2 PETERÙT 1:3 - Ala Ane Wene Ket Mene Warogo Wo'ninapike Wene3 At Ala esok motogat logolìk, yì mene tì mene elalinat hagatenem hogorato motok welagaikarek mene a'nogo nen ninayoko hesike atì. Halok, nit en at ebe sekek hogo ninelu arìk, nit ninebe nineluk logolìk, at hesik higit hogo hagatì logouagalùk, at okawerek omame ba yì mene tì mene wo'nisasikomo ese agosik welago. အခန်းကိုကြည့်ပါ။ |
2 PETERÙT 1:3
39 ပူးပေါင်းရင်းမြစ်များ
Atì'nogo huthìkì lagì atì nek hùk. Noe Etagepogot Yesùt Karìsùt nelu agagi atì hano motogat o. Yì mene tì mene hùnogo mene hagatì lagagi atì, nong asigin mene hagatì lagagimo ìlùk, hùthìkì lagìat o. At ebe helìlìk he, neperak hutik motok logouogolùk, yabu aleke tegelogo wulaksagarek hak, yì mene tì mene alep hagatì lagagi mene atì, “We meneat,” ìlùk heraksasigi atì. Wene Ala nen ninasuk wasike wene atì ba, nokawerek en higit hagatì lagì hùk. It apùnì aike inetaùken Karìsùt oba hìpìrethikenem, ùkùm inoba mene korogo wokhìlìk hobuk Ala inom hùnogo hisikerek hak, an atì'nogoat netaùken at oba hìpìrethesìgìmo, ùkùm noba welagaike mene korogo wokhasike atì.
Nerùgì nagaiya'lak. Wene elùgùn oba yì aike yogohisak, Hina'la ebetì logolìk he, hanorogo hagatìk, hogorinabusak mene hagatìk, ìlì'lùgì mene oba ebetì logoino. Atì ebe re, wene eberogoat mene oba ebetìk, hogorasusak mene oba ebetìk, higit hogo hagatarek mene oba ebetìk, inoabùt lopoksek logolìk hagatarek mene oba ebetìk, inoabùt heanerogo hagatarek mene oba ebetìk, inoba lìok usak mene oba ebetìk, ebeto motok logoino.
Apùnì inebe hesik mop eluk hogo ineki aike wanharek atì, yogotak ya elama hesik hamùlùgat hano negen hagatarek. Meneat he, ninetaùken hesik Ala awe a'ma logolìk, at eyabu wanhì logoumo, at Ala nen he, “Yogotak hineluk welagep mene hesik mel, hobuk hineluk motok logogun mene hesik mel, hano motok asìgìn o,” ìlùk, abok yogonisasike atì eberogoat.
At Ala nen ninebe telninapìk, at okawerek againapùrì asuagalùk ninayoko hìgìk, isike atì re, nit en aike hagasugu ba ninayoko hesike hùk. At he Ala oabùt hano nen, emakum yì mene tì mene oan elalhì'lek logolìk, hobuk Karìsùt Yesùt hagasigin oba hano'ninabigìlùk, okawerek a'la akalùk ninayoko hesike atì.
Mo eileken tilelek-walelek lakhei wagarek hak, Ala ebe hogoratarek mene a'nogo nen, Yesùt ebe lakhei wagaikomo kweangma lìarogo logolìk, opase alìlùmo at hake welagarek. Ati'nogo logolìk, yì mene tì mene obogat welagarek atì, at ane omame ba welagarek. Were'ma, nit weak hagatì lagagu mene horogo legethìlìk he, Ala Etagepogot esin mene a'nogo oba lagasikesik era'lu kainat welagarek atì.
At Ala nen he, “An noabùt weak hagatì'lek keksek motok welagìrek atì nen, hit hogo re, an hesik hinoabùt keksek motok logoino o,” ìlùk isikomo helal waganogo hesukwa atì nen, hit en yì mene tì mene hagatì logolìk, hinoabùt at Ala hinayoko hesike mene oabùt hakeat keksek motok logolìk hagatì logoino o.
Mene re, hit enek he, “At Ala nen hano haga'ninabì'logo,” ìlùk abok yogoisìlìk loagalùk, hinebe o mùmmo were'ma, at ebe elalinat lìa motok welagarek oba wesuagalùk hinayoko hesikesik, hit at againapùrì asuagalùk wenakhinapìk, at ebe esewerek kaintek logouagalùk menhikìgìk, hinùkùl etage at okawerek ùkùl etage mene salogo hikìgìk, “Nokawerek nagainapùrì,” ìlùk hinebe wokhinapìk, isike atì.
Apùnì aike nen hit weak hagathinapenem, hit en oko weagarinapùp o. Nen, inane sagan weak wokhikikenem, hit en oko hinane sagan wogisagùbat o. Oko re, Ala nen inebe hanorinabuagalùk, ayoko hìkì logoino. Hobuk at en hano mene wokhisagalùk hinayoko hesike atì nen, hit en oko hano mene wogisìkì logoino.
Were'ma, at Ala ebe hogorato motok logogun atì hak, hit Karìsùt hinom hutik were'ma hinomat hogothinapo logouagalùk hinayoko hesikomo, yogotak ya hamùlùgat enek hinoba yì aik tì aik hìkì logopik, hobuk, at oabùt hano motok a'nogo nen, katok hogo hagathinapìk, hinetaùken wurigethìgìk, hinomamethinapìk, hapuguthinapìk, igin o.
Ala ebe hinelu logolìk, atì mene oba louk hogo re, inetaùken sebeksek welagaikarek mene atì, ese a'no. Hinetaùken sebeksek logolìk he, atì mene oba louk hogo re, yì hesik tì hesik hagatì logolìk, inepe morogo welagaikarek atì mene, ese a'no. Hinepe morogo logolìk he, atì mene oba louk hogo re, Ala awe a'ma logolìk, at a'la walok akikerek higit hogo hagatarek mene atì, ese a'no.
Apùnì re, kweangma weak hagatarek mene yoma heraksalùk, ninoe Etagepogot Yesùt Karìsùt telninapike mene ebe inelu arìgat he, hobuk inapotkwe weak hagatarek mene atì oba kikenem he, kìmalìn awì ba elugeke kikenem ìkìlogo hakhikerek atì hak, haksamo re, mabenat asugun atì. Maben arìk, emakum weak welagaukwa atì re, hamùlùgat hano negen. Mene re, hobuk weak asugun atì re, motok hùko negen weak arìk logogun o.
ကြော်ငြာတွေ