1 Petrus 1:17 - ALLAH ANE WENW KET MEKE WAROGO WOKNINAKHIKHE WENE

¹⁷ At Allah obabut akhuni inoado baga anek ileken hisalok, aperek elokhoma 'bisigik, aperek oporlike 'bisigik, hagakherek dek o. Inobabut hagakharek dopok mothogonat wene inoba 'bigik, kokhik, hagakherek iti nen, hit nen he, “Allah ninopase o,” iluk ayoko 'bekhe dogolik, agat oba yoma elanma hasik hinebe ap huso negen dogolik, at ebe hinayukhogon hagakhe dogono o.

1 Petrus 1:17 ပူးပေါင်းရင်းမြစ်များ

Matius 16:27

An abat itaklasi agagi etnogo re, yabokane nopase hogorakho motok welageikharek iti hagat, hagalatluk, it malaikat Allah nen pogot oba nen yoko usa'isa agarek meke emenogo ninom witluk nen, itinem, akhuni tha'bokhogonat inobabut dopok hagakharek meke tak-tagat oko wogeisasigin o.

Matius 22:16

Abok palhe lagoukhasik nen, ap it inagarumi inane waganhe lagoukha meke inom, it ap Herodes werekmake meke inom, Yesus oba wene hinok waganuagaluk la'isa agoukhama it wagoukhasik nen, men yogokhukha, “Yesus noe. Hat hobabut wene eberogonat anek ekhe dogolik, Allah akla nen, Akhuni yigithogon hagakhe dogoak, iluk apekherek meke eberogonat yakulnisekhe lagan iti nit ninilu o. Akhuni inebe hayuk degat dogolik inelokhoken oba anek hisalok, ageikhe helokhoma 'bisigik, ageikhe hoporlike 'bisigik, hagakhetek dek heekhe lago.

Matius 6:9

Halok he, sembayan ekhe dogolik, yigithogon ekhe dogono, Ninopase pogot oba meke hekaerek hetaga kogotdekhe dogoagaluk, hagatninabi me o. Ninebe hapma dogoagaluk 'binani me o. It pogot oba hat hakla apegetek meke hagakharek hak, nit agat oba itithogonat hagakhe dogoagaluk, hagatninabi me o.

Roma 11:20

Itithogon mothogon apekhe lagap mekeat he, hinakla ebetni. It inetaiken Allah oba hakotdigidek nen palogo la'isasikhe. Meke re, hit anek he, hinetaiken Allah oba hakotdisigip iti nen wokhinakhikhemo welagap iti. Halok he, hinekaerek nen hogorakhigidek, hinayukhogon dogono

2 Korintus 1:2

Ninopase Allah ninoe Etagapogot Yesus Kristus ipisak inobabut hano etnogo nen, hano meke wokhisigik, hinetaiken hapugutdinageigik, hagakhe dogoak o.

2 Korintus 5:6

Itithogon dogolik, yabokane hano asigin, iluk ninakla thabok welago. Akhuni o yabokane halekma dogouogoluk alep halekma welageikharek hak, ninoado yi meke baga dogolik, ninoe Etagapogot aila ninom dogogun oba iti werlegat welago, iluk ninilu.

2 Korintus 7:1

Halok he, nagarlak lak nerugi. Hinebe nakmu lak o. At Allah nen itithogon dogogun iluk abok yoknisasikhe iti nen, ninebe inom, ninetaiken inom, weak hagakhorek meke iti, hanorogo horogo here'isauwok o. Itithogon here'isalok, Allah ebe ninayuk dogolik, ninebe at hasik 'bisalok dogouok nen, ninetaiken 'bogokhogon horletdekhe dogouok o.

2 Korintus 7:11

At Allah akla warlok apekherek oba hinakla weak atluk nen, “Napik nen weak hagakhima,” iluk hinobabut hebelatluk nen, hano meke obatnerogo hagakhik, wene hinoba dek mothogon hagakhik, hinakla aga dageigik, hinayuk ageik, “Paulus ninom abuk atlo o,” iluk noba ebekhik, hinakla agaken thok-thok hagakhik, at weak hagakhikhe werek iti ikirluk oba ula'isigik, hagakhep iti lakhani! Itithogon hagakhe dogolik hit weak agekhe hagakhidek wene hinoba meke korogo motok la'isegep o.

Galatia 2:6

It aperek inakla nen, “Inetaga koktek werek he, irat,” egarek meke iti nen wene an yogeisilik nekherek meke etnogo yabokane ninat yogeisilik nekhe dogoak nen iluk yoknikhidegat. Allah nen akhuni inoado itikmanke anek ileken hisalok nen, “Yi weak. Yi hano,” iluk ekherek dek iti nen, an it iti inobasik alebat inetaga koktek welageikha meke a? Dek meke a, iluk, wene munini ebekhe lagagi dek iti.

Efesus 1:17

Hit hinobasik he, ninoe Etagapogot Yesus Kristus opase Allah hogorakho motok welageikharek meke etnogo nen, hinakla motok kagalek meke wokhisigik, at ebe hutukhogon hutdubageik nen yakulhisigik, hagakhe dogoak nen iluk, Agoreke wokhisoagaluk ayoko 'bekhe lagei.

Efesus 3:14

Iti nenat, an ninopase elokhoma nitibagal yukukhogon ayoko 'bekhe lagei o.

Efesus 6:9

Nen, hit inopase lak koktek meneke, hinatuan meke hasik, itithogonat hagakhe dogono. “Hasigin,” iluk papagathekhe dogogup. Hinakla nen he, “An natuaneke meke ninomat, ninoe Etagapogot pogot oba werek meke etnogo nen, nit ninobasik, At iti kok. Nen, at iti kepu, iluk, ekherek dek. Ninom tak-tagat hagatninakherek,” iluk, hinakla eberek dogono o.

Filipi 2:12

Nagarlak lak nerugi. Hinebe nakmu o. An ninom dogolik, nane hibiku-yogoku isinem hologo hagakhe lagagip iti hagat, an yogotak nebe walegat werek korlek, nane itiat kogotdiluk nen, hologo motok hagakhe dogono. At Allah nen, hit nen hagakhe dogobageik iluk, hinakla kagalogo hagathinakhunem, hit hinakla nen, “I, nit itithogon hagakhe dogou warlok,” iluk apalok, Allah akla warlok meke hagakhe lagap iti nen, at ebe hinayukhogon hinoageleke dik-dik hagakhe dogolik, “At nen tilninabigin,” iluk iti hasigat hagakho motok dogono.

Kolose 3:25

Meke re, at ninoe Etagapogot nen, akhuni inelokhoken oba anek hisalok, aperek elokhoma 'bisigik, aperek oporlike 'bisigik, hagakherek dek iti nen, tha nen weak hagakhe meke hasik, oko wogosu hak, weak hagakhe iti tak-tagat ukum oba 'bigin werek o.

Ibrani 12:28

Itithogon aborlogothagein mekeat he, nit anek he, Allah apma 'binanherekma aborlok igin motok dek meke woknisasikhemo ite agosik welago iti nen, “Allah nopase,” iluk heagei wakhe dogouok o. Nen, at Allah ebe, yi meke ti meke hetu nen nekerek iti hagatma, nit itithogon weagatninabinogo iluk, at ebe ninayukhogon hagakhik, alon halogo hagakhik, hagakhe dogolik, at ane hologo akla warlok meke hagakhe dogolik, hogorakhe dogouok o.

Ibrani 4:1

Iti halok he, Allah ne a'buri thet waloagaluk abok yogeisasikhe meke iti dek ageidek werek meke iti, nit yabokane thet waloagaluk woknisageinmo etoma hit aperek ukigidek hagasunogo iluk hinayukhogon dogolik mothogon hagakhe dogono o.

1 Petrus 2:11

Nagarlak lak nerugi. Hinebe nakmu lak e. Hit hinebe ap huso akhuni inaila la'inagoumo lalok, etoma dogolik, yi meke ti meke hinakla nen kagalogo dageitluk, hinetaiken nen nukunem warlok apegethep meke iti re, thili meke nen inakharek iti hak hinebe weagathinabigiluk, hinakla nen kagalogo dagei agarek meke iti here'isekhe dogobageik iluk yokhisekhe lagei iti o.

1 Petrus 3:15

Hit nen Kristus hinayukhogon hogorakhe dogolik, “Ninoe Etagapogot at o,” iluk hinetaiken oba nen hogorakhe dogono. Hogorakhunem, it aperek nen hinok hinoba waganhe dogolik, “Hano asigin, iluk oba eberek welagap iti nenaluk,” iluk yokhisugunem nen, oko wene hutukhogon yogeisagun meke hinakla eberek motok dogolik,