MATÌÙT 5:16 - Ala Ane Wene Ket Mene Warogo Wo'ninapike Wene

¹⁶ Atì hak he, hit hano hagatenem, it aike nen he, It hano hagarì'lùgì, ìlùk hinopase pogot oba mene a'nogo hogorasuak en he, hit apùnì ineilhanem atì hakeat lìarogo logoino o,” ìlùk yogoisasike.

MATÌÙT 5:16 ပူးပေါင်းရင်းမြစ်များ

1 PETERÙT 2:12

It apùnì etakwe mene Ala inokot mene hinom logolìk, it en he, hit weak hagatì lagep mene salek, “It weak hagarì'lùgì o,” ìlùk hinabok weak ìkì logolìgat he, hit hinoabùt hano hagatenem ineileken hisìkì logopik he, apùnì nen at Ala ebe hobuk waganem hogorasuagalùk hit hinoabùt higit hogo hagatì logoino o.

TITUT 2:7

Inasuk atì'nogo watenem, it en, hat hoabùt wanhì logouak en, yì hesik tì hesik hagatì logolìk hoabùt higit hogo hagatì logoino. Atì'nogo hagatì logolìk, “Wene yì esin mene,” ìlùk, higit hogo yakùlisìkì logoino.

YOHANET 15:8

Hit hineken apik isu hak hano mene hùkorogo hagasugun halok, apùnì nen an napase hogorasugun o. Hit hinebe ebe nagoromì nane wanhì lagep mene logolìk, atì'nogoat hagatì logogun o,” ìlùk yogoisasike.

EPESÙT 5:8

Hit alebat he, o mùmmo welagagip meneat he, yogotak ninoe Etagepogot hinom hùnethìlìk, o lìa ba welagep atì nen he, hinoabùt o lìa ba logolìk hagatì logousak meneat higit hogo hagatì logoino o,

1 PETERÙT 3:16

hinane lìok hogo hai warogo yogoisìkì logoino. Atì'nogo yogoisìkì logolìk, hina'la nen he, “An wene noba selek o,” ìlùk akìkì logolìk, Karìsùt hinom hutik logolìk, hano hagatenem, apùnì nen hinabok weak palugun mene atì ineileken hisìlìk inekalì asugun o.

1 PETERÙT 4:14

Apùnì aike nen at Karìsùt hesik wenakhisiko halok he, hina'la nen he, “Ala Areagùn hogoratarek mene a'nogo ninoba louk ikomo welago,” ìlùk hina'la hai hakìkì logoino o.

1 PETERÙT 2:9

Mene re, hit enek he, “At Ala nen hano haga'ninabì'logo,” ìlùk abok yogoisìlìk loagalùk, hinebe o mùmmo were'ma, at ebe elalinat lìa motok welagarek oba wesuagalùk hinayoko hesikesik, hit at againapùrì asuagalùk wenakhinapìk, at ebe esewerek kaintek logouagalùk menhikìgìk, hinùkùl etage at okawerek ùkùl etage mene salogo hikìgìk, “Nokawerek nagainapùrì,” ìlùk hinebe wokhinapìk, isike atì.

TITUT 3:14

Apùnì nit Ala againapùrì mene aike, e eken hano mene ìtì'lek welagarek hak, it atì hano mene ese agì'lek tùlemat alemarogo logoinogo ìlùk, it aike yì mene tì mene lek en nong arìk were'ma, it inokawerek hano hagatì logolìk leberisìkì logouogolùk, atì mene esinethìlìk yakùlhì logouak o.

1 TIMOTÌÙT 6:18

It atì hanorogo hagatì logolìk, inagarok apik logou hak he, apùnì aike hanorogo leberisìkì logolìk, inagarok lek mene wogisìgìk, sùpùrisìgìk, ìkì logouagalùk inasuk watì logoino.

2 KORÌTÙT 9:13

Atì'nogo leberisìkì logogun atì ba, it Ala againapùrì o Yurea mene nen he, “It apùnì Korìtùt mene Karìsùt hagasike wene hano wene a'nogo wanhukwasik, Ninoabùt higit hogo hagatì logogun o, ìlùk isukwa higit hogoat hagarì'lùgì. Atì'nogo hagatì logolìk it mene aike inamùkwì agì'lek nit lebe'nisìgìk, it aike obogat leberisìgìk, ega o,” ìlùk hinoabùt enagat palhìlìk Ala hogorasugunat o.

EPESÙT 2:10

At enat hano hagarogo hinasikomo welago. Atì re, nit Karisùt ninom hutik logolìk, yì mene tì mene hanorogo hagatì logouagalùk, ninoabùt ket hùnogoat elalninapike atì re, ebe Karisùt Yesùt enat elalninapikomo welago.

IBERANI 10:24

Atì'nogo hesogo logolìk, nit-nit netawì-hetawìrogo logolìk, lebet-lebet hagatì logouogolùk, ninetaùken ago wat-wat ìkì logouok o.

1 PETERÙT 4:11

Atì'nogo ìkì logolìk, Yesùt Karìsùt hinom hutik logolìk hagatenem, it apùnì aike nen Ala hogoratì logouagalùk, hit aike nen wene yogoisìkì logolìk, Ala aneat yogoisìgìk, hit aike nen it aike leberisìkì logolìk, Ala omame wo'nisikerek atì baat leberisìgìk, ìkì logoino o. Atì'nogo hagatì logolìk, Yesùt omame apik esok motok welagarek a'nogo hogorato motok logouok ìlùk, “Amin,” ìgì atì.

1 PETERÙT 3:1

Ati hak, hit hìmì aike hinagonì Ala ane wanhì'lek mene hinane yogoisogoin oba hùk. We, hinoabùt hineil lopok hogo hinagonì inane hologo hagatenem, it en ineileken hisìlìk, Ala werekwe wìrìk ane wanuagalùk, hinokawerek hinagonì lopok inawe a'ma kìlìk inane hologo hagatì logoino o.

LAKSASIKE 9:36

O Yope atoma, he aike etage Paik ìlùk, apùnì Yunani mene inane ba etage Torekat u hak, it inane ba Tabita ìlùk ìkì lagaukwa mene welagaike. At he atì, ninoe Etagepogot Yesùt ane wanhikesik, yì mene tì mene hano hagatì logolìk, apùnì inekim lek inelageik mene leberisiko motok welagaike.

1 TIMOTÌÙT 5:25

Atì hagat, it aike hano hagatarek mene hepogat weinam agarek atì. It aike atì'nogo hano hagatenem hinago motok logogin lek. We, weinam asiginat o.

TITUT 2:14

Nit alep Ala ane heraksìlìk yì weak tì weak hagatì lagagu atì nen nineki hele warogo negen ha'nisek were'ma, at Yesùt Karìsùt en he, “It inebe an nokawerek nagainapùrì atìk he, inoabùt hano mene akiluk hogo hagatì logouak en, inebe hele hikalogo inoko paligìlùk, an nebe wa'lasigin,” ìlùk isike.

1 TIMOTÌÙT 5:10

It apùnì aike nen it hìmì soge mene atì inabok ìkì logolìk, “It inoabùt hano hagarì'lùgì,” ìlùk egarek mene halok, inetage palusak. Hano hagatarek atì re, inokawerek ineagwì hanorogo kùlinapìk, ap pok waganem inebe hanorogo woginapìk, Ala againapùrì aike inesok obakwe sobalisìgìk, it aike weak were'ma leberisìgìk, ineki aike kamo ìgì'lek yì hesik tì hesik leberisiko motok welagìk, egarek mene halok, inetage palusak o.

1 TIMOTÌÙT 2:10

Inalìlìke wanu hak he, inoabùt Ala a'logomì logolìk hagasu hagat, it aike hanorogo leberisìkì logouak.

KALATIA 1:24

Atì'nogo holhì logolìk, an hesik he, Ala hogoratì lagaukwa.

TITUT 3:4

Atì'nogo ìkì lagagu meneat he, at Ala ninebe telninaperek mene a'nogo oabùt hano nen, nit apùnì etawì'ninapike mene atì enagat weinam agaikomo ebe hùthasugu atì.

1 KORÌTÙT 14:25

at a'la hinago mene hukalasigin. Hukalaganem he, oabùt isong hogo at ebe soma ìlìk Ala hogoratì logolìk he, mel igin: “Eberogoat Ala hinom welagep o,” ìlùk yogohisegein o.

LUKAT 11:2

at Yesùt en he, “Hit sapan uogolùk halok he, yì'nogo ìkì logoino: Ninopase. Hat hokawerek hetage esinethìkì logouagalùk haga'ninabi me o. Nit ninebe hat hawe a'ma logouagalùk hina me o.

MATÌÙT 9:8

Atì'nogo hagasikomo re, it apùnì amanogo ineileken hasukwasik inayùk arìk he, “Ala nen apùnì mene nen yì'nogo hagatì logouagalùk menhesikomo atì nayù e,” ìlùk, Ala hogorasukwa.

MATÌÙT 23:5

It en yì hake tì hake hagarì'lùgì atì obogat he, Apùnì nen ye'nisek logouak, ìlùk, ina'la akìkì logolìk hagarì'lùgì o. It en he, Sapan ìkì lagì, ìlùk, Ala ane sùesika ba helal waganogo ineilha ba homatarek a'nogo, it en hùkorogo homatìk, su etakwe mene hùnogoat labetarek a'nogo, it en su o'lu uan hogo karogo labetìk,

MATÌÙT 6:16

Atì'nogo yogoisasikesik he, aike mel yogoisasike: “Hit sùpùrùk nìkì'lek sapanat iko motok logouogolùk halok he, it apùnì aike inogat oba nek hano salek logolìk inetaùken pìre mene nen, Apùnì aike nen enagat hù'nisoak, ìlùk inelokoken ohuselogo welagaikarek atì hak, logousak lek. It atì oko hela hak he, we, apùnì nen enagat yerisagarek atìat ìlùk, eberogoat yogohisìgì o.

MATÌÙT 23:9

Nen, hinopase pogot oba mene omakeat welagarek atì nen he, ap kweangma mene aike yogotì logolìk, Nopase, ìlùk yogosusak motok lek o.

MATÌÙT 6:9

Halok he, sapan ìkì logolìk he, yì'nogo ìkì logoino: Ninopase pogot oba mene hokawerek hetage esinethìkì logouagalùk, haga'ninabi me o. Ninebe hawe a'ma logouagalùk hina me o. It pogot oba hat ha'la akegetek mene hagatarek hak, nit kweangma atì'nogoat hagatì logouagalùk, haga'ninabi me o.