KOLOSE 3:4 - KITTA KAREBA MADECENG

⁴ Nah, assalenna atuwommu iya tongengngé iyanaritu Kristus sibawa rékko paitai matti malluru tokko matu silaong aléna ri laleng arajan-Na!

KOLOSE 3:4 ပူးပေါင်းရင်းမြစ်များ

MAZMUR 17:15

Iyakiya iyya uwita-Ko matu, saba' dé' upasala. Ri wettukku moto, ahadérékem-Mu mébbui atikku marennu.

MAZMUR 73:24

Mupimpikka sibawa pangaja, sibawa Mutarimaka matti sibawa alebbireng.

MATIUS 13:43

Na sining tau iya pogau'éngngi élona Allataala mattappai matu pada-pada mata essoé ri laleng Lino Barunna Allataala, Ambo'na mennang. Jaji, rékko maddaucculikko, éngkalingai!”

LUKAS 17:30

Makkuwaniro matu keadaanna wettunna riyappaitang Ana'na Tolinoé.

YOHANES 11:25

Nakkeda Yésus lao ri Marta, “Iyya ritu mabbéré atuwong sibawa paoto'i tau maté. Tau iya mateppe'é ri Iyya, tuwoi matu namuni maténa.

YOHANES 14:3

Purakuna passadiyangekko onrong, lisu-Ka matu duppaiko, kuwammengngi kéga-Ka engka, engka tokko matu kuwaro.

YOHANES 14:6

Nappébali Yésus, “Iyya'na laleng untu' missengngi Allataala sibawa lolongengngi atuwongngé. Dé' séddi tau mulléi lao ri Ambo'é, rékko dé' naola-Ka.

YOHANES 17:24

Ambo', macinna-Ka kuwammengngi mennang iya tabbéréyangngé lao ri Iyya, engkai sibawak-Ka ri onrong Uwonroiyé, kuwammengngi naitai mennang arajak-Ku; iyanaritu arajang iya nawéréngngék-Ka Ambo'é, nasaba namaséi-Ka Ambo'é riwettu dé'napa naripancaji linoé.

YOHANES 20:31

Iyakiya iya manennaé riyokii, kuwammengngi mumateppe makkedaé Yésus iyanaritu Arung Pappassalama'é, Ana'na Allataala, sibawa nasaba teppe' ri aléna, lolongekko atuwong.

RIWAYA'NA RASUL-RASUL-E 3:15

Muwunoi, padahal Aléna ritu assalenna atuwongngé untu' sininna tauwé. Na Allataala pura patuwoi paimeng polé ri amaténgngé. Alétana pura mitai gau'éro.

ROMA 8:18

Sininna anrasa-rasang iya ripéneddingiyé makkekkuwangngé, manuru' pallolongekku, dé' sises-siseng nawedding ripasibanding sibawa alebbireng iya maéloé ripannessa lao ri idi.

ROMA 8:19

Sininna alangngé mattajeng sibawa muddani senna' lao ri wettunna Allataala pannessai ana'-ana'-Na.

1 KORINTUS 1:7

angkanna dé' muakurangeng muwi séddi barakka, ri wettu mutajenna Puwatta Yésus Kristus sibawa naitana sininna tauwé.

1 KORINTUS 15:43

Wettunna rikuburu iyaro tauwé, iyaro tubué majai sibawa malemmai; iyakiya wettunna ripatuwo paimeng, iyanaritu tubu iya magelloé namawatang.

2 KORINTUS 4:17

Na asussang iya dé'é nasiyagaé, iya ripéneddingiyé untu' cinampe', powassélékekki matu séuwa asennangeng iya dé'é padanna sibawa mannennungeng. Iyaro asennangengngé mabélai lebbi battowana rékko ripasibandingngi sibawa iyaro asussangngé.

GALATIA 2:20

Makkekkuwangngé tenniyana iyya tuwo, iyakiya Kristus iya tuwoé ri laleng aléku. Atuwongngéwé iya uwattemmekiyé makkekkuwangngé iyanaritu tuwo ri laleng teppe' lao ri Ana'na Allataala iya mamaséiyékka sibawa iya puraé makkarobangngi Aléna untu' iyya.

FILIPI 3:21

Watakkaléta iya malemmaé sibawa weddingngé ancuru'é, napinrai matu Kristus mancaji pada-pada watakkalé-Na iya malebbié. Weddingngi napogau' iyaro nasaba mappunnaiwi akuwasang untu' patunru'i sini-sininnaé.

1 TESALONIKA 4:17

Purairo, idi iya tuwoé mupa iyaro wettué riyakkaki matu silaong mennang ri laleng ellungngé untu' siruntu Puwangngé ri langié. Nainappaki monro matu silaong Puwangngé lettu mannennungeng.

1 TIMOTIUS 6:14

Turusiwi sininna iyaro paréntaé secara tuléng sibawa dé' cellana narapi ri Essona Puwatta Yésus Kristus polé paimeng.

2 TIMOTIUS 1:1

Timotius, ana'ku iya uwamaséiyé! Iyya, Paulus, mokii iyaé sure'é lao ri iko, sibawa mamménasa tennapodo Allataala Ambo'é sibawa Puwatta Kristus Yésus mabbéré barakka, pammasé sibawa asaléwangeng lao ri iko. Nasaba élona Allataala, riyakkaka mancaji rasulna Kristus Yésus sibawa risuro untu' mabbirittangngi passalenna atuwong iya najjanciyangngé Allataala. Iyaro atuwongngé ritarimai nasaba masséddiki sibawa Kristus Yésus.

2 TIMOTIUS 4:8

Namakkekkuwangngé hadiya apakalangngé tajekka. Ri Esso Kiyame', Puwangngé, Haking iya adélé'éro mabbéréyangngi matu iyaro hadiyaé lao ri iyya, nasaba tuwoka simadécéngeng sibawa Allataala. Na tenniya iyya bawang iya maéloé tarimai iyaro hadiyaé, iyakiya sininnato tauwé iya tajengngéngngi apolénna Puwangngé sibawa muddani senna'.

TITUS 2:13

Makkekkuwangngé mattengngakki tajengngi Esso iya riyamménasaiyéro; ri Essoéro naitai matu linoé arajanna Yésus Kristus, iyanaritu Allataala Pobbatowaé sibawa Arung Pappassalama'ta.

IBRANI 9:28

Makkuwatoro Kristus sisemmi riyakkasuwiyangeng selaku akkarobangeng untu' leddai dosana maéga tau. Maéloi polé paimeng mabbékkaduwanna, tenniya untu' pacceppiwi persoalang dosaé, iyakiya untu' passalama'i sining tau iya tajengngéngngi apolén-Na.

1 PETRUS 1:13

Rimakkuwannanaro, sitinajako sadiya-sadiya. Atike'ko sibawa amménasa manenno ri barakka iya maéloé riwéréngngékko ri wettunna polé Yésus Kristus matti.

1 PETRUS 5:4

Na ri wettunna polé matti iyaro Pakkampi Marajaé, tarimako matu passigera' iya lala'-lala'é, iya dé'é matu nabellang lala'-lala'na.

1 YOHANES 2:28

Jaji, ana'-ana'ku, tette'no tuwo masséddi sibawa Kristus, kuwammengngi na ri Essona poléi, mangoloki Aléna sibawa penno abaraningeng, sibawa dé' tallekke nasaba masiri.

1 YOHANES 3:2

Saudara-saudara iya upojiyé! Idi makkekkuwangngé iyanaritu Ana'-ana'na Allataala, iyakiya keadaatta matti dé'pa namanessa. Iyakiya riissengngi makkedaé rékko poléi Kristus, mancajiki matu pada-pada Aléna, saba' taitai matu ri laleng keadaan-Na iya sitongennaé.

1 YOHANES 5:12

Tau iya mappunnangiyéngngi Ana'na Allataala, nappunnangiwi iyaro atuwongngé; na tau iya dé'é nappunnangiwi Ana'na Allataala, dé' nappunnangiwi iyaro atuwongngé.

YUDAS 1:24

Allataala, iya mulléngngi jagaiwi kuwammengngi nadé' musempé, sibawa mulléngngi tiwiko lao ri yolo-Na iya malebbié sibawa mariyo-riyo temmakkécella.

WAHYU 2:7

Nigi-nigi mulléi maréngkalinga, sitinajai pénessaiwi aga iya napowadaé Rohna Allataala lao ri jema'é! Mennang iya pakalaé, Upalaloi matu manréi buwa polé ri pong atuwongngé iya tuwoé ri laleng Tammenna Allataala.”

WAHYU 22:1

Najjelloreng towi iyaro malaéka'é lao ri iyya salo iya mabbéré atuwong uwaina. Iyaro saloé reppe-reppe pada-pada kacaé. Sibawa massolo'i polé ri kadéra arajanna Allataala sibawa Ana' Bimbala'éro,

WAHYU 22:14

Masennangngi sining tau iya sessa'éngngi jumbana gangka mapaccing. Mappunnaiwi mennang ha' manréi buwa polé ri pong atuwongngé enrengngé muttama ri laleng kotaéro lalo ri pintu gerbanna.