2 KORÌTÙT 7:1 - Ala Ane Wene Ket Mene Warogo Wo'ninapike Wene

¹ Halok he, nerùgì nagaiya'lak. Hinebe netawì e. At Ala nen atì'nogo logogun ìlùk abok yogonisasike atì nen, ninebe nen, ninetaùken nen, weak hagatorek mene atì, hanorogo horogo hebisùok o. Atì'nogo hebisìlìk, Ala ebe ninayùk logolìk he, ninebe at hesik hisìlìk logouok en, ninetaùken katok hogo wurigethìkì logouok o.

2 KORÌTÙT 7:1 ပူးပေါင်းရင်းမြစ်များ

1 TESALONIKA 4:7

Ala nen, nit weak hagatì logouagalùk ninayoko hesike lek o. We, ninebe at okawerek hesik hisìlìk, tegelek logolìk, higit hogo hagatì logouagalùk ninayoko hesike atì.

1 PETERÙT 2:11

Nerùgì nagaiya'lak. Hinebe netawì e. Hit hinebe ap pok apùnì inaua pùgùlogo lìlìk, atoma logolìk he, yì mene tì mene hina'la nen kagalogo lagai wìrìk, hinetaùken nen nikenem walok akegesep mene atì re, selei mene nen inoatarek atì hak hinebe weagathinabiglìlùk, hina'la nen kagalogo lagai wagarek mene atì heraksìkì logouageip ìlùk yogohisìkì lagi atì o.

YAKOBÙT 4:8

Hit Ala oba lopok hogo lagep halok he, at hogo re, hinoba lopok hogo wesiginat o. Hit weak hagatì lagep mene atì, hineki bakwe horogo hebisìkì logoino o. Hinetaùken pìre agorek atì, hina'la weak mene horogo laksìkì logoino o.

1 YOHANET 3:3

Nit nina'la nen, “Atì'nogo haga'lasugun,” ìlùk, oba eberek welagorek mene ninebe lopok on, at okawerek ebe tegelek welagarek atì hak, nit atì'nogoat tegelìkì logousak o.

1 TESALONIKA 5:23

Atì'nogo were'ma, at Ala ninetaùken hapuguthiaikerek mene a'nogo nen, hinebe abireke okawerek hesik hakìlìk logouak o. Were'ma, ninoe Etagepogot ebe waganem, hinetaùken mel, hinebe mel, hinoabùt mel, ùkùm hinoba housak motok lek tegelek were'ma wesuak en, at enat hakhisek logouak o.

1 PETERÙT 1:22

Ebe wene atì hinasuk holhì logolìk, hina'la nen weak mene horogo laksìlìk, hinerùgì hinagaiya'lak Ala againapùrì mene aike eberogoat hinetawìrogo hagatì lagep atì, hinom hutik motok logolìk netawì-hetawìrogo hagatì logoino.

1 KORÌTÙT 6:20

Ala nen he, hinebe oko arat katok hogo palogo wokhinapikomo welagep atì nen he, apùnì nen Ala hogorasuagalùk he, hinebe at hesik hano hagatì logoino o.

1 YOHANET 1:7

Atì'nogo meneat he, Ala ebe lìa ba welagarek atì hak, nit hogo re, lìa ba logolìk, hano hagatì lago halok, nit-nit nagaiyak-hagaiyak ninom hutik were'ma, nit weak hagatenem at aput Yesùt amep oba ho'ninapo motok welagarek o.

IBERANI 4:1

Atì halok he, Ala nen againapùrì set waloagalùk abok yogoisasike mene atì lek agì'lek werek mene atì, hobuk nit set waloagalùk wo'nisegeinmo atoma hit aike kìgì'lek kamo inogo ìlùk hinayùk hogo logolìk higit hogo hagatì logoino o.

MATÌÙT 5:48

Halok he, ninopase Ala pogot oba mene oabùt hano motok katoksek logolìk etawìrinaperek hùk, hit atì'nogoat hinetawìrinapì logoino o,” ìlùk yogoisasike.

MATÌÙT 5:8

Nen, apùnì inetaùken omakeat tegelek welagaikarek mene atì, hobuk Ala ebe ineileken hogoin atì nen he, ina'la hai hakìkì logousak o.

1 YOHANET 1:9

Mene re, nit weak hagato mene hukalogo hogoin halok, at oabùt higit motok logolìk, wene wa'nisikerek hagat hagateresi'mo re, nit weak hagatorek mene sagalogo heraksìlìk, weak hagasuogolùk nina'la kagalhorek mene sobalninaperek.

EPESÙT 2:3

Alep nit obogat it hagarì'lùgì hagat hagatì lagagu. Ninoabùt apùnì inoabùt inesogat logolìk hagatarek hak hagatì logolìk, ninoba aiyage lagaikenem weak hagatìk, nina'la akalùk weak hagatìk, ìkì lagagu. Atem sat he, apùnì inoabùt inesogat logolìk hagatarek mene ninom higirat were'ma, Ala a'mage lagalìk he, weaga'ninabigìlùk welagaike.

ÙRÙM 5:20

Mene re, at aike weak hagasikesik oba Ala ane sagalogo weak hagatarek mene ekin asuagalùk, Ala nen wene ninasuk wasike wene hobuk wo'nisasike. Weak hagatarek atì wìalarìk laga kolegat he, Ala oabùt hano nen etawì'ninaperek atì, yì mene tì mene oba hilarogo nekarek hak, etawì'ninapenem hùkorogo wìalarìk lagarek atì.

1 PETERÙT 5:10

Were'ma, at Ala ebe hogorato motok logogun atì hak, hit Karìsùt hinom hutik were'ma hinomat hogothinapo logouagalùk hinayoko hesikomo, yogotak ya hamùlùgat enek hinoba yì aik tì aik hìkì logopik, hobuk, at oabùt hano motok a'nogo nen, katok hogo hagathinapìk, hinetaùken wurigethìgìk, hinomamethinapìk, hapuguthinapìk, igin o.

IBERANI 12:28

Atì'nogo abologothegein meneat he, nit enek he, Ala awe a'ma hinikere'ma abolok igin motok lek mene wo'nisasikomo ese agosik welago atì nen he, “Ala nopase,” ìlùk hai watì lo gouok o. Nen, at Ala ebe re, etu nen yì mene tì mene nikerek atì hagatma, nit atì'nogo weaga'ninabinogo ìlùk, at ebe ninayùk hogo hagatìk, agauk hogo hagatìk, ìkì logolìk, at ane hologo a'la walok mene hagatì logolìk, hogoratì logouok o.

IBERANI 12:23

Ala againapùrì makusa mene inetage pogot oba helal waganek werek mene atogorek ina'la hai hakiko mel, it apùnì hano hagatì lagaukwama Ala nen katok hogo hanorinapike mene inareagùn mel, Ala ebe, apùnì obogat ùkùm inoba hìgìk, kotìk, ikerek mene a'nogo mel, inom were'ma oba wagep o.

1 TESALONIKA 3:13

Atì'nogo hagathinapì logopik he, ninoe Etagepogot Yesùt okawerek agoromì inom at waganem he, hinebe ninopase Ala okawerek hesik hisìlìk, at eilhanem ùkùm hinoba lek hano tegelek were'ma hisa wesuak en, hinetaùken wurigethinapì logouak o.

2 KORÌTÙT 1:20

At Ala nen yì mene tì mene abok yogonisasike atì obogat he, “Ì o, wokhisegein,” ìlùk u hak, Yesùt ebe wo'nisasikomo werek atì nen, nit at ninom hutik logolìk Ala hogoratì logolìk he: “Ebe asuak,” ìlùk u hak, “Amin,” ìlùk ìkì lago atì.

LAKSASIKE 9:31

Atì'nogo hagasukwama, hobuk en he, it apùnì Ala againapùrì o propinsi Yurea mene mel, Kalilea mene mel, Samaria mene mel, weagarinapì'lek hano lìok hogo welagaukwa. Were'ma, Ala Areagùn nen leberisikenem, inetaùken wurik agìk, ninoe Etagepogot inayùk hogo welagìk, ìkì logolìk he, inebe apik seik-peik ìkì lagaukwa.

MATÌÙT 12:33

Atì'nogo yogoisasikesik aike mel yogoisasike. “E eken hano mene ero hano mene nenat ìterek. Nen, e eken weak mene atì, ero weak mene nenat ìterek. Atì'nogo ìterek atì ba, e eken yì hano mene eken ìgìk, yì weak mene eken ìgìk, enagat hùthegesep o.

IBERANI 6:9

Atì'nogo ìgì meneat he, nerùgì nagaiya'lak. Hinebe netawì e. Ala nen weagathinabigin, ìlùk nina'la akìkì lago lek. At he, hanothinabigin ìlùk hùthìkì lago o.

1 PETERÙT 1:15

At Ala nen he, “An noabùt weak hagatì'lek keksek motok welagìrek atì nen, hit hogo re, an hesik hinoabùt keksek motok logoino o,” ìlùk isikomo helal waganogo hesukwa atì nen, hit en yì mene tì mene hagatì logolìk, hinoabùt at Ala hinayoko hesike mene oabùt hakeat keksek motok logolìk hagatì logoino o.

1 PETERÙT 1:17

At Ala oabùt he, apùnì inogat oba nek eileken isìlìk, aike elokoma hisìgìk, aike apotma hisìgìk, ikerek lek o. We, inoabùt hagatarek lopok higit hogoat ùkùm inoba hìgìk, kotìk, ikerek atì nen, hit an he, “Ala ninopase,” ìlùk ayoko hìkì logolìk, kweangma yoma elama hesik hinebe ap pok negen logolìk, at ebe hinayùk hogo hagatì logoino o.