1 Petrus 2:11 - ALLAH ANE WENW KET MEKE WAROGO WOKNINAKHIKHE WENE

¹¹ Nagarlak lak nerugi. Hinebe nakmu lak e. Hit hinebe ap huso akhuni inaila la'inagoumo lalok, etoma dogolik, yi meke ti meke hinakla nen kagalogo dageitluk, hinetaiken nen nukunem warlok apegethep meke iti re, thili meke nen inakharek iti hak hinebe weagathinabigiluk, hinakla nen kagalogo dagei agarek meke iti here'isekhe dogobageik iluk yokhisekhe lagei iti o.

1 Petrus 2:11 ပူးပေါင်းရင်းမြစ်များ

Lukas 21:34

At Yesus nen wene itithogon yogeisasikhesik nen, ageikhe men yogeisasikhe, “Yi meke ti meke isago werago hinelabut urogo nikik, apusu hunu-hunu asuogoluk nekarek meke nikik, yi meke ti meke agat oba meke hasik wene munini uan 'bero ebekhik, itithogon hagarik nekhe dogolik hinobabut hebelek dek akhirak werekma,

La'isasikhe 15:20

Nit nen, wene men iluk holal waganogo inoba la'usak. Kaneke oba inetaiken hakotdiluk dogolik ako warekharek meke palek nukunem inebe weagarageikharek meke iti nausak dek. Param hagarinabusak dek. Nen, yi meke ti meke arlokop pethelogo warek meke nikik, mep nikik, nausak degat, iluk inasuk warogo inoba la'uok o.

La'isasikhe 15:29

Kaneke oba hakotdiluk dogolik ako warekharek meke iti palek nausak dek o. Mep iti nausak degat. Yi meke ti meke arlokop pethelogo warek meke iti nausak degat. Param hagarinabusak degat o, iluk wene palho. Itithogon hagakhidek thogotdegep halok he, hit hano hagakhe lagap iluk ugun iti. Wene iti baga arat yokhisogo. Nagarlak lak nerugi,” iluk holal waganogo la'isa agoukha.

Roma 12:1

Nagarlak lak nerugi. At Allah ninebe akmu iluk wene ageikhe hinakla kagalik. Allah ako warekhe lagoukha hak, hinebe hiniluk mekeat, at ekaerek hasik 'bisalok, at akla hanorogo wogokhe dogono o. At apma dogolik, at hasik hagasusak meke itithogonat hagakhe dogono o.

Roma 7:23

niki nisok nebe a'birat, ninat meke hagakhe dogolik, wene Allah nen ninasuk wakhikhe wene etnogo nakla nen hano apegerek meke iti thebeligiluk hagakherek. Niki nisok nebe a'birat yoma weak anek hagakherek iti nen, nebe weak hagasuagaluk herle warogo negen 'banherek iti.

Roma 8:13

Hit hinobabut akhuni hinobabut hinikhogat dogolik hagakhe dogogun halok, hinebe motok watlasugun iti. Meke re, hinobabut itithogon hagasusak hagathinakhunem, Allah Agoreke ayoko 'biluk, at obatne baga watdisekhe dogogun halok he, hiniluk motok dogogun o.

2 Korintus 5:20

Nit he, Kristus nen at, ninayoko 'biluk la'inani ageikhemo wagagusik nen, Allah nen wene yokhisau hak, hinasuk wakhe lago iti o. Itithogon wakhe dogolik, “At Allah nen yabokane hinapuke dapukhogon 'binagouak nen he, at hinom dapulini o,” iluk Kristus etaga palogo ninane erogat yokhisekhe lago.

2 Korintus 6:1

At Allah nen, men isikhemo holal waganogo 'bisukhama werek, “An nen he, hit hinane nasuk holusak apigi bagaat holhi o. Hinebe tilhinabusak tak-tak obaat yomakhisa agei o,” iluk isikhe iti, Allah nen ninane asuk holusak he, o yogotak yaat o. Nen, ninebe tilninabusak he, o yogotak yaat o, iluk hinakla ebetni o. Halok he, nit Allah ninom at hasik hagakhe dogolik, at obabut hano nen akmuthinakhikhemo, at ebe waganhigip etnogo, we yugunat alomakhup o, iluk hinasuk wakhe lago iti o.

2 Korintus 7:1

Halok he, nagarlak lak nerugi. Hinebe nakmu lak o. At Allah nen itithogon dogogun iluk abok yoknisasikhe iti nen, ninebe inom, ninetaiken inom, weak hagakhorek meke iti, hanorogo horogo here'isauwok o. Itithogon here'isalok, Allah ebe ninayuk dogolik, ninebe at hasik 'bisalok dogouok nen, ninetaiken 'bogokhogon horletdekhe dogouok o.

Galatia 5:24

Ninebe Kristus Yesus agarumi meke, ninobabut ninikhogat dogolik, yi warlok ti warlok apekhe lagagu meke iti, Kristus Yesus ebe o baga meldiluk wakhukha iti baga warogo 'bisugu.

Efesus 2:19

Itithogon wageikhe iti baga, hit hinebe itikmanke ninat meke, ap huso meke hakene welagagip etnogo, yogotak itithogon dek ageikhemo, hinebe Allah a'buri agagisip, it hinom, at Allah aila etoma hinaieregat agagisip welagap o.

Efesus 4:1

An ninoe Etagapogot hasik niki herle warogo 'banhama dogolik, hit wene ageikhe hinasuk wasik. Nagarlak lak nerugi. Hit hinobabut he, at Allah nen hinayoko 'bisikhe tak-tagat hagakhe dogono o.

2 Timotius 2:22

Iti nen hat he, it ap elege meke nen inoba agaken dageiluk weak hagariogei meke iti here'isalok, lo laga dogono. It akhuni aperek inetaiken hano opakiat dogolik ninoe Etagapogot nen yomageisoagaluk ayoko 'biliogei meke iti hinom dapukhogon dogono. Hinomat mothogon hagakhik, Allah oba dopokhogon welageik, akhuni inebe inakmurogon welageik, akhuni inom hanorogon welageik, hagakharek iti mekeat mutluk laga dogono.

Ibrani 11:13

It akhuni inetaga ilik waga lagei iti tha'bokhogonat nen, “At Allah eberogonat,” iluk inetaiken at oba hakotdiluk welagoukha iti baga, Allah nen abok yogeisasikhe iti ebe waganhidek meke re, akhuni nen yi meke ti meke walegat werekma inileken lakhalok, inakla arleken akhegarek iti hak, it inetaiken oba nen, “Eberogonat waganugun meke werek o, iluk apekhe lago iti nen, o agat oba yoma it aperek inaila olirok lalok ap huso negen welageikharek hak welago,” iluk pakhogon ekhe dogolik inebe watlarik lagoukha.

Ibrani 6:9

Itithogon igi mekeat he, nagarlak lak nerugi. Hinebe nakmu. Allah nen weagathinabigin, iluk ninakla apekhe lago dek. At he, hit alebat tilhinakhikhesikmo Allah nen hanothinabigin iluk hutdekhe lago.

Yakobus 4:1

Hit wene palhik, tugi yakhik, hagakhe lagap iti, erlo nena baga nen yakhe lagap nogo. Wim yabusak warlok inetaikenma dogolik, inakla aga dageikherek iti hak, hinakla nen yi warlok ti warlok apegethep iti nenat yakhe lagap apigi.

1 Petrus 1:1

Nagarlak lak nerugi. An Petrus, Yesus Kristus nen nayoko 'biluk la'ani ageikhe meke etnogo nen, wene yi holal waganogo hit ninopase Allah nen, hinebe alebat wenakhinakhikhe meke, yogotak ya elanma hasik yi ai ti ai thirlik-pirlikhogon lo lagagisip, o propinsi Pontus men, Galatia men, Kapadokia men, Asia men, Bitinia men, akhuni inaklake inaklake dopok welagathep meke etnogo, hinoba la'i agei o. Hinebe Allah nenat akla apalok wenakhinakhikhesik, Yesus Kristus ane hologo hagakhe dogoagaluk apma 'binagagik, amep oba hothinakhik, hagasigiluk nen, “An nekaerek na'buri asubageik iluk wokhinakhi o,” iluk at Agoreke nen wokhinakhikhe iti o. Allah obabut hano etnogo nen hano meke wokhisigik, hinetaiken eran-alep hapugutdinagagik, kokhogonat hagakhe dogoak o.

1 Petrus 1:17

At Allah obabut akhuni inoado baga anek ileken hisalok, aperek elokhoma 'bisigik, aperek oporlike 'bisigik, hagakherek dek o. Inobabut hagakharek dopok mothogonat wene inoba 'bigik, kokhik, hagakherek iti nen, hit nen he, “Allah ninopase o,” iluk ayoko 'bekhe dogolik, agat oba yoma elanma hasik hinebe ap huso negen dogolik, at ebe hinayukhogon hagakhe dogono o.

1 Petrus 4:12

Nagarlak lak nerugi. Hinebe nakmu lak o. Hetu aik hegarek iti hak, Allah nen, hinobabut paligiluk yi aik ti aik hinoba agunem, hinakla nen, “Yi ninat hogorek dek meke ninoba ariogo,” iluk apugup o.

1 Petrus 4:2

Iti nen, hit nen akhuni yi meke ti meke warlok nen inetaiken nen nekerek iti meke here'isalok, hurli yogotak hurli nen, agat oba yoma hiniluk dogolik Allah akla warlok apekherek meke iti anek hagakhe dogono o.

2 Petrus 3:1

Nagarlak lak nerugi. Hinebe nakmu lak o. Surat alep ageikhe holal waganogo hinoba la'i agagi iti men, yabokane la'i agei iti men, hit wene ebe hinilu mekeat, hinakla mothogon ebesubageik nen iluk la'i aga lagei iti.