MIKHA 7:4 - KITTA KAREBA MADECENG

⁴ Muwi kaminang makessingngé sibawa kaminang malempué polé ri mennang pada towi alekale maddori iya dé'é nakkéguna. Narapini wettunna nahukkung Allataala umma'-Na pada-pada iya puraé Napparéngngerangeng lao ri mennang naolai nabi-nabin-Na. Momponi makkekkuwangngé akacaungeng ri yelle'na mennang.

MIKHA 7:4 ပူးပေါင်းရင်းမြစ်များ

YESAYA 10:3

Aga matu muwébbu ri esso nahukkummu Allataala? Aga awatangemmu ri wettu napapolé-Na abala polé ri wanuwa iya mabélaé? Kégiko lao méllau tulung matu? Kégiko matu subbui iyaro asugiremmu?

YESAYA 22:5

Mémeng Puwang Iya Pommatanré sibawa Pommakuwasaé pura pattentui iyaé essoé selaku esso akacaungeng, awéwangeng sibawa arocakeng ri Lompo Pakkitangngé. Riruttunni témbo-témbo kotaé. Kelli méllau tulungngé maddaremmeng ri bulu-bulué.

YESAYA 55:13

Aju camaraé sulléiwi matu alekale maddorié, tanet-taneng bungaé sulléiwi alekale'é. Kajajiyangngi iyaro kuwammengngi naripakalabba-Ka; selaku tanrang mannennungeng iya dé'é nateddéng.”

YEREMIA 10:15

Iyaro barahala-barahalaé dé' angke'na, sipato'i riyéllé-kéllé sibawa ripakatuna. Rékko narapini wettunna binasai matu mennang.

YEREMIA 11:23

Purani upattentu wettunna untu' papoléi abalaé ri yasé'na sining tau Anatot-é, sibawa rékko narapii wettu pahukkungenna mennanro, dé' muwi séddi tau leppe.”

YEREMIA 46:21

Mala prajuri-prajuri naséwaé dé' pakkullénna pada-padai ana' saping iya macommo senna'é. Dé' naulléi mennang mattahang. Balé' manengngi mennang nalari kuwammengngi nasalama. Esso pahukkungengngé untu' mennang narapini; wettunnana mennang nakenna abala.

YEREMIA 8:12

Eh umma'-Ku, harusu'ko masiri nasaba purai mupogau' sininna iya matunaéro! Iyakiya maompe rupako sibawa dé' muwissengngi masiri. Rimakkuwannanaro sempé'ko matu pada-pada tau laing iya sempé'énna; cappuni curitamu rékko Uhukkukko. Iyya, Puwang, pura mabbicara.

YEHEZKIEL 2:6

Iyakiya iko, éh tolino dé'é namannennungeng, aja' mumétau lao risining parronta'éro, iyaré'ga lao ri muwi aga iya napowadaé mennang. Naéwako matu mennang sibawa napakatunako, angkanna samannako tuwo ri yelle'na dokkéngngé. Namuni makkuwaro, aja' mumétau.

YEHEZKIEL 28:24

Makkedai Puwangnge, “Wanuwa-wanuwa sideppému iya puraé pakatunai Israélié, dé'na namaddupa dori iya peddiriyéngngi Israélié. Mainge'i matu mennang makkedaé Iyya'na ritu Puwang Iya Pommatanré.”

AMOS 8:2

Makkutanai Puwangnge, “Aga muwita, Amos?” Mappébalika, “Séddi baka iya mallise'é buwa-buwa iya matasa'é.” Makkedai Puwangnge, “Matasa'ni wettunna untu' umma'-Ku Israélié. Dé'na Upinrai rancana-Ku sibawa pasti uhukkungngi matu mennang.

NAHUM 1:10

Ritunuko matu pada-pada daramé iya marakkoé pada-pada alekale maddori iya sialu-alué.

LUKAS 21:25

“Paitai matu tanra-tanrangngé ri mata essoé, kétengngé sibawa sining wéttowingngé. Ri linoé, métaui matu bangsa-bangsaé sibawa malippunna moloiwi oni-onié nenniya bombanna tasi'é.

IBRANI 6:8

Iyakiya rékko iyaro tanaé powassélé'i ariya sibawa aju-kajungngé maddorié, iyaro tanaé dé'na gaga gunana sibawa natanroiwi matu matti Allataala sibawa angkanna ritunui matu gangka cappu.