WAHYU 21:2 - KITTA KAREBA MADECENG

² Nauwitani iyaro kota mapaccingngé, iyanaritu Yérusalém iya mabarué, nonno polé ri Allataala. Iyaro kotaé purani ripassadiya pada-pada séddié botting makkunrai iya ribélo-béloiyé untu' duppaiwi bottimpurané.

WAHYU 21:2 ပူးပေါင်းရင်းမြစ်များ

MAZMUR 87:3

Engkalingai, éh kotana Allataala, gau'-gau' iya mappabengngaé Napowadai passalenna iko:

YESAYA 1:21

Kota iya matinulué riyolo, makkekkuwangngé pada-padani séddié cakkuribang! Riyolo sininna pabbanuwana adélé sibawa malempu, iyakiya makkekkuwangngé naonroiwi pabbuno-pabbunoé.

YESAYA 52:1

Tokkonno, éh Yérusalém, tokkonno! Pakkasse'i atimmu! Pasangngi pakéyang arajammu! Eh Yérusalém, kota iya mapaccingngé, tau najisi'é dé'na nauttama lalo ri gerbammu.

YESAYA 54:5

Pappancajimmu pada-padai lakkaié ri alému, Allataala mapaccinna Israélié iyanaritu Pappassalama'mu. Puwang Iya Pommakuwasaé, iyanaro asen-Na, Aléna Allataala makuwasaiwi sininna linoé.

YESAYA 61:10

Makkedai Yérusalém, “Marennuka nasaba Puwangnge, mariyo-riyoi atikku nasaba Allataala. Pada-pada bottimpurané sibawa makkunraié pakéi bélo-bélo sining magello, makkuwaniro Puwangnge pakkennangekka waju asalamakengngé sibawa apakalangngé.

YESAYA 62:4

Asemmu tenniyana ‘Iya Risalaiyé’, wanuwammu tenniyana ‘Iya Masino-sinoé’. Riteppuko matu, ‘Iya Nasayangngé Allataala’, sibawa wanuwammu riyasengngi, ‘Iya Puraénna Kawing’, saba' naéloriko Puwangnge, pada-padai lakkaié untu' wanuwammu.

YEREMIA 31:23

Puwang Iya Pommakuwasaé, Allataalana Israélié makkeda, “Rékko purani Upatarompo umma'-Ku pada-pada riyolo, riyéngkalingasi matu ri wanuwa Yéhuda sibawa ri désa-désana makkeda tauwé, ‘Tennapodo Puwangnge barakkakiwi bulu-bulu mapaccingngé ri Yérusalém onrong appérumang ripallaingngé untu' Aléna.’

YOHANES 3:29

Botting makkunraié iyanaritu appunnangennai bottimpurané. Sellaona bottimpuranéro banna tettongngi ranrengngi sibawa méngkalingai, sibawa masennangngi rékko naéngkalingai saddanna bottimpurané. Makkuwatoniro iyya. Makkekkuwangngé masennang senna'ka.

2 KORINTUS 11:2

Muddanika lao ri iko, pada-pada muto Allataala muddani lao ri iko. Iko iyanaritu pada-padai séddié ana'dara iya mapaccingngé mupa iya puraé uwajjanciyang untu' ripabbotting sibawa séddié lakkai, iyanaritu Kristus.

IBRANI 11:10

Saba' natajengngi Abraham kota iya narancanaé sibawa napatettongngé Allataala sibawa pandaméng iya masse'é.

IBRANI 11:16

Iyakiya annessana, nauddaningiwi mennang séuwa wanuwa iya lebbi makessingngé, iyanaritu wanuwa ri surugaé. Iyanaro saba'na dé' namasiri Allataala rékko mennang nateppui Aléna Allataala, saba' Allataala pura passadiyai séddi kota untu' mennang.

IBRANI 12:22

Sibalé'na, laoko ri Bulu Sion sibawa kotana Allataala iya tuwoé, iyanaritu Yérusalém iya ri surugaé sibawa massebbu-sebbu malaéka'na.

IBRANI 13:14

Saba' ri linoé dé'gaga onrong iya mannennungengngé untu' idi; sappaki onrong iya maéloé polé.

WAHYU 1:1

Lise'na iyaé kitta'é passalenna aga iya napowadaé Yésus Kristus passalenna sining kajajiyang iya kajajiyangngé matti. Allataala mappaissengengngi lao ri Kristus kuwammengngi nappaitangngi lao ri ata-atanna Allataala aga iya masitta'é harusu kajajiyang. Nasuroi Kristus malaéka'-Na lao ri Yohanés, atan-Na, untu' mappaissengengngi sining kajajiyangngéro lao ri aléna.

WAHYU 1:4

Saudara-saudara iya engkaé ripitué jema' ri daérana Asia! Iyya, Yohanés, mamménasaiko riwérékko barakka sibawa asaléwangeng polé ri Allataala – iyanaritu Aléna iya engkaé, iya engkaénna, sibawa iya engkaénna matteru – kuwaéttopa polé ri iya pitu roh iya engkaé ri yolona kadéra arajanna Allataala,

WAHYU 1:9

Iyya Yohanés, saudaramu iya siputotoé sibawa iko ri laleng anrasa-rasangngé iya napéneddingiyé tungke' iya maccowériyéngngi Kristus. Tahakki manrasa-rasa selaku umma' appunnangen-Na. Ripalika ri Pulo Patmos nasaba uwappallebbangengngi paseng polé ri Allataala, iya napakkasse'é Yésus naolai asabbiyan-Na.

WAHYU 11:2

Iyakiya aja' muukkuru'i seddéna iya ri seddé saliwenna Bolana Allataalaro, saba' iyaro bagiyangngé purani riyabbéréyang lao risining tau iya dé'é naissengngi Puwangngé. Naléjja'-léjja'i matu mennang kota iya mapaccingngéro patappulo duwa uleng ittana.

WAHYU 21:10

Nanakuwasaina Rohna Allataala, sibawa iyaro malaéka'é natiwika ri coppo'na bulu iya matanré senna'é. Najellokenna Yérusalém, kota mapaccingngéro. Iyaro kotaé nonnoi polé ri surugaé, polé ri Allataala,

WAHYU 21:9

Séddi polé ri iya pitu malaéka' iya puraé makkatenningngi sining onrong iya pennoé sibawa iya pitu abala paccappurengngéro laoni ri iyya sibawa makkeda, “Laono mai! Maéloka jellokekko Bottingngé, iyanaritu bainéna Ana' Bimbala'é.”

WAHYU 22:17

Nakkeda Rohna Allataala sibawa Botting Makkunraié, “Laono mai!” Tungke' tau iya méngkalingaéngngi iyaé harusu towi makkeda, “Laono mai!” Niga madekka, sitinajai polé! Sibawa niga iya macinnangiyéngngi, sitinajai mala uwai iya mabbéré atuwonro sibawa cuma-cuma!

WAHYU 22:19

Sibawa rékko nakurangiwi tauwé séuwa polé ri ada-ada botoéwé, Allataala matu kurangiwi towi polé ri tauwéro bagiyanna iya ripowadaé ri laleng kitta'éwé – iyanaritu bagiyanna polé ri aju atuwongngé sibawa polé ri kota mapaccingngéro.

WAHYU 3:12

Tau iya pakalaé, maélo-Ka pancajiwi selaku alliri ri laleng Bola Mapaccinna Allataala-Ku, naonro matu ri onrongngéro mannennungeng. Asenna Allataala-Ku, enrengngé asenna kotana Allataala-Ku – iyanaritu Yérusalém baru iya maéloé nonno polé ri surugaé, polé ri Allataala-Ku – maélo Uwokii ri aléna tauwéro. Makkuwatoro asek-Ku iya mabarué maélo Uwokii ri aléna.