1 YOHANET 2:15 - Ala Ane Wene Ket Mene Warogo Wo'ninapike Wene

¹⁵ Mene re, apùnì kweangma mene inoabùt hagatarek mene atì mel, yì mene tì mene kweangma welagarek mene atì mel, hinetaùken tùlem logousak motok lek o. Sa nen it apùnì kweangma mene inoabùt hagatarek mene atì, etaùken tùlem welagarek halok he, ninopase Ala etaùken tùlem welagarek motok lek o.

1 YOHANET 2:15 ပူးပေါင်းရင်းမြစ်များ

MATÌÙT 4:8

Atì'nogo yogosikomo re, hobuk at Ibilit en Yesùt wolok tom hùko uan mene ùkùl oba lagalìk he, o kweangma yì awì tì awì ap kaintek inetagepogot en hagisek welagaikarek obakwe lopok obogat, yì mene tì mene apik were'ma eileken lakhoagalùk yakùletì logolìk he,

MATÌÙT 6:24

Atì'nogo yogoisasikesik he, aike mel yogoisasike: “Atì hak he, ap omakeat mene ap kaintek inebe pìre mene inatitigeke logolìk ineyabu hagatì logousak motok mea o. Atì'nogo logogin halok he, at inatitigeke atì nen: Nopase aike yì hano netawì. Nen, aike atì, weak nabìt, ìlùk, ìkì logolìk he, etawì mene atì eperak lopok hogo logolìk he, aike abìt mene atì aberalìthìkì logousak o. Atì hake, hit he, Ala atitigeke logolìk, uang atitigeke logousak mea o.

LUKAT 16:13

Ap omakeat mene ap kaintek inebe pìre mene inatitigeke logolìk ineyabu hagatì logousak motok mea o. Atì'nogo logogin halok he, inatitigeke atì nen, Nopase aike yì hano, netawì. Nen, aike atì weak, nabìt, ìlùk ìkì logolìk he, etawì mene atì eperak lopok hogo logolìk he, aike abìt mene atì, aberalìthìkì logousak o. Atì hake, hit he, Ala atitigeke logolìk, uang atitigeke logousak mea o,” ìlùk yogoisasike.

YOHANET 15:19

Hit hinebe apùnì kweangma mene logoilepma re, it apùnì kweangma mene nen he, It he, nit ninagoromì, ìlùk inetaùken hutik hagathinabilep meneat he, hit hinebe it apùnì kweangma mene were'ma wenakhinapigisik wokhinapigisi'mo re, hinebe it mene welagep hùk. Atì nen he, inabìt motok hagathinabì'lùgì o.

ÙRÙM 12:2

Apùnì yoma hagarì'lùgì mene atì inoabùt wanhùp o. Hinoabùt ket hùnogoat haga'lasuagalùk, at Ala nenat hina'la ket mene hagathinapì logouak o. Atì'nogo hagathinapì logoumo re, at a'la nen: “Yì'nogo hagasuak, tì'nogo hagasuak,” ìlùk akikerek atì ebe hinelu asigin o. Hana mene ebe atìat o. At Ala a'la hanorogo hagatìk, inetaùken wurik agìk, ikerek he, atì nenat o.

KALATIA 1:10

An nane ìgì atì re, apùnì nen, “Hat hano egen,” ìlùk yogonesuagalùk ìkì lagi a? At he, Ala nen, “Hat hano egen,” ìlùk, yogonesuagalùk ikì lagì a. Apùnì ina'la hanorogo ìkì lagì halok he, an nebe Karìsùt atitigeke usak legat o. Mene re, an Ala a'la hanorogo ìkì lagì o.

EPESÙT 2:2

Atì sat he, apùnì yoma inoabùt inesogat logolìk hagatarek hak hagatì lagagip. Atì'nogo hagatì logolìk, mokareke inoabùt weak mene inoe kain pogot abel makwe yoma esewerek logolìk, apùnì Ala ane inabìt en inasuk holùhùk mene ina'la kisikesik yogotak ina'la kagalhoat welagarek mene a'nogo ane hologo welagagip atì.

YAKOBÙT 1:27

Ninopase Ala nen he, “Apùnì nen an na'la hanorogo higit hano motok hagatì logousak he, yìtogo. Yekerùgì suarek mene mel, hìmì soge mene mel, nong arìk were'ma leberisìgìk, apùnì kweangma weak hagarì'lùgì mene atì inoabùt wanhì'lek inokawerek en tegelìgìk, ìkì logousak o,” ìlùk a'la akikerek atì.

YAKOBÙT 4:4

Hìmì nen inagonì ineil salharek atì hak, Ala eil salogo hagatì lagep atì rì! Apùnì kweangma mene yoma inoabùt inesogat logolìk hagarì'lùgì mene atì hinom hutik welagep halok, Ala hinom weim palek hakeat welagep atì, hinokot nogo? Hit aike nen apùnì kweangma yoma mene inoabùt inesogat logolìk hagarì'lùgì mene atì hinom hùnesuogolùk ìkì lagep halok he, hinokawerek en at Ala hinom weim kagalhì lagep o.

1 YOHANET 3:17

Mene re, sa nen at agarok yì mene tì mene kweangma mene hìlìk logolìk, erei agaiyak aike yì mene tì mene elageik were'ma eileken hìlìgat he, aike wogotì'lek etaùken pesethike halok, at atì oabùt he, Ala nen etawì'ninaperek atì hake werek akegep? Motok lek o.

1 YOHANET 4:5

It atì inebe apùnì kweangma mene inagainapùrì nogo nen he, it en wene kweangma wene ikenem, inane it apùnì kweangma mene aike nen inasuk holharek atì.

1 YOHANET 5:10

Apùnì inetaùken Ala aput oba hìpìrethìlì'lùgì mene hùgì nen he, “Wene atì eberogoat o,” ìlùk ina'la nen hùthìlì'lùgì. Atì'nogo meneat he, apùnì aike inetaùken Ala ba hìpìrethìgì'lek mene hùgì nen he, “Wene Ala okawerek en aput hesik abok isike wene atì eberogoat,” ìlùk akìgì'lek logolìk, Ala apeliak ikerek mene negen hagarogo hìlì'lùgì o.