2 SAMUEL 2:3 - KITTA KAREBA MADECENG

³ Makkuwatoro ana' buwana sibawa kaluwargana tungke'-tungke' maccowéni ri Daud, namattette'na mennang ri Hébron sibawa seddéna.

2 SAMUEL 2:3 ပူးပေါင်းရင်းမြစ်များ

1 TAWARIKH 12:23

Wettunna Daud ri Hébron maéga pajuwang iya tallatié masséddi sibawa aléna. Ribantuni Daud ri mennang kuwammengngi weddingngi mancaji arung sulléiwi Saul, situru sibawa jancinna Puwangnge. Jumellana mennang iyanaritu: Polé ri suku Yéhuda: 6.800 tau, sukku sibawa kaliyawo enrengngé bessi. Polé ri suku Siméon: 7.100 tau tallati. Polé ri suku Léwi: 4.600 tau. Ana' buwana Yoyada pamimping wija-wijanna Harun: 3.700 tau. Sumpulolona Zadok, séddiwi pajuwang kallolo iya baranié: 22 tau – iya manenna kepala kaluwarga. Polé ri suku Bényamin (sukunna Arung Saul): 3.000 tau; maégangngéngngi polé ri suku Bényamin tette'i matinulu ri Saul. Polé ri suku Efraim: 20.800 tau tassebbo'é ri laleng appanna tungke'-tungke'. Polé ri suku Manasyé ri seddé yajanna Salo Yordan: 18.000 tau iya rijello'é untu' lanti'i Daud mancaji arung. Polé ri suku Isakhar: 200 pamimping silaong ana' buwana mennang; iyaé sining pamimpingngé maccai pattentui aga iya harusu'é napogau' ra'ya' Israélié ri wettu iya teppa'é Polé ri suku Zébulon: 50.000 tau iya maccaé pakéi sininna rupanna senjataé, sibawa sadiya untu' mammusu; mennang iyanaritu sining tau iya matinulué sibawa riyatepperi. Polé ri suku Naftali: 1.000 pamimping silaong 37.000 prajuri iya sukkué sibawa kaliyawo enrengngé bessi. Polé ri suku Dan: 28.600 tau iya tallatié. Polé ri suku Asyer: 40.000 tau iya sadiyaé untu' mammusu. Polé ri suku-suku ri seddé alauna Yordan, iyanaritu Rubén, Gad sibawa sibagiyang suku Manasyé: 120.000 tau iya maccaé pakéi sininna rupanna senjataé.

1 SAMUEL 22:2

Makkuwatoro sining tau ritenre'é, iya mappunnaiyé inreng, sibawa iya marasa dé'é namasennang, iya manenna masséddini sibawa Daud, na Daud mancaji pamimpinna mennang. Jumellana tau maccowériyéngngi Daud engka kira-kira 400 tau.

1 SAMUEL 30:1

Duwangngesso rimunrinna, Daud sibawa ana' buwana lisuni ri kota Ziklag. Wettunna lettu kuwaro, napoléini mennang makkedaé purai nagasa tau Amalé'é bagiyang yattanna wanuwa Yéhuda sibawa gasai Ziklag. Dé' mennang naunoi muwi séddi tau. Iyakiya natunui gangka cappu kotaéro nainappa napatteru joppana mennang sibawa tiwii sining makkunraié, ana'-ana'é sibawa pabbanuwa laingngé. Natawang toni mennang kaluwargana Daud sibawa kaluwargana ana' buwana, muttama'ni iya duwa bainéna Daud, Ahinoam sibawa Abigail. Makkuwamani sarana Daud sibawa ana' buwana, angkanna mammulani mennang teri dé' nappésau-pésau angkanna lappé.