1 Korintus 13:7 - ALLAH ANE WENW KET MEKE WAROGO WOKNINAKHIKHE WENE

⁷ Inakmurogon dogolik, yi wene ti wene inoba agunem, inobakhanini hapugutdiluk welageik, inetaiken Allah oba hakotdiluk welageik, hano asigin iluk inakla arleken akhigik, inetaiken hapukhogon welageik, hagakharek iti.

1 Korintus 13:7 ပူးပေါင်းရင်းမြစ်များ

Matius 10:22

Nen, akhuni tha'bokhogonat nen an netaga ilik, Hit at agarumi, iluk ina'it motok hisagun o. Mekeat he, tha nen etaiken thebekhogon obakhanini hapugutdiluk dogogin halok he, o ilugun hurli baga, Allah nen tiligin o.

Markus 9:23

Itithogon yogokhikhemo, at Yesus nen men yogokhikhe, “Hat nen, Erlok hagasusak halok he, hagasin, iluk yoknekhen iti nenaluk. Akhuni inetaiken Allah oba hakotdiluk yi meke ti meke erlok hagasusak anek o,” iluk yogokhikhemo,

Roma 15:1

Nit aperek, ninetaiken Allah oba horlerogon hakotdiluk welago meke nen, ninekaerek hasik anek ninakla hanorogon hagakhidek, it aperek inetaiken abanma aborlok werek meke iti, yomageisekhe dogosak o.

Roma 8:24

Itithogon hagatninabigin o, iluk ninakla apasinem, Allah nen tilninakhikhemo welago. Meke re, tha hak nen “Yabokane itithogon hagatlasigin,” iluk akla apasi werekma, ebe arat hagatlagunem ileken halok nen, yabokane akla apasiat dogosak nogo? Itithogon aperek welageikharek dek iti nen, nit nen, “Yabokane itithogon hagatlasigin,” iluk apekhe lago meke iti, ebe arat hagatlagunem nen, ninileken hogo halok he, ninakla apasi motogat dogosak dek o.

1 Korintus 13:4

Akhuni aperek inebe inakmurogon dogolik, inobakhanini hapugutdiluk welageikharek iti. Itithogon inakmurogon dogolik, inobabut hano ua palek dek dogolik, inekaerek nen higirakhigik-hogorakhigik, hagakharek dek.

1 Korintus 9:12

Hit nen, it aperek meke itithogon wogeisausak erlogat halok he, nit ebe iteerek meke aperek woknisausak dek nogo a? “Woknisausak erlogat o,” iluk yogeisekhe lagei. Itithogon mekeat he, nit aperek woknisoagaluk ekhe lago dek. Hano wene Kristus hagakhikhe wene iti, nit nen yogeisilik lagunem agolak palunogo iluk, yi meke ti meke aperek woknisausak iluk igidek ninobakhanini hapugutdiluk here'isekhe lago.

Galatia 6:2

Hit-hit hinoba akin meke werek halok, hinebe dopok ageikhe nen ageikhe yomak-yomak hagakhe dogono o. Itithogon hagakhe dogogun iti baga nen, wene Kristus nen ninasuk warogo yakulnisasikhe wene etnogoat mothogon hagakhe dogogun iti.

2 Tesalonika 1:4

Akhuni nen yi aik ti aik hagathinakho korlegat, hinobakhanini hapugutdiluk dogolik, hinetaiken Kristus oba itithogon hakotdiluk welagathep iti nen, nit nen Allah a'buri o yi ai ti ai natogokharek meke hinabok yogeisekhe dogolik hogothinakhe lago.

2 Timotius 2:24

At tha nen ninoe Etagapogot atuaneke hagakhe dogolik, itithogon hagasusak dek. Akhuni tha'bokhogonat inobabut liokhogon hanorogon inom dogosak o. Obabut obakhanini hapugutdiluk dogolik, akhuni wene hanorogon yakulisekhe dogosak o.

2 Timotius 3:11

Akhuni nen yi aik ti aik hagatnakhunem, noba aik weak hegerek etnogo hiluat o. Akhuni o Antiokia nen, Ikonium nen, Listra nen, weagatnakho korlegat werekma, ninoe Etagapogot nen iki ageikhe thogotdanhidek tilnakhe lageikhe iti o.

2 Timotius 4:5

It itithogon hagakho korlegat, hat yi meke ti meke hasik, hobabut hebelek dogolik, hoba yi aik ti aik hekhe dogolik, hobakhanini hapugutdiluk dogono o. Hano wene yakulisilik nekharek iti mekeat kogotdiluk Allah nen, “Itithogon yomageisekhe dogono,” iluk, hayoko 'bisikhe meke iti ageikhe here'isigidegat mothogon hagakhe dogono.

Ibrani 13:13

Itithogon watlageikhe iti nen, nit agat oba yoma motok dogosak dek. Nit yabokane o motok dogogun meke herakhe lago iti nen he, at Yesus akhuni nen inane aik dagok paik dagok dalhe lagoukha hak, nit itithogonat yoknisekho korlek, at oba leget abel itikmanke dukhisi dogouok o.

Yakobus 1:12

Hit aperek yi akin ti akin hinoba aga korlek, hinobakhanini hapugutdiluk dogogun halok, hinakla arleken akhekhe dogono o. Itithogon hinobakhanini hapugutdiluk dogogun halok, Allah nen he, “An nebe hinakmu meke hiniluk motok dogogun meke wokhisagein o,” iluk, abok yoknisasikhe etnogo hit hinobabut palogo nenat wokhisagein o.

1 Petrus 2:24

Nit ninobabut weak hagakhe lagagu meke iti, akhuni watlatluk yi meke ti meke hagakharek dek iti hak, nit weak meke here'isalok, niniluk dogolik Allah akla warlok meke hagakhe dogoagaluk, nit weak hagakhe lagagu meke korogo, at Kristus oba 'bakhasikhemo, ebe o baga meldiluk wakhukha iti. At ebe li'bik-la'bakhogon wakhukha iti baga, hit hanothinakhikhe iti.

1 Petrus 4:8

Wene kok hakene yi. Hit-hit nakmu-hakmurogon hagakhe dogolik, ageikhe nen ageikhe weagatdugun meke thagalogo motok degetdugun iti nen, hit-hit hinagarlak lak hinerugi hinom nakmu-hakmurogo motok hagakhe dogono.