NEHEMIA 8:10 - KITTA KAREBA MADECENG

¹⁰ Lisuno makkekkuwangngé; anréno sibawa énunno sibawa masennang. Abbéréyangngi sibagiyang polé ri inanrému sibawa anggoro'mu lao ri mennang iya akurangengngé. Iyaé essoé, esso ripallaing untu' Puwatta, jaji aja' mumasussa. Asennangeng nawéréngngékko Puwangnge péwatangiko matu.”

NEHEMIA 8:10 ပူးပေါင်းရင်းမြစ်များ

1 ARUNG-NGARUNG 8:66

Ri esso maaruwaé nasuroni Salomo lisu sining tauwéro. Iya manenna mennang pojiwi nainappa lisu ri bolana sibawa ati marennu, nasaba sininna barakka iya puraé nabbéréyang Puwangnge lao ri atan-Na Daud sibawa lao ri bangsa Israélié umma'-Na.

1 TAWARIKH 16:27

Risalipuriwi arajang sibawa alebbireng, bola-Na pennoi akuwasang sibawa ariyo-riyong.

NEHEMIA 8:11

Makkuwatoro sining tau Léwié pattennangngi ra'ya'é sibawa makkeda makkolik-koling, “Aja' mumessé ri esso iya ripallaingngéwé.”

NEHEMIA 8:12

Nanalisuna sininna ra'ya'é untu' manré sibawa ménung enrengngé bagé-bagéi inanréna lao risining tau laingngé. Masennanni mennang nasaba napahanni bettuwanna ribacaé iya naéngkalingaéro mennang.

ESTER 9:19

Iyanaro saba'na tau Yahudi iya monroé ri kota-kota baiccu'é paréngngerangiwi tanggala seppulo eppa uleng Adar selaku esso iya marennué, esso untu' mappésta sibawa sisullé mabbéré hadiya maddupa inanré.

ESTER 9:22

Saba' ri esso-essoénnaro purai mennang nacau sining balinna, angkanna amessénna sibawa apessénna tappinrai mancaji arennung sibawa ariyo-riyong. Rimakkuwannanaro harusu'i mennang naramé-raméi iyaro esso-essoé sibawa pésta manré nenniya sisullé mabbéré inanré sibawa mabbéré sidekka lao ri tau kasiyasié.

MAZMUR 149:2

Ariyo-riyono, éh Israélié nasaba Pappancajimmui; arennuno, éh pabbanuwana Sion nasaba Arummui!

MAZMUR 89:17

Puppu esso mariyo-riyo mennang sibawa tette masse, nasaba akessingemmu.

AMSAL 17:22

Ati iya marennué napadisingiwi watakkalé; ati iya masaraé napoloi sumange'é.

PAKKATOBBA 11:2

Tanengngi modala'mu ri maddupa-rupang dangkangeng; sappano usaha singngéga-égana. Saba' parellui tauwé jaga-jaga, ri wettu dé'napa napakenna abalaé.

PAKKATOBBA 2:24

Dé'gaga iya lebbi makessingngé untu' tolinoé naiya manré, ménungngé sibawa péneddingiwi wassélé jama-jamanna. Mainge'ka makkedaé muwi iyaro pabbérénato Allataala.

PAKKATOBBA 3:13

Makessingeng manekki manré sibawa ménung enrengngé péneddingiwi wassélé jama-jamatta. Iyaro iyanaritu pabbéréna Allataala.

PAKKATOBBA 5:18

Rékko séddié tau tarima asugireng sibawa waramparang polé ri Allataala, naripalalo péneddingiwi asugirengngéro, harusu'i marasa sukkuru sibawa péneddingiwi sininna wassélé jama-jamanna. Iyaro pabbérénato Allataala.

PAKKATOBBA 9:7

Ayo, anréno bawang sibawa marennu, énunni anggoro'mu sibawa mariyo-riyo. Dé' nappotane Allataala, mala Napuwéloi.

ELONG MARAJA 5:1

Laoka ri palla'ku, anri, bottikku, upaddeppungengngi murku sibawa rampa-rampaku; uwanréi sarang wanikku sibawa cani'ku, uwénungngi dadi'ku sibawa uwai anggoro'ku. Manré ménunno, sellao-sellao, énunno gangka mabo' assicintang.

YESAYA 49:5

Ri wettu dé'napa ujaji, naobbika Puwangnge mancaji atan-Na, untu' paddeppungengngi umma Israélié, kuwammengngi nalisu mennang ri Aléna. Puwangnge pancajika ripakalebbi, Allataala iyanaritu awatangekku.

YESAYA 61:10

Makkedai Yérusalém, “Marennuka nasaba Puwangnge, mariyo-riyoi atikku nasaba Allataala. Pada-pada bottimpurané sibawa makkunraié pakéi bélo-bélo sining magello, makkuwaniro Puwangnge pakkennangekka waju asalamakengngé sibawa apakalangngé.

YOEL 2:23

Eh ra'ya' Sion, akkérennuno! Ariyo-riyono sibawa gorano! Nasaba sininna akessingengngé poléi ri Puwang Allataalamu. Ri wettu madduttunna daud-daungngé nawérékko genne bosi. Ri wettu keccé'é Natiri'i bosié, makkuwatoro ri wettu lemmaé pada-pada biyasaé.

ZAKHARIA 14:21

Sininna pancié ri Yérusalém sibawa risininna Yéhuda ripallaingngi matu mancaji appunnangenna Puwang Iya Pommakuwasaé. Pabbanuwa iya makkasuwiyangengngé akkarobangeng napakéi matu untu' masséwong juku pakkasuwiyang. Narékko narapini iyaro wettué, dé'na gaga matu padangkang ri Bolana Puwang Iya Pommakuwasaé.

LUKAS 11:41

Iya engkaé ri laleng mangko'mu sibawa pennémuro, iyanaro harusu' muwabbéréyang lao risining tau kasiyasié. Caraénnaro nallalengi namapaccing maneng matu untu' iko.

2 KORINTUS 8:2

Purani mennang rioji sibawa asukkarakeng-asukkarakeng iya matane'é. Iyakiya ri tengnga-tengngana asukkarakengngéro, marennui mennang sibawa masémpo ati senna'na ri laleng mabbéré sumbangeng untu' tulungngi tau laingngé, namuni kasiyasi senna'i mennang.

FILIPI 3:4

Sitongenna weddikka'sa maddennuwang ri upacara-upacaraéro. Saba' rékko engka séddi tau marasa mappunnai alasang untu' maddennuwang ri upacaraéro iya mallahérengngé, lebbi kessippi iyya.

WAHYU 11:10

Marennui matu pabbanuwana linoé nasaba maténana iya duwa sabbiéro. Naramé-raméiwi matu mennang enrengngé sisulléi matu sikiringeng hadiya, nasaba iya duwa tau nabiéro purani mappapolé maéga passissang lao ri sininna tauwé ri linoé.

1 SAMUEL 25:8

Coba tanai bawanni mennang, pasti napattongeng gau'éro. Rimakkuwannanaro, mamménasaka kuwammengngi ana' buwaku ritarimai sibawa madécéng ri bolamu, nasaba poléki ri esso marajaéwé. Wéréng towi ata-atammué sibawa iyya, Daud, sellao makessimmu, agi-agi manuru cenning atimmu.”