MIKHA 2:12 - KITTA KAREBA MADECENG

¹² Makkedasi Puwangnge, “Eh umma Israél iya nasésaé mupa! Pasti Upaddeppungekko matu sibawa Upasséddi pada-pada bimbala iya lisué ri wakkéna. Pada-pada padang wella iya pennoé sibawa bimbala, makkuwatoniro wanuwammu pennosi matu sibawa maéga tau.

MIKHA 2:12 ပူးပေါင်းရင်းမြစ်များ

YESAYA 11:11

Ri essoéro siseppi napakéi matu akuwasanna Puwangnge sibawa tiwii lisu umma'-Na iya nasésaé ri Asyur sibawa Maséré, ri wanuwa-wanuwa Patros, Sudan sibawa Elam, ri Babél, Hamat sibawa pulo-pulo iya mabélaé.

YESAYA 27:12

Ri wettuéro napadeppungengngi matu Puwangnge bangsa-Na tasséddi-séddi polé ri Salo Efrat lettu ri pakkasésénna Maséré. Napallaingngi matu mennang pada-pada tau pallaingngéngngi gandongngé polé ri awanna.

YESAYA 34:6

Pennoi matu dara peddanna Puwangnge nenniya penno sibawa lunra'na mennang, pada-pada darana nenniya lunra'na olokolo akkarobangengngé. Saba' Puwangnge passadiyai akkarobangengngé ri Bozra, sibawa pakangka abbunowang battowa ri tana Edom.

YESAYA 5:17

Ri ruttungeng kotaé ana' bémbé'é sibawa bimbala'é mabbellai matu sibawa dé' naakurangeng inanré.

YEREMIA 23:3

Iyakiya sésa-sésana umma'-Ku Upaddeppungengngi polé ri wanuwa-wanuwa onronna mennang Upali. Utiwii matu mennang lisu ri tana ancajingenna mennang sibawa wija-wijanna tattambai matu maéga.

YEREMIA 3:18

Masséddiwi matu Israélié sibawa Yéhuda, sibawa silaong lao polé ri wanuwa appalirengngé ri seddé manorang. Lisui matu ri wanuwa iya puraé Uwéréngngi selaku tana manana lao ri toriyolona.”

YEHEZKIEL 34:11

Makkedai Puwang Iya Pommatanré, “Alé-Ku maélo sappai sining bimbala'-Ku sibawa piyarai mennang,

YEHEZKIEL 34:13

Upassui matu mennang polé ri tengngana bangsa-bangsaé sibawa wanuwa-wanuwa laingngé, nainappa Upaddeppungeng sibawa Utiwi ri wanuwanna muto. Uwampii matu mennang risining bulué sibawa risining lompo'na Israélié sibawa Udulungngi mennang lao risining padang wella iya manyamengngé.

YEHEZKIEL 34:22

Iyakiya alé-Ku passalama'i matu sining bimbala'-Ku, kuwammengngi dé'na mennang narigaukeng sibawa mapéddara. Uwadélékiwi sining bimbala'-Ku tasséddi-séddi sibawa pallaingngi iya makessingngé polé ri majaé.

YEHEZKIEL 34:31

Tongeng, iko ritu bimbala makkonrok-Ku iya Uwéréngngé inanré. Iko iyanaritu umma'-Ku, na Iyya Allataalamu. Iyya, Puwang Iya Pommatanré pura mabbicara.”

YEHEZKIEL 36:37

Makkedai Puwang Iya Pommatanré, “Eh bangsa Israélié, Upalalosiko méllau tulung ri Iyya; Utambaiwi matu jumellamu pada-pada bimbala makkonrongngé.

YEHEZKIEL 37:21

Nainappa powadai lao ri mennang makkedaé Iyya, Puwang Iya Pommatanré malai matu sininna bangsa-Ku polé ri wanuwa-wanuwa kégi mennang pura lao. Upaddeppungengngi matu sibawa Utiwii lisu ri wanuwanna muto.

HOSEA 1:11

Bangsa Yéhuda sibawa bangsa Israélié ripasséddiwi matu paimeng. Makkai matu séddi tau pamimping, namabbijai matu mennang sibawa madécéngngi paimeng ri wanuwanna mennang. Tongeng, essona Yizreel mancajiwi matu esso iya battowaé!

AMOS 1:12

Rimakkuwannanaro, kirik-Ka matu api lao ri kota Téman, sibawa tunui gangka cappu sining bénténg Bozra.”

MIKHA 2:13

Utimpa'i matu lalengngé sibawa tiwiko massu polé ri appalirengngé. Murumpa'i matu pintu-pintu gerbangngé nennniya lao sibawa laluwasa. Iyya, Puwang muto, iyanaritu Arummu, na-Upimpikko matu massu.”

MIKHA 4:8

Na iko Yérusalém, onronna Allataala jagaiwi umma'-Na pada-pada pakkampié jagaiwi bimbala makkonronna, lisuko matu mancaji ibukotana akkarungemmu pada-pada pammulanna.

MIKHA 5:7

Tau Israél iya monroé mupa ri yelle'na bangsa-bangsaé padai matu singaé ri tengngana sining olokolo'é ri ale'é iyaré'ga ri tengngana bimbala makkonrongngé ri padang wellaé. Iyaro singaé muttama'i ri tengnga-tengngana bimbala makkonrongngéro nanaléjja'-léjja'i sibawa nasapé'-sapé'i; dé'gaga mulléi paleppe'i iyaro sining bimbala'é.

MIKHA 5:8

Nacaui matu Israélié sining balinna enrengngé mancuru manengngi mennang.

MIKHA 7:14

Oh Puwang, ampii umma'-Mu, umma Mupilé. Monroi mennang massala ri ale' karajaé, ri tengngana tana macommo'é. Leppessanni mennang lolongeng inanré ri padang wellana Basyan sibawa ri Giléad pada-pada riyolo.

MIKHA 7:18

Dé'gaga Allataala pada-padam-Mu, oh Puwang, iya maddampengengngéngngi dosana umma Mupilé iya risésaé. Dé' na untu' mannennungeng macai-Ko; sibalé'na, masennak-Ko mappaitangngi pappojim-Mu iya dé'é gaga paggangkannaro.

ZEFANYA 3:20

Poléi matu wettunna, pabbanuwamu iya tassiya-siyaé Upimpingngi lisu. Uwébbuko tarompo ri sininna linoé, sibawa adécéngemmu Upalisui matu paimeng.” Puwangnge pura mabbicara.