KOLOSE 1:9 - Ala Ane Wene Ket Mene Warogo Wo'ninapike Wene9 Hinabok atì'nogo ikenem ninasuk holhosik he, nit en hit hesik sapan ìgìk, Ala ayoko hìgìk, kamo ìgì'lek iko motogat welago. Atì'nogo ìkì logolìk Ala Areagùn nen hina'la kagalhenem, hina'la motok kagalogo wene hùthìlìk he, at Ala a'la walok akikerek mene atì hit en, tùkùm hogo hinelùrogo logouageip ìlùk ayoko hìkì lagoat. အခန်းကိုကြည့်ပါ။ |
Apùnì yoma hagarì'lùgì mene atì inoabùt wanhùp o. Hinoabùt ket hùnogoat haga'lasuagalùk, at Ala nenat hina'la ket mene hagathinapì logouak o. Atì'nogo hagathinapì logoumo re, at a'la nen: “Yì'nogo hagasuak, tì'nogo hagasuak,” ìlùk akikerek atì ebe hinelu asigin o. Hana mene ebe atìat o. At Ala a'la hanorogo hagatìk, inetaùken wurik agìk, ikerek he, atì nenat o.
Apùnì inagarok apik mene ineilmo wulalhak welagaikarek hak, hit he, Karìsùt ane atìat hinetaùkenma ning hogo hìlìk logolìk he, hina'la kagalogoat, hit-hit wene hinasuk wat-wat ìkì logolìk, wene hit en yakùlisìgìk, it en yakùlhisìgìk, ìkì logoino. Yakùlisìkì logolìk he, Ala hesik wùnì Masimùt wùnì watìk, etawì Ala hogoratarek etawì watìk, Ala Areagùn nen hina'la kagalhenem, wùnì helalogo watìk, ìkì logolìk he, hinetaùkenma nen Ala hai watì logoino.
At Epaperat, Karìsùt Yesùt atitigeke, ebe hit meneat a'nogo nen, hai wathinapeat o. At en he, hit hina'la nen, “Ala ane atì eberogoat,” ìlùk huthìlìk he, hinetaùken wurik arìk hinebe metegat logolìk he, yì mene tì mene Ala a'la akikerek hak hagato logouageip ìlùk sapan hit hesik ning hogo iko motogat welagarek.
Ninopase Ala eilhanem sapan atì'nogo ìkì logolìk he, hit hinetaùken Ala oba hìpìrìk logolìk hinoabùt hagatì lagep mene mel, apùnì aike hinetawìrogo logolìk, hinomamerogo leberisìkì lagep mene mel, hina'la nen, “Ninoe Etagepogot Yesùt Karìsùt en hano haga'ninabigin,” ìlùk, hinepe morogo welagep mene mel, nit en hit hagatì lagep mene atì hesik hinoba lì'mathìgì'lek, eberek motok welago.
At Ala nen he, “Hit atì'nogo hagatì logoino o,” ìlùk, hinayoko hesike hagat higit hogo hagatì logouageip ìlùk, nit en hit hesik sapan iko motok welago. Hit hina'la nen he, “Nit hano hagatì logoilo e,” ìlùk, akìkì lagep mene atì, Ala nen atì'nogo hagathinapìk, nen, hinetaùken at oba hìpìrethìlìk logolìk hagatì lagep mene atì, at enat hinetaùken wurigethinapìk, at omame atì ba hagathinapì logouak o.
Hit Ala a'la walok akikerek mene nek hano hagasuageip en he, yì mene tì mene hano mene obogat wokhisoak. Atì'nogo wokhisikenem, nit ninom obogat en Ala a'la hanorogo hagatì logouagalùk, ninoabùt at en wo'nisegein atì, ebe re, Yesùt Karìsùt en wo'nisoak o. At Karìsùt atìat hogorato motok logouok o. Ebe asuak u hak, “Amin,” ìgì atì.
Atì'nogo meneat he, apùnì Ala nen ina'la kagalhenem, inoabùt esin hagatarek he, weak aike hagatì'lek ineil lopok hogo welagaikarek atì. Atì'nogo logolìk, apùnì aike inom lìok hogo welagìk, inoabùt enago welagìk, inane hologo hagatìk, e eken hano mene ìterek atì hak, hanorogo hagatìk, apùnì inetawìrogo motok welagìk, apùnì aike inelokoma hisìgìk, aike inapotma hisìgìk, ìgì'legat, inetaùken pìre welagì'legat, hanorogo hagatarek atì.