ZEPANYA 3:7 - BIBEL JAMITA NA DENGGAN

⁷ Ning rohangKu ma, “Anggo saonnari pasti pasangapan ni bangsongKi ma Au, jana tangihononna sandok sipaingotKu. Hapengani, mur tu jotjotna do halahi mambaen jahat martimbangkon na salpu.

ZEPANYA 3:7 ပူးပေါင်းရင်းမြစ်များ

PAMUNGKAAN 6:12

Ditatap Debata ma sude tano on jana diida Ia do hajahatanna dibaen madung sude ngolu ni jolma i jahat.

2 JUJUR TAON 33:11

Jadi diparo Tuhan ma angka panglima ni tentara Asur laho mangarampas Juda. Ditangkup ma si Manase dohot hait, dirante lalu dioban tu Babel.

JOB 36:10

Disuru Ia do halahi manangihon sipaingotNia lalu manadingkon hajahatanna.

MASMUR 32:8

Didok Tuhan, “Hupatuduhon pe dalan sibolusonmu. Hutogu pe ho jana Hupaingot.

PODA 19:20

Tangihon ma poda, jana parhagiot ma parsiajaran, anso marbisuk ho.

JESAYA 5:4

Adong dope he ulaning na so Hubaen tu kobun anggurKi? Hape biasi ma angka na mancom batuna i jana nada denggan songon na niarop ni rohaniba?

JESAYA 63:8

PandokNia, “Satutuna do bangsongKu halahi, nada Au gabusan ni halahi.” Gabe dipalua Ia do halahi,

JEREMIA 17:23

Hape nada ra ompumunu i manangihon sanga mamparrohahon sanga aha na Hudok. Jogal do roha ni halahi jana nada ra mangoloi, boti na so targorahon.

JEREMIA 25:5

Disuru halahi do hamu manadingkon parngoluonmunu na jahat i dohot angka parbuatanmunu na gok dosa i anso tarbaen hamu hot maringanan di tano pusako na nilehen ni Tuhan tu hamu dohot tu angka ompumunu songon tano pusako.

JEREMIA 36:3

Betak na ra do halak Juda mantak mambaen na jahat muda dibege halahi taringot tu sude parmaraan na giot dondonkononKu tu halahi. Jadi ampunanKu do dosa dohot hajahatan ni halahi.”

JEREMIA 38:17

Dung i hudok ma tu si Zedekia, songon on do didok Tuhan Na Markuaso i, Debata na nisomba ni halak Israel, “Muda dipasahat ho do dirimu tu angka tentara ni raja Babel i, nada bunuonna ho, jana kota on pe nada tutungonna. Malua do ho dohot dongan sabagasmu.

JEREMIA 6:8

O hamu halak Jerusalem gabe pangajaran ma nian tu hamu sude hasusaan i! Ulang jabat Hutadingkon hamu jana kotamunu i nada diingani halak.”

JEREMIA 7:7

Muda songon i, ra ma Au maringanan rap dohot hamu di inganan on, di tano na Hulehen tu ompungmunu sian na jolo lopus tu salolot-lolotna, luat na dung Hulehen gabe tano pusako di ompungmunu.

JEREMIA 8:6

Madung marsitutu Au manangihon, hape nada tigor rohamunu mandok hata. Umpe adong sahalak sian hamu na manyolsoli pangalahona na jahat i; nada adong na mandok, ‘Aha do hasalaanku?’ Marsitondong dalanna sandiri be do hamu sude songon kudo na mangaroro tu parporangan.

HOSEA 9:9

Na lobi do jahatmunu songon na dung unjung dibaen halak Gibea. Ingoton ni Debata do hasalaanmunu jana uhumanNa hamu hara ni dosamunu i.

ZEPANYA 3:2

Nada ra i manangihon jana nada ra manjagit sipaingot. Nada porsaya tu Tuhan jana nada ra mangido tolong tu Debata.

PANGARATAION 4:16

Jago ma hamu anso ulang jabat mardosa hamu hara ni na mambaen patung di hamu sandiri gabe sisombaon sanga na bia pe rupana, halaklahi sanga dadaboru,

1 TIMOTEUS 1:5

Anggo tujuan ni sipaingot i, i ma laho manyungguli holong ni roha na polin sian roha na ias dohot haporsayaan na tutu situtu.

2 PETRUS 3:9

Nada tarlambat Debata mangalehen sanga aha na nijanjihonNia songon na nipikiran ni deba halak. Tapi sobar do Ia paadop-adop hamu, angke sahalak pe nada dihagioti Ia mago. GiotNia ulang so muba nian sude roha ni jolma sian angka dosana be.