LUKAS 11:41 - KITTA KAREBA MADECENG

⁴¹ Iya engkaé ri laleng mangko'mu sibawa pennémuro, iyanaro harusu' muwabbéréyang lao risining tau kasiyasié. Caraénnaro nallalengi namapaccing maneng matu untu' iko.

LUKAS 11:41 ပူးပေါင်းရင်းမြစ်များ

MAZMUR 112:9

Natawa-tawai waramparanna, sibawa mabbéréi sidekka lao ri tau kasiyasié; tuli napogau'i iya makessingngé, rimakkuwannanaro makuwasai sibawa ripakalebbi.

MAZMUR 41:1

Untu' pamimping kor. Mazmurna Daud.

AMSAL 14:31

Niga pogau'i makessingngé lao ri tau kasiyasié, napakalebbii Allataala; niga tenre'i tau malemmaé, napakatunai Pappancajinna.

AMSAL 16:6

Tau iya matinulué lao ri Allataala lolongengngi matu paddampeng. Tau iya mateppe'é leppe'i polé ri sininna majaé.

AMSAL 19:17

Tulungngi tau kasiyasié pada muwi mappainreng lao ri Puwangnge; Puwangnge matti mpale'i matu.

DANIEL 4:27

Rimakkuwannanaro sitinajai Puwakku turusiwi pangajana atatta. Aja'na namadosasi Puwakku, iyakiya pogau'i aga iya makessingngé sibawa adélé'é, sibawa amaséiwi tau kasiyasié. Nanallalengiwi tette'i matu masennang Puwakku.”

MATIUS 26:11

Tau kasiyasié tuli engkai ri yelle'mu, iyakiya Iyya dé' utuli sibawakko.

MATIUS 5:42

Rékko engka séuwa naéllau tauwé ri iko, wéréngngi siya. Sibawa aja'to musampéyangngi tau iya maéloé minreng séuwa ri iko.”

MARKUS 7:19

Saba' iya muttama'éro dé' nalalo ri atié, iyakiya laloi ri babuwaé, nainappasi massu.” Nasibawang iyaro ada-adaé napannessai Yésus makkedaé sininna nanré hallala'i.

LUKAS 12:33

Balu'ni appunnangemmu, namuwéréngngi ellinna tau kasiyasié. Ebburengngi alému tase'-tase' iya dé'é nawedding malaung, iyanaritu waramparang ritaroé ri surugaé. Iyaro waramparangngé dé' naulléi teddéng nasaba dé' naulléi pangaé malai sibawa dé' naulléi solangi karat.

LUKAS 16:9

Nabbicarasi Yésus, adan-Na, “Engkalingai! Pakéi asugirenna linoéwé untu' lolongeng sellao, kuwammengngi riwettu dé'na gaga angke'na asugirenna linoé, ritarimako matu ri onrong appérumang mannennungengngé.

LUKAS 18:22

Naéngkalingana iyaro, makkedani Yésus, “Engka mupa séddi passaleng harusu' mupogau': Balu'ni sininna appunnangemmu, namuwéréngngi ellinna tau kasiyasié, namulolongeng matu waramparang ri surugaé. Purairo laono maccowéri-Ka.”

LUKAS 19:8

Natettonna Zakhéus ri bolana makkeda lao ri Yésus, “Puwang, sitengngana waramparakku maélo uwassidekkang lao ri tau kasiyasié; sibawa nigi-nigi pura ubellé', maéloka mpajai paimeng leppe' wékkaeppa!”

RIWAYA'NA RASUL-RASUL-E 10:15

Iyakiya iyaro saddaé makkedai ri aléna, “Aga pura ripattentu hallala' ri Allataala, aja' muwangga'i iyaro harang.”

RIWAYA'NA RASUL-RASUL-E 11:29

Nasininna iyaro tau maccowériyéngngi Yésus masséddini untu' kiring sumbangeng lao ri saudara-saudara iya monroé ri Yudéa; tungke'-tungke' kiring situru amampungenna.

RIWAYA'NA RASUL-RASUL-E 24:17

Labe'nana siyagangngaré taung dé' uwonro ri Yérusalém, lisuka kuwaro untu' tiwi bantuwang dowi lao ri bangsaku sibawa untu' makkasuwiyangeng akkarobangeng lao ri Allataala.

2 KORINTUS 8:12

Rékko macennikko mabbéré, natarimai matu Allataala iyaro pabbérému situru aga iya engkaé ri iko, dé' nasituru' aga iya dé'é naengka ri iko.

EFESUS 4:28

Tau iya biyasaé ménnau harusu'i mappésau ménnau. Sibalé'na harusu'i majjama kuwammengngi lolongengngi dallé sibawa malempu enrengngé naulléi tulungngi tau iya akurangengngé.

TITUS 1:15

Sininna séuwa-séuwaé mapaccing lao risining tau iya mapaccingngé. Iyakiya lao risining tau iya macarépaé pikkiranna sibawa iya dé'é namateppe', dé' muwi séddi iya mapaccingngé, saba' pikkirang sibawa atinna mennang macarépani!

IBRANI 13:16

Aja' muwallupaiwi pogau'i makessingngé sibawa sisullé situlung, saba' iyanaé sining akkarobangeng iya pésennangiyéngngi atinna Allataala.

IBRANI 6:10

Allataala tenniya Allataala iya dé'é na adélé'. Dé' nallupaiwi aga iya mupogau'é lao ri Aléna, sibawa pammasé iya muwappitangngé lao ri Aléna wettunna mutulung Saudara-saudara siatepperengngé, riyolo sibawa makkekkuwangngé.

YAKOBUS 1:27

Atinulurengngé maggama iya mapaccingngé sibawa tuléngngé manuru' pakkitanna Allataala Ambo'é iyanaritu: tulungngi ana'-ana' biué sibawa janda-janda iya manrasa-rasaé, sibawa jagaiwi alé paimeng kuwammengngi dé' narisolangi ri linoéwé.