ZEPANYA 3:4 - BIBEL JAMITA NA DENGGAN

⁴ Nada adong idaon tanggung jawab ni angka panurirang ni halahi jana panghianat do halahi. Angka malim na manghodari na badia, jana mamparmayam-mayamkon tona.

ZEPANYA 3:4 ပူးပေါင်းရင်းမြစ်များ

JESAYA 9:15

Uluna, i ma bagian hatobangon dohot halak na marsangap; ihurna, i ma angka panurirang na mangalehen angka pangajaran na mangaliluhon!

JEREMIA 23:32

Au Tuhan, giot aloonKu do angka panurirang i na palaluhon angka nipina na gok gabus. Dipalilu halahi do bangsongKu marhite gabus dohot buras ni halahi. Nada Au marsuru angka panurirang i. Nada marguna halahi saotik pe anggo di bangsongKu. Au Tuhan, madung mandok songon i.”

JEREMIA 5:31

Angka panurirang manghatahon gabus jana angka malim mangajarkon hagiotna sambing. Jana i do na diparhagiot ni bangsongKu. Tapi muda ro ari parpudi, aha ma sibaenonmunu?”

JEREMIA 8:10

Patunda ni i na giot pasahatonKu noma ladang ni halahi tu tuan partano na asing, dohot angka dadaboru ni halahi tu halak na asing. Marsijalahi untungna be do halahi sude sian dalan na so patut, na menek dohot na magodang. Salang panurirang pe dohot malim dohot do manggabusi halak.

ANDUNG 2:14

Na niturihon ni angka panurirang tu ho, hum gabus do i jana buras sajo. Paoto-oto hamu do angka hata ni halahi, nada jungada dipatorang halahi dosamunu i, gabe nada dipauba hamu rohamunu. Didokkoni halahi do angka hata gabus na paliluhon hamunu.

JEHESKIEL 22:26

Dilaosi angka malim ni Israel do tona na sian Au, jana ramun dibaen halahi angka barang-barang na dung dibaen hapunjunganKu. Nada adong dibaen halahi parkotian ni na dung dihapunjungkon tu Au dohot na asing sian i. Boti muse nada diajari halahi rayat i laho paasingkon sanga dia na ias dohot na so ias mangihutkon aturan ni ugamo. Nada dipardulihon halahi Ari Sabat. Jadi songon i ma gabe marlayas Au dibaen bangso Israel.

JEHESKIEL 22:6

Sude pamimpin ni Israel mangasahon gogo ni botohonna sandiri do jana sai mamunu jolma.

JEHESKIEL 44:23

Angkon ajarkonon ni angka malim do tu bangsongKu sanga dia angka na ditontuhon gabe hapunjunganKu dohot na so hapunjunganku, dia na ias mangihutkon ugamo dohot na hodar.

HOSEA 9:7

Madung dapot ari panguhuman, hatiha pamaloson tu sandok parbuatan. Taonon ni Israel noma i! Didok hamu, “Na oto do panurirang on. Na rintik do jolma na nirajaan ni tondi on!” Didok hamu pe songon i hara ni gigina do rohamunu tu Au jana dosamunu santak godangna.

MIKA 2:11

Sugari ro sahalak na sai margabus, ‘Paboanku ma hasurirangon tu hamu, taringot tu anggur dohot arak.’ Jadi ia do na patut manyurirangi tu bangso on!”

MIKA 3:11

Anso dapotan hepeng sogok do umbaen na mamarenta angka parkuaso ni kota, angka malim mangajarkon Uhum Ni Tuhan anso dapotan gaji, marjamita angka panurirang anso dapotan hepeng – dung i diambang halahi ma di pihak ni halahi Tuhan i. Didok halahi ma, “Di tonga-tonganta do Tuhan; nada pola ro parmaraan tu hita.”

MALEAKI 1:6

Didok Tuhan Na Markuaso i ma tu angka malim, “Dipasangap anak ma amana, jana dipasangap naposo ma tuanna. Amangmu do Au; biasi nada dipasangap hamu Au? Tuanmunu do Au. biasi nada mabiar hamu mida Au? Dipalayas hamu Au, hape laing puluk muse do hamu manyapai, ‘Bia ma he hami baen palayaskon Ho?’

MALEAKI 2:7

Harana pamangan ni angka malim manjagohon parbinotoan jana dijalahi halak do pangajaran sian pamanganna, harana i do suruan ni Tuhan Na Markuaso.

MALEAKI 2:8

Hape saonnari, madung manyimbil hamu angka malim sian dalan na tutu. Hara ni angka pangajaranmunu, hona sarat do bahat halak gabe mambaen na sala. Diputuskon hamu do parjanjian dohot halak Levi ninna Tuhan Na Markuaso.

MATEUS 7:15

“Jago-jago ma hamu tu angka panurirang pargabus. Songon biri-biri do idaon haroro ni halahi tu hamu, tapi anggo di bagasan satutuna songon sorigala panyoro do halahi.

2 KORINTUS 11:13

Angka rasul na so tutu do i. Angka parkarejo na paoto-oto halak do i na pasuman-sumankon songon rasul ni Kristus.

1 JOHANNES 4:1

Angka dongan na nihaholongan! Ulang ma hamu porsaya tu ganop tondi, tapi uji hamu ma angka tondi i sanga na marharoroan sian Debata do i, harana madung bahat angka panurirang pargabus ro tu portibi on.

HALUMBAAN 19:20

Gabe tartangkup ma binatang i rap dohot panurirang pargabus na pabaen-baen angka tanda hahomangan di jolo ni binatang i. (Angka tanda hahomangan i do dibaen binatang i paoto-otohon angka jolma na mamake tanda ni binatang i dohot angka jolma na manyomba patung ni binatang i.) Jadi didanggurkon ma binatang i dohot panurirang pargabus i mangolu-ngolu tu bagasan laut api na gara-gara dohot barerang.

HAKIM-HAKIM 9:4

Dung i dilehen halahi ma tusia pitu pulu hepeng perak na dibuat sian bagas parsombaan ni Baal-Berit. Dipake si Abimelek ma hepeng i mangupai sarombongan parjahat anso margabung dohot ia,

1 SAMUEL 2:22

Madung matobang situtu si Eli. Sai torus do marpupu dibege ia barita taringot tu pangalaho ni dakdanaknia i maradopkon halak Israel. Diboto si Eli muse do na modom angka anaknia i dohot angka dadaboru na markobas di jolo ni pintu ni Bandar Parmianan Ni Tuhan i.