2 Korintus 6:7

Itithogon dogolik, Allah obatne baga ebe wene yogeisilik nekhe lago. Itithogon yogeisilik nekhe dogolik, akhuni nen he, “Sikhe thege niniki ebelak-ebelak hago welago,” iluk egarek hak, nit Allah akla warlok meke hagakhe lago iti, niniki ebelak-ebelak hago welago.

2 Korintus 9:13

Itithogon yomageisekhe dogogun iti baga, it Allah a'buri o Yudea meke nen, “It akhuni Korintus meke Kristus hagakhikhe wene hano wene etnogo waganhukhasik, Ninobabut mothogon hagakhe dogogun o, iluk isukha tak-tagat hagariogei. Itithogon hagakhe dogolik it meke aperek warlok ageidek nit yomaknisigik, it aperek tha'bokhogonat yomageisigik, hagakha o,” iluk hinobabut ekagat paldiluk Allah hogorasugunat o.

Filipi 1:30

An alebat he, wim yakhe dogolik inobatnerogon yakharek hak, hano wene hasik nobatnerogon hagakhunem hinileken neasigibat. Nen, yogotak nabok holhe lagabat. Iti meke, hit ninom dapukhogon hagakhe lagoat iti o.

Kolose 3:15

At Allah nen Kristus ebe opakiat meke hinom dapukhogon hunik dogobageik iluk hinayoko 'bisikhe iti nen, yi meke ti meke hagasuogoluk, hinakla nen, “Kristus nen ninom dapukhogon 'binanhikhemo welago,” iluk, wene itiat kogotdekhe dogolik, mothogon hagakhe dogono. Itithogon hagakhe dogolik, Allah ebe heagei wakhe dogono.

2 Tesalonika 2:14

Ninoe Etagapogot Yesus Kristus hogorakho motok welageikharek hak, hit itihogonat hinom hogothinabuagaluk, Allah warlok nen hano wene nit nen yokhisa agagu iti baga, hinayoko 'bisekhemo welagap.

1 Timotius 1:18

Timotius na'but o. An wene yi hasuk warogo yokhisik. It aperek nen wene alebat hat hekaerek hasik ekhe dogolik, “At itithogon hagakhe dogogin,” iluk isukha hak, hano wene yi hasik, wim inobatnerogon yakharek hak, hobatnerogon yogeisekhe dogono o.

1 Timotius 1:19

It aperek nen, “Wene iti eberogonat,” iluk waganharethek nen, inakla thiokhogon dogosak mekeat he, yabokane weak hagariogei iti nen, ku ima mak-makhogon usekherek hak, horla usega iti. Hat iti hakene hagakhidek, hakla nen, “An weak ageikhe hagakhidek, nakla thiokhogon welagei,” iluk hetaiken Allah oba hakotdiluk hobatnerogon hagakhe dogono.

1 Timotius 4:14

Hat hobasik haganeat it ap Allah a'buri therisik welageikharek meke nen iniki hukuloak thebelho korlek, it ap Allah ane yogeisegarek meke nen men isukha iti, “Hat yabokane itithogon hagakhe dogono,” iluk, yokhikhukha tak-tagat, Allah Agoreke obabut hano nen ayabu hagakhe dogoagaluk ninobabut dopok woknisekherek etnogo hat wokhikhikhe meke iti baga hagakhidek hobakhanini here'isagun o.

1 Timotius 6:13

Allah akhuni ninebe inom, yi meke ti meke inom, tha'bokhogonat ninilugutninakherek meke etnogo il obaat, Kristus Yesus akhuni nen ap Pontius Pilatus oba wolok lagoukhama, ane eberogonat pakhogon yogokhikhe etnogo il obaat, wene yi hasuk warogo yokhisigin.

1 Timotius 6:19

Itithogon hagakhe dogogun halok he, yi meke ti meke yabokane meke hasik natogorlogo 'begarek hak, hano hagakhe dogolik, yabokane motok dogogin meke hasigat 'bakhekhe dogoluk nen, ninebe eberogonat ninilugutninabumo dogogun iti mekeat horloagaluk inasuk wakhe dogono o.

2 Timotius 1:9

At Allah nen ninebe tilninakhik, at ekaerek a'buri asuagaluk ninayoko 'bigik, hagakhikhe iti, nit nen ageikhe hagakhugu baga ninayoko 'bisikhe 'buk. At he, Allah obabut hano nen, ebekeram yi meke ti meke aban winametdigidek dogolik, yabokane Kristus Yesus hagasigin oba hanotninabigiluk, ekaerek akla apalok ninayoko 'bisikhe iti.

2 Timotius 2:2

An nen wene akhuni doalegat inil oba yakulhikhigimo waganhigin meke etnogo, hat nen it akhuni aperek inobabut hupunhek meke nen it aperek yakulisekhe dogoagaluk, inoba 'bin o.

2 Timotius 4:7

Tha ae 'busuk, tha ae 'busuk lageikharek hak, an netaiken Allah oba hakotdiluk motok dogolik, at hasik nobatnerogonat hano hagarik waga lagarik nen, hurli baga arat hagatlasi aga o.

Ibrani 13:23

Nen, ninagot Timotius etnogo, ebe arat herle hisalogo ula'egama nen hinilurogo dogobageik iluk yokhisigi o. At ebe ibat-ibat an noba waga halok he, an yabokane hit hinoba 'bithisa aga dogolik nipisak wisugun o.

Ibrani 3:14

Itithogon hagakhe dogolik, ebekeram ninetaiken at oba hakotdisugu meke itiat, niniki nomokhogon herogo werekma, hurli ilugun oba hago dogogun halok he, nit Kristus agarlak lak erugi agosik welago o.

Ibrani 6:18

Wene hupuk palogo yogeisasikhe iti, nit Allah apma uki ago meke ninakla nen, “Hanotninabigin,” iluk eberek welago meke ninetaiken hapukhogon dogoagaluk nirat abok yoknisasikhe. Abok yoknisigik, hupuk palhik, wene pere isikhe iti, nit nen, Allah ekalat ekherek motok dek, iluk ninetaiken hapukhogon dogoagaluk yoknisasikhe iti.

1 Petrus 3:9

Akhuni aperek nen hit weak hagathinakhunem, hit nen oko weagarinakhup o. Nen, inane sagun weak yokhisugunem, hit nen oko hinane sagun yogeisugubat o. Oko re, Allah nen inebe hanorinabuagaluk, ayoko 'bekhe dogono. Yabokane at nen hano meke wokhisagaluk hinayoko 'bisikhe iti nen, hit nen oko hano meke wogeisekhe dogono.

1 Petrus 5:10

Werekma, at Allah ebe hogorakho motok dogogun iti hak, hit Kristus hinom hunik werekma hinomat hogothinakho dogoagaluk hinayoko 'bisikhemo, yogotak ya herlekha'bugat anek hinoba yi aik ti aik hekhe dogoluk, yabokane, at obabut hano motok etnogo nen, hinetaiken aban meke thirliphogon hagathinakhik, hinetaiken horlethinakhik, hinobatnethinakhik, hapuguthinakhik, hagasigin o.

1 Yohanes 2:25

Nen, at ekaerek nen, “Wokhisagein,” iluk abok yoknisasikhe etnogo, ninebe naburlal-haburlal hagatninabigiluk isikhe o.

Yudas 1:3

Nagarlak lak nerugi. Hinebe nakmu lak o. Wene Allah nen hit ninomat tilninakhikhe etnogo hasik wene holal waganogo hinoba la'isigiluk nakla eberek motok welagarik nen, yabokane netaiken thebelusak erlok dek agama re, wene men hasik la'i agei iti. Iti, it akhuni aperek Allah ebe ina'it meke nit ninobakha palek werek korlek ninakla ukitluk nen, Allah obabut hano nen wokninakherek meke iti, it nen dagakhogon wene ninat meke yokhisekhe dogolik, “Weak meke yugunat hagakhe dogosak,” iluk, ninoe Etagapogot Yesus Kristus obatneak etnogo ebe here'isalok, hagariogei iti. Itithogon hagariogei iti nen, Allah nen, “Ukum itithogon inoba 'bigin,” iluk isikhemo haganeat nen holal waganogo 'bisukhama werek. Wene Allah nen opaki hasigat nit a'buri woknisasikhemo ninetaiken oba hakotdiluk welago iti meke, it iti nen degetduogoluk hagakhunem, hit nen irlirli waganogo hinobatnerogo hago dogobageik iluk hinakla kagalogo la'i agei iti.

A'bikaka 3:3

Hit itithogon metokhogon melatluk hinobatne ageidek halok he, akhuni inilarlurlu waganuogoluk limago wageikharek iti hak, an itithogonat, hit nen, At itinem wisigin, iluk hinokodek werekma wisunogo nen, wene ebekeram yakulhisasukhama hinasuk holhigip meke hinakla ebetdiluk nen, weak hagakhe lagap meke 'bualogo thogotdisalok hinobabut hebelatluk, wene itiat hiniki a'bethogon hago dogono o.