ANGIMANGENG 17:7 - KITTA KAREBA MADECENG

⁷ Harusu'i tette matinulu bangsa Israélié ri Puwangnge sibawa dé' sises-siseng nawedding maggéré olokolo ri dare'é untu' pakkasuwiyang lao risining jing majaé. Iyaro peraturangngé harusu'i riturusi lettu mannennungeng.

ANGIMANGENG 17:7 ပူးပေါင်းရင်းမြစ်များ

2 TAWARIKH 11:15

Nakkai Yérobéam imang-ngimanna muto untu' mattumani ri onrong-ngonrong assompang barahalaé sibawa sompai sining jingngé enrengngé dato'-dato' saping iya aléna muto mébbui.

MAZMUR 106:37

Nakkarobangengngi mennang ana'-ana'na lao ri barahala-barahala Kanaan.

MAZMUR 106:39

Nasaba sining pangkaukengngéro namancaji najisi'na mennang, sibawa dé' namatinulu lao ri Allataala.

ASSURENG 22:19

Tau iya mallaiyé sibawa olokolo'é harusu'i riyuno.

ASSURENG 22:20

Nigi-nigi makkasuwiyangeng akkarobangeng lao ri déwata-déwata laingngé sangadinna lao ri Iyya, Puwang, harusu'i rihukkung maté.

ASSURENG 27:21

Harun sibawa ana'-ana'na harusu'i murusu'i iyaro lampué mappammulai arawéng lettu ri éléé ri onrokku hadéré, ri saliwenna kaing iya taggattungngé ri yolona Petti Assijancingngé. Iyaro paréntaé harusu'i napogau' untu' mannennungeng tau Israélié sibawa wija-wijanna.”

ASSURENG 32:8

Lésséni mennang polé ri parénta-parénta-Ku. Mébbui mennang dato'-dato' saping polé ri ulaweng ricuwangngé, nainappa sompai sibawa makkasuwiyangeng akkarobangeng lao ri aléna. Adanna mennang, iyanaro déwatana iya tiwiéngngi massu polé ri Maséré.

ASSURENG 34:15

Aja' mupakangka assijancing sibawa bangsana wanuwaéro, saba' wettunna mennang massompa sibawa makkasuwiyangeng akkarobangeng lao ri déwata-déwatana, naérako matu, namuwaccowé matu.

YEREMIA 3:1

Makkedai Puwangnge, “Rékko séddié bainé ritelle ri lakkainna, nainappa iyaro makkunraié mancaji bainéna tau laingngé, poro lakkainna dé' nawedding malai paimeng selaku bainéna, saba' iyaro gau'é nasolangiwi iyaé wanuwaé. Iko Israélié, mappunnaino maéga senna canring, masa makkekkuwangngé maéloko lisu lao ri Iyya!

YEHEZKIEL 23:3

Ri wettu malolona, monroi mennang ri Maséré. Kuwaniro mennang ateddéngeng aparawangenna, nainappa mennang mancaji cakkuribang.

YEHEZKIEL 23:8

Matterui bawang maccakkuribang pada-pada iya napogau'é riyolo ri Maséré, kégai ateddéngeng aparawangenna. Sipongeng baiccu'na, purani riyatinroi sibawa rigaukeng selaku cakkuribang.

ANGIMANGENG 17:8

Rékko séddié tau Israélié iyaré'ga tau laing iya monroé mattette ri yelle'na tau Israélié makkasuwiyangeng akkarobangeng ritunu iyaré'ga akkarobangeng laing,

ANGIMANGENG 20:5

alé-Ku hukkungngi, sininna kaluwargana, enrengngé sininna tau iya silaongengngéngngi salai-Ka sibawa sompai Molokh. Dé'na mennang Uwangga'i anggotana umma'-Ku.

ANGIMANGENG 3:17

Tau Israélié dé' sises-siseng nawedding manré lunra iyaré'ga dara. Iyaro peraturangngé untu' mannennungeng sibawa harusu'i naturusi tungke' tau Israélié kégi-kégi monro.

YOHANES 12:31

Narapini wettunna makkekkuwangngé riyadéléki linoé; risulléini panguwasana linoé makkekkuwangngé.

YOHANES 14:30

Dé' namaéga Upowada matu lao ri iko, saba' narapini wettunna panguwasana linoéwé polé. Iyakiya dé' nakuwasaiwi alé-Ku.

1 KORINTUS 10:20

Aga iya riyakkasuwiyangengngé ri onronna akkarobangenna barahalaé dé' nariyakkasuwiyangeng lao ri Allataala, sangadinna lao risining sétangngé. Nadé' umaélo masséddiko sibawa sétangngé.

2 KORINTUS 4:4

Déwata maja iya makuwasaéngngi linoéwé tongkoi pikkiranna sining tau iya dé'é namateppe'ro. Iyanaritu lawa-lawaiwi mennang kuwammengngi mennang dé' naitai tajang polé ri Karéba Madécéngngéro passalenna arajanna Kristus, iya maddapangengngéngngi gambara'na Allataala.

EFESUS 2:2

Iyaro wettué muwaccowériwi sining abiyasanna linoéwé; bettuwanna matinuluko lao ri panguwasana langi marajaé iyanaritu roh iya makuwasaiyéngngi makkekkuwangngé atinna sining tau iya dé'é namatinulu lao ri Allataala.

ULANGENG 31:16

Adanna Puwangnge lao ri Musa, “Macawé'ni ajjalemmu. Matémuna, bangsa Israélié dé' namatinuluna ri Iyya sibawa massakkarengngi assijancing iya Uwébbué sibawa mennang. Nasalaika matu untu' massompa ri déwata-déwataé iya risompaé ri wanuwa iya dé'énna namaitta nauttamakiwi mennang.

ULANGENG 32:17

Makkasuwiyangngi mennang akkarobangeng lao ri roh-roh majaé iya tenniyaé Allataala, lao ri déwata-déwata iya dé'é mennang naissengngi, déwata-déwata baru iya dé'é naétauriwi toriyolona mennang.

WAHYU 9:20

Iyakiya sésana polé ri umma' tolinoé iya dé'é nariyuno risining abalaéro, dé'to namaélo salaiwi pangkaukeng limanna muto mennang. Dé' nappésau mennang massompa risining sétangngé, sibawa barahala-barahala ulawengngé, péra'é, tembagaé, batu sibawa ajué iya dé'é naulléi makkita, iyaré'ga maréngkalinga, iyaré'ga joppa.