ASSURENG 1:7 - KITTA KAREBA MADECENG

⁷ Iyakiya wija-wijanna mennang, iyanaritu sining tau Israélié, makkéana' epponi maéga senna, sibawa jumellana mennang tattambai masitta senna, angkanna pennoni wanuwa Maséré sibawa mennang.

ASSURENG 1:7 ပူးပေါင်းရင်းမြစ်များ

KAJAJIYANG 1:20

Nanakkeda Allataala, “Sitinajai ri laleng uwai maddeppungeng maéga rupanna anu tuwo, sibawa ri elle'é makkaluttureng maéga manu'-manu'.”

KAJAJIYANG 1:28

Nainappa nabarakkakiwi mennang sibawa makkeda, “Akkéana' eppono iya maégaé, kuwammengngi wija-wijammu monroiwi sininna linoé enrengngé makuwasaiwi. Uwérékko tugas murusu'i sining balé, manu'-manu'é, sibawa sininna olokolo laing iya maliyaé.

KAJAJIYANG 12:2

Maélo-Ka mpérékko wija iya maégaé sibawa mancajiwi matu bangsa iya battowaé. Maélo-Ka barakkakiko sibawa mébbui asemmu tarompo, angkammu mancaji matu barakka.

KAJAJIYANG 13:16

Uwérékko matu wija-wija iya maéga senna'é, angkanna dé' muwi séddi tau mulléi bilangngi mennang. Pada-pada dé' naulléi tauwé bilangngi awué ri tanaé, makkuwatoniro wija-wijammu dé' matu nariyullé bilang.

KAJAJIYANG 15:5

Natiwini Puwangnge massu Abram nainappa makkeda ri aléna, “Itai langié, sibawa cobani bilangngi sining wéttowingngé; mappunnaiko matu wija-wija singngéga sining wéttowingngéro.”

KAJAJIYANG 17:16

Maélo-Ka barakkakiwi nanajajiyangngi matu séddi ana' worowané iya maéloé Uwérékko. Ya, maélo-Ka barakkakiwi Sara, namancaji matu indo'na toriyolona bangsa-bangsaé. Ri yelle'na wija-wijanna engka matu arung.”

KAJAJIYANG 22:17

maélo-Ka barakkakiko sibawa maona enrengngé mébbui wija-wijammu singngéga wéttowingngé ri langié sibawa singngéga kessi'é ri wiring tasi'é. Ana' eppomu nacaui matu sining balinna mennang.

KAJAJIYANG 26:22

Nainappa létté polé kuwaro sibawa kali bujung iya matellué. Iya sisengngéwé dé'na nakajajiyang assasangngé. Rimakkuwannanaro, nasenni Ishak iyaro bujungngé “Alaluwasang”. Adanna, “Makkekkuwangngé Puwangnge mpérékki alaluwasang untu' monro ri wanuwaéwé, sibawa mancajiki matu madécéng kuwaé.”

KAJAJIYANG 26:4

Maélo-Ka mpérékko ana' eppo singngéga wéttowingngé ri langié, sibawa sininna daéraéwé maélo-Ka mpéréngngi mennang. Sininna bangsaé ri linoé méllauwi matu ri Iyya kuwammengngi Ubarakkakiwi mennang pada-pada pura Ubarakkakinna wija-wijammu.

KAJAJIYANG 28:14

Wija-wijammu singngégai matu awué ri tanaé. Nalowangiwi matu daérana mennang lao tulili, nanaolako sibawa wija-wijammu, maélo-Ka barakkakiwi sininna bangsaé ri linoé.

KAJAJIYANG 35:11

Nainappa makkedasi Allataala, “Iyya'na Allataala Iya Pommakuwasaé. Sitinajako makkéana' eppo iya maégaé! Namuwabbija-bijangngi matu bangsa-bangsaé sibawa mancaji ambo'na toriyolona sining arungngé.

KAJAJIYANG 46:3

Adanna, “Iyya Allataala, Allataala iya nasompaé ambo'mu. Aja' mumétau untu' lao ri Maséré. Maélo-Ka pancajiwi wija-wijammu bangsa iya battowaé kuwaro.

KAJAJIYANG 47:27

Makkuwaniro sining tau Israélié mattette ri Maséré, ri daéra Gosyén. Sugini mennang sibawa makkéana' eppo maéga kuwaro.

KAJAJIYANG 48:16

Aléna ritu malaéka iya puraé paleppe'ka polé risininna bahayaé. Tennapodo iyaro Allataala barakkakiwi iyaé ana'-ana'é. Tennapodo tuwoi matteru asekku sibawa asenna Abraham nenniya Ishak nasaba iyaé ana'-ana'é! Tennapodo makkéana eppoi mennang, sibawa massossorengngi maéga ri linoé.”

KAJAJIYANG 48:4

Makkedai lao ri iyya, “Uwérékko matu maéga ana' eppo, kuwammengngi wija-wijammu mancajiwi maéga bangsa; maéloka mabbéréyangngi wanuwaéwé lao ri wija-wijammu selaku appunnangenna mennang untu' mannennungeng.”

KAJAJIYANG 9:1

Nabarakkakini Allataala Nuh sibawa ana'-ana'na sibawa makkeda, “Akkéana' eppono iya maégaé, kuwammengngi wija-wijammu monroiwi sininna linoé.

NEHEMIA 9:23

Mupancajiwi wija-wijanna mennang singngéga wéttowingngé ri bitaraé. Muwéréngngi mennang tana untu' naonroi, tana iya puraé Mujanciyangngi néné-nénéna.

MAZMUR 105:24

Puwangnge mébbui umma'-Na tattamba maéga, angkanna lebbi mawatang mennang naiya balinna.

MAZMUR 107:38

Puwangnge mpéréngngi mennang maéga ana', sibawa matterui mabbija-bija olokolo'na.

ASSURENG 1:12

Iyakiya pédé ripanrasa-rasai ri tau Maséré'é, pédé tattambai jumellana tau Israélié, sibawa pédé tassiyai mennang lao risininna wanuwaéro, angkanna métauni tau Maséré'é lao ri mennang.

ASSURENG 12:37

Najoppana tau Israélié sibawa mallaleng polé ri kota Raamses lao ri kota Sukot. Jumellana mennang 600.000 tau, dé' naribilang makkunraié sibawa ana'-ana'é.

ASSURENG 5:5

Iyaro sining tauwé maéga senna'ni jumellana. Namakkekkuwangngé maéloko kuwammengngi mappésauwi mennang majjama!”

YEHEZKIEL 16:7

Uwala uwai nainappa Ubissai daraé polé ri tubummu. Ugoso'i olimu sibawa minnya zaitun. Upawekke'ko pada-pada tanet-taneng iya macommo'é. Tuwoko masitta, madising sibawa matanré, enrengngé mancaji séddi makkunrai lolo. Susummu mammulani maloppo sibawa gemme'mu malampé, iyakiya mallusu-lusuko. Wettuk-Ku lalosi, Uwitani makkedaé narapini wettummu untu' maccanring. Upallebba'i jumbaku ri tubummu iya mallusu-lusué, sibawa Uwajjanciyangngi cinta-Ku lao ri iko. Ya, Usiyo janci akawingeng sibawa iko, namumancaji appunnangek-Ku. Iyya, Puwang Iya Pommatanré pura mabbicara.

RIWAYA'NA RASUL-RASUL-E 13:17

Allataalana bangsa Israélié pura piléi néné-nénéta, sibawa napancajinna bangsaéwé bangsa battowa wettunna mennang monro ri Maséré' selaku topolé-polé. Nainappa nasibawang akuwasanna Allataala iya battowaé tiwii mennang massu polé ri Maséré'.

ULANGENG 10:22

Wettunna néné-nénému lao ri Maséré, jumellana mennang banna pituppulo tau. Iyakiya Puwang Allataalamu pura mébbui jumellamu singngéga wéttowing-wéttowingngé ri langié.”

ULANGENG 26:5

Nainappa ri yolona Puwang Allataalamu, harusu'ko powadai ada-adaéwé: ‘Oh Puwang, néné-nénéku séddiwi tau Aram iya solléé. Natiwii kaluwargana ri Maséré untu' monro kuwaro selaku pangungsi. Wettunna lao kuwaro jumellana mennang céddé bawang, iyakiya mancajiwi bangsa iya battowaé sibawa mawatang.