ULANGENG 7:12 - KITTA KAREBA MADECENG

¹² “Rékko mupuriyatiwi iyaro parénta-paréntaé, sibawa pogau'i sibawa matinulu, matinulu towi matu Puwang Allataalamu lao ri assijancing iya Naébbué sibawa iko. Nappaitangngi matu pammasé-Na iya tette'é ri iko, pada-pada iya Najjanciyangngé lao ri toriyolomu.

ULANGENG 7:12 ပူးပေါင်းရင်းမြစ်များ

1 ARUNG-NGARUNG 8:23

namassempajang, “Puwang, Allataalana Israélié! Ri langié iyaré'ga ri linoé dé'gaga iya pada-padangngék-Ko! Murupaiwi jancim-Mu sibawa mappaitangngi pammasé-Mu lao ri umma'-Mu iya matinulué sibawa mapatoé sukku atinna lao ri Iko.

NEHEMIA 1:5

“Oh Puwang Allataala makuwasaé ri surugaé. Idi Allataala Iya Marajaé namangoloki ri idi sibawa penno tau. Tette'ki matinulu sibawa makkatenningngi jancim-Mu lao ri tau iya méloriyék-Ko sibawa turusiyéngngi parénta-Mu.

NEHEMIA 9:32

Oh Allataala, Allataalata iya mawatangngé! Allataala iya battowaé namasero! Matinulu-Ko makkatenningngi sininna assijancingngé; janci-jancim-Mu Murupaiwi sibawa Mupogau'i. Sipongenna arung Asyur tenre'ki lettu makkekkuwangngé, maéga anrasa-rasang ripéneddingi. Sining arutta, imangngé, nabié sibawa sining tomariyoloé, makkuwatoro sining toriyoloé sibawa ra'ya'é, pura manenni manrasa-rasa. Aja' Muwallupaiwi sininna anrasa-rasangngéro! Aja' Muwallupaiwi polé ri paréngngeram-Mu!

MAZMUR 103:18

lao ri tau iya makkatenningngé ri assijancin-Na, sibawa matinulué pogau'i parénta-Na.

MAZMUR 149:9

untu' hukkungngi bangsa-bangsaé nasaba paréntana Allataala. Iyanaro apakalanna umma iya Namaséiyé. Pojiwi Puwangnge!

ASSURENG 15:26

Adanna Puwangnge, “Turusi-Ka mattonget-tongeng, sibawa pogau'i aga iya Muwitaé makessing; accowérini sininna parénta-Ku. Rékko mupogau'i makkuwaéro, dé' Uhukkukko matu sibawa lasa iya Upakennaiyéngngi tau Maséré'é. Iyya'na ritu Puwang iya pajjappaékko.”

YEREMIA 11:5

Rékko napogau' manengngiro mennang, Urupaiwi matu jancik-Ku lao ri toriyolona mennang makkedaé wanuwa iya macommo'é sibawa madécéngngé, iyaro naonroiyé mennang makkekkuwangngé, Uwéréngngi matu mennang.” Mappébalika, “Makessinni, Puwang.”

DANIEL 9:4

Uwakuiwi dosana sininna bangsaku lao ri Puwang Allataalaku. Adakku, “Puwang Allataala, marajaki, na Idi pakalebbiki. Tuli Murupaiwi assijancim-Mu sibawa mappaitangngi pammasé-Mu iya mannennungengngé lao ri mennang iya mamaséiyék-Ko sibawa pogau'i aga iya Muwapparéntangngé.

MIKHA 7:20

Lao ri umma'-Mu, wijanna Abraham sibawa Yakub, Muwappaitangngi matu atinulurem-Mu sibawa pappojim-Mu iya dé'é gaga paggangkannaro pada-pada iya Muwajjanciyangngé lao ri toriyolota riyolo.

LUKAS 1:55

Dé' Nallupaiwi jancinna Puwangngé, namaséiwi Abraham sibawa wijanna lettu mannennungeng.”

ULANGENG 1:8

Iyya, Puwang, pura majjanciyangngi sininna daéraéro lao ri toriyolomu Abraham, Ishak sibawa Yakub enrengngé wija-wijanna mennang. Jaji laono tudangiwi tanaéro.’ ”

ULANGENG 11:13

Jaji turusiwi parénta-parénta iya upalettukengngékko essoéwé; éloriwi Puwang Allataalamu sibawa massompa ri Aléna sibawa sukku tubu nyawamu.

ULANGENG 5:10

Iyakiya Uwappaitangngi pammasé-Ku lao ri massebbu-sebbu assossoreng polé risining tau iya pojiyékka sibawa turusiwi parénta-Ku.

ULANGENG 7:11

Jaji, turusini sininna hukkung iya upalettukengngékko essoéwé.”

ULANGENG 7:9

Engngerangngi makkedaé Puwang Allataalamu iyanaritu séddi-séddinna Allataala, na Aléna Allataala iya matinulué. Puwangnge pennoiwi jancin-Na sibawa mappaitangngi pammasé-Na iya tette'é narapi sisebbu assossoreng lao ri tau iya pojiyéngngi sibawa turusiwi parénta-parénta-Na.