WAHYU 6:2 - KITTA KAREBA MADECENG

² Nauwakkita, nainappa paita sikaju anyarang puté. Tau iya tonangiyéngngi makkatenningngi séddi pana, sibawa ri aléna riwéréngngi séddi passigera'. Majui selaku séddi tau pakala iya laowé untu' pakala.

WAHYU 6:2 ပူးပေါင်းရင်းမြစ်များ

MAZMUR 110:2

Polé ri Sion nalowangiwi matu Puwangnge akkarungemmu; akuwasaini sining balimmu!

MAZMUR 76:7

Sininna anyaranna sibawa tonangiyéngngi sempé'ni maté nasaba paggera'-Mu, oh Allataalana Yakub!

MAZMUR 98:1

Mazmur. Elongengngi élong baru Puwangnge, nasaba sining pangkaukenna iya mappabengngaé! Nasibawang akuwasang sibawa awatangenna muto purani lolongeng apakalang.

YESAYA 25:8

Puwang Iya Pommakuwasaé pabbinasai matu amaténgngé untu' mannennungeng! Nasussui matu uwai mataé polé ri tungke rupaé, sibawa pabélaiwi atunang iya natanggungngé umma'-Na ri sininna linoé. Puwangnge pura mabbicara, na iyaro gau'é pasti kajajiyangngi.

ZAKHARIA 1:8

uwitai malaéka'na Puwangnge tonangi si kaju anyarang cella. Mappésauwi ri séddié lompo ri yelle'na ajukajung murad-é. Ri monrinna tentongngi siyagangngaré kajunna anyarang iya laingngé, engka macella, engka balibi sibawa tembaga.

MATIUS 28:18

Maddeppéni Yésus ri mennang, nakkeda, “Sininna akuwasangngé ri surugaé sibawa ri linoé purani riyabbéréyang ri Iyya.

1 KORINTUS 15:25

Harusu'i Kristus mapparénta matteru narapi Allataala napatunru' maneng balinna Kristus lao ri Kristus.

WAHYU 11:15

Nainappa malaéka' mapitué naseppung tarompé'na, nariyéngkalingana ri surugaé sadda battowa senna'é iya makkedaé, “Akuwasang untu' paréntai linoé engkani makkekkuwangngé ri laleng limanna Puwatta enrengngé Arung Pappassalama' iya najjanciyangngé. Mapparéntai matu lettu mannennungeng!”

WAHYU 11:18

Sining tau iya dé'é naissengngi Puwangngé, majjallo saba' wettunna Mupatabbollong cai-Mu, enrengngé wettunna tona Muwadéléki sining tau maté. Iyanaé wettunna untu' mpéréngngi saro ata-atam-Mu, sining nabié, sibawa lao ri sininna umma'-Mu, iyanaritu sininna tauwé iya massompaé ri Iko, battowa iyaré'ga baiccu. Iyanaé wettunna untu' mancuru'i sining tau iya mancuru'éngngi linoé!”

WAHYU 14:14

Nainappa makkitaka, napaitana séuwa ellung iya maputé. Ri yasé'na ellungngéro tudangngi séddi tau iya paitaé samanna pada tolinoé. Ri ulun-Na engka séddi passigera' ulaweng, sibawa ri liman-Na engka séddi kandao iya matarengngé.

WAHYU 15:2

Purairo uwitani séuwa iya paitaé pada-pada tasi' kacaé sicampuru' api. Uwita towi sining tau iya cauéngngi olokolo'é sibawa dato'-dato'na, sibawa pacau lao ri tau iya asennaé ritanrangi sibawa nomoro'. Sining tau iya pacauénnaro tettongngi ri wirinna tasi' kacaé nanakkatenning towi kacapi iya nabbéréyangngé Allataala lao ri mennang.

WAHYU 17:14

Mammusui matu mennang méwai iyaro Ana' Bimbala'é. Iyakiya iyaro Ana' Bimbala'é silaong sining ana' gurun-Na iya matinulué iya puraé Naobbi sibawa Napiléro nacaui matu iyaro sining arungngé, nasaba Aléna ritu Puwanna sininna puwangngé, enrengngé Arunna sininna arungngé.”

WAHYU 19:14

Tentarana surugaé maccowériwi sibawa makkinnyarangiwi sining anyarang puté, sibawa mappakéyang lénang iya maputé mapaccingngé.

WAHYU 3:21

Mennang iya pakalaé, maélo-Ka palaloi tudang ri kadéra akkarungek-Ku silaong Iyya. Pada-pada muto Iyya pura pakala na makkekkuwangngé tudang silaong Ambo'-Ku ri kadéra akkarungen-Na.

WAHYU 9:7

Tappana iyaro incalé pada-padai riita anyarang iya sadiyaénna untu' mammusu. Ri ulunna engka séuwa iya paitaé pada-pada passigera' ulawengngé. Tappana pada-padai tappa tolinoé.