1 Korintus 4:5 - ALLAH ANE WENW KET MEKE WAROGO WOKNINAKHIKHE WENE

⁵ Iti nen he, wene akhuni inoba 'bigik kokhik hagasigin itinem aban asi ageidek werek korlek, hit wene inoba 'bigik kokhik hagasusak motok dek o. At ninoe Etagapogot ebe witluk nen, hibakone limago hagariogei meke thelekmatdigik, itithogon hagasugun iluk apalok inakla thebelek werek meke iti 'bualogo 'bigik, hagasisigin iti therogo dogosak o. Itithogon 'bualogo 'bisinem, Allah nen hano hagakha meke inebe tomok hogorinabusak mekeat hogorinabigin o.

1 Korintus 4:5 ပူးပေါင်းရင်းမြစ်များ

Matius 10:26

Itithogon yogeisasikhesik, ageikhe men yogeisasikhe, “Yabokane Allah nen, yi meke ti meke thebelek meke iti winametdigik, limago meke iti inilurogon thelekmatdigik, hagasigin anek iti nen, hit nen, it akhuni meke iti hinayukhogo dogogup o.

Matius 24:30

Itithogon hagakhe korlek, an abat itaklasi agagi etnogo arat wisigin iluk, akhuni inetaiken ekerlogo hutduagaluk pogot oba ageikhe hagatlatluk oba nen, akhuni inukuloak etaga dopok deku makhe korlek nobatnerogonat oisa akla usa'agunem, inileken nealok kokhogonat hogotnabugun o.

Matius 24:46

Meldiluk lagunem, atuaneke etnogo itithogon mothogon hagakhunem ileken 'bikha aga halok, atuaneke meke etnogo akla arleken motok akhagein o.

Matius 25:21

at oe etnogo nen, Nagot wa! Hat hano motok. Hobabut hupulik hano motok hagakhe laganma higi o. Pererlagat meke re, wokhikhi meke hobabut hupulik hago welagan iti nen, yabokane motok doalegat hago dogonok iluk, meldageiluk wokhesigin o. An hoe nakla arleken akhekhe lagei hak, nipisagat ninakla arleken akhauwok nen, uki me o, iluk yogokhikhe.

Matius 25:23

at oe etnogo nen he, Nagot wa! Hano motok. Hat hobabut hupulik hano hagakhe laganma higi o. Pererlagat wokhikhi meke, hobabut hupulik hago welagan iti nen he, yabokane motok doalegat hago dogonok nen iluk, meldageiluk wokhesigin o. An hoe nakla arleken akhekhe lagei iti hak, nipisagat ninakla arleken akhauwok nen, uki me o, iluk yogokhikhe.

Lukas 6:37

Itithogon yogeisasikhesik nen, wene ageikhe men yogeisasikhe, “Allah nen wene hinoba 'binogo iluk, hit nen akhuni aperek wene inoba 'bugup o. Allah nen wene hinoba 'biluk nen, weagathinabinogo iluk, hit nen akhuni aperek wene inoba 'biluk nen, weagarinakhup o. Halok he, hit nen weak hagakhe lagap meke Allah nen thagalogo degetduagaluk, akhuni nen weagathinabiogei meke hit nen thagalogo degetdekhe dogono o.

Yohanes 21:22

at Yesus nen, “An nakla nen, ap ithi, ebe ilugat werekma, an yabokane wisigin nakla apigi halok he, hat nen hagasusak meke 'buk. An noba dopok o. Itithogon mekeat, hat anek, an noporlik nekhe dogono o,” iluk wene itithogon yogokhikhe meke iti,

Yohanes 21:23

it Yesus agarumi ane waganhe lagoukha meke nen, “Yesus nen, Nagot ithi ebe yabokane watlasigin motok dek o,” iluk ekhe thalek, abok wiadisukha. Meke re, at Yesus nen he, “An nagot ithi yabokane watlasigin motok dek o,” iluk igidek. At nen, “An nakla nen, ap ithi an yabokane wisigin iti bagaat ebe ilugat dogoak nakla apigi halok, hat nen hagasusak meke 'buk. An noba dopok o,” iluk wene iti meke hasik isikhe mekeat, itithogon isukha iti.

Yohanes 5:44

Allah arligat ikhok motok welagarek iti nen hogothinabuagaluk hagakhidek dogolik, hit-hirat hat ageikhe nen hogorakhik, hat ageikhe nen hogorakhik, hogorakhekhe lagap iti nen, hinetaiken an noba nikithogon hakotdusak apegep. Erlok dek o.

Roma 14:4

Ap ageikhe inatuaneke mekeat he, hit nen, wene inoba 'busak a? “At yi weak hagakhe. Hureklatnek,” nen, “At iti hano hagakhe. Metek dogonek,” iluk it inoe kok iti nenat usak o. Meke re, metek dogoagaluk, ninoe Etagapogot nen yogeisausak erlok meke nenat yogeisaumo metek dogogun o.

Roma 2:1

Iti halok he, hit nagarlak lak nerugi yi. Wene it aperek anek inoba 'bekhe dogolik, hit hinekaerek hinoba korasak erlok dek o. Itithogon wene it aperek inoba 'bekhe dogoligat, hit nen it hinom ipisak tak-tagat hagakhe lagap yoma re! Hinekaerek nen wene hinoba motok 'bakhekhe lagap o.

Roma 2:29

Akhuni Yahudi ebe Yahudi meke re, “An nebe Yahudi meke inoado aperlagap palek welagei,” iluk thuesika baga holal palogo 'begarek iti hasik 'buk. Dek o. Mekeat, inoado aperlagap palek ebe meke re, inoado aperlagap meke palu hak, Allah Agoreke nen inetaikenma meke karelogo ulakherek itiat o. Akhuni inetaikenma itithogon karelek werek halok he, akhuni aperek nen hogorinakharek 'buk. Meke re, at Allah nenat hogorinakherek o.

Roma 2:7

At Allah nen, it akhuni aperek nen inebe hogorinakharek meke men, inalon halinakharek meke men, hirli agarek dek meke men, ite asuogoluk ina'it ageidek dogolik inobabut mot hagakharek meke, inebe iniluk motok dogoagaluk hagarinabigin.

1 Korintus 1:7

Hinetaiken itithogon horletdiluk, ninoe Etagapogot Yesus Kristus thelekmaat wisigin iluk, therogo dogolik Allah nen woknisekherek meke iti, ageikhe aban waganhidek welagap 'buk. Tha'bokhogonat waganhigisip welagap o.

1 Korintus 11:16

Meke re, it aperek nen, iti hasik wene palusak werek halok he, nit inom, Allah a'buri o yi ai ti ai natogokharek meke inom, ninat hagakhidek, itithogonat hagakhorek anek.

1 Korintus 11:26

Hipiri roti meke yigithogon nikik, eken apusu henago yigithogonat nikik, hagakhe dogolik, hit nen, “Ninoe Etagapogot itithogon wakhukha o, iluk wene iti it aperek yogeisau hak, yigithogonat neke dogono. Itithogon nasi werekma, hurli, an wisigin iti hurli nen dek asigin o,” iluk isikhe.

1 Korintus 15:23

Itithogon mekeat he, Allah nen ninobolukmo tomok mot-mot ninilugutninabigin. Hipiri ebekeram yukuk meke tak itakharek hak, at Kristus tak ilugutdisikhemo nogo nen, at ebe wisigin itinem, nit Kristus agarumi meke ninilugutninabigin o.

1 Korintus 3:13

Itithogon halho werekma, at Kristus yabokane wisigin itinem, akhuni nen o halha meke tomok hano a? Weak a, iluk, hetumo walhasinem, ekagat thelekma agunem hugun o.

1 Korintus 3:14

Itithogon walhugunem at ageikhe nen o herlaga iti baga halhe meke hetu nikidek dogogin halok he, oko wogosigin o.

1 Korintus 3:8

Ai yakharek meke iti, i tialharek meke iti, nipisak tak-tak mekeat, niniki oko, ninebe tomok yabu hagakhe dogogun meke tak-takhogonat woknisagein o.

2 Korintus 10:18

Akhuni inekaerek nen hogorakhegarek meke iti Allah nen hano iluk woginakherek 'buk. At ninoe Etagapogot nen hogorinakherek meke halok hano iluk woginakherek o.

2 Korintus 10:9

Akhuni hit meke aperek nen he, “Paulus iti ebe walegat dogolik holal waganogo la'i agunem, ane magasusak erlok dek. Obatnerogon yoknisiliogo. Meke re, ebe witluk ninom dogolik ebe kepu hakene. Nen, ane isinem, inasuk holusak ina'it negen,” iluk iliogei iti nen he, wene holal waganogo hinoba la'i aga lagei iti, hit hinakla nen, “Ninayuk motok asuagaluk la'iriogo,” iluk apaunogo iluk yokhisigi iti o.

2 Korintus 4:2

Nit he, akhuni nen yi meke ti meke limago weak hagakharethek inekarli agarek iti meke here'isasugu. Itithogon here'isalok, akhuni nukhetdisigik, Allah ane wene ageikhe meke oba lapelogo yogeisigik, hagakhorek dek. Akhuni yoma inakla tomok nen hutdinoagaluk, wene ebe wene Allah iloba thelekmaat yogeisilik nekhe lago.

Ibrani 4:13

Allah il oba, yi meke ti meke at nen walhasikhe meke ageikhe limago welagarek motok dek o. Meke re, at il oba, yi meke ti meke tha'bokhogonat, thelekma motok welagarek iti nen, nit hagakhe lago meke, at ilumo ninoba dopogat ninom ugun o.

Yakobus 4:11

Nagarlak lak nerugi. Hit-hit hinabok pal-pal ekhe dogosak dek o. Hinagarlak lak hinerugi aperek inabok palhik, wene inoba 'bigik, hagakhep halok he, wene Allah nen ninasuk wakhikhe wene etnogoat weak iluk u hagat, ekhe lagap iti o. Nen, wene iti weak iluk ekhe lagap halok, wene iti hinasuk hologo hagakhe lagap 'buk. Hit nen he, “Wene iti weak. Ebe hano itithogon usak meke isikhemo,” iluk u hak ekhe lagap iti o.

Yakobus 5:7

Iti nenat, nagarlak lak nerugi. Ninoe Etagapogot ebe aban wageidek werek korlek, hinakla puk ageidek hinobakhanini hapugutdiluk therogo dogono o. Akhuni nen wen waganekma hipiri ai ya'iluk therogo welageikharek iti hinakla hutdini o. Itithogon ai ya'iluk werek korlek miso o mo dageisi korlek nikik, usekhe korlek nikik, eran-alep nasi korlek inakla puk ageidegat, “Yabokane isarlo agunem ebe kok meke itakhagein,” iluk inobakhanini hapugutdiluk therogo welageikharek iti hak,

Yakobus 5:9

Nagarlak lak nerugi. Itithogon therogo dogolik, Allah nen wene hinoba 'binogo iluk, hit-hit ekhe dogolik, “Nagarlak iti hagariogo na'it o,” iluk inabok palhidek dogono o. At Allah nenat wene akhuni inoba 'bigik, kokhik, hagasigin iti holagapema horok asi aga iti 'bikhani!

1 Petrus 1:7

Emas oko kogat palharek meke iti hano a? Weak a, iluk hetu aik oba walhegarek iti hak, Allah nen, “It inetaiken an noba eberogonat hakotdiluk werek a? Dek a,” iluk, ekagat asuagaluk apasinem, hinoba yi akin-pakinhogo hekhe lagap iti o. Emas iti, we yugunat dek asigin mekeat he, ebe wene kok he, hinetaiken Allah oba hakotdiluk welagap itiat o. Hit hinetaiken at oba hakotdiluk dogogun halok he, at nen hinobabut palhe dogoluk nen, Yesus Kristus thelekmaat la'isigin itinem, hogothinakhik, hinalonethinakhik, kogotdinagagik, hagasigin o.

1 Petrus 5:4

Itithogon hagakho werekma, ninoe kok adomba iteerek etnogo witluk nen, “Hano motok hagakhe lagapma,” iluk oko kare-kare mitago a'bi'baleak dek asigin dek meke wokhisagein o.

2 Petrus 3:4

“Hinoe Etagapogot nen, An yabokane wisigin, iluk wene wathisasikhe etnogo ebe ki waga. Wageidek werek korlek ninopase lak arat watlagoukha mekeat, yi meke ti meke Allah nen ebekeram walhasikhemo welageikhe hagat, ikhok motok werek yi,” iluk inane sagun yokhisasugun o.

Yudas 1:14

Alebat Adam nen itaklarik waga lagoukhasik, hurli 7 baga hurli, at Henokh itaklageikhe meke nen, it akhuni iti ukum inoba 'bisagein meke hasik men isikhe, “Lakhani. Ninoe Etagapogot etnogo nen agarumi at ekaerek nen yoko usa'isa agarek meke inebe motok doalegat wogosik usasigin o.

A'bikaka 1:7

Lakhani! At ebe oisa baga wagunem, akhuni tha'bokhogonat inebe dopok men, it at thege karluk wakhukha meke men, inomat nen inileken lakhekhe dogolik, inukuloak etaga tomok tha'bokhogonat de asugun o, iluk yokhisigi iti, “Ebeat asuak o,” u hak, “Amin,” igi iti o.

A'bikaka 20:12

Itithogon dek aga korlek, akhuni watlagoukha meke inetagawerek meke inom, inetaga dek meke inom, at kok obolukmo werek etnogo elokhoma metek werekma hisigi. Itithogon werek korlek, thuesika tha'bokhogonat 'bukalhigik, thuesika ageikhe akhuni inniluk motok dogoagaluk hanorinabigin meke inetaga holal waganek meke 'bukalhigik, hagakhe laga. Itithogon 'bukaldiluk, it akhuni watlagoukha meke inobabut hagakhe lagoukha meke thuesika etoma baga holal waganek meke tak-tagat ukum inoba 'bigik, kokhik, hagakhe laga higi.