1 Tesalonika 4:1 - ALLAH ANE WENW KET MEKE WAROGO WOKNINAKHIKHE WENE

^1-2 Nagarlak lak nerugi. Wene ilugun oba ageikhe yi yokhisak. Nit ninoe Etagapogot Yesus nen, “Hinobabut Allah akla hanorogon, yigithogon hagakhe dogono, tigithogon hagakhe dogono,” iluk, isikhemo yakulhisa agagu etnogo hinilu. Itithogon yakulhisasugumo, hit nen itithogon hagakhe lagap mekeat he, yabokane ageikhe inom kokhogon hagakhe dogobageik iluk, ninoe Etagapogot Yesus ninom hunik dogolik hinasuk warogo yokhisigi iti o.

1 Tesalonika 4:1 ပူးပေါင်းရင်းမြစ်များ

Yohanes 15:2

O ikilo'bak ebe tomok, an noba hunik dogolik eken ikhidek halok, 'bogokhogon la'igin mekeat he, ikilo'bak ebe tomok eken ikhe halok, aperek inom doalegat ikhe dogoagaluk oboseka palogo yorla yebeligin o.

Roma 8:8

Akhuni inobabut inikhok dogolik hagakharek meke iti hagakhoat dogolik, Allah akla hanorogo hagasusak erlok dek welageikharek iti.

1 Korintus 11:23

Wene itithogon hagakhe dogosak hasik, ninoe Etagapogot nen yakulnikhikhemo, an nen hit yakulhisasigi iti o.

1 Korintus 15:1

Nagarlak lak nerugi. Yogotak an nen wene ageikhe hinakla ebethisak. An nen hano wene yokhisa agagimo, waganhigisip nen, hinetaiken hano wene iti baga horle agagisip welagap.

1 Korintus 15:58

Iti nenat, nagarlak lak nerugi. Hinebe nakmu lak. Hinetaiken horlerogon, hapukhogon dogono. Ninoe Etagapogot ninom hunik dogolik, at hasik yi meke ti meke hagakhunem alomatlasigin dek o, iluk kokhogon hagakho motok dogono o.

2 Korintus 10:1

An Paulus Kristus obabut enago hano etnogo obabut waganogo, nekaerek nen wene ageikhe hinasuk wasik. It aperek nen he, “At ebe horokhogon ninom dogolik, obabut liokhogon wene yoknisekherek. Meke re, ebe walegat dogolik, obabut ayuk dek obatnerogon yoknisekherek,” iluk egarek meke etnogo yabokane hinoba witluk nen nobabut nayuk dek dogolik nane obatnerogon yokhisaunogo iluk, hutdubageik iluk nane liokhogon yokhisigi. It iti nen he, “Paulus lak iti, akhuni inobabut inikhogat dogolik inobabut waganogo hagariogei,” iluk ninabok weak paliogei meke iti, nobabut nayuk dek nane obatnerogon wenageisasigin iluk wene munini ebekhe lagei.

2 Korintus 13:11

Nagarlak lak nerugi. Wene ilugun oba arat men yokhisak. Hinakla arleken akhigik, hinetaiken 'bogokhogon horletdakhigik hagakhe dogono. Wene hinasuk warik wagei iti, hinasuk hanorogo holino. Hinetaiken opakiat dogolik, hinom dapukhogon dogono. Itithogon hagakhe dogogun halok, Allah akhuni akmurinakhik, inom dapukhogon hano 'bisigik, hagakherek meke etnogo thethisik dogogin o.

2 Korintus 5:9

At Kristus nen nit tha'bokhogonat ninoado yi baga dogolik hagakhe dogogun meke tomok ninitema waganogo ukum ninoba 'bigik, kokhik, hagakhe dogolik, hano hagakho meke halok, “Hano,” igik, nen weak hagakho meke halok, “Weak,” igik, mothogonat yoknisagein o. Itithogon yoknisagein iti nen, nit o yoma huso dogolik inom, yabokane at aila ukiluk inom, ninetaiken tumo, at akla hanorogo anek hagakhe dogou warlok nen hagakhe lago iti.

2 Korintus 6:1

At Allah nen, men isikhemo holal waganogo 'bisukhama werek, “An nen he, hit hinane nasuk holusak apigi bagaat holhi o. Hinebe tilhinabusak tak-tak obaat yomakhisa agei o,” iluk isikhe iti, Allah nen ninane asuk holusak he, o yogotak yaat o. Nen, ninebe tilninabusak he, o yogotak yaat o, iluk hinakla ebetni o. Halok he, nit Allah ninom at hasik hagakhe dogolik, at obabut hano nen akmuthinakhikhemo, at ebe waganhigip etnogo, we yugunat alomakhup o, iluk hinasuk wakhe lago iti o.

Galatia 6:1

Nagarlak lak nerugi. At ageikhe weak hagakhunem hinileken hegep halok he, at iti apuke obabut hebelasuagaluk, hit Allah Agoreke eberogonat hinakla werek meke nen hinane erogat asuk watno. Asuk itithogon wakhunem, hit itithogonat hinoba asunogo iluk, hinekaerek hinobabut hebelogo dogono.

Efesus 4:1

An ninoe Etagapogot hasik niki herle warogo 'banhama dogolik, hit wene ageikhe hinasuk wasik. Nagarlak lak nerugi. Hit hinobabut he, at Allah nen hinayoko 'bisikhe tak-tagat hagakhe dogono o.

Efesus 4:20

Mekeat he, at Kristus nen, “Hit weak itithogon hagakhe dogono,” iluk, yakulhisigidek o.

Efesus 5:17

Hinetaiken abit dogosak dek o. At ninoe Etagapogot akla warlok apekherek meke itiat erlo hera'iluk mothogon hagakhe dogono.

Filipi 1:27

Wene hano wene Kristus nen hagakhikhe wene etnogo baga, “Yigithogon hagakhe dogono, tigithogon hagakhe dogono,” iluk yokhisegarek mekeat hagakhe dogono. Itithogon hagakhe dogolik, hinebe opakiat dapukhogon hagakhe dogoumo, it akhuni aperek nen hinabok ekhe dogolik, “It inobabut hano wene yogeisugunem holiogei tak-tagat inetaiken Allah oba hakotdiluk obatnerogon metek werek o,” iluk, an nebe walegat werekma yoknisugun a? Hinoba witluk nileken hisagein a. Wene hano wene yokhisogorek hak, hinetaiken opakiat hinom dapukhogon dogolik, wim yakhe dogolik obatnerogon yakharek hak, wene iti hasik hinobatnerogon hagakhe dogono.

Filipi 1:9

An nen sembayan hit hinobasik ekhe dogolik, men ekhe lagei, “Yi meke ti meke ai yakhunem erlo kok atluk dukhekherek hak, hit ebe wene hutukhogon hinilu ageik, hutdigik, hagakhe dogolik, akhuni inebe hinakmurogon welagap iti meke kokhogonat hinakmurinakhe dogobageik nen,” iluk, sembayan ekhe lageiat o.

Filipi 3:14

Kristus Yesus nipisak hunik werekma, at Allah nen nayoko 'bekhe dogolik, “Hano meke pogot oba meke wokhesigin,” iluk abok yoknikhikhemo, ebe horla lagaluk, tha ae 'busak tha ae 'busuk pirlirli lageikharek hak, nobatnerogon mutluk laga lagei.

Kolose 1:10

Itithogon hinilu atluk nen, ninoe Etagapogot akla hanorogo, at warlok apekherek meke mothogon anek hagakhe dogosagat. Yi meke ti meke ai yakhunem erlo kok atluk nen eken hano ikherek hak, hit Allah obabut hinilu aga dogolik, yi meke ti meke hano meke hagakhe dogosak iti.

Kolose 2:6

Hit nen he, “Kristus Yesus ninoe Etagapogot o,” iluk ebe horlasigip iti nen, hinom hunik motok dogono o. Itithogon dogolik, hinobabut wene yakulhisasukha tak-tagat,

1 Tesalonika 3:12

Nit nen hit hinebe ninakmurogon welago hak, hit nen itithogonat hit-hit hinakmurogon hagakhik, akhuni tha'bokhogonat hinakmurinakhik, kokhogonat hinakmurinakhe dogobageik nen, ninoe Etagapogot nen hinobabut inakmurinakharek iti meke oba dukhogon ageikhe inombat wokhisekhe dogoak.

1 Tesalonika 5:12

Nagarlak lak nerugi. Hinougi hakhisik werek iti, ninoe Etagapogot nen meldisasikhemo dogolik, hit hinobasik inobatnerogo hagakhik, hinasuk wakhik, hagariogei iti nen, irat inapma dogolik, hinane inalon halogo yogeisekhe dogono o.

2 Tesalonika 1:3

Nagarlak lak nerugi. Hit hinetaiken Kristus oba hakotdiluk welagathep meke iti, ageikhe inom kokhogon hakotdigik, hit-hit hinebe dopok nakmu-hakmurogon hagakhethep meke iti, ageikhe inom kokhogonat hinakmurinakhik, hagakhe lagap iti nen, nit nen hit hinobasik Allah hogorasusak mekeat hogorakho motok welago.

2 Tesalonika 2:1

Nagarlak lak nerugi. Ninoe Etagapogot Yesus Kristus ebe witluk nen, at ninom opakimo dogouogoluk natogotninabi isigin iti hasik, hinasuk tetnokhogon wasik.

2 Tesalonika 3:1

Nagarlak lak nerugi. Wene ilugun oba ageikhe yi yokhisak. Ninoe Etagapogot ane ibat wialatluk hit werekma etoma wageikhemo hano waganhigip hak, itithogonat wialarik lagunem it aperek nen hano waganuagaluk, nit ninobasik sembayan ekhe dogono.

2 Tesalonika 3:13

Nagarlak lak nerugi. Hano meke hagakhe dogolik, hina'it ageidek hagakhe dogono o.

1 Timotius 5:21

Wene yokhigi meke iti, hat nen he, akhuni aperek helokhoma 'bisigik, aperek hoporlike 'bisigik, hagakhidek inom tak-tagat yogeisekhe dogono, iluk Allah inom, Kristus Yesus inom, inil obaat, malaikat Allah nen wenageinakhikhesik yoko usa'isa agarek meke inom, inil obaat yokhigi iti o.

2 Timotius 4:1

At Kristus Yesus ebe yabokane agat oba thelekmaat witluk nen, akhuni ninebe niniluk welago meke inom, watlagoukha meke inom, tha'bokhogonat wene ninoba 'bigik, kokhik, hagasigin o. Hagakhe dogoluk, yi akhuni ti akhuni tha'bokhogonat apma 'bisalok at ebe kok dogogin iti nen, an nen, ninopase Allah inom, Yesus inom, ipisak inil oba, hat nen ebe wene akhuni yogeisekhe dogonogoluk hasuk nobatnerogo warogo yokhisik. Akhuni hano wene yogeisugunem holusak werek korlegat inom, ina'it werek korlegat inom, holuagaluk wene iti hobatnerogon yogeisekhe dogono. Hakla puk ageidek yakulisekhe dogolik, weak hagakhunem hane pakhogon yogeisigik, inasuk wakhik, inetaiken ago warogo yogeisigik, hagakhe dogono.

Ibrani 11:6

Akhuni inetaiken Allah oba hakotdigidek halok he, at akla hanorogo hagasusak motok erlok dek o. Nen, at oba wisuogoluk halok, it nen, “Allah eberogonat werek,” iluk apigik, “At ebe inilu asuogoluk hagasugun halok, at nen oko ebe meke wogeisekheregat,” iluk apigik, hagasusak iti.

Ibrani 13:16

Itithogon ekhe dogolik, akhuni aperek hano hagarinakhik, yomageisigik, hagakhe dogouok. Itithogon hagakhe dogosak iti, Allah akla hanorogo kambing sapi warekhe dogou hagatma, obarlikmatdusak motok dek o.

Ibrani 13:22

Nagarlak lak nerugi. Wene hemurlugat hinasuk warogo holal waganogo hinoba la'i agei iti, hina'it ageidek hinasuk hologo dogono o.

2 Petrus 3:18

Ninoe Etagapogot tilninakherek meke obabut hano etnogo nen woknisekherek meke iti waganhik, ebe hinilu ageik, hagakhe dogolik, hinetaiken horle atluk dogono. Yogotak ya men, yabokane men, at Yesus Kristus arligat hogorakho motok dogouok o, iluk, “Amin,” igi iti.

1 Yohanes 3:22

at nen wene ninasuk wakhikhe wene mothogon hagakhik, at ilhanem akla hanorogon anek hagakhik, hagakhe lago iti nen, nit yi meke ti meke kino yogokhunem, at nen woknisiliogo.