2 SAMUEL 4:1 - KITTA KAREBA MADECENG

^1-4 Wija-wijanna Saul iya laingngé iyanaritu Méfibosét, ana' worowanéna Yonatan. Képpangngi sipongenna makkéumuru limattaung, iyanaritu wettunna Saul sibawa Yonatan maté. Saba' wettunna karéba passalenna amaténna mennang lettu polé ri kota Yizreel, indo' pasusunna Méfibosét mépa'i nalari; iyakiya nasaba iyaro makkunraié mapperi-peri senna'i, mabuwangngi iyaro ana'é angkanna mancaji képpang. Wettunna Isybosét ana' worowanéna Saul méngkalingai makkedaé riyunoi Abnér ri Hébron, teddénni sumange'na, sibawa métauni sininna bangsa Israélié. Isybosét mappunnaiwi duwa tau parawira iya mancajiyé kapala pasukang paggasa; iya séddié riyaseng Baana, iya séddiéssi riyaseng Rékhab. Ana'nai mennang Rimon, polé ri Beerot suku Bényamin. (Beerot ribilangngi daéra Bényamin. Pabbanuwa aslinna larini lao ri Gitaim nanaonro kuwaro mappammulai wettuéro.)

2 SAMUEL 4:1 ပူးပေါင်းရင်းမြစ်များ

2 SAMUEL 17:2

Maéloka gasai wettunna poso sibawa koddo sumange'na. Maéloka patassélengngi, angkanna sininna ana' buwana lari. Banna Arung Daud bawang maélo uwuno.

2 SAMUEL 2:8

Pallima tentarana Saul, iyanaritu Abnér ana' Nér, larini silaong Isybosét ana' Saul, lao ri Mahanaim ri liwenna Salo Yordan.

2 SAMUEL 3:27

Lettu'na muwa Abnér ri Hébron, riérani ri Yoab libenréng, ri seddéna pintu gerbangngé, samanna maéloi mabbicara séuwa iya rahasiyaé. Tappa nagajang muni Yoab babuwana Abnér gangka maté. Makkuwaniro Abnér maté riyuno ri Yoab untu' mpale'i abbunowanna lao ri Asaél anrinna.

EZRA 4:4

Nainappa pabbanuwa iya maittaénna monro ri wanuwaéro mappammulani palemmai sumange'na tau Yahudié enrengngé péttauriwi mennang kuwammengngi napappésauwi iyaro appatettongengngé.

NEHEMIA 6:9

Nacobani mennang péttauriki kuwammengngi naripappésau jama-jamangngéro. Massempajakka, “Oh Allataala, péwatangika!”

YESAYA 13:7

Tungke tau napéneddingiwi kapé limanna sibawa ateddéngeng abaraningenna.

YESAYA 35:3

Péwatangiwi lima iya malemmaé, pakkasse'i uttu iya kédo-kédoé.

YEREMIA 50:43

Naéngkalingana birittaéro, dé'ni pakkullénna arung Babél. Ricekké'ni ri pappénedding métaué, sibawa mapeddi pada-pada makkunrai iya maéloé mémmana.

YEREMIA 6:24

Naéngkalingana karébaéro, dé'na pakkullénna pabbanuwana Yérusalém. Nakennani pappénedding métau, sibawa mapeddi pada-pada makkunrai iya maéloé mémmana.

ZEFANYA 3:16

Narapii matu wettunna makkedai matti sining tauwé, “Eh Yérusalém, aja' mumétau sibawa makawa atimmu.