1 Timotius 6:11 - ALLAH ANE WENW KET MEKE WAROGO WOKNINAKHIKHE WENE

¹¹ It itithogon hagakharek mekeat he, hat he, hebe Allah a'but welagan iti nen, iti meke hagakhidek lo here'isalok dogono. Itithogon dogolik, Allah akla apekherek tak-tagat hagakhik, apma ukiluk, at hasik hagakhik, hetaiken at oba hakotdiluk welageik, akhuni hakmurinakhik, hobakhanini hapugutdiluk welageik, hobabut enago welageik, hagakhe dogeigiluk, iti mekeat kogotdekhe dogono.

1 Timotius 6:11 ပူးပေါင်းရင်းမြစ်များ

Roma 14:19

Halok he, ninetaiken hapukhogon dogouogoluk, nit-nit ageikhe nen ageikhe etaiken horletdigik, ageikhe nen, ageikhe etaiken horletdigik, ninobatnerogon hagakhe dogouok o.

1 Korintus 10:14

Iti nen, angarlak lak nerugi. Hinebe nakmu lak o. Kaneke iti hagatdiluk nen inetaiken oba hakotdiluk hogorakharek iti meke, here'isalok lo dukhitni o.

1 Korintus 14:1

Hinobabut akhuni inebe inakmu welageikharek iti meke hinobatnerogon yakulhe dogono. Yakulhe dogolik, Allah Agoreke nen inobabut tomok wogeisekherek wene iti iteerek asubageik nen, hinobatnerogon hagakhe dogono. Hagakhe dogolik, Allah ane pakhogon yogeisegarek meke iti meke wokhisoagaluk, kogotdino o.

1 Korintus 6:18

Humi yugunat ha'isegarek iti meke ha'isekhe dogunogo iluk, lo laga dogono o. Yi weak ti weak hagakharek iti inebe itikmanke yiat hagakharek. Mekeat he, humi yugunat ha'isegarek iti, inekaerek inebeat weagatdakhegarek iti o.

1 Timotius 1:14

Iti, at ninoe Etagapogot Kristus Yesus obabut hano nen kokhogon akmutnakhikhesik, nobabut at inom hunik dogolik hagakharek hagat, netaiken at oba hakotdigik, akhuni aperek nakmurinakhik, kokhogonat hagakhe dogoagaluk, nebe woknakhikhe iti o.

1 Timotius 4:12

Hat hebe elege aban welagan iti nen, it akhuni aperek nen inakla meanetdagousak dek o. Meke re, hebe elegeat dogolik, akhuni aperek inetaiken Allah oba hakotdiluk werek meke nen, hat hobabut waganuagaluk, hane mothogon yogeisigik, hobabut mothogon hagakhik, akhuni hakmurinakhik, hetaiken Kristus oba hakotdiluk welageik, weak hagakhidek hilaga isonhogo welageik, hagakhe dogono.

1 Timotius 5:10

It akhuni aperek nen it humi thoge meke iti inabok ekhe dogolik, “It inobabut hano hagariogei,” iluk egarek meke halok, inetaga holal waganusak. Hano hagakharek iti, inekaerek ineagei hanorogon kogorinakhik, ap huso wagunem, inebe hanorogon woginakhik, Allah a'buri aperek inisok obake thobalinakhik, it aperek weak werekma yomageisigik, iniki ageikhe huk agedek yi meke ti meke hasik yomageisekho motok welageik, hagakharek meke halok, inetaga holal waganusak o.

1 Timotius 6:20

Timotius na'but o. Allah nen hayoko 'bekhe dogolik, “Yi meke hagakhe dogono,” iluk, hoba 'bisikhe meke itiat hanorogon herogo dogolik, hobatnerogon hagakhe dogono. It aperek nen Allah ane usak meke iti igidegat dogolik, we yugunat, dek asigin meke hasigat wenemuk yakhe dogolik, “Wene ninilu,” iluk iliogei iti inokodek dogolik iliogei o. It iti nen, “Wene ebeat meke arat hutdogo,” iluk ekhe dogolik, Allah ane eberogonat meke here'isalok nuk asi dukhega iti nen, wene iti meke waganhidek here'isalok dogono. Allah obabut hano etnogo nenat hakharik dogoak o.

2 Timotius 2:21

Iti hagat, tha nen ekaerek nen weak hagakherek meke iti horogo here'isalok, ebe Allah hasik 'bisalok werekma, at nenat yi meke ti meke hano meke hagasigiluk, “Arat hano,” iluk ayoko 'bigin iti.

2 Timotius 2:22

Iti nen hat he, it ap elege meke nen inoba agaken dageiluk weak hagariogei meke iti here'isalok, lo laga dogono. It akhuni aperek inetaiken hano opakiat dogolik ninoe Etagapogot nen yomageisoagaluk ayoko 'biliogei meke iti hinom dapukhogon dogono. Hinomat mothogon hagakhik, Allah oba dopokhogon welageik, akhuni inebe inakmurogon welageik, akhuni inom hanorogon welageik, hagakharek iti mekeat mutluk laga dogono.

2 Timotius 3:10

It iti inobabut itithogon ekagat asigin mekeat he, hat he, an nen wene yakulisegerek meke inom, nobabut hagakherek meke inom, “Itithogon hagasigin,” iluk nakla apegerek meke inom, netaiken Allah oba hakotdiluk welagarek meke inom, nakla hapukhogon welagarek meke inom, akhuni tha'bokhogonat nakmurogon welagarek meke inom, nobakhanini hapugutdiluk welagarek meke inom, haganeat nen hutdanhe laganat o.

2 Timotius 3:17

Akhuni inebe tomok inebe Allah hasik 'bisalok dogolik, yi meke ti meke at obasik hano hagakharek meke iti erlokhogonat inetaiken horlerogon hagakhe dogoagaluk, Allah ane holal waganogo woknisasikhe iti o.

Ibrani 12:14

Hit hinebe karelogo Allah meke 'bisigidek dogogun halok he, at ebe hinileken hugun motok dek iti nen,akhuni tha'bokhogonat hinom hano dapulik dogolik, hinebe at hasik 'bisalok weak hagakhidek hano karelek motok dogouogoluk hinobatnerogon hagakhe dogono o.