NEHEMIA 8:7 - KITTA KAREBA MADECENG

⁷ Purairo tokkonni mennang sibawa tettong ri onronna tungke'-tungke', na siyagangngaré tau Léwi pakatajangngi Hukkungngéro lao ri mennang. Iyaro sining tau Léwié iyanaritu: Yésua, Bani, Sérébya, Yamin, Akub, Sabetai, Hodia, Maaséya, Kélita, Azarya, Yozabad, Hanan sibawa Pélaya.

NEHEMIA 8:7 ပူးပေါင်းရင်းမြစ်များ

1 ARUNG-NGARUNG 8:14

Purana massempajang, gilinni Arung Salomo lao ri sininna ra'ya' iya tettongngé kuwaro, nainappa naéllaungeng mennang barakka'na Allataala.

2 TAWARIKH 30:22

Iyaro sining tau Léwié makkuwamani accana pimpingngi assompangngé lao ri Puwangnge, angkanna Hizkia pojiwi mennang. Labe'nana 7 esso ittana mennang péneddingiwi inanré polé ri ramé-raméro sibawa makkasuwiyangeng akkarobangeng untu' mattarima kasi lao ri Puwangnge, Allataalana toriyolona,

2 TAWARIKH 35:3

Sining tau Léwi iya puraé ripallaing untu' Puwangnge, sibawa iya mancajiyé guru-gurunna Israélié lolongengngi paréntaéwé polé ri Yosia, “Taroi Petti Assijancinna Puwangnge iya mapaccingngéro ri laleng Bolana Puwang iya napatettongngé Arung Salomo ana' worowanéna Daud. Aja'na mupalétté-létté'i. Tumaningiwi Puwang Allataalamu sibawa bangsa Israélié umma'-Na.

EZRA 8:18

Nasaba akessingeng atinna Allataala, nakirinni lao ri idi Sérébya, séddi tau Léwi iya maccaé polé ri appang Mahli. Nasibawang aléna polé towi ana'-ana'na sibawa silessu-silessurenna, jumellana 18 tau.

NEHEMIA 10:2

Sining imangngé Séraya, Azarya, Yérémia, Pasyhur, Amarya, Malkia, Hatus, Sébanya, Malukh, Harim, Mérémot, Obaja, Daniél, Gineton, Barukh, Mésulam, Abia, Miyamin, Maazya, Bilgai sibawa Sémaya.

NEHEMIA 11:19

Sining panganrowang pintu gerbangngé: Akub, Talmon sibawa sellao-sellaona mennang. Jumellana iya maneng 172 tau.

NEHEMIA 12:33

Sining imang mangoloéwé joppai ri munrinna mennang nanaseppung towi tarompé'é: Azarya, Ezra, Mésulam, Yéhuda, Bényamin, Sémaya sibawa Yérémia. Riyaccowériwi mennang ri Zakharia ana' Yonatan sibawa eppona Sémaya. Siyagangngaré polé ri néné-nénéna iyanaritu: Matanya, Mikha, Zakur polé ri appang Asaf.

NEHEMIA 3:17

Siyagangngaré bagiyanna témbo mangoloéwé napatettongngi sining tau Léwié ri laleng atturu-turusengngéwé: Rérum ana' Bani Hasabya, panguwasana sitengngana Daéra Kéhila. Bagiyang témbo untu' daérana muto. Binui ana' Hénadad, panguwasana sitengngana Daéra Kéhila. Ezer ana' Yésua, panguwasana Mizpa: témbo ri sunna lalengngé ri yolona gudang senjataé. Barukh ana' Zabai: témbo polé ri sunna lalengngé lettu ri sumpang bolana Imang Lompo Elyasib. Mérémot ana' Uria sibawa eppona Hakos: bagiyang témbo polé ri sumpang bolana Elyasib lettu ri cappa bolaéro.

NEHEMIA 8:12

Nanalisuna sininna ra'ya'é untu' manré sibawa ménung enrengngé bagé-bagéi inanréna lao risining tau laingngé. Masennanni mennang nasaba napahanni bettuwanna ribacaé iya naéngkalingaéro mennang.

NEHEMIA 8:4

Tettonni Ezra ri mimbara ajué iya puraé riyébbu untu' apparelluwanna addéppungengngéro. Ri seddé ataunna tettongngi sining tauwéwé: Matica, Séma, Anaya, Uria, Hilkia sibawa Maaséya; na ri seddé abéyona tettongngi: Pédaya, Misaél, Malkia, Hasum, Hasbadana, Zakharia sibawa Mésulam.

NEHEMIA 8:6

Makkedani Ezra, “Pojiwi Puwangnge, Allataala iya battowaé!” Nakkani limanna ra'ya'é matanré-tanré sibawa mappébali, “Aming, aming!” Nainappa mennang suju' sompai Allataala.

NEHEMIA 8:8

Nalémbani mennang Hukkunna Allataalaro tassibagiyang-tassibagiyang enrengngé pakatajangngi angkanna naulléni pahangngi ra'ya'é iyaro ribacaé.

NEHEMIA 9:3

Kira-kira tellu jang ittana, kitta Hukkunna Puwangnge, Allataalana mennang, ribacangeng mennang sibawa tellu jang rappina mangakuiwi dosa-dosana. Purairo suju'ni mennang sibawa sompai Puwangnge, Allataalana.

NEHEMIA 9:4

Kuwaro engka mimbara untu' sining tau Léwié na ri yasé'na tettonni Yésua, Bani, Kadmiél, Sébanya, Buni, Sérébya, Bani sibawa Kénani. Nasibawang sadda macenno massempajanni mennang lao ri Puwang Allataalana.

ANGIMANGENG 10:11

Sininna hukkung iya uwéréngngékko naolaé Musa, harusu'ko mulléi mappagguruwangngi lao ri bangsa Israélié.”

MALEAKHI 2:7

Mémeng kewajibanna sining imangngé untu' mappagguruwangngi iya tongengngé passalek-Ku, Puwang Iya Pommatanré. Lao ri mennang ritu harusu'i makkutana ra'ya'é aga élo-Ku, nasaba mennang ritu sining suro-Ku.

ULANGENG 33:10

Napaggurui mennang umma'-Mu turusiwi sininna parénta-Mu sibawa makkasuwiyangengngi akkarobangengngé ri yasé'na mézba-Mu.