SURAT NI SI PAULUS TU PARLAGUTAN ROM 8:9 - BIBEL JAMITA NA DENGGAN

⁹ Tapi anggo hamu ale angka dongan, nada mangihutkon bako ni jolma hamu mangolu. Mangihutkon Tondi do hamu mangolu, muda tutu Tondi Ni Debata mangingani dirimunu. Sanga ise na so maruli Tondi Ni Kristus, nada Kristus nampuna ia.

SURAT NI SI PAULUS TU PARLAGUTAN ROM 8:9 ပူးပေါင်းရင်းမြစ်များ

JEHESKIEL 11:19

LehenonKu ma tu halahi roha na imbaru dohot taroktok na imbaru. BuatonKu ma roha ni halahi na songon pir ni batu i jana gontionKu dohot roha na marpangoloion tu Au.

LUKAS 11:13

Haru na bia pe jahatmunu, laing diboto hamu do patupa na denggan tu dakdanakmunu, mur ma hape Ama na di banua ginjang i. Laing na lehenonNia do tondiNia di halak na mangido diSia!”

JOHANNES 14:17

i ma Tondi ni hasintongan. Nada tarjagit portibi on Tondi i, angke nada diida portibi on Ia jana nada ditanda halahi muse. Tapi anggo hamu, ditanda hamu do Tondi i angke rap dohot hamu do Ia tongtong mangolu, jana di bagasan hamu muse do Ia.

JOHANNES 14:23

Ninna Jesus ma mangalusi, “Sanga ise na mangkaholongi Au, ihutkononna do angka pangajaranKu. Haholongan ni Damang ma Ia. Ro ma Damang dohot Au sandiri mandapotkon ia jana maringanan ma Hami rap dohot ia.

JOHANNES 3:34

Sanga ise na nisuru ni Debata, barita sian Debata do dioban Ia, harana madung dilehen Debata TondiNia i, nada hasuhatan bahatna.

JOHANNES 3:6

Dibaen sibuk do na tubu sian sibuk, jana tondi do na tubu sian Tondi.

BAENON NI ANGKA RASUL 16:7

Dung lalu halahi di parbalohan ni Misia dirohahon halahi ma anso masuk nian tu Bitinia, hape dilarang Tondi Ni Jesus do halahi tusi.

SURAT NI SI PAULUS TU PARLAGUTAN ROM 7:5

Angke taran mangolu di bagasan bako ni jolma dope hita, margogo do hagiot ni dosa na ro markite-hite Tona i, na markarejo di bagasan goar-goaran ni pamatangta i, mamparbatuhon hamatean.

SURAT NI SI PAULUS TU PARLAGUTAN ROM 8:1

Saonnari nada adong be siuhumon di halak na mangolu di bagasan Kristus Jesus.

SURAT NI SI PAULUS TU PARLAGUTAN ROM 8:11

Muda Tondi Ni Debata na pangoluhon Jesus sian hamatean i do mangolu di bagasan dirimunu, jadi pangoluonNia muse ma pamatangmunu na ra mate i, songon Kristus na nipangoluNia sian hamatean i, markite-hite TondiNia na mangolu i di bagasan hamu.

SURAT NI SI PAULUS TU PARLAGUTAN ROM 8:2

Harana madung dipalua bako ni Tondi na pangoluhon i au sian bako ni dosa na mamatehon i. Tona Ni Tondi na mangalehen ngolu madung paluahon hamu di bagasan Kristus Jesus sian tona ni dosa dohot hamatean.

1 KORINTUS 15:23

Tapi marguru tu aturanna be do nipangolu halahi: Na parjolo Kristus; dung i angka na dung nampuna ni Kristus di hatiha haroroNia.

1 KORINTUS 3:16

Diboto hamu dehe, na Bagas Ni Debata do hamu? Songon i muse na maringanan do Tondi Ni Debata di hamu?

1 KORINTUS 6:17

Tapi anggo halak na pasada dirina dohot Tuhan, gabe sada ma Tondi Ni Tuhan i dohot tondi ni halakna i.

1 KORINTUS 6:19

Sanga nada he diboto hamu, pamatangmunu do inganan ni Tondi Parbadia i? Sian Debata do pamatangmunu, jana nada hamu nampuna dirimunu.

2 KORINTUS 10:7

Angkon botoonmunu sugari pangalaho na satutuna. Muda dihaposi roha ni sada halak do nampuna ni Kristus ia, dipareso ia ma mangulahi dirinia jana diboto ia ma, hami pe laing nampuna ni Kristus do songon ia.

2 KORINTUS 6:16

Aha ma he pardomuan ni Bagas Ni Debata dohot bagas ni gana-ganaan? Bagas Ni Debata na mangolu i do hita on, Debata sandiri pe didok Ia do, “Maringanan ma Au di tonga-tonga ni halahi, jana mangolu rap dohot halahi. Au ma gabe Debata ni halahi, jana gabe bangsongKu ma halahi.

GALATIA 4:6

Dibaen dakdanak ni Debata do hamu, disuru Debata muse ma Tondi Ni AnakNia i masuk tu bagasan rohanta, i ma Tondi na pio-pio, “Abba, ale Amang.”

GALATIA 5:24

Angka halak na dung gabe nampuna ni Kristus Jesus, madung dimatehon halahi do bakona humani na jat i.

EPESUS 1:13

Laing songon i muse do hamu – hara ni na dung nibegemunu hata hasintongan i, i ma Jamita Na Denggan haluaanmunu i – di bagasan Ia, dung porsaya hamu, madung dimeteraihon hamu markite-hite Tondi Parbadia na nijanjihonNia i.

EPESUS 2:22

Di na mardomu i dohot Kristus, na nipajongjong do hamu rap dohot halak na asing gabe sada Bagas Ni Debata; maringanan do Debata disi dohot TondiNia.

EPESUS 3:17

Hara ni na porsaya i hamu tu Kristus, sai maringanan ma nian Kristus di bagasan rohamunu, jana mur togu ma ngolumunu hara ni holong ni roha na dung marurat di bagasan hamu.

PILIPPI 1:19

angke huboto do, hara ni angka tangiangmunu i dohot hara ni pangurupi ni Tondi Ni Jesus Kristus angkon malua do au.

2 TIMOTEUS 1:14

Mardongan pangurupi ni Tondi Parbadia na maringanan di bagasan hita, angkon jagohononmu ma sadenggan-dengganna angka na mararga na dung dihaporsayahon tu ho.

1 PETRUS 1:11

Ditangkasi halahi do sanga na bia dohot andigan hamamasa ni na nidok ni Tondi Ni Kristus i, na adong di bagasan halahi. Dipaboa Tondi i hian do hatiha i tu halahi taringot tu angka parkancitan na angkon taonon ni Kristus dohot taringot tu hagodanganNia na giot ro dung salpu parkancitanNia i.

1 JOHANNES 3:24

Barang ise na mangoloi angka na niparentahonNia, na maringanan do ia di bagasan Debata, jana Debata di bagasan ia. Jana taboto ma bahaso Debata maringanan di bagasan hita, i ma hara ni Tondi na dung dilehenNia tu hita.

1 JOHANNES 4:13

Dibaen madung dilehen Debata TondiNia tu hita, gabe taboto ma na di bagasan ni Debata do hita, jana Ia di bagasan hita.

1 JOHANNES 4:4

Tapi ale dakdanakku, anggo hamu dakdanak ni Debata do. Madung ditaluhon hamu angka panurirang pargabus i, angke gumogoan dope Tondi na adong di hamu sian tondi na adong di angka jolma na ro sian portibi on.

HALUMBAAN 13:8

Sombaon ni sude jolma na mangolu di ginjang tano on ma binatang i, i ma angka halak na so tarsurat goarna di buku hangoluan ni Anak Ni Biri-biri na dung disambol i, mamungka sian panompaon ni portibi on.

HALUMBAAN 20:15

Sanga ise halak na so adong goarna tarsurat di bagasan buku hangoluan i, diambungkon ma tu bagasan laut api i.