1 Korintus 3:5 - ALLAH ANE WENW KET MEKE WAROGO WOKNINAKHIKHE WENE

⁵ At Apolos iti tha nogo? Nen, an Paulus tha nogo? Nit iti ninoe Etagapogot nenat akla apalok ninayabu tomok hagakhe dogoagaluk ninayoko 'bisikhemo nen, at atuaneke welago. At atuaneke dogolik, wene yakulhisasugumo, hinetaiken Yesus oba hakotdisigip iti o.

1 Korintus 3:5 ပူးပေါင်းရင်းမြစ်များ

Matius 25:15

It inobabut palogo inebe dopok wogeisausak tak-tagat wogeisilik lageikhe. Uang kok emas meke ap ageikhe 5.000 wogokhik, nen, ap ageikhe 2.000 wogokhik, nen, ap ageikhe 1.000 wogokhik, hagakhikhe. Itithogon wogeisalok nen, o walegat nekalokma lageikhe.

Yohanes 3:27

Itithogon yogokhukhama, at nen, men yogeisasikhe, “Warligi yi. Nagarumi. Ap ageikhe Allah nen yogokhidekma, at ekaerek akla nen kagalogo erlok hagasusak erlok dek o.

La'isasikhe 18:24

Ap Yahudi meke ageikhe etaga Apolos. Ebe o Aleksandria nen itaklageikhe meke, o Efesus wageikhesik welageikhe. Ane hano motok yogeisekhe dogolik, Allah ane holal waganek etnogo ilu motok welageikhe.

La'isasikhe 19:1

At Apolos o Korintus etomaat werek korlek, at Paulus etnogo holak upuke dagak-pagak waga lageikhesik, o kota Efesus wageikhe. Wageikhesik, akhuni Yesus ane waganhukha meke aperek werekma inoba ukisikhe.

Roma 15:16

An nebe at Kristus Yesus apma dogolik akhuni itikmanke meke woginabuagaluk nayoko 'bisikhemo, at Allah akla hanorogo Agoreke iti baga it inebe Allah hasik 'bisagaluk, at ane hano wene iti yogeisilik nekhe lagei o.

1 Korintus 12:28

At Allah nenat, a'buri ninobolukmo tomok 'binanhe dogolik, alebageik nit at ane yogeisilik nekhe dogoagaluk ninayoko 'bigik, ninoporlik at ane yogeisekhe dogoagaluk it aperek inayoko 'bigik, it inoporlik wene yakulisekhe dogoagaluk it aperek inayoko 'bigik, it inoporlik elalin meke hagakhe dogoagaluk it aperek inayoko 'bigik, it inoporlik akhuni aperek u warek meke hano hagarinakhe dogoagaluk it aperek inayoko 'bigik, nen, yi meke ti meke yomageisekhe dogoagaluk it aperek inayoko 'bigik, inougi koktek metek dogoagaluk it aperek inayoko 'bigik, akhuni o ya meke ta meke inane inokodek meke baga wene ekhe dogoagaluk it aperek inayoko 'bigik, ninebe tomok itithogon ninayoko 'bisikhe.

1 Korintus 16:12

Ninagarlak Apolos etnogo nen, it ninagarlak lak aperek emenogo wogosik hinoba wisuagaluk, eran-alep akla kagalhe lagei mekeat he, at yogotak ya wisusak iluk akla apiliogo dek o. Meke re, yabokane wisusak apekhe halok wisiginat o.

1 Korintus 3:10

At Allah obabut hano nen nayoko 'bisikhemo, o iti herlaga re, an netai ekerlek meke nen 'bisigimo, it aperek nen oba dukhogon haliogei iti o. Meke re, akhuni inebe tomok, o herlaga iti baga dukhogon haluogoluk halok he, hutdiluk nen inetai ekerlogo halusak o.

1 Korintus 3:7

Ebe kok etaga werek he, ai yakharek meke iti 'buk. I tialik lagarek meke iti 'bugat. Kok etaga werek he, Allah nen ebe kogotdekherek itiat anek etaga werek o.

1 Korintus 9:17

An itithogon yogeisilik nekhe lagei iti, an nakla nen kagalogo yogeisilik nekhe dogolema, niki oko woknikhunem, waganhe dogole o. Meke re, an nakla nen kagalhidek werekma, Allah nen nayoko 'biluk iteerek 'banhikhe iti nen oko dek yogeisilik lagarek iti.

2 Korintus 11:23

It iti Kristus atuaneke dogolik, at hasik herlekha'bugat hagakharek mekeat he, an anek he, kogat hagakherek o, iluk, akhuni thinuknuk meke nen egarek hak ageikhe yokhisigi iti o. It he, thet herlekha'bugat negen hegarek mekeat, an he, thet doalegat hegerek o. It he, opaki hasik hakene iniki herle wakhik, tugi inakhik, inebe watlasusak negen motok inakhik hegarek mekeat he, an anek he, hibiku-yogoku niki herle wakhik, tugi nakhik, nebe watlasusak negen motok nakhik, hegerek o.

2 Korintus 3:3

Hit hinebe, wene Kristus nen holal waganogo 'bisikhemo nit nen la'isugu meke hakene welagap o. Holal iti, disu apusu baga waganhidek mekeat he, Allah iluk motok welagarek etnogo Agoreke baga waganhikhe o. Nen, helekit thabia meke baga waganhidegat. Akhuni inetaiken obaat waganhikhe o.

2 Korintus 3:6

Allah nen wene ket wene nit ninoba watnisasikhe iti, nit nen wolok loagaluk, at nenat ninobatnetninakhikhemo erlok wolok lausak welago. Wene alep inasuk wakhikhemo holal waganogo 'bisukha meke tak-tagat hagakhidek halok, iti baga inebe inakherek. Meke re, Allah Agoreke nen inilugurinakherek iti nen, nit wene alep holal waganek meke wolok lageidek, at Agoreke nen yoknisiliogo meke wolok laga lago iti.

2 Korintus 4:1

At Allah ninebe akmu nen, at hasik yigithogon hagakhe dogoagaluk ninayoko 'bisikhe iti nen, ninakla puk atluk here'isigidek hagakhoat welago.

2 Korintus 4:5

Wene yogeisilik nekhe lago iti, ninekaerek hagakhorek wene 'buk. Dek o. At Yesus Kristus hagakhikhe mekeat o. At Yesus ebe ninoe Etagapogot iluk, nit at hasik hit hinatuaneke welago, iluk yogeisogorek iti.

2 Korintus 4:7

Nit wene yigithogon yogeisilik nukhunem, akhuni inileken nisekhe dogolik, inakla nen, “It inobatne dek. At Allah obatne werek higi,” iluk ekagat hutdekhe dogoagaluk, isoak agat meke hagarogo henakharek hak, hano meke iti nit erlok dek meke ninakla 'binanhemo werek o.

2 Korintus 5:18

Meke re, yi meke ti meke iti tha'bokhogonat at Allah nenat hagakherek o. At nenat Kristus hagakhikhe iti baga, Allah ekaerek ninom dapukhogon 'binanhikhe. Itithogon 'binanhikhesik nen, akhuni aperek at inom inapuke dapukhogon 'bisagaluk wene iti nit nen yogeisilik nekhe dogoagaluk nit ninoba 'bisikhe.

2 Korintus 6:1

At Allah nen, men isikhemo holal waganogo 'bisukhama werek, “An nen he, hit hinane nasuk holusak apigi bagaat holhi o. Hinebe tilhinabusak tak-tak obaat yomakhisa agei o,” iluk isikhe iti, Allah nen ninane asuk holusak he, o yogotak yaat o. Nen, ninebe tilninabusak he, o yogotak yaat o, iluk hinakla ebetni o. Halok he, nit Allah ninom at hasik hagakhe dogolik, at obabut hano nen akmuthinakhikhemo, at ebe waganhigip etnogo, we yugunat alomakhup o, iluk hinasuk wakhe lago iti o.

2 Korintus 6:4

Akhuni nen he, “It Allah nen inayoko 'bisikhemo, at hasik hagakhe dogosak mekeat hagariogei,” iluk hutdinanuagaluk, yi aik ti aik hagatninakhik, wiik-weakhogon hagatninakhik, umunetnisigik, hagakhe korlek, ninobakhanini hapugutdiluk dogolik yi meke ti meke ekagat hagakhe lago.

Efesus 3:7

An akhuni inatuaneke negen dogoli, wene iti supurisekhe dogoagaluk, Allah obabut hano nen obatnerogon hagatninakherek tak-tagat nayoko 'bisikhe iti o.

Kolose 1:23

Halok he, hano wene hinasuk holhigisip hinakla nen, “Yabokane hano asigin,” iluk, apasigip meke iti, hinetaiken aborlok iluk kolelogo here'igidek hinobatnerogonat hago dogono. Hano wene iti, at nen yi ai ti ai akhuni inebe tha'bokhogonat yogeisasikhe wene iti yogeisilik nekhe dogoagaluk, an Paulus nayoko 'bisikhe iti.

Kolose 1:25

An he, Allah nen, hit hinobasik, at a'buri meke tha'bokhogonat inatuaneke dogoagaluk nayoko 'bisikhemo, wene Allah nen isikhe wene iti tha'bokhogonat yogeisilik nekhe dogosak mekeat, yogeisilik nekhe lagei iti o.

1 Timotius 1:12

An alebageik he, Yesus abok weak palhik, ebe nakla nen meanetdiluk Allah a'buri meke yi aik ti aik hagarinakhik, hagakhe lagagi mekeat he, ninoe Etagapogot Kristus Yesus akmutnakhikhesik, “Hat nen yabokane an nobasik hobabut erlok hagakhe dogogin,” iluk, wene yi an noba 'biluk nayoko 'bigik, obatne woknikhik, hagakhikhe iti o. Itithogon weak hagakhe lagagi etanem he, an netaiken ninoe Etagapogot Kristus Yesus oba hakotdigidek dogolik, itithogon hagasusak dek mekeat he, nokodek nen hagakhe lagagi iti nen, at nen nebe akmutnakhikhe iti nen, heagei wakhe lagei o.

1 Petrus 4:10

At Allah obabut hano nen, ninebe dopok ninobabut tomok woknisasikhe tak-tagat, hinebe dopok nen iti meke hano ite dogolik, hit-hit yomak-yomak hagakhe dogono.