LUKAS 12:32 - KITTA KAREBA MADECENG

³² “Iko iya céddé'mi jumellamu, aja' mumétau! Saba' masennang Ambo'mu mpérékko barakka polé ri Apparéntan-Na.

LUKAS 12:32 ပူးပေါင်းရင်းမြစ်များ

YESAYA 40:11

Pada-padai séddié pakkampi Napiyarai ampi-Na; Aléna paddeppungengngi mennang. Nakokkongngi ana'-ana' bimbala'é, nasibawang alemmang Natinrosiwi sining indo'-Na.

YESAYA 41:14

Adanna Puwangnge, “Aja' mumétau, Israél, namuni baiccu'ko sibawa malemma. Iyya ritu Puwang iya tulungngékko, Iya Pommapaccingngé, Allataalana Israélié iyanaritu Pappassalama'mu.

YESAYA 53:6

Pusa manekki pada-pada bimbala'é, tungke-tungke sappai lalenna muto. Puwangnge pura patakkennai ri aléna jata maneng.

YEREMIA 3:19

Makkedai Puwangnge, “Israélié, macinna-Ka tarimako selaku ana'-Ku, sibawa mpérékko wanuwa iya pasennangiyé, wanuwa iya kaminang makessingngé ri sininna linoé. Macinna-Ka muteppu Ambo', sibawa dé'na mulari polé ri Iyya.

MATIUS 14:27

Iyakiya tappa mappébaliwi Yésus, “Tennakko! Iyya Yésus. Aja' mumétau!”

MATIUS 20:16

Nainappa makkedasi Yésus, “Makkuwa toniro sining tau iya poddimonrié mancaji matu poddiyolo, nasining tau poddiyoloé mancajiwi matu poddimonri.”

MATIUS 25:34

Nainappa makkeda matu iyaro Arungngé lao risining tauwé ri seddé ataun-Na, ‘Laono mai iko iya nabarakkakiyé Ambo'-Ku. Uttama'no ri laleng akkarungeng iya napassadiyangengngékko mappammulai pammulanna linoé.

MATIUS 7:15

“Atike'ko lao ri nabi-nabi palsué. Poléi matu mennang ri iko sibawa mallarikkodo bimbala', iyakiya sitongenna mennang pada-padai asu ale' masekkangngé.

LUKAS 10:21

Iyatoro wettué namarennu Yésus nasaba rikuwasaiwi ri Rohna Allataala. Makkedai Yésus, “Ambo', Puwang iya makuwasaiyéngngi langié sibawa linoé! Mattarima kasi'ka ri Iko nasaba iya manennaro Murahasiyakangngi polé ri tau iya maccaé sibawa mappangissengengngé, iyakiya Muwajjellokengngi lao risining tau iya dé'é namacca. Iyanaro pésennangiwi atinna Ambo'.

YOHANES 18:36

Nakkeda Yésus, “Akkarungek-Ku dé' napolé ri linoéwé. Ebara'na akkarungek-Ku poléi ri linoéwé, sining tauk-Ku méwai matu kuwammengngi na aja' nariyabbéréyak-Ka lao risining panguwasana Yahudié. Iyakiya mémeng akkarungek-Ku dé' napolé ri linoéwé!”

RIWAYA'NA RASUL-RASUL-E 20:28

Sitinajako jagaiwi aléna sibawa jagai towi sininna jema'é iya puraé nabbéréyang Rohna Allataala lao ri iko untu' rijagai, saba' pura riyakkako mancaji jennang ri jema'éro. Sitinajako jagaiwi iyaro jema'na Allataala pada-pada pakkampié jagaiwi bimbala'na, nasaba Allataala pura pancajiwi iyaro jema'é appunnangeng ri Aléna naolai amaténna Ana'-Na.

RIWAYA'NA RASUL-RASUL-E 20:29

Pada-padaénna iyya, pasti poléi matu sining asu ale'é iya masekkangngé ri tengnga-tengngamu. Nasining tau iya mujagaiyéro mancajiwi matu nanréna iyaro sining asu ale'é.

ROMA 6:23

Saba' amaténgngé iyanaritu saronai dosaé; iyakiya atuwong tongengngé iya mannennungengngé sibawa Kristus Yésus Puwatta iyanaritu pabbéré iya nabbéréyangngé Allataala sibawa cuma-cuma.

1 KORINTUS 1:21

Nasaba muwi pékkugi accana rupa tauwé, dé' naulléi missengngi Allataala naolai acca ri aléna. Iyakiya mala nasaba mapanréi Allataala, nanasitujuiwi passalama'i sining tau iya mateppe'é ri Aléna naolai biritta iya riyappallebbangengngé iya nangga'é séuwa omong kosong linoé.

FILIPI 2:13

nasaba Allataala muto ritu iya majjamaé ri laleng alému untu' mébbuko réla sibawa mulléi pésennangiwi atinna Allataala.

2 TESALONIKA 1:11

Iyanaro saba'na na idi tuli massempajangekko. Massempajakki kuwammengngi Allataala pancajiko sitinaja untu' tuwo situru élo-Na, untu' iyanaro mobbiko. Tennapodo Allataala, nasibawang akuwasan-Na, pennoiwi cinna-Na untu' pogau'i madécéngngé, sibawa passukkui sininna jama-jamang iya mupogau'é nasaba mateppe'ko lao ri Kristus.

2 TESALONIKA 1:5

Purai mupéneddingi anrasa-rasangngé nasaba Lino Baruna Allataala, nariyangga'ko matu sitinaja muttama ri lalenna. Kuwaniyé manessa pékkugi adélé'na apettunna Allataala.

IBRANI 12:28

Rimakkuwannanaro, sitinajaki mattarima kasi lao ri Allataala, nasaba tarimaki polé ri Aléna séuwa akkarungeng iya dé'é nawedding taggoccang. Sitinajaki mattarima kasi sibawa massompa ri Allataala sibawa mappakalebbi enrengngé métau, situru cara iya naéloriyé muto Allataala.

YAKOBUS 2:5

Engngerangngi, Saudara-saudara iya ripojiyé! Tau iya nangga'é kasiyasi linoéwé, napiléi Allataala untu' mancaji sining tau iya sugié ri laleng teppe'. Iyaro sining tauwé mancajiwi matu anggota umma'na Allataala pada-pada iya najjanciyangngé Allataala lao ri tau iya mamaséiyéngngi Aléna.

2 PETRUS 1:11

Nanallalengiro riwérékko matu ha' penno untu' muttama ri Akkarungeng mannennungengngé iya polé ri Puwangngé sibawa Arung Pappassala'ta Yésus Kristus.

WAHYU 1:6

enrengngé pancajiki séddi bangsa banna imang-ngimang, iya tumaningiyéngngi Allataala, Ambo'-Na. Yésus Kristus ritu iya marajaé enrengngé makuwasa lettu mannennungeng. Aming!

WAHYU 22:5

Dé' matu mennang napparelluwang lampu iyaré'ga cahaya mata esso, saba' dé'na gaga wenni, sibawa aléna Puwang Allataala tajangiwi matu mennang. Mapparéntai matu mennang selaku arung lettu mannennungeng.