TITUT 2:12 - Ala Ane Wene Ket Mene Warogo Wo'ninapike Wene

¹² Nit ninoabùt alep Ala ebe ninobaken nene heraksìkì logolìk he, nina'la nen yì mene tì mene kweangma mene walok enek akìkì lagagu atì heraksìlìk he, yogotak ya ninoabùt ninetaùken uan logolìk Ala hesik higit hogo hagatì logouagalùk, at oabùt hano atì ha yakùlnisìlì'logo atì.

TITUT 2:12 ပူးပေါင်းရင်းမြစ်များ

MATÌÙT 16:24

Atì'nogo yogosikesik he, at agoromì ane wanhì lagaukwa mene amanogo aike mel yogoisaaike: “At sa nen an nopolik nìkì logoigìlùk halok he, oabùt okawerek hesik etaùken tùlem logolìk hagaterek mene atì, Nabìt, ìlùk heraksalùk, e ba menhisìlìk inoatarek mene atì ageiyo meneat wolok nopolik nìkì logoigìlùk wesuak o.

ÙRÙM 6:19

Hit hinoabùt he, wene yogohisìgì atì hùthasak mea hake nen, hùthoageip en ìlùk he, apùnì inatitigeke logolìk hagatarek mene inoba lìrogo yogohisìkì lagì atì. Hit alep he, hineki hinesok hinebe ha welagarek mene aike inom obogat he, weak mene atitigeke salek wogorìk, yùgùnat hagatìk, hinasuk ware'lek yì weak tì weak hagatìk, ìkì lagagip atì. Atì hagat he, yogotak hit hineki hinesok hinebe ba welagarek mene aike inom obogat he, Ala okawerek hesik hisìlìk higit hogo hagatì logouogolùk, at wogotì logoino o.

2 PETERÙT 2:9

Atì'nogoat he, apùnì aike Ala walok mene hagatenem ina'la kagaligìluk waganem, ninopase Ala Etagepogot en telinapìk, nen it aike weak hagarì'lùgì mene halok, ùkùm hobuk inoba heigìlùk, hagisek welagìk, atì'nogo hagasusak elu logolìgat elok hagasigin o.

1 YOHANET 2:6

Nen, sa nen, “An Ala neperak hutik welagì,” ìlùk ikerek halok he, oabùt at Karìsùt hagatì lagaike atì hagat hagatì logousak o.

2 TIMOTÌÙT 3:12

Nit Karìsùt Yesùt ninom hutik logolìk, Ala hesik hanorogo hagatì logouogolùk nina'la akìkì lago mene hùgì, ninebe lopok obogat yì aik tì aik haga'ninapì logogunat o.

ABÌKAKAN 14:12

Wene yì hesik esin haganunak ho, Ala againapùrì at ane hologo higit hogo hagatì logolìk, hinetaùken Yesùt oba hìpìrìk welagasep mene atì, hinepe morogo logousak o.

1 TESALONIKA 4:7

Ala nen, nit weak hagatì logouagalùk ninayoko hesike lek o. We, ninebe at okawerek hesik hisìlìk, tegelek logolìk, higit hogo hagatì logouagalùk ninayoko hesike atì.

TITUT 3:3

It atì'nogo hagatì logousak atì re, nit alep ninetaùken lek ninoabùt kepù negen, ninasuk ware'legat, nong-hong hogo hagatì logolìk he, apùnì inogogì kaintek inawe a'ma welagaikarek hak, inoba aiyage lagagìk, ina'la nen yì mene tì mene walok akìgìk, egarek atì mene awe a'ma negen welagagu. Atì'nogo logolìk, it aike weagarinapìk, ua palhìk, it aike nit inapsìrì'ninapìk, nit en it ninapsìrìrinapìk, ìkì lagagu.

1 TESALONIKA 4:9

Nen, hit-hit hinerùgì hinagaiya'lak hinom hinetawìrogo logouageip ìlùk, Ala nen elogat yakùlhisìlì'logo atì nen he, hobuk an nen nìkì'nogo halok, “Hit hinerùgì hinagaiya'lak hinom hinetawìrogo hagatì logoino,” ìlùk, helal waganogo hinoba lakhei wesusak. Legat o.

EPESÙT 2:2

Atì sat he, apùnì yoma inoabùt inesogat logolìk hagatarek hak hagatì lagagip. Atì'nogo hagatì logolìk, mokareke inoabùt weak mene inoe kain pogot abel makwe yoma esewerek logolìk, apùnì Ala ane inabìt en inasuk holùhùk mene ina'la kisikesik yogotak ina'la kagalhoat welagarek mene a'nogo ane hologo welagagip atì.

ÙRÙM 12:2

Apùnì yoma hagarì'lùgì mene atì inoabùt wanhùp o. Hinoabùt ket hùnogoat haga'lasuagalùk, at Ala nenat hina'la ket mene hagathinapì logouak o. Atì'nogo hagathinapì logoumo re, at a'la nen: “Yì'nogo hagasuak, tì'nogo hagasuak,” ìlùk akikerek atì ebe hinelu asigin o. Hana mene ebe atìat o. At Ala a'la hanorogo hagatìk, inetaùken wurik agìk, ikerek he, atì nenat o.

ÙRÙM 6:12

Ninebe wa'lagorek mene yì were'ma, weak hagatarek mene atì omame asinogo nen he, awe a'ma kìlìk logogùp o. Weak hagasuagalùk hina'la kagali waga halok he, weak mene atì ane hinasuk holhùp o.

1 YOHANET 2:27

At Karìsùt en Ala Areagùn wokhisasikomo hina'la logolìk, yì mene tì mene hesik, apeliak yakùlhisìgì'lek, eberogoat enek yakùlhisìlì'logo atì nen he, apùnì aike nen wene hit yakùlhisasak mea o. Wene at Ala nen yakùlhisìlì'logo mene atì higit hogoat hagatì logolìk, Karìsùt hinom hutik motogat logoino o.

2 PETERÙT 3:11

Yì mene tì mene obogat atì'nogo lek asigin atì nen, hit hinoabùt nìkì'nogo hagatì logousak akegep. Ala nen hagasigin atì like pogot etu houmo re, amulok en heleleng hogo nìkìk, yì mene tì mene ero inom tamuk-tamak hogo nìkìk, igin atì nen, weak hagatì'lek tegelek logolìk, hinebe Ala hesik hisìlìk, at ebe serogo logolìk, ebe hepok wesuagalùk akiluk hogo hagatì logoino o.

IBERANI 8:11

It inalùgetek mel, yekerùgì mel, obogat inopase an nebe inelu logogun atì nen he, it inogogì inagaikùgì mel, inerùgì inagaiya'lak mel, yogoisìkì logolìk, Hinopase Ala atì hinelu a'ni o, ìlùk yakùlisasak lek o. We, inokawerek inabusak enat, nebe inelu aga logogun o.

1 TIMOTÌÙT 6:17

Yì mene tì mene obogat lek asigin meneat he, it ap kaintek inetagewerek mene atì ina'la nen hogorakìkì logolìk, “Nagarok kweangma mene yoma motok apik yì nen nebe hano logogin,” ìlùk, akìkì logoinogo. At he, at Ala yì mene tì mene obogat nina'la hairogo helìkì logouagalùk hùkorogo wo'nisikerek a'nogo nenat hano'ninabigin ìlùk hùthìkì logouak en inasuk watì logoino.

1 TIMOTÌÙT 4:12

Hat hebe elege oan welagen atì nen, it apùnì aike nen ina'la meathagousak lek o. Hebe elegeat logolìk, apùnì aike inetaùken Ala oba hìpìrìk werek mene hùgì nen hat hoabùt wanuagalùk, hane higit hogo yogoisìgìk, hoabùt higit hogo hagatìk, apùnì hetawìrinapìk, hetaùken Karìsùt oba hìpìrìk welagìk, weak hagatì'lek heil lopok hogo welagìk, ìkì logoino.

KOLOSE 1:22

Atì'nogo meneat he, hit hinebe at Ala okawerek hesik hakìlìk, at eilhanem ùkùm hinoba lek hogo hano tegelek logouagalùk, aput ebe wa'lagaike atì ba, okawerek hinom lapulogo hikasikomo welagep atì.

KALATIA 5:24

Ninebe Karìsùt Yesùt agoromì mene hùgì, ninoabùt ninesogat logolìk, yì walok tì walok akìkì lagagu mene atì, Karìsùt Yesùt ebe e ba menhìlìk wasukwa atì ba warogo hesugu.

KALATIA 1:4

Nit weak hagatorek atì nen ninopase Ala a'la nen he, “Tì'nogo hagasuak,” ìlùk a'la akasike ba, at Yesùt Karìsùt en nit apùnì kweangma mene telninabigìlùk, etaùken nenat nit ninoabùt weak motok hagatorek mene atì ùkùm at okawerek en oba hakìlìk wa'lagaike atì.

2 KORÌTÙT 7:1

Halok he, nerùgì nagaiya'lak. Hinebe netawì e. At Ala nen atì'nogo logogun ìlùk abok yogonisasike atì nen, ninebe nen, ninetaùken nen, weak hagatorek mene atì, hanorogo horogo hebisùok o. Atì'nogo hebisìlìk, Ala ebe ninayùk logolìk he, ninebe at hesik hisìlìk logouok en, ninetaùken katok hogo wurigethìkì logouok o.

2 KORÌTÙT 1:12

Nit hogorakìkì lago atì, ebe yì'nogo nen. Nit it apùnì kweangma mene aike ina'lakwe ina'lakwe logolìk, it hesik hagatì lago re, hamùlùgat negen. Mene re, hit hesik enek he, esin hogo hagatì lago. Atì re, apùnì kweangma mene ina'la kagalek mene hagatarek hak hagatì'lek. We, at Ala oabùt hano a'nogo nen, ninetaùken hano omakeat logolìk hagatì logouagalùk ninoabùt wo'nisasikomo hagatorek mene atì nina'la ebetì logolìk, “Nit hano hagatì lagoma,” ìlùk hogorakìkì lago atì.

ÙRÙM 8:13

Hit hinoabùt apùnì hinoabùt hinesogat logolìk hagatì logogun halok, hinebe motok wa'lasugun atì. Mene re, hinoabùt atì'nogo hagasusak hagathinapenem, Ala Areagùn ayoko hìlìk, at omame ba watsìkì logogun halok he, hineluk motok logogun o.

LAKSASIKE 24:25

Atì'nogo holek werek kolek, higit hagatì logousak wene atì mel, inetaùken sebeksek logousak wene atì mel, hobuk Ala nen apùnì ninanema wanìk ùkùm ninoba hìgìk, kotìk, igin wene atì mel, yogoisikenem, Pelìkìt ayùk agaike. Ayùk arìk he. “Yagotak wene arat egen o. Hobuk usak higit aga halok he, wahesigin o,” ìlùk apotkwe lakhesike.

LAKSASIKE 24:16

Atì'nogo logolìk, na'la nen he, Weak aike hagatì, ìlùk na'la ekin logoinogo ìlùk he, Ala hesik mel, apùnì hesik mel, hano hagatì lagì ìlùk, na'la selek logoigìlùk, nomamerogo hagatì lagì o.

1 YOHANET 5:19

It apùnì kweangma mene inoabùt inesok mene atì obogat he, at oabùt weak mene a'nogo eki ba welagaikarek. Atì'nogo meneat he, nit enek he, Ala ebe againapùrì mene welago, ìlùk ninelu o.

EPESÙT 1:4

At Ala nenat ninebe at okawerek hesik hakìlìk, at eilhanem tegelek logouagalùk, pogot kweang oan elalhì'lek logolìk, wena'ninapike atì ebe at Karìsùt enat wena'ninapike o.

YOHANET 14:30

Apùnì kweangma mene inoe kain a'nogo ebe wìrì'logo atì nen he, an wene apigat yogohisegein lek o. At atì wesigin meneat he, an at eki ba welagì lek o.

YOHANET 6:25

It apùnì amanogo wùlìbi wagaukwasik, at Yesùt o Kaperenagùm were'ma oba wagaukwasik he, mel yogosukwa: “Noe, hat o yoma mera wagen,” ìlùk oba hinok wokhasukwama,

LUKAT 1:6

It agwe eperak atì re, ninopase Etagepogot en, “Yì'nogo haga'no, tì'nogo haga'no,” ìlùk, yakùlnisìgìk, ninasuk watìk, isike mene a'nogo, motok higit hogoat hagatì lagaukwama re, at Ala nen he, “It atì inoabùt hano motok,” ìlùk, enagat eileken isìkì lagaike.

YURAT 1:18

It en he, wene mel ìlùk yogohisasukwa atì: “O wùrep kobok oba logolìk he, it apùnì aike Ala ebe inabìt logolìk ina'la nen, yì mene tì mene inetaùken nen nikenem, Namolo, ìlùk atì meneat weak motok hagatì logolìk, inane sagan wokhisa wesugun o,” ìlùk yogohisasukwa atì.

MATÌÙT 12:32

Sa nen an abat ta'lasi wagagi a'nogo a'la meathanìk nabok aike weak palho halok he, weak hagasigin mene atì Ala nen elok sagalogo legetsasak meneat he, Ala Areagùn atì a'la meathìlìk abok weak palho halok he, weak hagasigin mene atì, Ala nen yogotak mel, o wùrep oba arat haga'larìk oba nen logogun oba mel, sagalogo legetsasak motok lek o,” ìlùk yogoisasike.

1 TIMOTÌÙT 6:9

Ati'nogo meneat he, apùnì nen he, “Esin uang atìat,” ìlùk inetaùken tùlemethìlìk he, erepùl oba yì weak tì weak hagarì'lùgì atì. It aike nen uang atì mene herasuogolùk, inetaùken Ala oba hìpìrìk welagaikasik enat he, heraksalùk hobuk e ba saluk hogo waragarek hak, it inokawerek ina'la wiik-weak hogo hagarìlì'lùgì atì. Ati nen he, apùnì aike nen, “Yì mene tì mene hùkorogo helìlìk ninebe kain logoilo e,” ìlùk akìlì'lùgì atì re, paik hele hìlì'mo kerelarìk wa'lagarek hak, Ibilit en ina'la kagalhenem, yì mene tì mene walok akasak lek meneat he, weagarinabigin mene walok ìlùk akìlì'lùgì atì nen he, inebe weak akìgìk, nong akìgìk, egarek atì.

YAKOBÙT 1:27

Ninopase Ala nen he, “Apùnì nen an na'la hanorogo higit hano motok hagatì logousak he, yìtogo. Yekerùgì suarek mene mel, hìmì soge mene mel, nong arìk were'ma leberisìgìk, apùnì kweangma weak hagarì'lùgì mene atì inoabùt wanhì'lek inokawerek en tegelìgìk, ìkì logousak o,” ìlùk a'la akikerek atì.